Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Kơnràñ Jesu tơmbời cau dĭ-gơna cau kuang ăt-rơhiăng dê
7 1 Tŭ Kơnràñ neh đơs jơh ală jơnau hơ̆ làng-bol in iăt rau, gen Khai mut tam Kapharnaum. 2 Geh cau dĭ-gơna cau kuang ăt-rơhiăng ne kòp jroă mờr chơt, mơ cau kuang gơboh ngăn mơ cau dĭ hơ̆. 3 Dơ̆ kơno gơrềng bơh Kơnràñ Jesu, khai pơyoa bol kuang kra làng-bol Jude dê tus mơ Kơnràñ, dăn Kơnràn tus mơ tơmbời cau dĭ-gơna khai dê. 4 Bol khai tus mơ Kơnràñ Jesu, khoai dăn Kơnràñ mơ đơs: ‘‘Khai di-pal làng Đi ai khai in bơta hơ̆: 5 bơh khai gơboh mơ làng-bol he, mơ tờm khai băc hìu-pơrjum he in.” 6 Kơnràñ Jesu lòt bal mơ bol khai. Mơya tŭ Kơnràñ ờ tai ngài mơ hìu, gen cau kuang ăt-rơhiăng pơyoa bol gơp-bơyô tus đơs mơ Kơnràñ: ‘‘Ơ Kơnràñ, bañ bòl tai; kơyoa añ ờ pal làng Đi mut tam hìu añ, 7 krung tài bơh hơ̆, añ kơlôi lah añ ờ pal làng tus mơ Đi; mơya dăn Đi đơs dùl bơr, gen kơnòm añ rơp geh tơmbời. 8 Kơyoa añ lah cau ơm hơđơm gơnoar, mơ krung geh bol ling hơđơm añ, añ đơs mơ cau do : ‘‘Lòt tĕ”, gen khai lòt; mơ cau ne: ‘‘Tus tĕ”, gen khai tus; mơ cau duh-broă añ: ‘‘Lơh tĕ broă do”, gen khai lơh.” 9 Kơno be hơ̆, Kơnràñ Jesu ai lơh krơi bơh khai, mơ wơlke đơs mơ ală mpồl làng-bol găm jăt he: ‘‘Añ đơs mơ bol mê, tam Israel, Añ krung ờ gŏ nùs pindờn dờng be hơ̆ !” 10 Rê hìu, bol cau neh geh pơyoa lòt, gŏ cau duh-broă neh bời.
Kơnràñ Jesu tơngkis wơl kòn klau cau ùr-bàng dê
* 11 Gơlik gơs lah, tơnơ̆ hơ̆, Kơnràñ lòt hơ bòn dờng ne hòi lah Naim, geh bol jăt-dờn mơ mpồl làng-bol oă rà lòt bal mơ Khai. 12 Tŭ Kơnràñ tus rềp dơ mpồng bòn dờng, gen do cau tùng tơlik dùl nă cau chơt, lah kòn klau dùl-lơm mè khai dê; mơ cau do lah ùr-bàng, geh mpồl làng-bol gal tam bòn dờng lòt bal mơ khai. * 13 Tŭ Kơnràñ gŏ khai, gen nđàc-sơngit mơ đơs: ‘‘Bañ ñìm !” 14 Mơ Kơnràñ tus rềp, bư dơ gơbăng; ală cau tùng ơm wơl. Kơnràñ đơs: ‘‘Ơ cau pơnu, Añ sồr mê: Guh tĕ !” 15 Cau neh chơt nggui wơl mơ sơntờm đơs; Kơnràñ jào khai dơ mè khai. 16 Jơh tơl nă gơlơh rơngòt, yal-jờng Yàng mơ đơs: ‘‘Dùl nă cau ala-bơr dờng neh guh tam bol he” mơ: ‘‘Yàng neh còp-cùl làng-bol Khai dê.” 17 Jơnau do gơ pơnrơ làm Judea mơ jơh tiah gùt dar.
Jơnau lùp Joan Baptista dê mơ jơnau hơ wơl Kơnràñ Jesu dê
18 Bol jăt-dờn Joan dê yal khai in jơh ală jơnau hơ̆. 19 Joan hòi bàr nă tam bol jăt-dờn khai dê, pơyoa tus mơ Kơnràñ mơ đơs: ‘‘Đi lah Bơtau pal tus ờ, ngŏlah bol hi pal kơp cau ndai ?” 20 Tŭ bol hơ̆ tus mơ Kơnràñ, gen đơs lah: ‘‘Joan Baptista pơyoa bol hi tus mơ Đi mơ đơs: ‘‘Đi lah Bơtau pal tus ờ, ngŏlah bol hi pal kơp cau ndai ?”‘‘ 21 Tam jiờ hơ̆, Kơnràñ tơmbời gal cau bơh ală bơta kòp-tê jê-să, lơbơn-lơñơ, huềng-iơh, mơ ai gal cau jơngo in gŏ. 22 Hơ wơl, Kơnràñ đơs mơ bol khai: ‘‘Bol mê lòt yal tĕ Joan in ală bơta bol mê neh gŏ mơ kơno: bol jơngo gŏ, bol pă lòt, bol lut-dun geh lơh goh, bol tĭ kơno, bol chơt kis wơl, bol rơbah geh yal Jơnau Yal Niăm, 23 mơ bơtoah cau lơi ờ gơtup tìs tài bơh Añ.”
24 Tŭ bol cau geh Joan pơyoa tus neh rê, Kơnràñ sơntờm đơs mơ ală mpồl làng-bol gơrềng bơh Joan: ‘‘Ñchi bol mê neh lik-lòt sền tam blàng bràs taih ? Tờm proh càl lơh gơ ơwañ ơ ? 25 Gen ñchi bol mê neh lik-lòt sền taih ? Cau soh ào biài lơbơn ơ ? Do, bol cau soh ào kas-màng mơ ơm kis pas-bơnàr, gen ơm tam hìu bol bơtau. 26 Gen ñchi bol mê neh lik-lòt sền taih ? Cau ala-bơr ơ ? Di be hơ̆, Añ đơs mơ bol mê, rơlau mơ cau ala-bơr tai. * 27 Do lah cau mơ gơrềng bơh khai neh geh cih:
‘‘Do Añ pơyoa huềng-duh Añ dê lòt dơđăp măt mê, Khai rơp rơcăng gùng mê dê dơđăp mê.”
28 Añ đơs mơ bol mê: Tam gùl bol cau deh bơh cau ùr, ờ geh cau lơi dờng rơlau mơ Joan; mơya cau dêt rơlau tam lơgar Yàng, gen dờng rơlau mơ khai. 29 Jơh làng-bol, mơ bol dar dia tai, tŭ kơno Joan, gen dờp Yàng lah song-dơpă, tam tŭ geh pơnđum mơ bơta pơnđum Joan dê; 30 ai bol Phariseo mơ bol jăk gùng boh-lăm, gen ờ dờp bơta kơlôi-rơndăp Yàng dê dơ bol khai, tŭ ờ dờp bơta pơnđum bơh Joan.
Kơnràñ Jesu pơndrờm rơnàng Khai dê
31 Be hơ̆, Añ pal pơndrờm ală cau jơi-nòi do dê mơ ñcau taih ? Bol khai ndrờm be ñcau taih ? 32 Bol khai ndrờm be bol kơnòm nggui tam drà mơ đơs ndring bol khai lah:
‘‘Bol hi neh uh kơwào bol mê in, mơ bol mê ờ tamya; bol hi neh rơnđơh-rơnđìng, mơ bol mê ờ ñìm !”
33 Kơyoa Joan Baptista neh tus, ờ sa bañ, ờ ñô alăk, gen bol mê đơs: ‘‘Khai kong cà lơh !” 34 Kòn kòn-bơnus tus, sào sơl, ñô sơl, gen bol mê đơs: ‘‘Do cau jròk sa, jròk ñô alăk, gơp-bơyô mơ bol dar dia, mơ bol tìs-glài !” * 35 Mơya bơta jăk-chài geh dờp lah song-dơpă bơh ală kòn he dê.”
Cau ùr tìs-glài neh geh hồ, mơ neh gơboh oă rà mơ Kơnràñ
36 Geh cau tam bol Phariseo jà Kơnràñ sào bal mơ khai; Kơnràñ mut tam hìu cau Phariseo mơ ơm dơ cơnờng sào. 37 Do geh dùl nă cau ùr lah cau tìs-glài tam bòn dờng, git lah Kơnràñ ơm dơ cơnờng sào tam hìu cau Phariseo, gen cèng tus dùl nơm gri lŭ màng ơn bơñà; 38 khai ntào bơh tơnơ̆, rềp dơ jơng Kơnràñ mơ ñìm, sơntờm lơh sùh jơng Kơnràñ mơ dà măt, mơ jùt mơ sŏ bồ khai dê; khai cum jơng Kơnràñ mơ bong mơ bơñà.
39 Gŏ be hơ̆, cau Phariseo neh jà Kơnràñ, đơs is lah: ‘‘Dilah cau do lah cau ala-bơr, gen git cau ùr bư dơ khai lah cau lơi mơ be lơi, lah cau tìs-glài.” 40 Hơ wơl, Kơnràñ Jesu đơs mơ khai: ‘‘Ơ Simon, Añ geh jơnau đơs mơ mê.” Khai đơs: ‘‘Ơ Pôgru, đơs tĕ.” 41 ‘‘Dùl nă cau ai càn ne geh bàr nă cau kòl dồs: dùl nă kòl dồs prăm rơhiăng đong priă, dùl nă prăm jơt. 42 Tài bơh bol khai ờ geh chi lơi tơm wơl, tàng khai săng ngò jơh bàr nă in. Be hơ̆, ñcau tam bol khai gơboh mơ khai rơlau ?” 43 Hơ wơl, Simon đơs: ‘‘Añ kơlôi lah cau mơ khai neh săng ngò cau hơ̆ in oă rơlau.” Kơnràñ đơs mơ Simon: ‘‘Mê kơlôi di ngăn.” 44 Wơlke dơ cau ùr, Kơnràñ đơs mơ Simon: ‘‘Mê gŏ cau ùr do sơl ờ ? Añ mut tam hìu mê: mê ờ ai dà rào jơng Añ in; mơya cau ùr do lơh sùh jơng Añ mơ dà măt, mơ jùt mơ sŏ khai. 45 Mê ờ cum Añ; mơya cau ùr do bơh dơ tŭ Añ mut, ờ dơh cum jơng Añ. 46 Mê ờ bong bồ Añ mơ bơñà; mơya cau ùr do bong jơng Añ mơ bơñà bô bơlhu. * 47 Bơh hơ̆, Añ đơs mơ mê: Tìs-glài khai dê oă rà neh geh hồ, tài bơh khai gơboh oă rà; ai cau lơi geh hồ dŭt, gen gơboh dŭt.” 48 Kơnràñ đơs mơ cau ùr: ‘‘Tìs-glài ai dê neh geh hồ rau.” 49 Ală cau ơm bal dơ cơnờng sào sơntờm đơs ndring gơp: ‘‘Cau do lah ñcau mơ hồ tìs-glài taih ?” 50 Mơya Kơnràñ đơs mơ cau ùr: ‘‘Nùs pindờn ai dê neh tơngklàs ai; lòt tĕ ring-lơnngai !”
