Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Jơnau bơto gơrềng bơh bơta lồi-dut:
Jơnau lăm-mut
13 * 1 Tŭ Kơnràñ lik bơh hìu duh-khoai, gen dùl nă tam bol jăt-dờn Khai dê đơs mơ Khai: ‘‘Ơ Pôgru, sền tĕ, dờng ngăn lŭ ne, dờng ngăn hìu ne.” 2 Kơnràñ Jesu đơs mơ khai: ‘‘Kòn gŏ hìu dờng ơ ? Tềng do, rơp ờ geh lời wơl pơnai lŭ lơi hơđăng pơnai lŭ lơi mơ ờ kong lơh tơrlah.” 3 Tŭ Kơnràñ nggui hơđăng bơnơm Olive, tamtoh mơ hìu duh-khoai, gen Petro, Jakobe, Joan mơ Andrea lùp is Khai: 4 ‘‘Dăn Đi đơs bol kòn in: Tŭ lơi ală bơta hơ̆ rơp gơlik gơs, mơ tềl lơi rơp gơlik gơs tŭ jơh ală bơta hơ̆ rơp sir-tơl ?”
Ală bơta jê-yăn sơntờm
5 Kơnràñ Jesu sơntờm đơs mơ bol khai: ‘‘Sền ngăc tĕ, mbài cau lơi pơrlồm bol kòn. 6 Gal cau rơp ai sơnđăn Añ tus mơ đơs: ‘‘Añ do”, mơ bol khai rơp pơrlồm gal cau. 7 Tŭ bol kòn kơno geh ală bơta tamlơh mơ ală jơnau pơnrơ tamlơh, gen bañ rơngòt; pal gơlik gơs be hơ̆, mơya ờ hềt dut-lồi. 8 Kơyoa làng-bol do rơp ñă-ntào tamdră mơ làng-bol ne, lơgar do tamdră mơ lơgar ne, mơ rơp geh ală bơta mprơm ù tam rà tiah, rơp geh ală bơta jơgloh-rung; ală bơta hơ̆ lah sơntờm ală bơta jê-yăn.
9 Bol kòn sền ngăc tĕ să tờm. Cau rơp jào bol kòn dơ mpồl tơrña, mơ rơp pù-lơh tam ală hìu-pơrjum; tài bơh Añ, bol kòn rơp ơm ntào dơđăp bol gơnoar mơ bol bơtau, gơs cơng bol khai in.10 Mơya lài jơh, Jơnau Yal Niăm pal geh yal-pơnrơ tam jơh ală làng-bol. 11 Tŭ cau cèng jào bol kòn, gen bol kòn bañ kơlôi lài pal đơs chi lơi, mơya tam jiờ hơ̆ rơp ai bol kòn in jơnau bol kòn pal đơs: kơyoa ờ di bol kòn đơs, mơya Yàng Nhơm. 12 Oh mơ mi rơp tam jào làng kong gơsơt, Bàp rơp jào kòn, oh kòn rơp tamdră mơ me bàp mơ lơh me bàp in kong chơt. 13 Bol kòn rơp kong jơh ală cau ềng-gơjrañ tài bơh sơnđăn Añ. Mơya cau lơi kơ̆ nùs jơl lồi-dut, gen cau hơ̆ rơp geh tơngklàs.
* 14 Tŭ bol kòn gŏ bơta bơ̆-bơl ngkòr-ngkàc bơta tơrlah-tơrling dê ơm tam anih ờ di ơm, cau lơi đal, gen wă tĕ: tŭ hơ̆, bol cau lơi ơm tam Judea, dô tĕ tam bơnơm; 15 cau lơi ơm hơđăng rơkàng hìu, bañ mù, bañ mut ai chi lơi lik bơh hìu he; 16 mơ cau lơi ơm tam sre, bañ wơlke tơnơ̆ ai ào he. 17 Dồn-sa bol cau ùr găm bun in mơ bol cau ùr găm tơmpô kòn in tam ală ngai hơ̆ ! 18 Răc dăn tĕ làng ờ gơtìp tam kàl noăt-mrềt: 19 kơyoa ală ngai hơ̆ rơp lah ală ngai kòl-yăn kal-ke dờng, tiăn tus neh ờ geh bơh sơnrờp Yàng crơng-gơs trồ tiah jơl tus tŭ do, mơ krung rơp ờ gơlik gơs tai. 20 Dilah Kơnràñ ờ tơnhuc ală ngai hơ̆, gen ờ geh nă lơi geh tơngklàs. Mơya tài bơh bol cau geh rơwah, mơ Kơnràñ neh rơwah, gen Khai neh tơnhuc ală ngai hơ̆. 21 Tŭ hơ̆, dilah geh cau lơi đơs mơ bol kòn: ‘‘Do, Kơnràñ Kristo ơm tềng do; ne, tềng ne”, gen bol kòn bañ pindờn. 22 Kơyoa rơp geh bol Kristo blăc mơ bol ala-bơr blăc ñă-ntào mơ lơh ală tềl mơ ală broă krơi làng bơchồ bol cau geh rơwah, dilah rơgơi. 23 Bol kòn sền ngăc tĕ, Añ neh đơs lài bol kòn in rau.
Kòn kòn-bơnus tus wơl
24 Mơya tam ală ngai hơ̆, tơnơ̆ mơ bơta kòl-yăn kal-ke, gen măt tơngai rơp gơs jơngo, àng-kơnhai rơp ờ ai bơta àng tai, 25 rơp geh ală sơrmañ dùh bơh trồ, mơ ală pràn- gơnoar ơm tam trồ rơp kong gơ ơwañ.
26 Tŭ hơ̆, cau rơp gŏ Kòn kòn-bơnus tus tam mhoal bal mơ pràn-gơnoar mơ bơta gơklŏ. 27 Tŭ hơ̆, Khai rơp pơyoa bol huềng-duh lòt, mơ Khai rơp tơrgùm ală cau geh rơwah Khai dê bơh poan mum ù, bơh jơng trồ do tus jơng trồ ne.
Jơnau pơniơu gơrềng bơh tờm chi bal
28 Bol kòn bơsrăm tĕ jơnau pơniơu gơrềng bơh tờm chi bal: tŭ ntê gơ dê bơnung mơ nha gơcăt, gen bol kòn git lah kàl duh neh rềp rau. 29 Ai bol kòn krung be hơ̆ sơl, tŭ gŏ ală bơta hơ̆ gơlik gơs, gen bol kòn git tĕ lah Kòn kòn-bơnus neh rềp, dơ mpồng rau. 30 Di ngăn, Añ đơs mơ bol kòn: Rơnàng do rơp ờ gơgăn, jơl tus tŭ jơh ală bơta hơ̆ gơlik gơs. 31 Trồ mơ tiah rơp gơgăn, mơya ală jơnau đơs Añ dê rơp ờ gơgăn. 32 Gơrềng bơh ngai ngŏlah jiờ hơ̆, gen ờ geh cau lơi git, bol huềng-duh tam trồ krung ờ, Kòn krung ờ sơl, mìng Bàp lơm.
Pal drơng-kơp mơ răk-rơcăng
33 Bol kòn sền ngăc tĕ, drơng-kơp tĕ; bơh bol kòn ờ git tŭ lơi tơngai tus. 34 Krung be dùl nă cau rơp lik-lòt tiah ngài, neh lời hìu khai mơ jào gơnoar bol duh-broă khai dê in, kờp nă kờp broă, mơ krung sồr cau kơp mpồng ơm drơng-kơp. 35 Be hơ̆, bol kòn drơng-kơp tĕ; bơh bol kòn ờ git tŭ lơi cau tờm hìu tus, trồ mho ngŏlah nggùl măng, tŭ iar nrau ngŏlah àng drim; 36 mbài tŭ nisơna khai tus, khai bàn bol kòn găm bic. 37 Jơnau Añ đơs mơ bol kòn, Añ krung đơs mơ jơh ală cau sơl: Drơng-kơp tĕ !”
