Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Cau kong cà lơh tam Gerasa
5 1 Kơnràñ mơ bol jăt-dờn tus đah bơtĭ ne dà-lềng, tam kơnhoàl bol Gerasa. 2 Kơnràñ lik bơh ahò, gen tŭ hơ̆ mơ, bơh brê bồc, geh dùl nă cau kong huềng bơ̆-bơl lơh, tus tìp Khai. 3 Cau do ơm tam brê bồc; mơ ờ geh cau lơi rơgơi căp khai, bulah mơ che sreng, 4 tài bơh khai ờs kong kơt-căp mơ gơsàng mơ che sreng, mơya khai kơltăc che sreng mơ dơrkă gơsàng, mơ ờ geh cau lơi rơgơi ăt-kơryăn khai; 5 măng mơ ngai, khai ơm sùm tam brê bồc mơ tam bơnơm, hòi-nggà mơ ai lŭ còr să tờm. 6 Gŏ Kơnràñ Jesu bơh ngài, khai ntoat tus mơ cùn khoai Kơnràñ, 7 hòi-nggà lơs mơ đơs: ‘‘Ñchi jơnau añ mơ Đi, ơ Jesu, Kòn Yàng Jơnhoa ngăn dê ? Bơh sơnđăn Yàng, añ khoai dăn Đi bañ tơnyăn añ.” 8 Kơyoa bơh Kơnràñ neh đơs mơ khai: ‘‘Ơ huềng bơ̆-bơl, lik tĕ bơh cau do !” 9 Mơ Kơnràñ lùp khai: ‘‘Ñchi sơnđăn mê ?” Khai đơs mơ Kơnràñ: ‘‘Sơnđăn añ lah mpồl ling, tài bơh bol hi gal ngăn.” 10 Khai khoai dăn ngăn mơ Kơnràñ bañ bơtrơh khai lik bơh kơnhoàl hơ̆.
11 Tềng hơ̆, geh dùl mpồl sur gal ngăn găm sa jăt phò bơnơm; 12 bol gơ khoai dăn Kơnràñ mơ đơs: ‘‘Dăn Đi ai bol hi mut tam mpồl sur.” 13 Kơnràñ ai bol gơ in. Bol huềng bơ̆-bơl lik mơ mut tam mpồl sur. Mpồl sur, pơgăp bàr rơbô nơm, bơh kơh bơnơm ntruñ tam dà-lềng, mơ chơt bŭ tam dà-lềng. 14 Bol cau ê sur ntoat dô, mơ yal jơnau tam bòn dờng mơ ală bòn dêt; mơ làng-bol lik sền bơta neh gơlik gơs. 15 Bol khai tus hơ Kơnràñ Jesu; mơ bol khai gŏ cau kong cà lơh ơm nggui, soh phan, bồ-tơngoh ngăc-ngờ, tờm cau do neh kong mpồl cà lơh, gen bol khai rơngòt. 16 Mơ bol cau neh gŏ, gen yal wơl bol khai in mbe jơnau neh gơlik gơs cau kong cà lơh in mơ mpồl sur in. 17 Mơ bol khai sơntờm dăn Kơnràñ lik bơh kơnhoàl ù bol khai dê. 18 Tŭ Kơnràñ hào ahò, gen cau neh kong cà lơh, khoai dăn Kơnràñ ai khai in ơm bal mơ Kơnràñ. 19 Kơnràñ ờ ai khai in, mơya đơs mơ khai: ‘‘Rê tĕ hìu mê dê, tus mơ bol mê dê, mơ yal wơl bol khai in jơh ală bơta Kơnràñ neh lơh mê in, mơ Khai neh nđàc-sơngit mê git nđờ.” 20 Cau hơ̆ lik-lòt mơ sơntờm yal-pơnrơ tam kơnhoàl Dekapoli jơh ală bơta Kơnràñ Jesu neh lơh khai in, mơ jơh ală cau ai lơh krơi.
Kơnràñ Jesu tơmbời cau ùr kong gơhùng mhàm, mơ tơngkis wơl kòn ùr Jairo dê
21 Kơnràñ Jesu hào ahò, tiă wơl đah bơtĭ ne, geh mpồl làng-bol gal tus bal hơ Khai, mơ Khai ơm dơ gah dà-lềng. 22 Geh dùl nă tam bol ăt-bồ hìu-pơrjum dê, sơnđăn lah Jairo, tus, dơ̆ gŏ Kơnràñ, khai blup să dơ jơng Kơnràñ, 23 khoai dăn ngăn Kơnràñ mơ đơs: ‘‘Kòn ùr dêt añ dê mờr chơt rau; dăn Đi tus, ơn tê hơđăng khai, làng khai geh bời mơ kis.” 24 Kơnràñ lik-lòt bal mơ cau hơ̆. Geh mpồl làng-bol gal jăt Khai mơ ntềt Khai.
25 Mơ geh dùl nă cau ùr kong gơhùng mhàm neh jơt bàr sơnăm, 26 neh kong bòl-glar oă ngăn mơ gal cau lơh sơnơm, roh jơh ală phan-bơna khai dê mơ krung ờ kuơ chi lơi, mơya sơlơ kơnjơ̆ rơlau, 27 tŭ khai kơno bơh Kơnràñ Jesu, khai tus tam mpồl làng-bol, ơm bơh ngkời, mơ bư dơ ào Kơnràñ dê; 28 kơyoa khai đơs: ‘‘Dilah añ mìng bư dơ ào Kơnràñ dê, gen añ rơp geh bời.” 29 Tŭ hơ̆ mơ, mhàm khai rañ-rơsơh, mơ khai git să khai neh bời kòp-jê.
* 30 Kơnràñ Jesu git mơ tam să tờm geh pràn-gơnoar lik bơh Khai, gen Khai wơlke hơ mpồl làng-bol mơ đơs: ‘‘Ñcau neh bư dơ ào Añ?” 31 Bol jăt-dờn Khai dê đơs mơ Khai: ‘‘Đi gŏ mpồl làng-bol ntềt Đi mơ Đi găm đơs: ‘‘Ñcau neh bư dơ Añ ?”‘‘ 32 Kơnràñ sền gùt dar, gŏ cau ùr neh lơh bơta hơ̆. 33 Cau ùr rơm-ngòt, git bơta neh gơlik gơs tam khai, gen khai tus cùn khoai dơđăp Kơnràñ, đơs song mơ Khai jơh ală bơta. * 34 Kơnràñ đơs mơ khai: ‘‘Ơ kòn ùr, nùs pindờn ai dê neh tơmbời ai. Lòt tĕ ring-lơngai mơ bời tĕ kòp ai dê.”
35 Tam tŭ Kơnràñ găm đơs, gen geh bol bơh hìu cau ăt-bồ hìu-pơrjum dê tus mơ đơs: ‘‘Kòn ùr ồng neh chơt; ñchi lơh tơmbòl Pôgru tai ?” 36 Mơya Kơnràñ Jesu kơno jơnau cau đơs hơ̆, gen đơs mơ cau ăt-bồ hìu-pơrjum dê: ‘‘Bañ ngòt; mìng pindờn tĕ lơm !” 37 Mơ Kơnràñ ờ ai cau lơi jăt Khai, mìng Petro, Jakobe mơ Joan lah oh Jakobe dê. 38 Bol khai tus hơ hìu cau ăt-bồ hìu-pơrjum dê; mơ Kơnràñ gŏ bơta nggồr-nggàc mơ gal cau ñìm-nggà. 39 Khai mut mơ đơs mơ bol khai: ‘‘Ñchi lơh nggồr-nggàc mơ ñìm-nggà taih ? Oh ùr do ờ chơt, mơya khai bic khai dê.” 40 Bol khai ñŏ-tơnhial Kơnràñ. Mơya lồc tơlik jơh ală cau, Kơnràñ cèng bàp mơ mè oh ùr dê mơ ală cau ơm bal mơ Kơnràñ, mơ Kơnràñ mut tam anih oh ùr ơm; 41 ăt dơ tê oh ùr dê, Kơnràñ đơs mơ khai: ‘‘Talitha, qum !” – mblàng-tơlik lah: ‘‘Ơ oh ùr, Añ đơs mơ ai: Guh tĕ !” – 42 Tŭ hơ̆ mơ, oh ùr guh mơ cơnđoà lòt; bơh khai neh jơt bàr sơnăm. Mơ bol khai ai lơh crih-crài oă ngăn. 43 Kơnràñ bơtăn ngăn bol khai bañ ai cau lơi in git bơta hơ̆, mơ sồr ai oh ùr in sa.
