Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Kơnràñ Jesu pơyoa
Jơt Bàr nă cau dờp-pơyoa lòt yal-bơto
9 1 Kơnràñ hòi bol Jơt Bàr tus, pà bol khai in bơta pràn mơ gơnoar hơđăng jơh ală cà, làng bol khai tơmbời ală bơta kòp-jê, 2 Khai pơyoa bol khai lòt yal-bơto lơgar Yàng mơ tơmbời ală cau kòp-jê; 3 Khai đơs mơ bol khai: ‘‘Bol kòn bañ cèng chi lơi tŭ lòt gùng, ờ gai jra, ờ kơldung, ờ bañ, ờ priă-jền, mơ krung ờ geh bàr blah ào. 4 Bol kòn mut tam hìu lơi, gen ơm tĕ tềng hơ̆ mơ krung bơh tềng hơ̆ lik-lòt. 5 Bol lơi ờ wă-rò bol kòn, gen tŭ lik bơh bòn dờng hơ̆, bol kòn rơtuh tĕ thul dơ jơng bol kòn, làng gơs cơng dơ bol khai.” 6 Bol khai lik-lòt làm ală bòn, yal Jơnau Yal Niăm mơ tơmbời kòp-jê làm tiah.
7 Herode, cau pô kơnhoàl, kơno jơh ală bơta neh gơlik gơs, gen gơlơh wi-wơ, bơh geh cau đơs lah: ‘‘Joan neh guh wơl bơh bol cau chơt”; 8 cau bà đơs lah: ‘‘Elia neh tơnggŏ măt”; cau bà tai đơs lah ‘‘Dùl nă cau ala-bơr tam bol cau yau neh kis wơl.” * 9 Ai Herode đơs lah: ‘‘Joan, añ neh koh bồ rau; gen cau do lah ñcau, mơ gơrềng bơh khai, añ kơno ală jơnau be hơ̆ taih ?” Mơ khai jòi gùng tìp Kơnràñ.
Bol dờp-pơyoa rê wơl. Kơnràñ Jesu lơh bañ gơs rà.
10 Bol dờp-pơyoa rê wơl, yal Kơnràñ in ală bơta bol khai neh lơh. Kơnràñ cèng bol khai ruc is hơ bòn dờng hòi lah Bethsaida. 11 Tŭ ală mpồl làng-bol git be hơ̆, gen lòt jăt Kơnràñ. Kơnràñ wă-rò bol khai, đơs mơ bol khai gơrềng bơh lơgar Yàng, mơ tơmbời ală cau kờñ geh tơmbời. 12 Trồ neh sơntờm rơyơm mho; bol Jơt Bàr tus đơs mơ Kơnràñ: ‘‘Dăn Đi ai mpồl làng-bol rê, làng bol khai lòt tus tam ală bòn gùt dar, ơm mơ jòi phan sa, kơyoa ndo bol he ơm tam tiah ngềt-ngơt.” 13 Kơnràñ đơs mơ bol khai: ‘‘Bol kòn ai tĕ bol khai in sa.” Bol khai đơs: ‘‘Bol kòn ờ geh rơlau mơ prăm nơm bañ mơ bàr nơm ka, digơlăn lơm lah bol kòn pal lòt blơi phan sa jơh mpồl làng-bol do in.” 14 Kơyoa geh pơgăp prăm rơbô nă cau klau. Kơnràñ đơs mơ bol jăt-dờn Khai dê: ‘‘Bol kòn sồr tĕ bol khai nggui kờp ntum pơgăp prăm jơt nă.” 15 Bol khai neh lơh be hơ̆, mơ sồr jơh ală cau nggui. 16 Kơnràñ dờp prăm nơm bañ mơ bàr nơm ka, tơngờ hơ trồ, yalniăm bañ mơ ka, pet gơ mơ ai bol jăt-dờn Khai dê in, làng bol khai ơn dơđăp mpồl làng-bol. 17 Bol khai sa mơ hờm jơh; mơ cau tơrgùm ală pet jơngkah geh jơt bàr nơm bài.
Petro yal-tơlik Kơnràñ Jesu lah Bơtau Kristo Yàng dê
18 Gơlik gơs lah, tam tŭ Kơnràñ răc dăn is, mơ geh bol jăt-dờn ơm bal mơ Khai, gen Kơnràñ lùp bol khai lah: ‘‘Ală mpồl làng-bol đơs Añ lah ñcau taih ?” 19 Bol khai hơ wơl mơ đơs: ‘‘Joan Pơnđum, mơya cau bà đơs lah Elia, cau bà tai đơs lah: Dùl nă cau ala-bơr tam bol lài-òr neh kis wơl.” 20 Kơnràñ đơs mơ bol khai: ‘‘Ai bol kòn đơs Añ lah ñcau taih ?” Hơ wơl, Petro đơs: ‘‘Lah Bơtau Kristo Yàng dê.”
Kơnràñ Jesu yal lài dơ̆ dùl bơta jê-yăn Khai dê
21 Mơya Kơnràñ kràñ-cê sồr bol khai bañ yal jơnau hơ̆ mơ cau lơi, 22 mơ đơs: ‘‘Kòn kòn-bơnus pal kong jê-yăn oă ngăn, kong bol kuang kra, bol ăt-bồ bol lơh-yàng dê mơ bol gơnoar-cih săng-sơrbì, kong gơsơt mơ ngai pe kis wơl.”
Bơta pal geh làng jăt Kơnràñ Jesu
23 Kơnràñ đơs mơ jơh ală cau: ‘‘Dilah cau lơi kờñ jăt Añ, gen pal săng-lời să tờm, tui chikal he dê pah ngai mơ jăt Añ. 24 Kơyoa cau lơi kờñ tơngklàs bơta kis he dê, gen rơp roh gơ; mơya cau lơi kong roh bơta kis he dê tài bơh Añ, gen rơp tơngklàs gơ. 25 Kơyoa ñchi kuơ cau in, dilah geh jơh dunia, mơya roh să tờm ngŏlah lơh ơniai să he. 26 Cau lơi bàssìl bơh Añ mơ bơh ală jơnau Añ dê, gen Kòn kòn-bơnus krung rơp bàssìl bơh cau hơ̆, tŭ Khai tus tam bơta gơklŏ Khai dê, mơ Bàp dê, mơ bol huềng-duh niăm-goh dê.
Gơnoar-bơtau Yàng dê neh tus rềp
27 Añ đơs ngăn mơ bol mê: Geh bol cau găm ntào tềng do, ờ tiăm bơta chơt, jơl tus tŭ gŏ lơgar Yàng.
Kơnràñ Jesu srơh să
28 Gơlik gơs lah, pơgăp phàm ngai tơnơ̆ mơ ală jơnau hơ̆, Kơnràñ cèng Petro, Joan mơ Jakobe guh hơđăng bơnơm làng răc dăn. 29 Tam tŭ Khai răc dăn, muh-măt Khai gơlik is, ào Khai gơs bò, àng-gơcrà. 30 Mơ do, geh bàr nă cau boh-bơr mơ Khai, lah Moise mơ Elia. 31 Bol khai tơnggŏ măt tam bơta gơklŏ, đơs gơrềng bơh bơta lik-lòt Kơnràñ dê, mơ Kơnràñ rơp lơh sir tam Jerusalem. 32 Ai Petro mơ bol ơm bal mơ khai gen lơhă bic; mơ tŭ kah-rơngal, bol khai gŏ bơta gơklŏ Kơnràñ dê mơ bàr nă cau ntào bal mơ Kơnràñ. 33 Gơlik gơs lah, tam tŭ bàr nă cau hơ̆ tơngăc Kơnràñ, gen Petro đơs mơ Kơnràñ Jesu : ‘‘Ơ Pôgru, bol he ơm ndo gen niăm; bol kòn rơp lơh pe nơm sàl: dùl nơm Đi in, dùl nơm Moise in mơ dùl nơm Elia in”; khai ờ git ñchi khai đơs. 34 Tŭ khai găm đơs ală jơnau hơ̆, gen geh mhoal gơgòm bol khai, mơ bol khai rơngòt tam tŭ bol khai mut tam mhoal. 35 Mơ geh săp bơh mhoal đơs: ‘‘Do lah Kòn Añ dê, cau Añ rơwah, bol mê iăt tĕ Khai .” 36 Tŭ săp hơ̆ neh đơs rau, gen mìng gŏ Kơnràñ Jesu lơm. Bol khai ơm momŏ, mơ tam ală ngai hơ̆, ờ yal mơ cau lơi chi lơi tam ală bơta bol khai neh gŏ.
Kơnràñ Jesu tơmbời kòn klau kong cà lơh
37 Gơlik gơs lah, tam ngai tơnơ̆, tŭ bol khai mù bơh bơnơm, gen geh mpồl làng-bol gal tus tìp mơ Kơnràñ. 38 Mơ do, geh cau bơh mpồl làng-bol hòi-nggà mơ đơs: ‘‘Ơ Pôgru, añ khoai dăn Đi wèt-sền dơ kòn klau añ dê, tài bơh añ geh mìng dùl nă khai lơm; 39 mơ do, huềng-iơh kup khai, nisơna khai tơnggà, mơ gơ lơh khai rơpơt să, lik kơmbuh bơr, gơ lơh bòl-glar khai ngăn, mơ kalke ngăn sòng gơ lời khai; 40 añ neh dăn bol jăt-dờn Đi dê bơtrơh gơ, mơ bol khai ờ rơgơi.” 41 Hơ wơl, Kơnràñ Jesu đơs: ‘‘Ơ jơi ờ pindờn mơ sơlơ̆-dră, Añ rơp ơm mơ bol mê mơ kong ơt-ơl bol mê jơl tus tŭ lơi taih ? Cèng tĕ kòn mê dê ndo.” 42 Tam tŭ kòn klau tus, gen cà sơrglơm mơ lơh rơpơt khai. Kơnràñ Jesu lah-pơrhơng huềng-iơh bơ̆-bơl, tơmbời kòn hơ̆, mơ jào wơl khai bàp khai in. 43 Jơh ală cau ai lơh crih-crài bơh gơnăp-gơnoar dờng-màng Yàng dê.
Kơnràñ Jesu yal lài dơ̆ bàr bơta jê-yăn Khai dê
Mơ tam tŭ jơh ală cau ai lơh krơi bơh jơh ală bơta Kơnràñ lơh, gen Kơnràñ đơs mơ bol jăt-dờn Khai dê: 44 ‘‘Bol kòn ơn tĕ ală jơnau do tam tồr bol kòn: Kòn kòn-bơnus rơp kong jào tam tê cau.” * 45 Mơya bol khai ờ wă jơnau hơ̆, gơ pồn-ndơp dơđăp bol khai, tàng bol khai ờ đal-git, mơ bol khai ngòt ờ khin lùp Kơnràn bơh jơnau hơ̆.
Ñcau tam bol jăt-dờn lah dờng rơlau ?
46 Dùl jơnau kơlôi gơtus tam bol khai lah, ñcau tam bol khai lah dờng rơlau. 47 Kơnràñ Jesu git jơnau kơlôi tam bol khai, gen ai dùl nă oh dêt ơn dơ gah Khai, 48 mơ đơs mơ bol khai: ‘‘Cau lơi wă-rò oh dêt do bơh sơnđăn Añ, lah wă-rò Añ; mơ cau lơi wă-rò Añ, lah wă-rò Bơtau neh pơyoa Añ tus; kơyoa cau lơi lah dêt rơlau tam gùl jơh ală bol kòn, gen cau hơ̆ lah dờng rơlau.”
49 Hơ wơl, Joan đơs: ‘‘Ơ Pôgru, bol kòn neh gŏ cau ai sơnđăn Đi bơtrơh cà, mơ bol kòn neh kơryăn cau hơ̆, tài bơh khai ờ jăt bal mơ bol kòn.” 50 Kơnràñ Jesu đơs mơ khai: ‘‘Bañ kơryăn; kơyoa cau lơi ờ tamdră wơl mơ bol kòn, lah bal mơ bol kòn.”
- KƠNRÀÑ JESU LÒT HƠ JERUSALEM
Dùl bòn cau Samaria ờ wă-rò Kơnràñ Jesu
* 51 Gơlik gơs lah, tŭ mờr tus tơngai Kơnràñ geh tơngguh, Khai kờn lòt hơ Jerusalem, 52 mơ pơyoa ală cau lòt lài mơ Khai. Bol khai lòt mơ mut tam dùl bòn cau Samaria làng rơcăng Khai in. * 53 Mơya cau Samaria ờ wă-rò Khai, tài bơh Khai găm lòt hơ Jerusalem. 54 Gŏ be hơ̆, Jakobe mơ Joan lah bol jăt-dờn, neh đơs: ‘‘Ơ Kơnràñ, Đi kờñ bol kòn sồr ồs mù bơh trồ mơ tơnroh bol khai sơl ờ ?” 55 Kơnràñ wơlke lah-pơrhơng bol khai. 56 Kơnràñ mơ bol jăt-dờn lòt hơ bòn ndai.
Kơnràñ Jesu sồr bol jăt-dờn pal săng-lời jơh ală bơta
57 Tam tŭ bol khai lòt gùng, geh cau đơs mơ Kơnràñ: ‘‘Añ dăn jăt Đi, bulah Đi lòt tiah lơi.” 58 Kơnràñ Jesu đơs mơ khai: ‘‘Pì geh trồm, sềm tam trồ geh rơsòn, mơya Kòn kòn-bơnus ờ geh tiah sơnđìng bồ.” 59 Kơnràñ đơs mơ cau ndai: ‘‘Jăt tĕ Añ.” Cau hơ̆ đơs: ‘‘Ơ Kơnràñ, dăn ai añ in lài rê tơp bàp añ.” 60 Kơnràñ Jesu đơs mơ khai: ‘‘Lời tĕ cau chơt tơp cau chơt bol khai dê; ai mê lòt tĕ yal-pơnrơ lơgar Yàng.” 61 Dùl nă cau ndai tai đơs: ‘‘Ơ Kơnràñ, añ dăn jăt Đi, mơya dăn ai añ in lài tơngăc cau tam hìu-bơnhă.” * 62 Kơnràñ Jesu đơs mơ khai: ‘‘Ờ geh cau lơi ai tê đơng ngal mơ găm wơlke tơnơ̆ lah di-pal mơ lơgar Yàng.”
