Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Jơnau pơniơu bol lơh suơn ño gơsơt cau
12 1 Kơnràñ sơntờm đơs mơ bol khai mơ ală jơnau pơniơu: ‘‘Geh cau ne tăm dùl suơn ño, lơh pơnggàr gùt dar, tờ bơtô păt ño, mơ bơtào dùl nơm kù, ai bol lơh suơn in apah mơ lòt tiah ngài. 2 Tus kàl, khai pơyoa cau duh-broă tus mơ bol lơh suơn, làng dờp cồng-nha gơ dê bơh bol lơh suơn; 3 bol lơh suơn kup cau duh-broă, pù-lơh mơ bơtrơh rê gời. 4 Khai pơyoa tai cau duh-broă ndai tus mơ bol khai; bol khai pờng sồt bồ mơ tơmbàs cau hơ̆. 5 Khai pơyoa cau ndai tai tus, bol khai gơsơt cau do; khai pơyoa gal cau ndai tai tus, cau bà bol khai pù-lơh, cau bà bol khai gơsơt. 6 Khai găm geh dùl nă tai, lah kòn klau kờñ-gơboh. Khai pơyoa kòn hơ̆ lah cau dut-ndơl tus mơ bol khai, mơ đơs: ‘‘Bol khai rơp bìr-adăt kòn klau añ.” 7 Mơya bol lơh suơn đơs bal: ‘‘Do lah cau pơrdờn. Bol mê tus tĕ, bol he rơp gơsơt khai, mơ jơtài gơrê mơ bol he.” 8 Bol khai kup gơsơt kòn klau hơ̆, mơ cơm hơ bơdìh suơn ño. 9 Be hơ̆, ñchi cau tờm suơn ño rơp lơh ? Khai rơp tus mơ tơnroh ală cau lơh suơn, mơ rơp ai suơn ño bol ndai in. 10 Bol mê neh ờ đal jơnau Sră Goh do sơl ơ:
‘‘Lŭ mơ bol băc hìu săng-sơrbì, lŭ hơ̆ neh gơs lŭ mum;
11 broă hơ̆ neh geh Kơnràñ lơh mơ gơ krơi-sơrbơi dơ măt bol he ?”‘‘
12 Bol khai jòi gùng kup Kơnràñ, mơya rơngòt mpồl làng-bol; kơyoa bol khai git lah tài bơh bol khai mơ Kơnràñ neh đơs jơnau pơniơu hơ̆. Bol khai lời Kơnràñ mơ lik-lòt.
Jơnau boh dia Sesare in
13 Bol khai pơyoa bàr pe nă tam bol Phariseo mơ tam ntum Herode tus, làng kup Kơnràñ tam jơnau đơs. 14 Bol hơ̆ tus mơ đơs mơ Kơnràñ: ‘‘Ơ Pôgru, bol hi git Đi lah cau ngăn-ngồn mơ Đi ờ kơlôi-kơnòl dơ cau lơi, tài bơh Đi ờ sền đah bơdìh cau dê, mơya Đi bơto gùng Yàng dê tam bơta ngăn-ngồn. Geh boh dia Sesare in ngŏlah ờ ? Bol hi pal boh dia ngŏlah ờ boh dia taih ?” 15 Kơnràñ git bơta blăc-să bol khai dê, gen đơs mơ bol khai: ‘‘Ñchi bơh tài bol mê tơlòng Añ taih ? Đờp tĕ Añ in dùl đong priă làng Añ sền.” 16 Bol khai tong Kơnràñ in. Kơnràñ đơs mơ bol khai: ‘‘Rùp mơ khar păc do lah ñcau dê taih ?” Bol khai đơs mơ Kơnràñ: ‘‘Sesare dê.” 17 Kơnràñ Jesu đơs mơ bol khai: ‘‘Ală bơta Sesare dê, jào wơl tĕ Sesare in; ală bơta Yàng dê, jào wơl tĕ Yàng in.” Mơ bol khai ai lơh krơi gơrềng bơh Kơnràñ.
Jơnau cau chơt kis wơl
18 Bol Sadduseo, lah bol đơs ờ geh bơta kis wơl, tus mơ Kơnrañø, mơ lùp Khai lah: 19 ‘‘Ơ Pôgru, Moise neh cih bol he in, dilah oh mi cau lơi chơt, lời wơl bao mơ ờ lời wơl kòn, gen oh mi khai pal bao mơ ùr hơ̆ làng tơrbŏ jơi oh mi he in. 20 Geh poh nă oh mi: cau sơnrờp neh bao mơ chơt ờ lời wơl kòn; 21 cau dơ̆ bàr bao mơ ùr hơ̆ mơ chơt ờ lời wơl kòn; mơ cau dơ̆ pe krung ndrờm be hơ̆ sơl; 22 mơ poh nă ờ lời wơl kòn. Dut-ndơl, cau ùr jơh ală cau hơ̆ dê krung chơt sơl. 23 Tam ngai kis wơl, tŭ bol khai kis wơl, khai rơp lah bao ùr ñcau dê tam bol hơ̆ taih ? Kơyoa poh nă neh bao mơ khai.” 24 Kơnràñ Jesu đơs mơ khai: ‘‘Ờ di bol mê neh tìs rau bơh ờ git Sră Goh mơ krung ờ git pràn-gơnoar Yàng dê ơ ? 25 Kơyoa tŭ cau kis wơl bơh bol cau chơt, cau ờ lăp klau tambao ùr, mơya gơs be bol huềng-duh tam trồ. 26 Ai gơrềng bơh bơta cau chơt kis wơl, bol mê neh ờ đal tam sră Moise dê, jơnau rơlau lò, mbe Yàng đơs mơ khai: ‘‘Añ lah Yàng Abraham dê, Yàng Isaak dê mơ Yàng Jakop dê ?” 27 Khai ờ di lah Yàng bol cau chơt dê, mơya bol cau kis dê ! Bol mê tìs ngăn.”
Jơnau sồr lài jơh
28 Dùl nă tam bol gơnoar-cih lah cau neh kơno Kơnràñ mơ bol Sadduseo tam pơndăng, gŏ Kơnràñ hơ wơl mơ bol khai di ngăn, gen tus lùp Kơnràñ: ‘‘Jơnau lơi lah jơnau sồr lài jơh tam jơh ală jơnau sồr taih ?” 29 Kơnràñ Jesu hơ wơl: ‘‘Jơnau sồr lài jơh lah: ‘‘Iăt tĕ, ơ Israel: Kơnràñ Yàng he dê lah Kơnràñ dùl-lơm, 30 mơ mê pal gơboh mơ Kơnràñ Yàng mê dê jơh nùs, jơh soàn, jơh tồr mơ jơh pràn mê.” * 31 Jơnau sồr bàr lah: ‘‘Mê pal gơboh mơ gơp mê be să tờm mê.” Ờ geh jơnau sồr ndai dờng rơlau mơ bàr jơnau hơ̆.” 32 Cau gơnoar-cih đơs mơ Kơnràñ: ‘‘Di, ơ Pôgru, Đi neh đơs di ngăn: ‘‘Yàng lah dùl-lơm, mơ ờ gơs Yàng ndai tai, mìng Khai lơm; 33 gơboh Khai jơh nùs, jơh tồr, jơh pràn” mơ: ‘‘Gơboh mơ gơp be să tờm he”, gen lah rơlau mơ jơh ală phan chu gŭc mơ ală phan pơdơng.” 34 Kơnràñ Jesu gŏ khai hơ wơl jăk-chài, gen đơs mơ khai: ‘‘Mê ờ ngài mơ lơgar trồ.” Mơ ờ geh cau lơi khin lùp Kơnràñ tai.
Kơnràñ Kristo lah kòn mơ lah Kơnràñ Davit dê
35 Tŭ bơto tam hìu duh-khoai, Kơnràñ Jesu pờ bơr đơs: ‘‘Mbe gơlơh bol gơnoar-cih đơs Kơnràñ Kristo lah kòn Davit dê taih ? 36 Tờm Davit geh Yàng Nhơm pơnđàng neh đơs:
‘‘Kơnràñ neh đơs mơ Kơnràñ añ: Nggui tĕ đah ma Añ, jơl tus dơ tŭ Añ ơn bol sò-tơm Kòn dê hơđơm jơng Kòn.”
37 Tờm Davit đơs Khai lah Kơnràñ, gen mbe gơlơh Khai lah kòn Davit dê taih ?” Mơ mpồl gal làng-bol chờ nùs iăt Kơnràñ.
Kơnràñ Jesu cah-rơña bol gơnoar-cih
38 Tam jơnau bơto, Kơnràñ đơs: ‘‘Prăp-gàr să tĕ bơh bol gơnoar-cih, lah bol kờñ lòt pơrwài mơ ào jrùh mơ geh cau đơs niăm-să tam gùng-dà, 39 nggui dơ ală cơnờng hơđăp tam ală hìu-pơrjum, mơ ală anih hơđăp tam ală bơta ñô-sa, 40 bol khai sa loan ală hìu-đăm bol ùr-bàng mơ lơh be răc dăn jòng gùng. Bol khai rơp dờp bơta cah-rơña kơnjơ̆ rơlau.”
Priă pơdơng cau ùr-bàng rơbah dê
41 Nggui tamtoh mơ đài priă, Kơnràñ sền mbe mpồl làng-bol ơn priă tam đài; geh gal cau pas ơn oă. 42 Krung geh dùl nă cau ùr-bàng rơbah tus ơn bàr đong-trà, hơ̆ lah dùl bơnah poan đong-su. 43 Hòi bol jăt-dờn Khai dê tus, Kơnràñ đơs mơ bol khai: ‘‘Di ngăn, Añ đơs mơ bol kòn: Cau ùr-bàng rơbah do neh ơn oă rơlau mơ jơh ală cau neh ơn tam đài. 44 Kơyoa jơh ală cau ơn bơh bơta jơngkah bol khai dê, ai cau ùr do ơn bơh bơta siơ̆u-siar khai dê, lah jơh ală bơta khai geh, jơh mơ phan ròng să khai dê.”
