Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Kơnràñ Jesu tus tam Nazareth, bòn tờm Khai dê
6 1 Kơnràñ lik-lòt bơh tềng hơ̆, tus tam bòn tờm Khai dê, mơ bol jăt-dờn Khai dê jăt Khai. 2 Ngai sabbat tus, Kơnràñ sơntờm bơto tam hìu-pơrjum; mơ gal cau iăt gen ai lơh krơi mơ đơs: ‘‘Mbơh mơ cau do geh ală bơta hơ̆ taih, mơ mbe lah bơta jăk-chài geh pà Khai in, mơ ală broă pràn-gơnoar be hơ̆ bơh tê Khai lơh ? 3 Cau do ờ di lah cau lơh broă chi dê, kòn Maria dê, oh mi mơ Jakobe, Jose, Juda mơ Simon ơ ? Mơ ruh-lŏ Khai dê ờ di lah bol cau ơm bal mơ bol hi ơ ?” Mơ bol khai gơtup tìs bơh Khai. 4 Kơnràñ Jesu đơs mơ bol khai: ‘‘Ờ geh cau ala-bơr lơi mơ ờ geh sền-màng, mìng tam bòn tờm Khai dê, tam gơp-jơi Khai dê, mơ tam hìu Khai dê lah ờ lơm.” 5 Tềng hơ̆, Kơnràñ ờ rơgơi lơh broă pràn-gơnoar lơi, mìng ơn tê tơmbời dŭt cau kòp-jê lơm; 6 mơ Khai ai lơh krơi tài bơh bol khai ờ pindờn. Khai lòt bơto làm ală bòn gùt dar.
Kơnràñ Jesu pơyoa bol Jơt Bàr lòt bơto
7 Kơnràñ hòi bol Jơt Bàr tus, mơ sơntờm pơyoa bol khai lòt bàr nă bàr nă, mơ pà bol khai in gơnoar hơđăng ală huềng bơ̆-bơl; 8 mơ bơtăn bol khai bañ cèng chi lơi tŭ lòt gùng, mìng gai jra lơm: ờ bañ, ờ kơldung, ờ priă-jền tam che but, 9 di cù khŏ-joă, mơ ờ di soh bàr blah ào. 10 Mơ Kơnràñ đơs mơ bol khai: ‘‘Bulah tềng lơi, tŭ bol kòn mut tam hìu lơi, gen ơm tĕ tềng hơ̆, jơl tus tŭ bol kòn lik-lòt bơh tềng hơ̆. 11 Tiah lơi ờ wă-rò bol kòn mơ ờ iăt bol kòn, gen tŭ lik bơh nhơ̆, rơtuh tĕ thul bơh dơ jơng bol kòn làng gơs cơng bol khai in.” 12 Bol khai lik-lòt yal-bơto, làng cau in ềng-màl; 13 mơ bol khai bơtrơh rà cà, bong jiờu gal cau kòp-jê in mơ tơmbời bol khai.
Bơtau Herode mơ Kơnràñ Jesu
14 Bơtau Herode kơno; tài bơh sơnđăn Kơnràñ neh tiơng-pơnrơ. Geh cau đơs: ‘‘Joan Baptista neh kis wơl bơh bol cau chơt, gen tàng ală broă pràn-gơnoar lơh broă tam khai.” 15 Geh cau ndai đơs: ‘‘Hơ̆ lah Elia.” Geh cau ndai tai đơs: ‘‘Hơ̆ lah cau ala-bơr, be dùl nă tam bol ala-bơr.” 16 Kơno jơnau hơ̆, Herode đơs : ‘‘Hơ̆ lah Joan mơ añ neh sồr koh bồ, khai neh kis wơl !”
Joan Baptista kong koh bồ
17 Kơyoa să tờm Herode neh sồr kup Joan mơ kơt ơn khai tam hìu jàm, tài bơh Herodia lah bao ùr Philippe dê, bi Herode, kơyoa Herode neh bao mơ ùr hơ̆. 18 Bơh Joan neh đơs mơ Herode: ‘‘Ồng ờ di bao mơ bao ùr bi ồng dê.” 19 Herodia ềng-gơjrañ mơ Joan mơ kờñ gơsơt khai, mơya ờ rơgơi: 20 Bơh git Joan lah cau song-dơpă mơ niăm-goh, Herode ngòt mơ prăp-gàr khai; mơ dơ̆ kơno khai, Herode kơlôi wil-wơl ngăn, mơya kờñ iăt khai. 21 Tŭ ngai lơmpah tus, tòm ngai deh khai dê, Herode yờ sào bol kuang-bàng, bol ăt-bồ ling mơ bol pas-yòm kơnhoàl Galilea dê in; 22 mơ tŭ kòn ùr Herodia dê mut mơ tamya, gen khai neh lơh chờ nùs Herode bal mơ ală cau ñô-sa. Bơtau đơs mơ kòn ùr: ‘‘Dăn tĕ mơ añ bơta lơi ai kờñ, añ rơp pà ai in.” 23 Mơ bơtau sơntơm să oă ngăn mơ khai: ‘‘Bơta lơi ai dăn mơ añ, añ rơp pà ai in, bulah nggùl lơgar añ dê.” 24 Kòn ùr lik, đơs mơ mè khai: ‘‘Ñchi añ dăn ?” Mơ mè khai đơs: ‘‘Bồ Joan Baptista.” 25 Kòn ùr mut mơ, sơrbăc-sơrbăng tus mơ bơtau, dăn mơ đơs: ‘‘Añ kờñ ồng ai mơ añ in bồ Joan Baptista ơn tam preng.” 26 Bơtau moăt-jrùng, mơya tài bơh jơnau sơntơm să mơ tài bơh bol cau ñô-sa bal, gen cau bơtau ờ kờñ pơndăng mơ khai. 27 Tŭ hơ̆ mơ, bơtau sồr cau ling gròng cèng bồ Joan tus. Cau ling gròng lòt, koh bồ Joan tam hìu jàm, 28 mơ cèng bồ Joan ơn tam preng; mơ ai bồ hơ̆ kòn ùr in, mơ kòn ùr ai mè khai in. 29 Kơno jơnau hơ̆, bol jăt-dờn Joan dê tus ai bồc khai mơ ơn bồc tam dùl nơm bơtô.
Kơnràñ Jesu lơh bañ gơs rà dơ̆ dùl
30 Bol dờp-pơyoa pơrjum bal mơ Kơnràñ Jesu, yal wơl Kơnràñ in jơh ală bơta bol khai neh lơh mơ neh bơto. 31 Kơnràñ đơs mơ bol khai: ‘‘Tờm bol kòn pleh tĕ tam anih ngềt-ngơt mơ ơm rơlô dŭt.” Kơyoa geh gal cau lòt-rê mơ bol khai ờ geh tŭ sào-sa. 32 Kơnràñ Jesu mơ bol dờp-pơyoa hào ahò pleh tam tiah ngềt-ngơt.
33 Gal cau gŏ bol khai lòt gen git-wă; mơ bơh jơh ală bòn dờng, cau lòt jơng ntoat tus tềng hơ̆ mơ tus lài mơ bol khai. 34 Lik bơh ahò, Kơnràñ gŏ mpồl làng-bol gal, gen nđàc-sơngit bol khai, bơh bol khai be ală belàt ờ geh cau ê, mơ Kơnràñ sơntờm bơto bol khai rà jơnau. 35 Bơh trồ neh mho rau, bol jăt-dờn Kơnràñ dê tus mơ đơs: ‘‘Tiah do ngềt-ngơt mơ trồ neh mho rau; 36 dăn Đi ai làng-bol in rê, làng bol khai lòt tam ală bòn dêt mơ ală bòn gùt dar blơi phan sa bol khai in.” 37 Hơ wơl, Kơnràñ Jesu đơs mơ bol jăt-dờn: ‘‘Să tờm bol kòn ai tĕ bol khai in sa.” Bol jăt-dờn đơs mơ Kơnràñ: ‘‘Bol kòn pal lòt blơi bàr rơhiăng đong priă bañ mơ ai bol khai in sa ơ ?” 38 Kơnràñ đơs mơ bol jăt-dờn: ‘‘Bol kòn geh nđờ nơm bañ ? Lòt sền tĕ.” Tŭ neh git rau, bol jăt-dờn đơs: ‘‘Prăm nơm bañ mơ bàr nơm ka.” 39 Kơnràñ sồr bol khai ai jơh ală cau nggui jăt mpồl hơđăng ñhơt tơlir. 40 Làng-bol nggui jăt mpồl, bà dùl rơhiăng, bà prăm jơt. 41 Kơnràñ dờp prăm nơm bañ mơ bàr nơm ka, tơngờ hơ trồ, yalniăm, pet bañ mơ ai bol jăt-dờn Khai dê in, làng bol khai yờ dơđăp làng-bol; Kơnràñ krung tampà bàr nơm ka jơh ală cau in. 42 Jơh ală cau sa mơ hờm; 43 mơ cau tơrgùm wơl ală pet bañ mơ ka bềng jơt bàr nơm bài. 44 Ală cau sa bañ lah prăm rơbô nă cau klau.
Kơnràñ Jesu lòt hơđăng dà-lềng
45 Tŭ hơ̆ mơ, Kơnràñ bơklơn bol jăt-dờn Khai dê hào ahò, tiă lài đah bơtĭ ne, hơ Bethsaida, tam tŭ Kơnràñ ai làng-bol in rê. 46 Neh ai làng-bol in rê, Kơnràñ guh hơđăng bơnơm răc dăn. 47 Mho tus, ahò neh ơm tam gùl dà-lềng, mơ dùl nă Kơnràñ lơm ơm hơđăng ù. 48 Gŏ bol jăt-dờn bòl-glar was, bơh geh càl drờl sơlơ̆ mơ bol khai, pơgăp dơ jiờ drơng măng dơ̆ poan, Kơnràñ lòt hơđăng dà-lềng tus mơ bol khai mơ kờñ lòt lài mơ bol khai. 49 Tŭ bol khai gŏ Kơnràñ lòt hơđăng dà-lềng, gen bol khai tồn lah cà tàng nggà; 50 kơyoa jơh ală cau neh gŏø Kơnràñ mơ nrơt-nre. Tŭ hơ̆ mơ, Kơnràñ đơs mơ bol khai: ‘‘Kơ̆ tĕ nùs, Añ do; bañ ngòt !” 51 Kơnràñ hào ahò mơ bol khai, mơ càl ơm ngềt. Bol khai ai lơh crih-crài oă ngăn; 52 kơyoa bol khai neh ờ wă gơrềng bơh bañ, mơya nùs bol khai găm kră-kơldăng.
Kơnràñ Jesu tơmbời gal cau tam Gennesaret
53 Tŭ neh tiă đah bơtĭ ne, Kơnràñ mơ bol jăt-dờn tus hơ tiah Gennesaret mơ guh hơ gah dà. 54 Mơ tŭ bol khai lik bơh ahò, gen làng-bol đal-git mơ Kơnràñ, 55 mơ lòt làm kơnhoàl hơ̆, bol khai sơntờm cèng ală cau kòp-jê tam ală tơrnă tus tềng lơi bol khai kơno Kơnràñ ơm. 56 Mơ tềng lơi Kơnràñ mut, tam ală bòn dêt, ngŏlah ală bòn dờng, ngŏlah ală blàng sre, bol khai krung ơn ală cau kòp-jê tam ală gùng-dà, mơ dăn Kơnràñ ai bol kòp-jê in mìng bư dơ tiăng ào Kơnràñ dê; mơ ală cau lơi bư dơ gơ, gen geh bời.
