Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Tam pơndăng gơrềng bơh jơnau bơhiàn bol Phariseo dê
7 1 Geh bol Phariseo mơ bàr pe nă cau gơnoar-cih tus bơh Jerusalem, tơrgùm bal gùt dar Kơnràñ; 2 mơ tŭ bol khai gŏ bàr pe nă cau jăt-dờn Kơnràñ dê sào-sa mơ tê bơ̆ê-bơl, hơ̆ lah ờ rào 3 – kơyoa bol Phariseo mơ jơh ală cau Jude prăp jơnau bơhiàn ală cau yau dê, dilah ờ rào tê nền, gen bol khai ờ sào-sa; 4 mơ rê bơh drà, dilah ờ um, gen bol khai ờ sào-sa; mơ bol khai găm prăp rà jơnau ndai: be rào coàn, bơngàn, gri mơ phan kòng – 5 bol Phariseo mơ bol gơnoar-cih lùp Kơnràñ: ‘‘Ñchi gơlơh bol jăt-dờn Đi dê ờ jăt jơnau bơhiàn ală cau yau dê, mơya bol khai sào-sa mơ tê bơ̆-bơl ?” 6 Kơnràñ đơs mơ bol khai: ‘‘Isaia neh đơs ala di ngăn gơrềng bơh bol mê, lah bol cau blăc-să, be neh cih:
‘‘ Làng-bol do dờn-duh Añ mơ sơndồi bơr, mơya nùs bol khai ngài mơ Añ;
7 bol khai duh-khoai Añ lah ờ kuơ, bơh ală jơnau bol khai bơto mìng lah ală jơnau sồr kòn-bơnus dê.”
8 Bol mê lời jơnau sồr-lăm Yàng dê mơ prăp jơnau bơhiàn kòn-bơnus dê.” 9 Kơnràñ đơs mơ bol khai: ‘‘Bol mê chài lơh jơnau sồr-lăm Yàng dê gơs be gời, làng prăp jơnau bơhiàn bol mê dê. 10 Kơyoa Moise neh đơs: ‘‘Mê dờn-duh tĕ bàp mê mơ mè mê”, mơ: ‘‘Cau lơi yal iơh bàp ngŏlah mè in, gen pal kong chơt”; 11 ai bol mê đơs: ‘‘Dilah cau lơi đơs mơ bàp ngŏlah mè: Bơta lơi me bàp rơp dờp-geh bơh dơ añ lah Korban, hơ̆ lah phan pơdơng”, 12 gen bol mê ờ ai khai in lơh chi lơi bàp ngŏlah mè in tai, 13 bol mê neh săng-sơrbì jơnau Yàng dê bơh jơnau bơhiàn mơ bol mê neh tam jào wơl; mơ bol mê lơh rà jơnau ndai ndrờm be hơ̆ sơl.”
Chi lơi lơh bơ̆-bơl cau in ?
14 Kơnràñ hòi tai mpồl làng-bol tus, mơ đơs mơ bol khai: ‘‘Iăt tĕ Añ, ơ jơh ală cau, mơ wă tĕ: 15 Ờ geh chi lơi bơdìh cau mut tam cau, rơgơi lơh bơ̆-bơl cau in; mơya ală bơta lik bơh cau, gen ală bơta hơ̆ lơh bơ̆-bơl cau in !”
17 Tŭ Kơnràñ neh lời mpồl làng-bol, mut tam hìu, gen bol jăt-dờn Khai dê lùp Khai gơrềng bơh jơnau pơniơu hơ̆. 18 Kơnràñ đơs mơ bol khai: ‘‘Bol kòn krung ờ git-wă be hơ̆ ơ ? Bol kòn ờ wă lah jơh ală bơta bơh bơdìh mut tam cau, gen ờ rơgơi lơh bơ̆-bơl cau in, 19 tài bơh gơ ờ mut tam nùs cau mơya tam kơndul mơ lik hơ bơdìh ơ ?”, be hơ̆, Kơnràñ yal-tơlik jơh ală phan sa lah kloh lơm. 20 Kơnràñ đơs tai: ‘‘Bơta lik bơh cau, bơta hơ̆ lơh bơ̆-bơl cau in; 21 kơyoa bơh tam dơlăm, bơh tam nùs cau gơlik ală bơta kơlôi iơh, dri-tơlàr, tung-kơñau, gơsơt cau, 22 bơrnàn, hàm-hà, iơh-bơsăk, blăc-lèo, sơlồng-sơlàng, iơh măt, tràl-sơrbil, pơnhừ-să, thừ nùs: 23 jơh ală bơta iơh hơ̆ lik bơh tam dơlăm mơ lơh bơ̆-bơl cau in.”
III. KƠNRÀÑ JESU
LÒT TAM ALĂ TIAH BƠDÌH GALILEA
Kơnràñ Jesu tơmbời
kòn ùr dùl nă cau ùr Syrophenisi dê
24 Bơh tềng hơ̆, Kơnràñ ñă-ntào lòt tus tam kơnhoàl Tyro mơ Sidon. Khai mut tam dùl nơm hìu mơ ờ kờñ cau lơi in git, mơya Khai ờ rơgơi pơndơp- să. 25 Tŭ hơ̆ mơ, dùl nă cau ùr geh kòn ùr kong huềng bơ̆-bơl lơh, kơno gơrềng bơh Kơnràñ, gen tus tơmbic să dơ jơng Kơnràñ dê. 26 Ùr hơ̆ lah cau Grek, nòi Syrophenisi. Khai dăn mơ Kơnràñ bơtrơh cà bơh kòn ùr khai dê. 27 Kơnràñ đơs mơ khai: ‘‘Lời tĕ oh kòn sa hờm lài; kơyoa ờ di ai bañ oh kòn dê mơ cơm ală so kòn in.” 28 Mơya cau ùr hơ wơl mơ đơs mơ Kơnràñ: ‘‘Ơ Kơnràñ, ngăn ală so kòn hơđơm cơnờng sào krung geh sa ală pet bañ bol kơnòm dê.” 29 Kơnràñ đơs mơ khai: ‘‘Tài bơh jơnau ai đơs hơ̆, ai rê tĕ; cà neh lik rau bơh kòn ùr ai dê.” 30 Tŭ cau ùr rê hìu, khai gŏ kòn ùr bic hơđăng cơnờng mơ cà neh lik rau.
Kơnràñ Jesu tơmbời cau tĭ mơ kloat
31 Kơnràñ lời tai kơnhoàl Tyro, lòt găn Sidon, tus hơ dà-lềng Galilea, mut tam kơnhoàl Dekapoli.
32 Cau cèng tus Kơnràñ in dùl nă cau tĭ mơ kloat, mơ dăn Kơnràñ ơn tê hơđăng khai. 33 Tơlik is khai bơh mpồl làng-bol, Kơnràñ ơn ală nau tê Kơnràñ dê tam trồm tồr khai, mơ ai dà diau lip dơ mpiăt khai, 34 mơ tơngờ hơ trồ, Kơnràñ rơnđơh mơ đơs mơ khai: ‘‘Effetha”, hơ̆ lah: ‘‘Pờ tĕ.” 35 Tŭ hơ̆ mơ, tồr khai geh pờ, mơ che kơt mpiăt khai geh hồ, mơ khai đơs loh-làng. 36 Kơnràñ sồr bol khai bañ yal mơ cau lơi; mơya Kơnràñ sơlơ sồr bol khai, bol khai sơlơ yal-pơnrơ oă rơlau tai. 37 Bol khai ai lơh krơi rơlau gơrềng bơh Kơnràñ mơ đơs: ‘‘ Khai neh lơh niăm jơh ală bơta, Khai lơh ală cau tĭ kơno mơ ală cau kloat đơs !”
