Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơtô bồc soh gời.
Huềng-duh yal-tơnggit.
16 1 Tŭ ngai sabbat neh gơgăn, Maria Magdala, Maria mè Jakobe dê, mơ Salome, blơi bơñà làng tus bong bồc Kơnràñ. 2 Bơh prŭ drim, tŭ măt tơngai rơp lik, ngai sơnrờp tam poh, bol khai tus hơ bơtô bồc. 3 Bol khai đơs ndring gơp: ‘‘Ñcau rơp pơrlă bol he in pơnai lŭ bơh mpồng bơtô bồc taih ?” 4 Dơ̆ tơnggờr sền, bol khai gŏ pơnai lŭ neh pơrlă rau; mơ pơnai lŭ hơ̆ dờng ngăn. 5 Mut tam bơtô bồc, bol khai gŏ cau pơnu nggui đah ma, soh ào bò, mơ bol khai nrơt-ngòt. * 6 Cau hơ̆ đơs mơ bol khai: ‘‘Bañ rơm-ngòt ! Bol ai jòi Jesu Nazareth neh kong tơs dơ chikal. Khai neh guh wơl, Khai ờ tai tềng do; do tiah cau neh ơn Khai. 7 Mơya bol ai lòt tĕ, yal bol jăt-dờn Khai dê mơ Petro in: ‘‘Khai tus tam Galilea lài mơ bol mê. Tềng hơ̆, bol mê rơp gŏ Khai be Khai neh đơs mơ bol mê.”‘‘ * 8 Lik bơh bơtô bồc, bol khai dô; tài bơh bơta rơm să mơ rơngòt lơh gơyơh bol khai, mơ bol khai ờ đơs chi lơi mơ cau, tài bơh bol khai rơngòt.
Kơnràñ Jesu kis wơl mơ tơnggŏ măt
* 9 Kis wơl àng drim ngai sơnrờp tam poh, Kơnràñ tơnggŏ măt lài jơh mơ Maria Magdala, lah cau, bơh dơ khai, Kơnràñ neh bơtrơh poh nơm cà. 10 Khai lòt yal bol neh ơm bal mơ Kơnràñ in, tam tŭ bol khai găm moăt-jrùng mơ ñìm-răc. 11 Dơ̆ bol khai kơno lah Kơnràñ găm kis mơ khai neh gŏ Kơnràñ, gen bol khai ờ pindờn. 12 Tơnơ̆ hơ̆, Kơnràñ neh sơnđio mơ rùp să ndai bàr nă in tam bol khai, găm lòt gùng rê bòn. 13 Bàr nă hơ̆ lòt yal bol ndai in, mơya bol khai krung ờ pindờn.
14 Dut-ndơl, Kơnràñ neh tơnggŏ măt mơ bol Jơt Dùl tam tŭ bol khai găm ơm dơ cơnờng sào, lah-pơrhơng bơta ờ dờn mơ bơta kơldăng nùs bol khai dê, tài bơh bol khai ờ pindờn bol cau neh gŏ Kơnràñ kis wơl. 15 Kơnràñ đơs mơ bol khai: ‘‘Bol kòn lòt tĕ làm khop dunia, yal-pơnrơ Jơnau Yal Niăm jơh jơi crơng-gơs in. 16 Cau lơi pindờn mơ geh pơnđum, gen geh tơngklàs; cau lơi ờ pindờn, gen kong kup glài.” 17 Ală tềl do rơp jăt ală cau pindờn : bơh sơnđăn Añ, bol khai rơp bơtrơh ală cà, rơp đơs ală dà pa; 18 bol khai rơp ăt bơs, mơ dilah bol khai hùc chi lơi khih, gen gơ krung ờ lơh ơniai bol khai; bol khai rơp ơn tê hơđăng bol kòp-jê, mơ bol hơ̆ rơp geh pràn-kơldăng.
19 Neh đơs mơ bol khai rau, Kơnràñ Jesu geh tơngguh hơđăng trồ mơ nggui đah ma Bàp.
* 20 Bol khai lik-lòt yal-pơnrơ làm ù làm tiah; geh Kơnràñ lơh broă bal, mơ ai ală tềl tamjăt làng lơh kơnhăp jơnau yal.
