Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta lời bao
10 1 Ñă bơh tềng hơ̆, Kơnràñ tus tam kơnhoàl Judea, đah ne dà Jordano; ală mpồl làng-bol pơrjum tai rềp mơ Khai, mơ be ờs-mờng, Khai bơto tai bol khai. 2 Bol Phariseo tus lùp tơlòng Kơnràñ lah, cau klau geh lời pơ-ùr ờ. 3 Kơnràñ hơ mơ đơs mơ bol khai: ‘‘Ñchi Moise neh sồr bol mê taih ?” 4 Bol khai đơs: ‘‘Moise neh ai cih sră tamlời làng lời bao.” 5 Kơnràñ Jesu đơs mơ bol khai: ‘‘Bơh nùs bol mê kơldăng, gen tàng khai neh cih bol mê in jơnau sồr hơ̆. 6 Mơya bơh sơnrờp crơng-gơs, Yàng neh pơjềng bol khai, klau mơ ùr. 7 Bơh hơ̆, cau klau rơp lời me bàp he mơ klăc-mềr mơ cau ùr he dê, * 8 mơ bàr nă rơp gơs dùl poăc-să lơm; be hơ̆, bol khai ờ di lah bàr tai, mơya lah dùl poăc-să. 9 Gen tàng, bơta lơi Yàng neh bơrkuăt, kòn-bơnus ờ geh pơnrah.” 10 Tŭ neh rê hìu, bol jăt-dờn lùp tai Kơnràñ bơh jơnau hơ̆. 11 Kơnràñ đơs mơ bol khai: ‘‘Cau lơi lời bao ùr he dê mơ bao mơ cau ndai, gen lơh tìs bơrnàn gơwèt mơ bao ùr he dê; 12 mơ dilah cau ùr lời bao klau mơ bao mơ cau ndai, gen cau hơ̆ tìs bơrnàn.”
Kơnràñ Jesu mơ ală kơnòm
13 Cau lăm ală kơnòm tus hơ Kơnràñ Jesu, làng Kơnràñ bư dơ bol khai; mơya bol jăt-dờn lah-pơrhơng pơrhơng bol khai. 14 Kơnràñ Jesu gŏ be hơ̆, gen gơjrañ, đơs mơ bol jăt-dờn: ‘‘Lời tĕ ală kơnòm dêt tus mơ Añ, bañ kơryăn bol khai: kơyoa lơgar Yàng gơrê mơ ală cau ndrờm be bol khai. 15 Ngăn, Añ đơs mơ bol kòn: Cau lơi ờ wă-dờp lơgar Yàng be dùl nă kơnòm, gen rơp ờ geh mut tam hơ̆.” 16 Mơ Kơnràñ koar bol kơnòm, ơn tê hơđăng, yalniăm bol khai in.
Cau pas-sơm mut tam lơgar Yàng lah kal-ke ngăn
17 Dơ̆ Kơnràñ rơp lik-lòt, gen geh dùl nă cau ntoat tus, cùn-kơltăng dơđăp măt Khai mơ lùp Khai: ‘‘Ơ Pôgru niăm-lơnhơn, ñchi añ pal lơh làng dờp-geh bơta kis rài rài taih ?” 18 Kơnràñ đơs mơ khai: ‘‘Ñchi bơh tài mê đơs añ lah niăm-lơnhơn taih ? Ờ geh cau lơi niăm-lơhơn, mìng dùl Yàng lơm. 19 Mê neh git ală jơnau sồr: bañ gơsơt cau, bañ lơh bơrnàn, bañ tung-kơñau, bañ lơh cơng blăc, bañ pơrlồm-pơrlơm cau, dờn-duh tĕ bàp mơ mè mê.”
20 Cau hơ̆ đơs mơ Kơnràñ: ‘‘Ơ Pôgru, jơh ală jơnau hơ̆ añ neh prăp bơh kơnòm.” 21 Kơnràñ Jesu rơmê dơ khai, gơboh mơ khai mơ đơs mơ khai: ‘‘Mê phơt dùl jơnau lơm: lòt tĕ tăc jơh ală bơta mê geh mơ pà bol rơbah in, gen mê rơp geh đăm phan-màng tam trồ; mơ tus tĕ jăt Añ.” 22 Dơ̆ kơno jơnau hơ̆, khai moăt-jrùng lik-lòt: bơh khai geh oă phan-bơna.
23 Kơnràñ rơmê gùt-dar, đơs mơ bol jăt-dờn Khai dê: ‘‘Bol geh priă-jền mut tam lơgar Yàng lah kal-ke ngăn.” 24 Kơno ală jơnau đơs Kơnràñ dê, bol jăt-dờn ai lơh crih-crài. Mơya Kơnràñ hơ wơl mơ đơs mơ bol khai tai: ‘‘Ơ bol kòn, mut tam lơgar Yàng lah kal-ke ngăn. 25 Làk-đà lòt găn trồm jrum gen buơn rơlau mơ cau pas-sơm mut tam lơgar Yàng.” 26 Bol khai sơlơ ai lơh krơi mơ đơs ndring bol khai: ‘‘Be hơ̆, ñcau rơgơi geh tơngklàs taih ?” 27 Kơnràñ Jesu sền dơ bol khai mơ đơs: ‘‘Mơ kòn-bơnus gen ờ rơgơi, mơya ờ di be hơ̆ mơ Yàng: kơyoa jơh ală bơta rơgơi lơm mơ Yàng.”
Kơnràñ Jesu hơ pà phan-jờng cau lơi in git săng-lời
28 Petro pờ bơr đơs mơ Kơnràñ: ‘‘Do bol kòn neh săng-lời jơh ală bơta mơ jăt Đi.” 29 Kơnràñ Jesu đơs: ‘‘Di ngăn, Añ đơs mơ bol kòn: Ờ gơs cau lơi săng hìu-đăm, oh mi, ruh-lŏ, mè, bàp, oh kòn, ngŏlah sre-brê tài bơh Añ mơ tài bơh Jơnau Yal Niăm, 30 mơ ờ dờp dùl rơhiăng dơ̆ rơlau, tŭ do, tam rài do, hìu-đăm, oh mi, ruh-lŏ, mè, oh kòn, mơ sre-brê, bal mơ bơta kup-kuăn, mơ bơta kis sùm tam rài tơnơ̆. 31 Mơya geh gal cau sơnrờp rơp gơs bol lồi-dut, mơ bol lồi-dut rơp gơs bol sơnrờp.
Kơnràñ Jesu yal lài dơ̆ pe bơta jê-yăn mơ bơta kis wơl Khai dê
32 Bol khai găm tam gùng guh hơ Jerusalem, Kơnràñ Jesu lòt lài mơ bol khai, mơ bol khai ai lơh crih-crài; mơya bol cau jăt tơnơ̆ gen rơngòt. Kơnràñ lăm is tai bol Jơt Bàr mơ sơntờm đơs mơ bol khai ală bơta rơp gơlik gơs Khai in: 33 ‘‘Do bol he guh hơ Jerusalem; mơ Kòn kòn-bơnus rơp kong jào dơ bol ăt-bồ bol lơh-yàng dê, bol gơnoar-cih, mơ bol khai rơp yal-glài chơt Khai in, jào Khai dơ làng-bol bơdìh, 34 mơ bol khai ñŏ-tơnhial Khai, choh dơ Khai, pù-lơh Khai, gơsơt Khai, mơ tơnơ̆ pe ngai Khai rơp kis wơl.”
Jơnau dăn bàr nă kòn klau Zebede dê
35 Jakobe mơ Joan lah bol kòn klau Zebede dê, tus mơ đơs mơ Kơnràñ: ‘‘Ơ Pôgru, bol kòn kờñ Đi lơh bol kòn in jơnau bol kòn dăn mơ Đi.” 36 Kơnràñ đơs mơ bol khai: ‘‘Ñchi jơnau bol kòn kờñ Añ lơh bol kòn in taih ?” 37 Bol khai đơs mơ Kơnràñ: ‘‘Dăn ai bol kòn in, dùl nă nggui đah ma, mơ dùl nă nggui đah kiau tam bơta gơklŏ Đi dê.” * 38 Kơnràñ Jesu đơs mơ bol khai: ‘‘Bol kòn ờ git bơta bol kòn dăn. Bol kòn rơgơi hùc coàn mơ Añ rơp hùc, ngŏlah dờp bơta pơnđum mơ Añ rơp dờp sơl ờ ?” 39 Bol khai đơs mơ Kơnràñ: ‘‘Bol kòn rơgơi.” Kơnràñ Jesu đơs mơ bol khai: ‘‘Coàn Añ rơp hùc, bol kòn krung rơp hùc, mơ bơta pơnđum Añ rơp dờp, bol kòn krung rơp dờp; 40 mơya nggui đah ma ngŏlah đah kiau Añ, gen ờ di Añ geh gơnoar ai, mơya ai ală cau lơi in mơ bơta hơ̆ neh geh rơcăng lài.”
Cau lăm-bồ pal gơs cau duh-broă
41 Dơ̆ Jơt nă cau jăt-dờn kơno jơnau hơ̆, gen gơjrañ mơ Jakobe mơ Joan. 42 Kơnràñ Jesu hòi bol khai mơ đơs bol khai: ‘‘Bol kòn git lah, bol cau geh sền lah lăm-bồ ală làng-bol gen ăt-bồ bol khai, mơ bol cau lăm-bồ ală làng-bol gen geh gơnoar bol khai dê. 43 Ờ di be hơ̆ tam bol kòn, mơya cau lơi kờñ gơs dờng rơlau tam gùl bol kòn, gen cau hơ̆ rơp gơs cau dong-broă bol kòn dê; 44 mơ cau lơi kờñ gơs lài jơh tam bol kòn, gen cau hơ̆ rơp gơs cau duh-broă jơh ală cau dê; 45 kơyoa Kòn kòn-bơnus ờ tus làng cau duh-broă Khai in, mơya làng duh-broă mơ pà bơta kis Khai dê gơs bơta tơwài gal cau in.”
Cau jơngo măt tam Jeriko
46 Bol khai tus tam Jeriko. Mơ dơ̆ Kơnràñ lik bơh Jeriko bal mơ bol jăt-dờn Khai dê mơ mpồl làng-bol gal ngăn, gen geh kòn klau Time dê lah Bartime, cau kơnư-dàn jơngo măt nggui dơ gah gùng.
47 Dơ̆ khai kơno hơ̆ lah Kơnràñ Jesu Nazareth, gen khai sơntờm hòi-nggà mơ đơs: ‘‘Ơ Jesu, kòn Davit, dăn nđàc-sơngit Añ !” 48 Rà cau lah-pơrhơng khai làng khai ơm momŏ, mơya khai sơlơ hòi-nggà rà tai: ‘‘Ơ kòn Davit dê, dăn nđàc-sơngit Añ !” 49 Kơnràñ Jesu ơm wơl mơ đơs: ‘‘Hòi tĕ khai.” Bol khai hòi cau jơngo mơ đơs mơ khai: ‘‘Kơnhăp nùs tĕ. Ñă tĕ, Khai hòi mê.” 50 Cau jơngo cơm ào war khai dê, brồ ntào, tus mơ Kơnràñ Jesu. 51 Hơ wơl, Kơnràñ Jesu đơs mơ khai: ‘‘Ñchi mê kờñ Añ lơh mê in taih ?” Cau jơngo đơs mơ Kơnràñ: ‘‘Ơ Kơnràñ, dăn ai añ in gŏ.” 52 Kơnràñ Jesu đơs mơ khai: ‘‘Lòt tĕ; nùs pindờn mê dê neh tơmbời mê.” Tŭ hơ̆ mơ, khai gŏ mơ jăt Kơnràñ tam gùng lòt.
