Jơnau Yalniam Marko-Pơnah 14

BƠTA JÊ-YĂN MƠ BƠTA KIS WƠL

KƠNRÀÑ JESU DÊ

Bol Jude jòi gùng kup Kơnràñ Jesu mơ gơsơt

14 1 Bàr ngai lài mơ leh Lòt Găn mơ leh Bañ ờ kañ, bol lơh-yàng dờng mơ bol gơnoar-cih jòi gùng mbe lơh geh kai kup Kơnràñ mơ gơsơt; 2 kơyoa bol khai đơs: ‘‘Bañ lơh tam ngai leh, mbài gơlik bơta nggồr-nggàc dờng tam làng-bol.”

Tuh bơñà Kơnràñ Jesu in tam Bethania

3 Tŭ Kơnràñ ơm tam Bethania, tam hìu Simon, cau lut-dun, mơ găm sào, gen geh dùl nă cau ùr ià dùl nơm gri lŭ màng ơn bơñà găm tờm gơ dê, bô bơlhu, kas ngăn; lồc pờng bơcah gri lŭ màng, khai

tuh bơñà hơđăng bồ Kơnràñ dê. 4 Geh dŭt cau gơjrañ, đơs ndring bol khai: ‘‘Ñchi kuơ lơh roh bơñà be hơ̆ ? 5 Kơyoa bơñà do rơgơi tăc geh rơlau mơ pe rơhiăng đong priă mơ pà bol rơbah in.” Mơ bol khai rơmbŏ lah ùr hơ̆.

6 Mơya Kơnràñ Jesu đơs: ‘‘Lời khai dê, ñchi gơlơh bol mê lơh kal-ke khai in taih ? Khai neh lơh broă niăm Añ in. 7 Kơyoa bol rơbah, bol mê geh sùm bal mơ bol mê, mơ tŭ bol mê kờñ, bol mê rơgơi lơh niăm bol khai in; mơya Añ, bol mê ờ geh sùm. 8 Bơta khai rơgơi, gen khai neh lơh: khai neh ai bơñà tuh lài dơ să Añ làng tơp Añ. 9 Di ngăn, Añ đơs mơ bol mê: Tềng lơi tam jơh dunia, Jơnau Yal Niăm rơp geh yal-pơnrơ, gen bơta cau ùr do neh lơh, krung rơp geh yal wơl làng kah-kơlôi khai.”

Juda jào Kơnràñ

10 Juda Iskarioth, dùl nă tam bol Jơt Bàr, lòt tus hơ bol lơh-yàng dờng, làng jào Kơnràñ bol khai in. 11 Bol khai kơno, gen chờhờp mơ hơ pà khai in priă. Mơ khai jòi gùng mbe lơh làng buơn jào Kơnràñ.

Rơcăng sa leh Lòt Găn

12 Ngai sơnrờp tam ală ngai leh Bañ ờ kañ, hơ̆ lah tŭ gơsơt-pơdơng belàt Lòt Găn, bol jăt-dờn Kơnràn dê đơs mơ Khai :  ‘‘Ntềng đah Đi kờñ bol

kòn lòt rơcăng Đi in sa leh Lòt Găn taih ?” 13 Kơnràñ pơyoa bàr nă tam bol jăt-dờn Khai dê lòt, mơ đơs mơ bol khai: ‘‘Bol kòn lòt tĕ tam bòn dờng, mơ rơp geh dùl nă đoa yăng dà tus tìp bol kòn; bol kòn jăt tĕ cau hơ̆, 14 mơ khai mut tềng lơi, gen bol kòn đơs tĕ mơ cau tờm hìu: ‘‘Pôgru đơs: Ntềng đah Añ rơp sa leh Lòt Găn bal mơ bol jăt-dờn Añ dê ?” 15 Khai rơp sơnđio bol kòn in dùl adŭ dờng, tap hơđăng, neh geh rơcăng; mơ bol kòn rơcăng tĕ bol he in tềng hơ̆.” 16 Bol jăt-dờn lik-lòt, tus tam bòn dờng mơ gŏ be Kơnràñ neh đơs mơ bol khai, mơ bol khai rơcăng leh Lòt Găn.

Kơnràñ Jesu yal lài Juda rơp jào Khai

17 Mho tus, Kơnràñ tus bal mơ bol Jơt Bàr. 18 Tam tŭ bol khai găm ơm dơ cơnờng mơ găm sào, gen Kơnràñ Jesu đơs: ‘‘Di ngăn, Añ đơs mơ bol kòn: Dùl nă tam bol kòn rơp jào Añ, lah cau găm sào mơ Añ.” 19 Bol khai sơntờm moăt-jrùng, mơ kờp nă đơs mơ Kơnràñ: ‘‘Añ ơ ?” 20 Kơnràñ đơs mơ bol khai: ‘‘Dùl nă tam bol Jơt Bàr, lah cau iŭ bal mơ Añ tam preng. 21 Ngăn, Kòn kòn-bơnus lik-lòt be neh cih gơrềng bơh Khai. Mơya dồn-sa cau hơ̆ in, bơh khai mơ Kòn kòn-bơnus kong jào!  Niăm cau hơ̆ in, dilah neh ờ deh khai.”

Kơnràñ Jesu lơh gơs tềl-gơnrơh Să Mhàm niăm-goh

22 Tam tŭ Kơnràñ mơ bol jăt-dờn găm sào, Kơnràñ neh dờp bañ, yalniăm mơ pet gơ, pà bol jăt-dờn in mơ đơs: ‘‘Bol kòn dờp tĕ: do lah să Añ dê.” 23 Lồc dờp coàn, Kơnràñ ưn-ngài mơ pà bol jăt-dờn in; mơ jơh ală bol khai hùc coàn gen. 24 Kơnràñ đơs mơ bol khai: ‘‘Do lah mhàm Añ dê, mhàm bơta tam bơrkuăt pa, kong tuh bơh rà cau in. 25 Di ngăn, Añ đơs mơ bol kòn: Añ rơp ờ tŭ lơi hùc tai dà ño do jơl tus ngai hơ̆, tŭ Añ rơp hùc dà ño tam lơgar Yàng.”

Kơnràñ Jesu yal lài Petro rơp pơndăng-săng Khai

26 Mơ neh đơs-chờ rau, Kơnràñ mơ bol jăt-dờn lik-lòt tam bơnơm Olive. 27 Kơnràñ Jesu đơs mơ bol jăt-dờn: ‘‘Jơh ală bol kòn rơp gơtup tìs, bơh neh cih: ‘‘Añ rơp pù-lơh cau ê, mơ ală belàt rơp gơprah-gơpring.”

28 Mơya tơnơ̆ mơ tŭ Añ neh kis wơl, Añ rơp lòt lài mơ bol kòn tus tam Galilea.” 29 Petro đơs mơ Kơnràñ: ‘‘Bulah jơh tơl nă rơp gơtup tìs, mơya kòn ờ.” 30 Kơnràñ Jesu đơs mơ khai: ‘‘Di ngăn, Añ đơs mơ kòn: Kòn, ngai do, tam măng do, lài mơ tŭ iar nrau bàr dơ̆, kòn neh pơndăng-săng Añ pe dơ̆.”

31 Mơya khai đơs rơlau tai: ‘‘Bulah kòn rơp pal chơt Kơnràñ in, kòn krung rơp ờ pơndăng-săng Kơnràñ.” Jơh ală cau krung đơs ndrờm be hơ̆ sơl.

Tam bă tiah Gethsemani

32 Kơnràñ mơ bol jăt-dờn tus tam dùl bă tiah, sơnđăn lah Gethsemani; mơ Kơnràñ đơs mơ bol jăt-dờn Khai dê: ‘‘Bol kòn nggui tĕ ndo, tam tŭ Añ răc dăn.” 33 Kơnràñ lăm Petro, Jakobe mơ Joan lòt bal mơ Khai, mơ Khai sơntờm rơngòt mơ kơlôi-kơnòl; 34 Kơnràñ đơs mơ bol khai: ‘‘Sồp-soàn Añ moăt-jrùng jơl tus chơt; bol kòn ơm tĕ ndo mơ drơng tĕ.” 35 Lòt hơđăp dŭt, Kơnràñ blup să dơ ù mơ răc dăn, làng dilah rơgơi, jiờ hơ̆ gơgăn bơh Khai; * 36 Kơnràñ đơs: ‘‘Abba, ơ Bàp ! Jơh ală bơta, Bàp rơgơi lơm. Dăn tă coàn do bơh Kòn; mơya ờ di lah bơta Kòn kờñ, mơ lah bơta Đi kờñ.” 37 Kơnràñ tus mơ gŏ bol khai găm bic, gen đơs mơ Petro: ‘‘Ơ Simon, kòn bic ơ ? Kòn ờ rơgơi drơng dùl jiờ ơ ? 38 Drơng tĕ mơ răc dăn tĕ, làng bol kòn ờ mut tam bơta tơlòng; nùs-nhơm ñhăp-ñhar, mơya poăc-să lơbơn-lơñơ.” 39 Kơnràñ lòt tai răc dăn, mơ đơs krung jơnau hơ̆. 40 Kơnràñ tus tai, gŏ bol khai găm bic; bơh măt bol khai gơjồt, mơ bol khai ờ git hơ wơl chi lơi mơ Kơnràñ. 41 Kơnràñ tus dơ̆ pe mơ đơs mơ bol khai : ‘‘Tŭ do, bic tĕ, rơlô tĕ ! Tơl rau, jiờ neh tus rau: do Kòn kòn-bơnus kong jào tam tê bol cau tìs. 42 Guh tĕ, bol he lòt ih ! Do, cau jào Añ, neh rềp rau.”

Kơnràñ Jesu kong kup

43 Tŭ hơ̆ mơ, tam tŭ Kơnràñ găm đơs, gen Juda, dùl nă tam bol Jơt Bàr tus, mơ bal mơ khai, geh mpồl cèng đào mơ gai bơh bol lơh-yàng dờng, bol gơnoar-cih mơ bol kuang kra. 44 Cau jào Kơnràñ neh ai tềl bol khai in mơ đơs: ‘‘Cau lơi añ cum, hơ̆ lah Khai; bol mê kup tĕ Khai mơ lăm lòt nền-nờn.” 45 Tŭ Juda tus, khai ràn mơ hơ Kơnràñ mơ đơs: ‘‘Rabbi”; mơ khai cum Kơnràñ. 46 Bol khai ai tê sơmbăt kup Kơnràñ. 47 Dùl nă tam ală cau ơm tềng hơ̆, tă đào sreh cau duh-broă cau lơh-yàng dờng dê, mơ lơh tăc tồr cau hơ̆. 48 Hơ wơl, Kơnràñ Jesu đơs mơ bol khai: ‘‘Bol mê ăt đào mơ gai lòt kup Añ be kup cau thừ-blơ̆ ơ ? 49 Pah ngai, Añ ơm tam gùl bol mê, bơto tam hìu duh-khoai, mơ bol mê neh ờ kup Añ; mơya làng jơnau Sră Goh geh gơlik gơs wil-tơl.” 50 Jơh ală cau jăt-dờn săng-lời Kơnràñ mơ dô. 51 Dùl nă cau pơnu jăt Kơnràñ, nggòc mìng dùl păng ồi dơ să kuh, mơ cau sơmbăt kup khai; * 52 khai lời păng ồi, dô să kuh.

Kơnràñ Jesu lik dơđăp mpồl tơrña

53 Bol khai lăm Kơnràñ Jesu tus hơ cau lơh-yàng dờng; jơh ală cau lơh-yàng dờng, cau kuang kra mơ cau gơnoar-cih pơrjum bal. 54 Petro lòt jăt Kơnràñ ngài ngài, tus tam dơlăm hìu-gơlăng cau lơh-yàng dờng dê, nggui bal mơ bol dong-broă mơ njơr ồs. 55 Bol lơh-yàng dờng mơ jơh kuang tơrña jòi cơng tamdră mơ Kơnràñ Jesu, làng gơsơt Khai, mơ ờ gŏ. 56 Kơyoa gal cau lơh cơng blăc tamdră mơ Kơnràñ, mơya ală cơng hơ̆ ờ tamtoh bal. 57 Geh bàr pe nă ñă-ntào lơh cơng blăc tamdră mơ Kơnràñ, mơ đơs: 58 ‘‘Bol hi neh kơno Khai đơs: ‘‘Añ rơp lơh tơrlah hìu duh-khoai do bơh tê cau lơh, mơ tam pe ngai, Añ rơp bơtào wơl ờ di bơh tê cau lơh.”‘‘ 59 Bulah be hơ̆, cơng bol khai dê krung ờ tamtoh bal. 60 Cau lơh-yàng dờng ñă-ntào tam gùl, lùp Kơnràñ Jesu mơ đơs: ‘‘Mê ờ hơ wơl chi lơi mơ ală jơnau cau lơh cơng tamdră mơ mê ơ ?” 61 Mơya Kơnràñ ơm momŏ, mơ ờ hơ wơl chi lơi. Cau lơh-yàng lùp Khai tai mơ đơs: ‘‘Mê lah Kristo, kòn Bơtau geh yalniăm dê ờ ?” 62 Kơnràñ Jesu đơs: ‘‘Añ lah cau hơ̆, mơ bol mê rơp gŏ Kòn kòn-bơnus nggui đah ma Pràn-gơnoar dê mơ tus bal mơ mhoal trồ.”

63 Cau lơh-yàng dờng crè ào tờm mơ đơs:

‘‘Ñchi bol he kờñ tai bol cau cơng ? 64 Bol mê neh kơno jơnau tràl-sơrbil. Mbe bol mê kơlôi taih ?” Jơh ală bol khai yal-glài Kơnràñ pal chơt.

65 Geh cau choh dơ Kơnràñ, lềt măt Khai, tăp Khai mơ đơs mơ Khai: ‘‘Mê hồr tĕ !”; mơ bol dong-broă pah Khai.

Petro pơndăng-săng Kơnràñ Jesu

66 Tam tŭ Petro ơm tam blàng dơ tiah, gen geh dùl nă tam bol ùr duh-broă cau lơh-yàng dờng dê tus; 67 tŭ gŏ Petro ơm njơr ồs, ùr hơ̆ sền trong dơ khai mơ đơs: ‘‘Mê tai, mê krung ơm mơ Jesu, cau Nazareth hơ̆ !” 68 Mơya Petro pơndăng-săng mơ đơs: ‘‘Añ ờ git mơ krung ờ wă chi ai đơs !” Mơ khai lik bơdìh, dơđăp blàng, mơ iar nrau. 69 Cau ùr duh-broă, tŭ gŏ khai, gen sơntờm đơs tai mơ bol ơm tềng hơ̆: ‘‘Cau do krung tam bol hơ̆.” 70 Mơya khai pơndăng-săng tai. Dùl thoa tơnơ̆, ală cau ntào tềng hơ̆, đơs mơ Petro: ‘‘Ngăn, mê krung ơm tam bol hơ̆, tài bơh mê krung lah cau Galilea.” 71 Khai sơntờm srat-rơma mơ sơntơm: ‘‘Añ ờ git cau hơ̆, cau bol mê đơs hơ̆ !” 72 Tŭ hơ̆ mơ, iar nrau tai; mơ Petro kah wơl jơnau, be Kơnràñ Jesu neh đơs mơ khai: ‘‘Lài mơ tŭ iar nrau bàr dơ̆, kòn neh pơndăng-săng Añ pe dơ̆.” Mơ khai sơntờm ñìm.