Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bol jăt-dờn pet ală nting kòi sa tam ngai sabbat
6 1 Gơlik gơs lah tam ngai sabbat, tŭ Kơnràñ lòt găn sre kòi, bol jăt-dờn Khai dê pet ală nting kòi, ai tê rơpau mơ sa. 2 Dŭt cau tam bol Phariseo đơs: ‘‘Ñchi bơh tài bol mê lơh bơta ờ geh lơh tam ngai sabbat taih ?” 3 Hơ wơl, Kơnràñ Jesu đơs mơ bol khai: ‘‘Bol mê neh ờ đal bơta Davit neh lơh, tŭ khai jơgloh, khai mơ bol cau ơm bal mơ khai ơ ? 4 Mbe lơi khai neh mut tam hìu Yàng dê, mơ neh ai bañ pơdơng mơ sa, mơ pà bol cau ơm bal mơ khai, bañ hơ̆ ờ cau lơi geh sa, mìng bol lơh-yàng lơm ?” 5 Kơnràñ đơs mơ bol khai: ‘‘Kòn kòn-bơnus lah Kơnràñ ngai sabbat dê.”
Kơnràñ Jesu tơmbời cau lơng tê tam ngai sabbat
6 Gơlik gơs lah tam ngai sabbat ndai, tŭ Kơnràñ mut tam hìu-pơrjum mơ bơto; tềng hơ̆ geh dùl nă cau lơng tê ma. 7 Bol gơnoar-cih mơ bol Phariseo kơp sền Kơnràñ tơmbời tam ngai sabbat ngŏlah ờ, làng jòi kai yă Khai. 8 Kơnràñ git ală jơnau kơlôi bol khai dê, gen đơs mơ cau geh tê lơng: ‘‘Ñă tĕ mơ ntào dơ gùl.” Khai ñă-ntào. 9 Kơnràñ Jesu đơs mơ bol khai: ‘‘Añ lùp bol mê, tam ngai sabbat geh lơh bơta niăm ngŏlah bơta iơh, tơngklàs bơta kis ngŏlah tơnroh taih ?” 10 Sền làm jơh ală bol khai, Kơnràñ đơs mơ cau lơng tê: ‘‘Tơlik tĕ tê mê.” Khai lơh be hơ̆; mơ tê khai geh tơmbời. 11 Bol khai bềng nùs gơjrañ mơ bơyai ndring bol khai ñchi lơh mơ Kơnràñ Jesu.
Kơnràñ Jesu rơwah Jơt Bàr nă cau dờp-pơyoa
12 Gơlik gơs lah tam ală ngai hơ̆, Kơnràñ lik-lòt tam bơnơm răc dăn, mơ Khai drơng jơh măng răc dăn mơ Yàng. 13 Tus àng drim, Khai hòi bol jăt-dờn Khai dê mơ rơwah Jơt Bàr nă tam bol khai, mơ hòi lah bol dờp-pơyoa. 14 Simon mơ Khai sơnđăn lah Petro, Andrea oh khai, Jakobe, Joan, Philippe, Bartolomeo, 15 Mattheo, Toma, Jakobe kòn Alphe, Simon hòi lah Zelote, 16 Juda kòn Jakobe, mơ Juda Iskarioth lah cau pơrlơ̆-dră.
Làng-bol tus mơ Kơnràñ Jesu
17 Kơnràñ mù bal mơ bol khai, ntào dơ tiah blàng, geh mpồl gal bol jăt-dờn Khai dê, mơ oă rà làng-bol bơh làm Judea, Jerusalem mơ gah dà-lềng Tyro mơ Sidon, 18 tus làng iăt Khai mơ geh tơmbời bơh ală bơta kòp-tê jê-să bol khai dê; ală cau kong cà lơh bòl-glar krung geh tơmbời sơl. 19 Jơh mpồl làng-bol jòi gùng bư dơ Kơnràñ, tài bơh pràn-gơnoar lik bơh Khai mơ tơmbời jơh ală cau.
Phàm bơta bơtoah
* 20 Kơnràñ tơngờ măt hơ bol jăt-dờn Khai dê mơ đơs: ‘‘Bơtoah bol cau rơbah, bơh lơgar Yàng lah bol kòn dê,
21 Bơtoah bol cau tŭ do jơgloh, bơh bol kòn rơp hờm. Bơtoah bol cau tŭ do ñìm, bơh bol kòn rơp ñŏ,
22 Bơtoah bol kòn in tŭ cau gơjrañ mơ bol kòn, tŭ cau cah is bol kòn, bơtăt-bơtrờh bol kòn, mơ tă-tơlik sơnđăn bol kòn be bơta iơh tài bơh Kòn kòn-bơnus. 23 Tam ngai hơ̆, bol kòn chờhờp mơ rơhờn tĕ, kơyoa do phan-jờng bol kòn dê rà ngăn tam trồ; tài bơh ồng-pàng bol khai neh lơh bol ala-bơr in be hơ̆ sơl.
Ală bơta dồn-sa
24 Mơya dồn-sa bol mê in lah bol pas-sơm, bơh bol mê geh bơta pơndờm-pơnđiăng bol mê dê rau !
25 Dồn-sa bol mê in lah bol tŭ do hờm, bơh bol mê rơp jơgloh ! Dồn-sa bol mê in lah bol tŭ do ñŏ, bơh bol mê rơp moăt-jrùng mơ ñìm-răc !
26 Dồn-sa, tŭ jơh ală cau đơs niăm bol mê in ! Tài bơh ồng-pàng bol khai neh lơh bol ala-bơr blăc in be hơ̆ sơl.
Gơboh mơ bol sò-tơm
27 Mơya Añ đơs mơ bol kòn lah bol iăt: Gơboh tĕ mơ bol sò-tơm bol kòn dê, lơh niăm tĕ bol gơjrañ mơ bol kòn in; 28 yalniăm tĕ bol đơs iơh bol kòn in, răc dăn tĕ bol pơrdah bol kòn in. 29 Cau lơi pah kòn dơ tơrmồ, gen ai tĕ khai in đah ne tai; mơ cau lơi ai ào bơdìh kòn, gen bañ kơryăn khai ai tơn ào dơlăm. 30 Cau lơh dăn mơ kòn, gen ai tĕ; cau lơi ai ală phan kòn dê, gen bañ lùp wơl. 31 Bol kòn kờñ cau lơh bol kòn in be lơi, gen lơh tĕ bol khai in krung be hơ̆ sơl. 32 Dilah bol kòn gơboh mơ bol cau gơboh mơ bol kòn, gen bol kòn geh bơta niăm nùs lơi taih ? Bơh bol tìs-glài krung gơboh mơ bol cau gơboh mơ bol khai sơl. 33 Mơ dilah bol kòn lơh niăm bol cau lơh niăm bol kòn in, gen bol kòn geh bơta niăm nùs lơi taih ? Bơh bol tìs-glài krung lơh be hơ̆ sơl. 34 Dilah bol kòn ai bol cau lơi in càn, mơ bol kòn kơnờm dờp wơl bơh bol khai, gen bol kòn geh bơta niăm nùs lơi taih ? Bơh bol tìs-glài krung ai bol tìs-glài in càn làng dờp wơl song-ring sơl.
35 Mơya bol kòn gơboh tĕ mơ bol sò-tơm bol kòn dê, lơh niăm tĕ, ai càn tĕ mơ ờ kơnờm chi lơi; phan-jờng bol kòn dê rơp oă rà, mơ bol kòn rơp gơs kòn Bơtau Jơnhoa Rơlau Jơh dê, tài bơh Khai niăm-lơhơn mơ bol ờ git ưn-ngài, mơ bol iơh-bơsăk.
Pal geh nùs nđàc-sơngit
36 Bol kòn nđàc-sơngit tĕ be Bàp bol kòn nđàc-sơngit. 37 Bol kòn bañ cah-rơña, gen bol kòn rơp ờ kong cah-rơña; bol kòn bañ yal-glài, gen bol kòn rơp ờ kong yal-glài. Bol kòn hồ-lời tĕ, gen bol kòn rơp geh hồ-lời; 38 bol kòn pà tĕ, gen cau rơp pà bol kòn in: cau rơp pà dơ ntơh bol kòn kơrnăc niăm, neh jơlềt, neh rơnggô, mơ bềng lìu; tài bơh cau rơp was wơl bol kòn in krung mơ kơrnăc bol kòn neh was.”
Cau jơngo lăm cau jơngo.
Pet khoh mơ ròc-dra.
* 39 Kơnràñ đơs mơ bol khai jơnau pơniơu do tai: ‘‘Cau jơngo rơgơi lăm cau jơngo ơ ? Jơh bàr ờ dùh tam tơrluh ơ ?
40 Cau jăt-dờn ờ rơlau mơ cau pôgru; niăm wil-tơl lah tơl cau rơp gơs be cau pôgru bol khai dê.
41 Ñchi bơh tài mê gŏ dùl pet khoh tam măt oh mi mê, ai ròc-dra gơ ơm tam măt mê, mê ờ sền ? 42 Mbe lơh mê rơgơi đơs mơ oh mi mê: ‘‘Ơ bi, lời añ tă pet khoh gơ ơm tam măt mê”, tŭ să tờm mê ờ gŏ ròc-dra tam măt mê taih ? Ơ cau blăc-să, lài jơh tă tĕ ròc-dra bơh măt mê, mơ tŭ hơ̆ mê rơp gŏ loh, làng tă pet khoh gơ ơm tam măt oh mi mê.
Chi be lơi plai be hơ̆
43 Ờ geh chi niăm gơlik plai iơh, krung ờ geh chi iơh gơlik plai niăm. 44 Kờp tờm chi geh git bơh plai gơ dê; kơyoa cau ờ pic plai sơr bơh dơ rơlau lò, krung ờ pic plai ño bơh dơ tờm lò. 45 Cau niăm tơlik bơta niăm bơh tam đăm niăm nùs khai dê, cau iơh tơlik bơta iơh bơh tam đăm iơh: kơyoa bơh nùs bềng lìu, gen bơr đơs.
Pal lơh jăt jơnau Kơnràñ Jesu bơto
46 Ñchi bơh tài bol mê hòi Añ: ‘‘Ơ Kơnràñ, ơ Kơnràñ”, mơ bol mê ờ lơh ală bơta Añ đơs taih ? 47 Cau lơi tus mơ Añ, iăt ală jơnau bơto Añ dê mơ lơh jăt, gen Añ rơp sơnđio bol mê in git khai gơs ndrờm be cau lơi: 48 khai gơs ndrờm be cau băc hìu neh tờ jrô mơ ơn bơnàng hơđăng lŭ; dà tih gơguh, gơkoa hìu hơ̆, krung ờ rơgơi lơh gơ ơwañ, bơh hìu hơ̆ neh geh băc niăm. 49 Ai cau lơi iăt mơ ờ lơh jăt, gen gơs ndrờm be cau băc hìu khai hơđăng ù ờ geh bơnàng; dà gơkoa hìu hơ̆, mơ hìu hơ̆ tơrlah mơ, mơ gơ tơrlah-tơrlơm oă ngăn.”
