Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Kơnràñ Jesu tơmbời cau lơng tê
3 1 Kơnràñ mut tai tam hìu-pơrjum. Tềng hơ̆, geh dùl nă cau lơng tê; 2 bol khai kơp-sền Kơnràñ tơmbời cau hơ̆ tam ngai sabbat ngŏlah ờ, làng yă Khai. 3 Kơnràñ đơs mơ cau geh tê lơng: ‘‘Ñă tĕ, ơm dơ gùl do.” 4 Mơ Kơnràñ đơs mơ bol khai: ‘‘Tam ngai sabbat, geh lơh bơta niăm ngŏlah bơta iơh ? Tơngklàs bơta kis ngŏlah tơnroh ?” Mơya bol khai ơm momŏ. 5 Kơnràñ sền làm bol khai, gơjrañ mơ moăt-jrùng tài bơh nùs bol khai kơldăng, gen Khai đơs mơ cau hơ̆: ‘‘Tơlik tĕ tê.” Khai tơlik, mơ tê khai geh tơmbời. 6 Lik-lòt, bol Phariseo bơyai mơ bal mơ bol tam mpồl Herode tamdră mơ Kơnràñ, mbe lơh làng tơnroh Khai.
Làng-bol lòt jăt Kơnràñ Jesu
7 Kơnràñ Jesu bal mơ bol jăt-dờn Khai dê pleh lòt hơ dà-lềng. Mơ geh mpồl làng-bol gal bơh Galilea jăt Khai, mơ bơh Judea, 8 Jerusalem, Idumea, đah ne Jordano, mơ gùt dar Tyro mơ Sidon, krung geh làng-bol gal ngăn kơno ală bơta Kơnràñ neh lơh, gen tus hơ Khai. 9 Tài bơh mpồl làng-bol, Kơnràñ neh sồr bol jăt-dờn Khai dê rơcăng lài Khai in dùl nơm ahò dêt, mbài làng-bol ntềt Khai. 10 Bơh Khai neh tơmbời gal cau, tàng cau lơi geh bơta kòp-jê krung ràn tus hơ Khai, làng bư dơ Khai. 11 Ai ală huềng bơ̆-bơl, dơ̆ gŏ Khai, gen cùn khoai Khai mơ nggà đơs: ‘‘Đi lah Kòn Yàng dê !” 12 Kơnràñ đơs kràn-cê ngăn mơ bol gơ, bañ lơh cau in git Khai.
Kơnràñ Jesu lơh gơs bol Jơt Bàr
13 Kơnràñ guh hơđăng bơnơm, hòi tus mơ Khai ală cau Khai kờñ, mơ bol hơ̆ tus mơ Khai. 14 Khai lơh gơs bol Jơt Bàr, làng bol hơ̆ ơm bal mơ Khai, mơ làng Khai pơyoa bol hơ̆ lòt yal-bơto 15 bal mơ gơnoar bơtrơh cà: 16 Simon, Khai neh sơnđăn lah Petro; 17 Jakobe kòn Zebede dê mơ Joan lah oh Jakobe dê, Khai neh sơnđăn bol khai lah Boanerges, hơ̆ lah bol Kòn Klau kơnàs dê; 18 mơ Andrea, Philippe, Bartolomeo, Mattheo, Toma, Jakobe kòn Alphe dê, Tadeo, Simon cau Kanaan, 19 mơ Juda Iskariot, lah cau jào Kơnràñ.
Bol jơi-bơtiàn Kơnràñ Jesu dê kơnòl
20 Kơnràñ tus tam hìu; mơ mpồl làng-bol pơrjum bal tai, tiăn tus bol khai ờ rơgơi sào-sa. 21 Bol jơi-bơtiàn Kơnràñ dê kơno be hơ̆, gen lik-lòt kup Khai; bơh bol khai đơs: ‘‘Khai neh mòs-sơnrăng.”
Kơnràñ Jesu mơ cà Beelzebul
22 Ai bol gơnoar-cih mù bơh Jerusalem, gen đơs: ‘‘Khai kong cà Beelzebul lơh” mơ: ‘‘Khai kơnờm dơ bơtau ală cà làng bơtrơh ală cà.” 23 Kơnràñ hòi bol khai tus mơ ngui ală jơnau pơniơu đơs mơ bol khai: ‘‘Mbe lơh Satan rơgơi bơtrơh Satan taih ? 24 Dilah lơgar lơi tamcah is gơ dê, gen lơgar hơ̆ ờ rơgơi ntào kơ̆; 25 dilah hìu lơi tamcah is gơ dê, gen hìu hơ̆ ờ rơgơi ntào kơ̆. 26 Dilah Satan ntào tamdră ndring gơ mơ tamcah is gơ dê, gen gơ ờ rơgơi ntào kơ̆, mơya neh dut-lồi rau. 27 Ờ geh cau lơi rơgơi mut tam hìu cau pràn-kơldăng mơ pìt-phà phan-bơna khai dê, dilah ờ lài kơt-căp cau pràn-kơldăng; tŭ hơ̆ sòng pìt-phà hìu khai dê. 28 Di ngăn, Añ đơs mơ bol mê: Jơh ală jơnau tìs rơp geh hồ kòn sau kòn-bơnus in, mơ jơh ală jơnau tràl-sơrbil bol khai neh đơs krung be hơ̆ sơl; 29 ai cau lơi đơs tràl-sơrbil dơ Yàng Nhơm, gen jơl rài rài ờ geh hồ, mơya cau hơ̆ kòl tìs rài rài.” 30 Tài bơh bol khai neh đơs: ‘‘Khai kong huềng bơ̆-bơl lơh.”
Mè mơ oh mi Kơnràñ Jesu dê
31 Mè mơ ală oh mi Kơnràñ dê tus, ntào hơ bơdìh, sồr cau hòi Khai. 32 Mpồl làng-bol nggui gùt dar Khai, mơ geh cau yal mơ Khai: ‘‘Ne, mè Đi mơ ală oh mi ruh-lŏ Đi găm hơ bơdìh jòi Đi.” 33 Hơ wơl, Kơnràñ đơs mơ bol khai: ‘‘Ñcau lah mè Añ mơ ală oh mi Añ taih ?” 34 Mơ sền làm ală cau nggui gùt dar Khai, Khai đơs: ‘‘Do lah mè Añ mơ ală oh mi Añ. 35 Kơyoa cau lơi lơh jăt nùs-kờñ Yàng dê, gen cau hơ̆ lah oh mi ruh-lŏ Añ mơ mè Añ.”
