Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
BROĂ KƠNRÀÑ JESU DÊ TAM JERUSALEM
Kơnràñ Jesu mut tam Jerusalem mơ gơnăp-gơnoar Bơtau Messia
11 1 Tŭ bol khai tus rềp mơ Jerusalem, Bethphage mơ Bethania, hơ bơnơm Olive, Kơnràñ Jesu pơyoa bàr nă tam bol jăt-dờn Khai dê, 2 mơ đơs mơ bol khai: ‘‘Lòt tĕ hơ bòn dơđăp bol kòn, mơ dơ̆ rơp mut, gen bol kòn bàn dùl nơm alàng kòn găm diàng, hơđăng gơ ờ hềt cau lơi đì; bol kòn hồ tĕ gơ mơ tề cèng ndo. 3 Dilah geh cau lơi đơs mơ bol kòn: ‘‘Ñchi gơlơh bol mê lơh bơta gen taih ?”, gen bol kòn đơs tĕ: ‘‘Kơnràñ kờñ gơ, mơ Khai rơp jun wơl gơ ndo mơ.”‘‘ 4 Bol khai lòt mơ bàn dùl nơm alàng kòn găm diàng dơđăp mpồng, đah bơdìh, dơ sơnĕ gùng, mơ bol khai hồ gơ. 5 Geh bàr pe nă cau tam bol ntào tềng hơ̆ đơs mơ bol khai: ‘‘Ñchi bol mê lơh hồ alàng kòn taih ?” 6 Bol khai đơs mơ bol gen be Kơnràñ Jesu neh sồr; mơ bol gen lời khăt bol khai dê. 7 Mơ bol khai tề cèng alàng kòn hơ Kơnràñ Jesu, dă ào bol khai dê hơđăng gơ; mơ Kơnràñ nggui hơđăng gơ. 8 Gal cau dă ào bol khai dê tam gùng, bol ndai rơsìh nha chi sreh bơh tam blàng. 9 Cau bà lòt lài mơ cau bà lòt tơnơ̆, driau lah: ‘‘Hosanna ! Yalniăm Bơtau tus bơh sơnđăn Kơnràñ ! 10 Yalniăm lơgar tus, lơgar bơtau Davit, ồng-pàng bol he dê ! Hosanna tam ală kơloàng trồ !”
11 Kơnràñ mut tam Jerusalem mơ tam hìu duh-khoai; Khai sền làm jơh ală bơta, mơ tài bơh trồ neh mho, gen Khai lik-lòt hơ Bethania bal mơ bol Jơt Bàr.
Tờm chi bal ờ gơlik plai
12 Ngai tơnơ̆, tŭ bol khai lik bơh Bethania, gen Kơnràñ Jesu jơgloh. 13 Tŭ gŏ bơh ngài dùl tờm chi bal geh nha, gen Kơnràñ tus sền gŏ geh chi lơi tam gơ ờ; tŭ Kơnràñ tus hơ gơ, Khai ờ gŏ chi lơi, mìng nha lơm: tài bơh ờ di lah kàl plai bal. 14 Kơnràñ pờ bơr đơs mơ gơ: ‘‘Jơl rài rài ờ gơs cau lơi sa plai bơh mê tai.” Bol jăt-dờn Khai dê neh kơno be hơ̆.
Kơnràñ Jesu bơtrơh jơh ală cau tăc mơ ală cau blơi bơh hìu duh-khoai
15 Bol khai tus tam Jerusalem. Kơnràñ mut tam hìu duh-khoai, Khai sơntờm bơtrơh ală cau tăc mơ ală cau blơi tam hìu duh-khoai, tơlơ ală cơnờng bol gơl priă mơ ală cơnờng-nggui bol tăc ntờp; 16 Khai ờ ai cau lơi cèng phan lòt găn hìu duh-khoai. 17 Khai bơto mơ đơs mơ bol khai: ‘‘Ờ di neh geh cih: ‘‘Hìu Añ dê rơp geh hòi lah hìu răc dăn jơh ală làng-bol in ơ ?” Mơya bol mê neh lơh gơ gơs trồm bol tung-kơñau dê.”
18 Kơno jơnau hơ̆, bol ăt-bồ bol lơh-yàng dê mơ bol gơnoar-cih jòi gùng mbe lơh làng tơnroh Kơnràñ; kơyoa bol khai ngòt Kơnràñ, tài bơh jơh làng-bol ai lơh krơi gơrềng bơh jơnau bơto Khai dê. 19 Tŭ mho tus, Kơnràñ mơ bol jăt-dờn lik bơh bòn dờng.
Tờm chi bal chơt ro. Bơta pindờn mơ bơta răc dăn.
20 Àng drim, tŭ lòt găn, bol khai gŏ tờm chi bal neh chơt ro bơh tam rias. 21 Petro kah wơl, đơs mơ Kơnràñ: ‘‘Ơ Rabbi, ne tờm chi bal Đi yal-iơh gơ in neh chơt ro.” 22 Hơ wơl, Kơnràñ Jesu đơs mơ bol khai: ‘‘Bol kòn geh tĕ nùs pindờn dơ Yàng ! 23 Di ngăn, Añ đơs mơ bol kòn: Cau lơi đơs mơ bơnơm do: ‘‘Yờ tĕ mơ cơm să tĕ tam dà-lềng”, mơ cau hơ̆ ờ pin wi-wơ tam nùs khai, mơya pindờn lah jơnau khai đơs gơlik gơs, gen jơnau hơ̆ rơp gơlik gơs khai in. 24 Tài bơh hơ̆, Añ đơs mơ bol kòn: Jơh ală bơta lơi bol kòn dăn tam tŭ răc dăn, bol kòn pindờn tĕê lah bol kòn neh dờp, gen bol mê rơp geh. 25 Tŭ bol kòn ntào răc dăn, dilah bol kòn geh jơnau lơi tamdră mơ cau, gen hồ tĕ, làng Bàp bol kòn, Bơtau ơm tam trồ, rơp hồ bol kòn in ală jơnau tìs bol kòn dê. * 26 Mơya dilah bol kòn ờ hồ, gen Bàp bol kòn, Bơtau ơm tam trồ, krung rơp ờ hồ ală jơnau tìs bol kòn dê.”
Bol Jude lùp Kơnràñ Jesu gơrềng bơh gơnoar Khai dê
27 Kơnràñ Jesu mơ bol jăt-dờn tus tai tam Jerusalem. Tŭ Kơnràñ găm cơnđoà lòt tam hìu duh-khoai, gen bol lơh-yàng dờng, bol gơnoar-cih mơ bol kuang kra tus hơ Khai, 28 mơ đơs mơ Khai: ‘‘Ồng ai gơnoar lơi mơ lơh ală bơta hơ̆ ? Ngŏlah ñcau neh pà ồng in gơnoar, làng ồng lơh ală bơta hơ̆ taih ?” 29 Kơnràñ Jesu đơs mơ bol khai: ‘‘Añ rơp lùp bol mê dùl jơnau, bol mê hơ wơl tĕ Añ in; gen Añ rơp đơs mơ bol mê, Añ ai jơnau lơi mơ lơh ală bơta hơ̆: 30 Bơta pơnđum Joan dê lah bơh trồ ngŏlah bơh kòn-bơnus taih ? Hơ wơl tĕ Añ in.” 31 Bol khai kơlôi mơ đơs bal: ‘‘Dilah bol he đơs: ‘‘Bơh trồ”, gen Khai rơp đơs: ‘‘Be hơ̆, ñchi bơh tài bol mê ờ pindờn Khai ?”; 32 ai dilah bol he đơs: ‘‘Bơh kòn-bơnus ?”‘‘ Bol khai ngòt làng-bol: kơyoa jơh ală cau sền Joan ngăn lah cau ala-bơr. 33 Bol khai hơ mơ đơs mơ Kơnràñ Jesu: ‘‘Bol hi ờ git.” Kơnràñ Jesu đơs mơ bol khai: ‘‘Añ krung ờ đơs mơ bol mê Añ ai gơnoar lơi mơ lơh ală bơta hơ̆.”
