Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Jơnau pơniơu cau sih gar sơntìl
4 1 Kơnràñ sơntờm bơto tai dơ gah dà-lềng. Geh mpồl làng-bol gal ngăn pơrjum bal tus mơ Khai, tiăn tus Khai pal hào nggui tam ahò tam dà-lềng, mơ jơh mpồl làng-bol ơm dơ gah dà-lềng. 2 Kơnràñ ai ală jơnau pơniơu bơto bol khai rà bơta, mơ tam tŭ bơto, Kơnràñ đơs mơ bol khai: 3 ‘‘Iăt tĕ. Do cau sih gar sơntìl lik-lòt làng sih. 4 Mơ gơlik gơs lah, tam tŭ khai sih, gen geh gar rung dơ gah gùng, mơ ală sềm tus sa gơ. 5 Geh gar rung hơđăng tiah lŭ, tềng hơ̆ ờ geh oă ù, gơ hòn mơ, bơh ờ geh ù jrô; 6 mơya tŭ măt tơngai lik, gơ ñòp, mơ bơh ờ geh rias, gen gơ ro. 7 Geh gar rung tam lò, mơ lò gơhòn gơrềt gơ, mơ gơ ờ gơlik plai. 8 Geh ală gar rung tam ù niăm mơ gơlik plai: gơ hòn, gơ guh mơ gơ lik, gar bà pe jơt, gar bà prau jơt, mơ gar bà dùl rơhiăng.” 9 Mơ Kơnràñ đơs: ‘‘Cau lơi geh tồr làng iăt, gen iăt tĕ.”
Ñchi bơh tài Kơnràñ Jesu ngui jơnau pơniơu ?
10 Tŭ Kơnràñ ơm is dùl nă, gen ală cau ơm gùt dar Khai bal mơ bol Jơt Bàr lùp Khai bơh ală jơnau pơniơu. 11 Kơnràñ đơs mơ bol khai: ‘‘Bơta ndơp-ndơr lơgar Yàng neh ai bol kòn in; mơya mơ bol cau ơm bơdìh, gen tam jơh ală bơta pal ngui jơnau pơniơu,
* 12 làng bol khai sền mơ sền tai mơ ờ gŏ, bol khai iăt mơ iăt tai mơ ờ git-wă, mbài dơ̆ bol khai rê wơl, mơ geh hồ-lời.”
Mblàng jơnau pơniơu cau sih gar sơntìl
* 13 Kơnràñ đơs mơ bol khai: ‘‘Bol kòn ờ git-wă jơnau pơniơu do, gen mbe lơh bol kòn git-wă jơh ală jơnau pơniơu taih ? * 14 Cau sih gar sơntìl lah sih jơnau đơs. 15 Ală cau dơ gah gùng, tềng hơ̆ jơnau đơs geh sih: hơ̆ lah ală cau dơ̆ iăt, gen tŭ hơ̆ mơ, Satan tus mơ tă-tơlik jơnau đơs neh geh sih tam bol khai. 16 Ală cau geh sih hơđăng tiah lŭ: hơ̆ lah ală cau, dơ̆ iăt jơnau đơs, gen tŭ hơ̆ mơ, chờhờp dờp gơ, 17 mơya bol khai ờ geh rias tam bol khai, mìng lah ală cau dùl thoa lơm; tơnơ̆ hơ̆, tŭ gơlik bơta kòl-yăn ngŏlah bơta kup-kuăn tài bơh jơnau đơs, gen gơtup tìs mơ. 18 Ală cau geh sih tam lò: hơ̆ lah ală cau iăt jơnau đơs, 19 mơya ală bơta kơlôi-kơnòl rài do dê, mơ bơta pơrlồm bơta pas-sơm dê, bal mơ ală bơta hàm-kờñ ndai gơrề tam dơlăm, lơh gơrềt jơnau đơs, tàng lơh ờ gơlik plai. 20 Ală cau neh geh sih hơđăng ù niăm: hơ̆ lah ală cau iăt jơnau đơs mơ dờp, mơ lơh gơlik plai: bà pe jơt, bà prau jơt, mơ bà dùl rơhiăng.”
Jơnau pơniơu đèng mơ kơrnăc
21 Kơnràñ đơs mơ bol khai: ‘‘Đèng cèng tus làng geh ơn tam tơrluh ngŏlah tam rồm cơnờng bic sơl ơ ? Ờ di làng geh ơn hơđăng jơng đèng ơ ? 22 Kơyoa ờ geh bơta lơi pơndơp mơ ờ di làng geh pờ-tơlik, krung ờ geh bơta lơi ndơp mơ ờ di làng gơlik loh-làng. 23 Cau lơi geh tồr làng iăt, gen iăt tĕ.”
24 Kơnràñ đơs mơ bol khai: ‘‘Sền ngăc tĕ jơnau bol kòn iăt. Cau rơp was wơl bol kòn in mơ kơrnăc bol kòn neh was, mơ cau rơp ai rơlau tai bol kòn in. 25 Kơyoa cau lơi geh, gen rơp ai cau hơ̆ in tai; mơ cau lơi ờ geh, gen jơh bơta khai geh, krung rơp kong tă-tơlik bơh dơ khai.”
Jơnau pơniơu gar sơntìl gơhòn is
* 26 Kơnràñ đơs: ‘‘Lơgar Yàng krung be dùl nă cau sih gar sơntìl tam ù, 27 măng mơ ngai, cau hơ̆ bic ngŏlah kah, gen gar sơntìl gơcăt bồ măt mơ gơhòn, tam tŭ cau hơ̆ ờ git. 28 Ù gơlik cồng-nha gơ dê, lài jơh tờm kòi, lồc gen nting kòi, lồc gen gar kòi bềng nting. 29 Mơ tŭ cồng-nha neh gơlik gơs rau, gen tŭ hơ̆ mơ, cau ai mơ̆, bơh kàl tơwès neh tus.”
Jơnau pơniơu gar sơbê
30 Kơnràñ đơs: ‘‘Bol he pơndrờm lơgar Yàng mơ bơta lơi, ngŏlah ai jơnau pơniơu lơi làng yal-tơlik gơ taih ? 31 Gơ krung be gar sơbê, tŭ sih tam ù, gơ dêt-rơhền rơlau mơ jơh ală gar sơntìl tam ù; 32 mơya dơ̆ neh sih rau, gen gơ guh mơ gơ gơs dờng rơlau mơ jơh ală biăp, mơ gơ căt ală ntê dờng, tiăn tus sềm tam trồ rơgơi ơm hơđơm mbur gơ.”
Pơndut gơrềng bơh ală jơnau pơniơu
33 Kơnràñ ngui rà jơnau pơniơu be hơ̆ làng yal jơnau đơs bol khai in, jăt be bol khai rơgơi iăt; 34 Kơnràñ ờ đơs chi lơi mơ bol khai mơ ờ ngui jơnau pơniơu. Mơya tŭ ơm is, Khai yal-mblàng jơh ală jơnau bol jăt-dờn Khai dê in.
Kơnràñ Jesu lơh dà-lềng gơs ring-drik
35 Ngai hơ̆, tŭ mho tus, Kơnràñ đơs mơ bol jăt-dờn: ‘‘Bol he tiă lă đah bơtĭ ne.” 36 Lời mpồl làng-bol, bol jăt-dờn pơdiăng Kơnràñ lòt, bơh Khai neh ơm tam ahò rau; mơ jơh ală ahò ndai lòt bal mơ Khai. 37 Mơ gơlik càl rơbut dờng, dà nsừc mut tam ahò, tiăn tus ahò bềng dà. 38 Mơya Kơnràñ găm ơm dơ tiah trơwơl ahò dê, kờl bồ dơ kơrnờl mơ bic; bol jăt-dờn pơrlai Khai mơ đơs mơ Khai: ‘‘Ơ Pôgru, Đi ờ kơlôi bol he chơt ơ ?” 39 Kơnràñ guh bic, lah-pơrhơng rơbut mơ đơs mơ dà-lềng: ‘‘Ngềt tĕ, ơm momŏ tĕ !” Rơbut ơm thit, mơ gơlik gơs ring-drik ngăn. 40 Kơnràñ đơs mơ bol khai: ‘‘Ñchi gơlơh bol kòn bìr-ngòt ? Bol kòn ờ hềt geh nùs pindờn ơ ?” 41 Bol khai rơngòt-rơngơt ngăn mơ đơs bal: ‘‘Be hơ̆, cau do lah ñcau, mơ rơbut mơ dà-lềng krung dờn bơr Khai taih ?”
