Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Kơnràñ Jesu hòi poan nă cau jăt-dờn sơnrờp
5 1 Gơlik gơs lah, tam tŭ Kơnràñ ơm ntào dơ gah dà-lềng Genesareth, mpồl làng-bol ntềt dơ Khai làng iăt jơnau Yàng dê. 2 Khai gŏ bàr nơm ahò ơm dơ gah dà-lềng, ai bol kup ka neh lik bơh gơ mơ găm rào bơrtơng. 3 Kơnràñ hào tam dùl nơm ahò, ahò Simon dê, dăn khai was ngài dŭt bơh dơ gah, mơ nggui bơto ală mpồl làng-bol bơh ahò.
4 Dơ̆ Kơnràñ neh bơto rau, gen sồr Simon: ‘‘Was tĕ dơ tiah jrô mơ dăng tĕ bơrtơng kup ka.” 5 Hơ wơl, Simon đơs: ‘‘Ơ Pôgru, bol hi neh lơh broă bòl-glar măng-àng tơn mơ ờ geh chi lơi; mơya bơh bơr Đi dê, añ rơp dăng bơrtơng.” 6 Bol khai neh lơh be hơ̆, neh kup oă rà ka; mơ bơrtơng bol khai mờr gơcrè. 7 Bol khai kuời tê bol gơp in găm ơm tam ahò ndai, làng bol hơ̆ tus kờl bol khai; bol hơ̆ tus mơ tơmbềng bàr nơm ahò, tiăn tus mờr gơkrăm. 8 Tŭ Simon Petro gŏ be hơ̆, khai kun să dơ jơng Kơnràñ Jesu mơ đơs: ‘‘Ơ Kơnràñ, dăn pleh ngài bơh añ, tài bơh añ lah cau tìs.” 9 Kơyoa tŭ gŏ ka pa kup, bơta nrơt-dơl gơglòm khai mơ jơh ală cau ơm bal mơ khai. 10 Jakobe mơ Joan, bàr nă kòn Zebede dê, lah bol gơp Simon dê, krung be hơ̆ sơl. Kơnràñ đơs mơ Simon : ‘‘Bañ ngòt; bơh ndo mê rơp gơs cau kup bơnus.” 11 Was ahò rê hơ gah rau, lời jơh ală bơta, bol khai jăt Kơnràñ.
Kơnràñ Jesu tơnggoh cau dun
12 Gơlik gơs lah, tam tŭ Kơnràñ ơm tam dùl bòn dờng ne, gen do geh dùl nă cau bềng sồt dun; gŏ Kơnràñ Jesu, khai tơmbic să, dăn Kơnràñ mơ đơs: ‘‘Ơ Kơnràñ, dilah Đi kờñ, Đi rơgơi tơnggoh añ.” 13 Yơr tê, Kơnràñ bư dơ khai mơ đơs: ‘‘Mê gơs goh tĕ !” Tŭ hơ̆ mơ, sồt dun lik bơh khai. 14 Kơnràñ sồr khai bañ yal mơ cau lơi, mơya: ‘‘Lòt tĕ sơnđio să mơ cau lơh-yàng, mơ tài bơh mê neh geh tơnggoh, gen pơdơng tĕ phan be Moise neh sồr, làng gơs cơng bol khai in.” 15 Tiơng-pơnrơ bơh Khai sơlơ ngai sơlơ gơrề, mơ gal mpồl làng-bol tus làng iăt mơ geh tơmbời bơh ală bơta kòp-jê bol khai dê; 16 mơya Khai ruc lòt tam blàng bràs mơ răc dăn.
Kơnràñ Jesu tơmbời cau kuet-kơlte
17 Gơlik gơs lah, dùl ngai ne, Kơnràñ găm bơto, mơ geh bol Phariseo mơ bol jăk gùng boh-lăm nggui tềng hơ̆; bol hơ̆ neh tus bơh ală bòn tam Galilea, Judea mơ Jerusalem; pràn-gơnoar Kơnràñ dê ơm mơ Khai làng tơmbời kòp-jê. 18 Do geh bol cau tùng hơđăng cơnờng dùl nă cau kuet-kơlte, jòi gùng tơmut khai mơ ơn dơđăp Kơnràñ. 19 Tài bơh mpồl làng-bol, bol hơ̆ ờ gŏ gùng lơi làng tơmut cau kơlte, tàng bol khai hào hơđăng rơkàng, pồ kiă tơmù khai bal mơ cơnờng dơ gùl, dơđăp Kơnràñ Jesu. 20 Gŏ nùs pindờn bol khai dê, Kơnràñ đơs: ‘‘Ơ cau, ală tìs mê dê geh hồ mê in rau.” 21 Bol gơnoar-cih mơ bol Phariseo sơntờm kơlôi mơ đơs: ‘‘Cau đơs tràl-sơrbil do lah ñcau taih ? Ñcau mơ rơgơi hồ ală tìs, dilah ờ mìng Yàng lơm ?” 22 Kơnràñ Jesu git ală jơnau kơlôi bol khai dê, gen hơ wơl mơ đơs mơ bol khai: ‘‘Ñchi bol mê kơlôi tam nùs bol mê taih ? 23 Ñchi buơn rơlau, đơs: ‘‘Ală tìs mê dê geh hồ mê in rau”, ngŏlah đơs: ‘‘Ñă tĕ mơ lòt” ? 24 Mơya làng bol mê git lah Kòn kòn-bơnus tam tiah geh gơnoar hồ ală tìs – Kơnràñ đơs mơ cau kuet-kơlte -: Añ sồr mê: Ñă tĕ, tui tĕ cơnờng mê dê mơ rê hìu mê.” 25 Tŭ hơ̆ mơ, cau kuet-kơlte ñă-ntào dơđăp bol khai, tui chi khai bic, rê hìu khai mơ jờngrơ Yàng. 26 Jơh ală cau ai lơh crih-crài mơ jờngrơ Yàng; bol khai rơngòt-rơngơt mơ đơs: ‘‘Ngai do, bol he neh gŏ ală bơta krơi-sơrbơi.”
Kơnràñ Jesu hòi Levi
27 Tơnơ̆ hơ̆, Kơnràñ lik-lòt, gŏ dùl nă cau dar dia sơnđăn lah Levi nggui tam hìu dar dia, mơ đơs mơ khai : ‘‘Jăt tĕ Añ !” 28 Khai lời jơh ală bơta, ñă-ntào, jăt Kơnràñ.
Kơnràñ Jesu sào-sa bal mơ bol tìs-glài tam hìu Levi
29 Levi yờ ñô-sa dờng Kơnràñ in tam hìu khai; mơ geh mpồl gal bol dar dia mơ bol ndai nggui sào bal mơ bol khai. 30 Bol Phariseo mơ bol gơnoar-cih bol khai dê kơmrào tamdră mơ bol jăt-dờn Kơnràñ dê mơ đơs: ‘‘Ñchi bơh tài bol mê ñô-sa bal mơ bol dar dia mơ bol tìs-glài taih ?” 31 Hơ wơl, Kơnràñ Jesu đơs mơ bol khai: ‘‘Bol pràn-kơldăng ờ càng cau lơh sơnơm, mơya lah bol kòp-jê. 32 Añ ờ tus hòi bol song-dơpă, mơya hòi bol tìs-glài ềng-màl.”
Tam pơndăng gơrềng bơh bơta ơt-sa
33 Bol khai đơs mơ Kơnràñ: ‘‘Bol jăt-dờn Joan dê ờs ơt-sa mơ răc dăn, bol jăt-dờn bol Phariseo dê krung ndrờm be hơ̆ sơl; ai bol jăt-dờn Đi dê ñô mơ sa.” 34 Kơnràñ Jesu đơs mơ bol khai: ‘‘Bol mê rơgơi sồr bol năc ñô-bao ơt-sa, tam tŭ cau bơrtơu găm ơm bal mơ bol khai ơ ? 35 Mơya rơp tus ală ngai, tŭ cau bơrtơu kong tă-tơlik bơh bol khai, tŭ hơ̆ bol khai rơp ơt-sa tam ală ngai hơ̆.” 36 Kơnràñ đơs tai jơnau pơniơu mơ bol khai: ‘‘Ờ geh cau lơi crè pơnồ bơh ào tơme mơ tambồl dơ ào klar; dilah be hơ̆, ào tơme gơsèt, mơ pơnồ bơh ào tơme krung ờ gơdờp mơ ào klar. 37 Ờ geh cau lơi tròc tơrnờm pa tam ală kơldung gơltau yau; dilah be hơ̆, tơrnờm pa lơh bơcah ală kơldung gơltau, tơrnờm gơtuh, mơ ală kơldung gơltau roh sơl; 38 mơya tơrnờm pa pal ơn tam ală kơldung gơltau pa. * 39 Ờ geh cau lơi ñô tơrnờm yau, mơ kờñ tơrnờm pa; kơyoa khai đơs: ‘‘Tơrnờm yau niăm rơlau !”‘‘
