Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Kơnràñ Jesu lik dơđăp Pilato, cau kuang dờng lơgar
15 1 Prŭ drim, bol lơh-yàng dờng bơyai bal mơ bol kuang kra mơ bol gơnoar-cih, hơ̆ lah jơh mpồl tơrña; bol khai căp Kơnràñ Jesu, cèng jào dơ Pilato. 2 Pilato lùp Kơnràñ: ‘‘Mê lah Bơtau bol Jude ơ ?” Kơnràñ hơ wơl, đơs mơ khai : ‘‘Ồng đơs hơ̆.” 3 Bol lơh-yàng dờng yă Kơnràñ rà jơnau. 4 Pilato lùp Kơnràñ tai mơ đơs: ‘‘Mê ờ hơ wơl chi lơi ơ ? Sền bol khai yă mê git nđờ jơnau.” 5 Kơnràñ Jesu ờ hơ chi lơi tai, tiăn tus Pilato ai lơh krơi.
6 Pah dơ̆ leh, khai mờng hồ bol khai in dùl nă tam bol ơm jàm lơi bol khai dăn. 7 Geh cau sơnđăn lah Barabba, kong jàm bal mơ bol pơrlơ̆-dră, lah bol neh gơsơt cau tam tŭ pơrlơ̆-dră. 8 Mpồl làng-bol guh, sơntờm dăn bơta be khai ờs lơh bol khai in. 9 Pilato hơ wơl mơ bol khai mơ đơs: ‘‘Bol mê kờñ añ hồ bol mê in bơtau Judea ơ ?” 10 Kơyoa khai git lah, bơh nùs boah-gơjrañ, mơ bol lơh-yàng dờng neh jào Kơnràñ. 11 Mơya bol lơh-yàng dờng bơchồl mpồl làng-bol, làng niăm rơlau lah Pilato hồ Barabba bol khai in. 12 Pilato hơ wơl mơ đơs mơ bol khai tai: ‘‘Be hơ̆, ñchi bol mê kờñ añ lơh bơtau Judea in taih ?” 13 Bol khai nggà tai: ‘‘Tơs tĕ khai dơ chikal !” 14 Pilato đơs mơ bol khai: ‘‘Mơya ñchi bơta iơh khai neh lơh taih ?” Bol khai sơlơ nggà dờng rơlau: ‘‘Tơs tĕ khai dơ chikal !” 15 Pilato, bơh kờñ lơh di nùs làng-bol, neh hồ Barraba bol khai in, sồr pù-lơh Kơnràñ Jesu mơ jào tơs dơ chikal.
Kơnràñ Jesu kong groă mơ gơnoàr lò
16 Bol ling cèng Kơnràñ mut tam dơlăm blàng, hơ̆ lah hìu lơh broă cau kuang dờng dê, mơ pơrjum jơh mpồl ling. 17 Bol khai tơnsoh Kơnràñ in ào prơhê, mơ ai lò wăc dùl nơm gơnoàr groă Khai in, 18 mơ sơntờm niăm-să Khai: ‘‘Niăm-să bơtau bol Jude !” 19 Bol khai ai gai proh tờl dơ bồ Kơnràñ, choh dơ Khai, mơ cùn kơltăng duh-khoai Khai. 20 Tơnơ̆ mơ tŭ bol khai neh ñŏ-tơnhial Kơnràñ, gen bol khai hồ ào prơhê, tơnsoh wơl Khai in ào Khai dê. Mơ bol khai cèng Kơnràñ lòt làng tơs dơ chikal.
Gùng guh Golgotha
21 Bol khai kup bơklơn dùl nă tus bơh bòn, lòt găn tềng hơ̆, lah Simon, cau Sirene, bàp Alexandre mơ Rufo, tui chikal Kơnràñ dê. 22 Bol khai cèng Kơnràñ tus tam dùl bă tiah, hòi lah Golgotha, hơ̆ lah tiah Kơndoh Bồ.
Kơnràñ Jesu kong tơs dơ chikal
23 Bol khai ai Kơnràñ in alăk pơrlŭ bal mơ plai măt bơtăng, mơya Khai ờ ñô. 24 Bol khai tơs Kơnràñ dơ chikal mơ tă khà tampà ào Khai dê, sền cau lơi ai chi lơi. * 25 Hơ̆ lah jiờ dơ̆ pe, mơ bol khai neh tơs Kơnràñ dơ chikal. 26 Păng mpàn cih kồ jơnau lơh glài Kơnràñ lah: ‘‘Bơtau bol Jude.” 27 Bal mơ Kơnràñ, bol khai tơs bàr nă cau thừ-blơ̆, dùl nă đah ma, dùl nă đah kiau Khai dê.
Kơnràñ Jesu hơđăng chikal kong tơmbàs
29 Ală cau lòt găn đơs tràl-sơrbil dơ Kơnràñ, rơtơs bồ mơ đơs: ‘‘Ơ, mê lah cau lơh tơrlah hìu duh-khoai mơ tam pe ngai bơtào wơl; 30 mù tĕ bơh chikal, tơngklàs să tờm mê !” 31 Krung ndrờm be hơ̆ sơl, bol lơh-yàng dờng bal mơ bol gơnoar-cih ñŏ-tơnhial bal mơ đơs: ‘‘Khai neh tơngklàs ală cau ndai, mơ ờ rơgơi tơngklàs să tờm. 32 Kristo, bơtau Israel, tŭ do, mù tĕ bơh chikal, làng bol he gŏ mơ pindờn.” Bol cau kong tơs dơ chikal bal mơ Kơnràñ, krung bơtăt-bơtrờh Khai.
Kơnràñ Jesu kong chơt dơ chikal
33 Bơh jiờ dơ̆ prau, gơlik klăm-jơngo làm ù jơl tus dơ jiờ dơ̆ sin. 34 Dơ jiờ dơ̆ sin, Kơnràñ Jesu hòi mơ săp dờng: ‘‘Heloi, Heloi, lema sabacthani ?”, gơ cih-tơlik lah: ‘‘Ơ Yàng añ, ơ Yàng añ, ñchi gơlơh Đi săng-lời añ ?” 35 Geh bol bà tam ală cau ntào gùt dar kơno gen đơs: ‘‘Ne, khai hòi Elia.” 36 Geh dùl nă ntoat iŭ phan-nsồp bềng mơ dà sràt, pùt dơ gai proh, ai Kơnràñ hùc mơ đơs: ‘‘Lời tĕ lòng sền geh Elia tus tă-tơmù khai sơl ờ.” 37 Kơnràñ Jesu nggà dùl săp dờng mơ tăc nhơm.
38 Biài kơrnìng hìu duh-khoai dê gơcrè gơs bàr bơh hơđăng tus hơđơm.
* 39 Cau kuang ăt-rơhiăng, ntào tamtoh mơ Kơnràñ, gŏ Kơnràñ hòi mơ tăc nhơm be hơ̆, gen đơs: ‘‘Ngăn, cau do lah Kòn Yàng dê !”
Ală cau ùr niăm hơđăng Golgotha
40 Krung geh ală cau ùr ơm sền bơh ngài, tam bol khai geh Maria Magdala, Maria mè Jakobe-oh mơ Jose dê, mơ Salome. 41 Bol ùr do, tŭ Kơnràñ ơm tam Galilea, neh jăt mơ dong-broă Khai; mơ krung geh gal cau ùr ndai, lah bol neh guh hơ Jerusalem bal mơ Kơnràñ.
Tơp bồc Kơnràñ Jesu
42 Mho tus, tài bơh lah Ngai Rơcăng Leh, hơ̆ lah ngai lài mơ ngai sabbat, 43 geh Joseph, cau Arimathea, lah kuang tơrña tiơng-pơnrơ, tus; tờm khai krung lah cau kơp-gơn lơgar Yàng; khai neh khin-cha mut mơ Pilato mơ dăn bồc Kơnràñ Jesu. 44 Pilato ai lơh krơi lah Kơnràñ neh chơt rau, khai sồr hòi cau kuang ăt-rơhiăng tus, lùp khai Kơnràñ neh chơt lah ờ, 45 mơ tŭ neh git bơh cau kuang ăt-rơhiăng, khai ai bồc Joseph in. 46 Ồng do blơi biài che dơmai, tă bồc Kơnràñ, pò mơ biài che dơmai, ơn bồc tam bơtô bồc neh phàt tam lŭ, mơ pơrlă pơnai lŭ dơ mpồng bơtô bồc. 47 Maria Magdala mơ Maria mè Jose dê sền tiah cau ơn Kơnràñ.
