Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Kơnràñ Jesu tơmbời cau kuet-kơlte
2 1 Bàr pe ngai tơnơ̆, Kơnràñ mut tai tam Kapharnaum, cau kơno lah Khai ơm tam hìu. 2 Mơ gal cau pơrjum bal tiăn tus ờ geh pah gời tai, tus hơ mpồng krung ờ sơl, mơ Kơnràñ yal-bơto jơnau bol khai in. 3 Cau cèng tus hơ Kơnràñ dùl nă cau kuet-kơlte, geh poan nă cau tùng. 4 Mơ tài bơh mpồl làng-bol, bol khai ờ rơgơi cèng cau hơ̆ tus mơ Kơnràñ, gen bol khai tă rơkàng hìu, tamtoh dơ tiah Kơnràñ ơm, lơh gơs dùl nơm trồm, mơ tơrđùh tơrnă tơmbic cau kuet-kơlte. 5 Tŭ Kơnràñ Jesu gŏ nùs pindờn bol khai dê, gen đơs mơ cau kuet-kơlte: ‘‘Ơ kòn, ală tìs kòn dê geh hồ rau.”
6 Geh bol gơnoar-cih nggui tềng hơ̆, kơlôi tam nùs bol khai lah: 7 ‘‘Ñchi gơlơh cau do đơs be hơ̆ taih ? Khai đơs tràl-sơrbil ! Ñcau mơ rơgơi hồ tìs, dilah ờ mìng Yàng lơm ?” 8 Nùs-tồr Kơnràñ Jesu git mơ bol khai kơlôi tam dơlăm be hơ̆, gen đơs mơ bol khai: ‘‘Ñchi gơlơh bol mê kơlôi ală jơnau hơ̆ tam nùs bol mê taih ? 9 Bơta lơi buơn rơlau taih, đơs mơ cau kuet-kơlte: ‘‘Ală tìs kòn dê geh hồ rau”, ngŏlah đơs: ‘‘Guh tĕ, tui tơrnă kòn dê mơ lòt” ? 10 Mơya làng bol mê git lah, Kòn kòn-bơnus tam tiah geh gơnoar hồ tìs – Kơnràñ đơs mơ cau kuet-kơlte –: 11 Añ đơs mơ kòn: Guh tĕ, tui tơrnă kòn dê mơ rê hìu.” 12 Cau kuet-kơlte guh, tui mơ tơrnă, lòt dơđăp măt jơh ală cau, tiăn tus jơh ală cau ai lơh krơi, tơngklŏ Yàng mơ đơs : ‘‘Bol hi ờ hềt tŭ lơi gŏ be hơ̆ !”
Kơnràñ Jesu hòi Levi
13 Kơnràñ Jesu lik-lòt tai hơ dà-lềng; jơh mpồl làng-bol tus mơ Khai, mơ Khai bơto bol hơ̆. 14 Kơnràñ lòt găn, gŏ Levi kòn Alphe nggui tam hìu dar dia, gen đơs mơ khai: ‘‘Jăt tĕ Añ.” Mơ khai ñă-ntào, jăt Kơnràñ.
Kơnràñ Jesu sào mơ bol tìs-glài
15 Mơ gơlik gơs lah, tŭ Kơnràñ nggui sào tam hìu khai, geh gal cau dar dia mơ cau tìs-glài nggui sào bal mơ Kơnràñ mơ bol jăt-dờn Khai dê; kơyoa geh gal cau, mơ bol khai neh jăt Kơnràñ. 16 Bol gơnoar-cih mpồl Phariseo dê gŏ Kơnràñ sào bal mơ bol tìs-glài mơ bol dar dia, gen đơs mơ bol jăt-dờn Khai dê: ‘‘Ñchi gơlơh Khai sào bal mơ bol dar dia mơ bol tìs-glài taih ?” 17 Kơnràñ Jesu kơno jơnau hơ̆, gen đơs mơ bol khai: ‘‘Bol pràn-kơldăng ờ càng cau lơh sơnơm, mơya bol kòp-jê; Añ ờ tus hòi bol song-dơpă, mơya bol tìs-glài.”
Tam pơndăng gơrềng bơh bơta ơt-sa
18 Bol jăt-dờn Joan dê mơ bol Phariseo ơt-sa. Geh cau tus đơs mơ Kơnràñ: ‘‘Ñchi gơlơh bol jăt-dờn Joan dê mơ bol jăt-dờn mpồl Phariseo dê ơt-sa, mơya bol jăt-dờn Đi dê ờ ơt-sa taih ?” 19 Kơnràñ Jesu đơs mơ bol khai : ‘‘Bol năc ñô-bao rơgơi ơt-sa, tam tŭ cau bơrtơu găm ơm bal mơ bol khai ơ ? Tam tŭ bol khai geh cau bơrtơu găm ơm bal mơ bol khai, gen bol khai ờ rơgơi ơt-sa; 20 Mơya rơp tus ală ngai, tŭ cau bơrtơu kong tă-tơlik bơh bol khai, mơ tŭ hơ̆, bol khai rơp ơt-sa tam ngai hơ̆. 21 Ờ geh cau lơi ai pơnồ biài tơme làng tơmbồr dơ ào klar; di be hơ̆, pơnồ tơmbồr tơme lơh gơrồt wơl ào klar, mơ chi sèt gơlik iơh rơlau. 22 Mơ ờ geh cau lơi tròc tơrnờm pa tam ală nhồng gơltau yau, di be hơ̆, tơrnờm rơp lơh bơcah ală nhồng gơltau, tơrnờm roh mơ ală nhồng gơltau krung roh sơl; mơya tơrnờm pa pal tròc tam ală nhồng gơltau pa.”
Bol jăt-dờn pet nting kòi
23 Mơ gơlik gơs lah, di ngai sabbat, Kơnràñ lòt găn sre kòi, tam tŭ lòt gùng, bol jăt-dờn Khai dê sơntờm pet ală nting kòi. 24 Bol Phariseo đơs mơ Khai: ‘‘Ne, ñchi gơlơh bol khai lơh tam ngai sabbat bơta ờ geh lơh taih ?” 25 Kơnràñ đơs mơ bol khai: ‘‘Bol mê neh ờ tŭ lơi đal bơta Davit neh lơh tŭ khai jal-kờñ mơ jơgloh, khai mơ bol cau ơm bal mơ khai ơ ? 26 Mbe lơi khai neh mut tam hìu Yàng dê, tam rài Abiathar lah cau ăt-bồ bol lơh-yàng dê, mơ sa bañ pơdơng, lah bañ ờ cau lơi geh sa, mơya mìng bol lơh-yàng lơm, mơ khai krung neh pà bol cau ơm bal mơ khai tai ?” 27 Mơ Kơnràñ đơs mơ bol khai: ‘‘Ngai sabbat geh lơh gơs tài bơh kòn-bơnus, mơ ờ di kòn-bơnus tài bơh ngai sabbat; 28 gen tàng, Kòn kòn-bơnus krung lah Kơnràñ ngai sabbat dê.”
