Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bol cau ùr lòt jăt Kơnràñ Jesu
8 1 Gơlik gơs lah, tơnơ̆ hơ̆, Kơnràñ lòt găn bòn dờng mơ bòn dêt, yal-bơto mơ yal Jơnau Yal Niăm lơgar Yàng; geh bol Jơt Bàr bal mơ Khai, 2 mơ geh bol cau ùr, neh geh tơmbời bơh ală huềng-iơh mơ ală bơta lơbơn-lơñơ: Maria, hòi lah Maria Magdala, geh poh nơm cà neh lik bơh khai, 3 Joanna, bao ùr Suza, cau ăt-bồ broă Herode dê, Susanna mơ gal cau ùr ndai, lah bol cau neh ai phan-jơtài bol khai dê duh-broă Kơnràñ mơ bol Jơt Bàr.
Jơnau pơniơu cau sih gar sơntìl
4 Tŭ mpồl làng-bol gal ngăn pơrjum bal, mơ bơh ală bòn dờng cau tus mơ Kơnràñ, gen Khai ai jơnau pơniơu mơ đơs: 5 ‘‘Cau sih gar sơntìl lik-lòt sih gar sơntìl khai dê. Tam tŭ khai sih, gen geh gar rung dơ gah gùng, gơ kong cau jă mơ sềm tam trồ sa gơ. 6 Geh gar rung hơđăng lŭ, mơ lồc hòn gen gơ ro, tài bơh gơ ờ sùh. 7 Geh gar rung tam lò, mơ lò hòn bal gơrềt gơ. 8 Geh gar rung tam ù niăm, mơ lồc hòn gen gơlik plai dùl rơhiăng dơ̆ rơlau.” Lồc đơs ală jơnau hơ̆, gen Kơnràñ đơs dờng lah: ‘‘Cau lơi geh tồr làng iăt, gen iăt tĕ.”
Ñchi bơh tài Kơnràñ Jesu ngui ală jơnau pơniơu làng đơs ?
9 Bol jăt-dờn Kơnràñ dê lùp Khai mbe lah jơnau pơniơu hơ̆. * 10 Khai đơs mơ bol khai: ‘‘Neh ai bol kòn in git ală bơta ndơp-ndơr lơgar Yàng, mơya mơ ală cau ndai, gen pal ngui ală jơnau pơniơu, làng bol khai sền mơ ờ gŏ, iăt mơ ờ wă.
Mblàng jơnau pơniơu cau sih gar sơntìl
11 Jơnau pơniơu hơ̆ lah be do: Gar sơntìl lah jơnau đơs Yàng dê. 12 Ală cau dơ gah gùng lah ală cau iăt; lồc gen cà tus mơ tă-tơlik jơnau đơs bơh nùs bol khai, mbài bol khai pindờn mơ geh tơngklàs. 13 Ală cau hơđăng lŭ lah ală cau tŭ iăt, gen chờhờp dờp jơnau đơs; bol do ờ geh rias, lah ală cau pindờn dùl thoa lơm, mơ tam tŭ tơngai tơlòng, bol khai ruc. 14 Gar rung tam lò: bol do lah ală cau iăt, mơ tam tŭ lòt, gen kong lơh gơrềt bơh ală bơta kơlôi-kơnòl, ală bơta pas-sơm mơ ală bơta hàm-kờñ rài kis dê, mơ ờ lơh gơlik plai. 15 Gar rung tam ù niăm: bol do lah ală cau ai nùs niăm mơ ngăn-ngồn iăt jơnau đơs, prăp wơl mơ lơh gơlik plai tam bơta kơ̆-trơyăng.
Mbe lơh dờp mơ lơh gơprà jơnau bơto Kơnràñ Jesu dê ?
16 Ờ geh cau lơi chu đèng mơ ai yăng dơp gơ, ngŏlah ơn tam rồm cơnờng bic, mơya ơn gơ hơđăng jơng đèng làng ală cau mut gŏ bơta àng. 17 Kơyoa ờ geh bơta lơi ndơp mơ ờ geh pờ-tơlik, krung ờ geh bơta lơi pồn mơ ờ cau git, ờ gơlik loh-làng. 18 Be hơ̆, sền ngăc tĕ mbe bol kòn iăt: kơyoa cau lơi geh, gen rơp ai cau hơ̆ in tai; mơ cau lơi ờ geh, gen jơh bơta khai tồn lah geh, krung rơp kong tă-tơlik bơh dơ khai.”
19 Mè mơ ală oh mi Kơnràñ dê tus mơ Khai, mơ bol khai ờ rơgơi tus rềp mơ Khai tài bơh mpồl làng-bol. 20 Geh cau yal mơ Kơnràñ: ‘‘Mè Đi mơ ală oh mi Đi ntào hơ bơdìh kờñ tìp Đi.” 21 Kơnràñ hơ wơl, đơs mơ bol khai: ‘‘Mè Añ mơ ală oh mi Añ lah ală cau iăt jơnau đơs Yàng dê mơ lơh jăt.”
Kơnràñ Jesu lơh dà-lềng gơs ring-drik
22 Gơlik gơs lah dùl ngai ne, Kơnràñ hào ahò mơ bol jăt-dờn Khai dê, mơ đơs mơ bol khai: ‘‘Bol he tiă lă đah bơtĭ ne dà-lềng.” Bol khai was lòt. 23 Tam tŭ bol khai tiă ahò, gen Kơnràñ lơhă bic. Càl-rơbut druh tam dà-lềng, bol khai kong gơlìu dà mơ gơtìp sơrbơng-roh. 24 Bol khai tus pơrlai Kơnràñ mơ đơs: ‘‘Ơ Pôgru, ơ Pôgru, chơt bol he !” Kơnràñ ñă-ntào lah-pơrhơng rơbut mơ dà-lềng, gen gơ ơm thit mơ gơlik gơs ring-drik. 25 Kơnràñ đơs mơ bol khai: ‘‘Ntềng đah nùs pindờn bol kòn dê taih ?” Bol khai rơngòt, ai lơh krơi mơ đơs ndring gơp: ‘‘Cau do lah ñcau, mơ Khai sồr rơbut mơ dà, mơ gơ dờn bơr Khai taih ?”
Kơnràñ Jesu tơmbời cau kong cà lơh tam kơnhoàl bol Gergese
26 Kơnràñ mơ bol jăt-dờn tiă hơ kơnhoàl bol Gergese, tamtoh mơ Galilea, 27 Tŭ Kơnràñ lik hơ tiah, gen geh cau ne bơh bòn dờng tus tìp Khai; cau hơ̆ kong cà lơh, mơ neh jŏ rau ờ soh ào, krung ờ ơm tam hìu, mơya ơm tam brê bồc. 28 Dơ̆ cau hơ̆ gŏ Kơnràñ Jesu, gen khai nggà, bic blup dơđăp Kơnràñ, mơ đơs dờng lah: ‘‘Ñchi jơnau añ mơ mê, ơ Jesu, Kòn Yàng Jơnhoa Rơlau Jơh dê ? Añ dăn mê bañ tơnyăn añ.” 29 Tài bơh Kơnràñ neh sồr huềng bơ̆-bơl lik bơh cau hơ̆. Kơyoa neh rà dơ̆ cà gòc khai, cau ai che sreng mơ gơsàng kơt-kơryăn khai; mơya lồc kơltăc che sreng, khai kong cà tơrhoài tus tam blàng bràs. 30 Kơnràñ Jesu lùp khai mơ đơs: ‘‘Ñchi sơnđăn mê ?” Khai đơs: ‘‘Mpồl ling”, tài bơh geh gal cà mut tam khai. 31 Bol gơ dăn Kơnràñ bañ sồr bol gơ mù tam thòng hùt-hung.
32 Tềng hơ̆, geh mpồl sur gal găm sa tam bơnơm; bol gơ dăn Kơnràñ ai bol gơ in mut tam mpồl hơ̆. Kơnràñ ai bol gơ in. 33 Gen, ală cà lik bơh cau hơ̆ mơ mut tam mpồl sur, mpồl sur bơh kơh ntoat ntruñ tam dà-lềng mơ chơt bŭ. 34 Bol cau ê gŏ bơta gơlik gơs, gen dô mơ yal tam bòn dờng mơ tam ală bòn dêt. 35 Làng-bol lik sền bơta neh gơlik gơs. Bol khai tus mơ Kơnràñ Jesu, gŏ cau mơ cà neh lik bơh khai, găm nggui dơ jơng Kơnràñ Jesu, geh soh ồi-ào mơ geh bồ-tồr ngăn-ngồn, gen bol khai rơngòt. 36 Ală cau neh gŏ yal wơl bol khai in mbe gơlơh cau kong cà lơh geh tơmbời. 37 Jơh làng-bol gal tam kơnhoàl Gergese dăn Kơnràñ lik bơh dơ bol khai, tài bơh bol khai rơngòt-rơngơt ngăn. Kơnràñ hào ahò mơ rê wơl. 38 Cau mơ ală cà neh lik bơh dơ khai, dăn Kơnràñ ai khai in ơm mơ Kơnràñ. Kơnràñ sồr khai rê mơ đơs: 39 ‘‘Rê tĕ hơ hìu mê mơ yal wơl jơh ală bơta Yàng neh lơh mê in.” Khai lòt làm jơh bòn dờng, yal-pơnrơ jơh ală bơta Kơnràñ Jesu neh lơh khai in.
Kơnràñ Jesu tơmbời cau ùr kong gơhùng mhàm, mơ tơngkis wơl kòn ùr Jairo dê
40 Tŭ Kơnràñ Jesu rê wơl, gen mpồl làng-bol wă-rò Khai; kơyoa jơh ală cau găm kơp-gơn Khai. 41 Do geh dùl nă cau sơnđăn lah Jairo lòt tus, khai lah cau ăt-bồ hìu-pơrjum, khai kun să dơ jơng Kơnràñ Jesu, dăn Kơnràñ mut tam hìu khai, 42 tài bơh khai geh dùl nă kòn ùr lơm, di pơgăp jơt bàr sơnăm, mờr chơt. Tam tŭ Kơnràñ lòt, gen ală mpồl làng-bol ntềt dơ Kơnràñ. 43 Geh dùl nă cau ùr ne kong gơhùng mhàm neh jơt bàr sơnăm, neh roh jơh jơtài khai dê dơ bol lơh sơnơm, mơ krung ờ geh cau lơi rơgơi tơmbời khai; 44 khai lòt tus bơh ngkời mơ bư dơ tiăng ào Kơnràñ dê, mơ mhàm khai dê gơ ơm mơ. 45 Kơnràñ Jesu đơs: ‘‘Ñcau neh bư dơ Añ taih ?” Jơh ală cau pơndăng lơm, gen Petro đơs: ‘‘Ơ Pôgru, ală mpồl làng-bol ntềt-pơndiă Đi.” 46 Kơnràñ Jesu đơs: ‘‘Geh cau neh bư dơ Añ; bơh Añ git geh pràn-gơnoar neh gơlik bơh dơ Añ.” 47 Cau ùr gŏ lah khai ờ rơgơi pồn tai, gen rơm ngòt tus kun să dơđăp Kơnràñ, yal-tơlik dơđăp jơh mơ làng-bol bơh jơnau lơi khai neh bư dơ Kơnràñ, mơ mbe lơi khai neh geh bời mơ. 48 Kơnràñ đơs mơ khai: ‘‘Ơ kòn ùr, nùs pindờn ai dê neh tơmbời ai. Lòt tĕ ring-lơngai.”
49 Kơnràñ găm đơs, gen geh cau bơh hìu cau ăt-bồ hìu-pơrjum dê tus mơ đơs: ‘‘Kòn ùr ồng dê neh chơt rau, bañ tơmbòl Pôgru tai.” 50 Kơnràñ Jesu kơno jơnau hơ̆, gen đơs mơ cau ăt-bồ hìu-pơrjum dê: ‘‘Bañ ngòt; mìng pindờn lơm, gen kòn ùr mê rơp geh tơngklàs.” 51 Tŭ tus hơ hìu, Kơnràñ ờ ai cau lơi mut bal mơ Khai, mìng Petro, Joan, Jakobe, bàp mơ mè kòn ùr dê lơm. 52 Jơh ală cau ñìm mơ tur ntơh bơh kòn ùr. Kơnràñ đơs: ‘‘Bañ ñìm; kơyoa khai ờ chơt, mơya khai bic khai dê.” 53 Bol khai ñŏ-tơnhial Kơnràñ, bơh git lah kòn ùr neh chơt rau. 54 Mơya Kơnràñ ăt dơ tê kòn ùr dê, hòi lah: ‘‘Ơ kòn ùr, guh tĕ !” 55 Nhơm kòn ùr dê rê wơl, khai guh mơ; mơ Kơnràñ sồr cau ai khai in sào. 56 Me bàp khai ai lơh crih-crài, mơ Kơnràñ sồr bol khai bañ yal cau lơi in bơta neh gơlik gơs.
