Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Kơnràñ Jesu kong cà tơlòng
4 * 1 Kơnràñ Jesu bềng Yàng Nhơm, rê wơl bơh Jordano, mơ geh Nhơm lăm tus tam blàng bràs 2 tam poan jơt ngai mơ kong cà tơlòng. Khai ờ sa chi lơi tam ală ngai hơ̆, mơ tŭ ală ngai hơ̆ neh tơl rau, gen Khai jơgloh. 3 Cà đơs mơ Khai: ‘‘Dilah mê lah Kòn Yàng dê, gen sồr tĕ pơnai lŭ do gơs bañ.” 4 Kơnràñ Jesu hơ wơl mơ gơ: ‘‘Neh geh cih: ‘‘Kòn-bơnus kis ờ di mìng bơh bañ lơm.”‘‘ 5 Cà cèng Kơnràñ guh mơ sơnđio Khai in jơh ală lơgar tam plai ù tam dùl mbrơs măt; 6 mơ cà đơs mơ Kơnràñ: ‘‘Añ rơp pà mê in jơh gơnoar do mơ bơta gơklŏ ală lơgar dê, kơyoa gơ neh geh jào añ in, mơ añ pà gơ cau lơi in añ kờñ: 7 be hơ̆ mê, dilah mê duh-khoai dơđăp añ, gen ală bơta hơ̆ rơp gơrê jơh mơ mê.” 8 Hơ wơl, Kơnràñ Jesu đơs mơ cà: ‘‘Neh geh cih: ‘‘Mê pal duh-khoai Kơnràñ Yàng mê dê, mơ duh-broă mìng Khai lơm.”‘‘ 9 Cà cèng Kơnràñ tus tam Jerusalem, ơn Khai hơđăng bồ joc hìu duh-khoai, mơ đơs mơ Khai: ‘‘Dilah mê lah Kòn Yàng dê, gen ntruñ tĕ bơh tềng do dơ tiah. 10 Kơyoa neh geh cih:
‘‘Bơh mê, Yàng rơp sồr bol huềng-duh Khai dê, làng bol khai prăp-gàr mê”
11 mơ: ‘‘Bol khai rơp ai tê đơ mê, mbài mê gơtup jơng dơ lŭ.”‘‘
12 Hơ wơl, Kơnràñ Jesu đơs mơ gơ : ‘‘Neh geh đơs: ‘‘Mê bañ tơlòng Kơnràñ Yàng mê dê.”‘‘ * 13 Dơ̆ neh lơh sir-tơl bơta tơlòng, cà lời Kơnràñ jơl tus tŭ tơngai.
KƠNRÀÑ JESU YAL-BƠTO TAM GALILEA
Kơnràñ Jesu sơntờm yal-bơto
14 Kơnràñ Jesu rê wơl tam Galilea mơ pràn-gơnoar Huềng Nhơm dê, mơ tiơng-pơnrơ Khai dê gơrề làm jơh kơnhoàl. 15 Khai bơto tam ală hìu-pơrjum bol khai dê, mơ geh jơh ală cau tơngklŏ.
Kơnràñ Jesu tam Nazareth
* 16 Khai tus tam Nazareth, tềng hơ̆ Khai neh geh siăm-ròng, mơ jăt be bơta ờs-mờng Khai dê, ngai sabbat Khai mut tam hìu-pơrjum, mơ ñă-ntào đal sră. 17 Cau jào Khai in sră Isaia, cau ala-bơr; mơ tŭ pờ sră, Khai gŏ păng tềng hơ̆ neh geh cih:
18 ‘‘Nhơm Kơnràñ dê hơđăng añ; tài bơh Khai neh bong jiờu añ in, pơyoa añ yal Jơnau Yal Niăm bol rơbah in, yal-pơnrơ bơta hồ-lời bol kong jàm in, bơta àng măt bol jơngo in, ai bol kong rồn-bơklơn in geh khăt-gơboh.
19 yal-pơnrơ sơnăm hàng-goh Kơnràñ dê.”
20 Kơnràñ dơp sră, jào wơl dơ cau dong-broă mơ nggui; mơ măt jơh ală cau tam hìu-pơrjum wèt hơ Khai. 21 Kơnràñ sơntờm đơs mơ bol khai: ‘‘Ngai do, jơnau Sră Goh do dơ tồr bol mê neh gơlik gơs di ngăn.” 22 Jơh ală cau lơh cơng Kơnràñ in, mơ ai lơh krơi bơh ală jơnau đơs bơta hàng-goh dê lik bơh bơr Khai, mơ bol khai đơs: ‘‘Hơ̆ ờ di lah kòn Joseph ơ ?” 23 Kơnràñ đơs mơ bol khai: ‘‘Ngăn, bol mê rơp đơs mơ Añ jơnau pơnđik do: ‘‘Ơ cau lơh sơnơm, tơmbời tĕ să tờm mê; ală bơta bol hi kơno neh geh lơh tam Kapharnaum, mê lơh tĕ tềng do, tam bòn tờm mê dê.”‘‘ 24 Kơnràñ đơs tai: ‘‘Di ngăn, Añ đơs mơ bol mê: Ờ geh cau ala-bơr lơi geh wă-dờp tam bòn tờm he dê. 25 Ngăn, Añ đơs mơ bol mê: Geh gal cau ùr-bàng tam Israel, rài Elia, tŭ trồ gơtil tam pe sơnăm prau kơnhai, tam tŭ gơlik gơs jơgloh-rung dờng làm jơh ù-tiah; 26 mơ Elia ờ geh pơyoa tus mơ cau lơi tam bol hơ̆, mìng mơ cau ùr-bàng tam Sarepta, lơgar Sidon lơm. 27 Geh gal cau lut-dun tam Israel, rài cau ala-bơr Eliseo; mơ ờ geh cau lơi tam bol khai geh tơmbời, mìng Naaman, cau Syria lơm.”
28 Jơh ală cau tam hìu-pơrjum kơno ală jơnau hơ̆, gen bềng bơta gơjrañ; 29 bol khai ñă-ntào, tơlik Kơnràñ hơ bơdìh bòn dờng, cèng Khai tus hơ bồ bơnơm, hơđăng hơ̆ băc-bơtào bòn dờng bol khai dê làng tơndùh Khai. 30 Mơya Kơnràñ găn dơ gùl bol khai mơ lòt.
Kơnràñ Jesu yal-bơto tam Kapharnaum, mơ tơmbời cau kong huềng cà bơ̆-bơl lơh
31 Kơnràñ mù hơ Kapharnaum, bòn dờng lơgar Galilea dê. Khai bơto bol khai tam ngai sabbat; 32 mơ bol khai ai lơh crih-crài bơh jơnau bơto Khai dê, tài bơh jơnau bơto Khai dê geh gơnăp-gơnoar. 33 Tam hìu-pơrjum, geh cau kong huềng cà bơ̆-bơl lơh; gơ tơnggà dờng lah: 34 ‘‘Ñchi jơnau bol hi mơ Đi, ơ Jesu Nazareth ? Đi tus tơnroh bol hi ơ ? Añ git Đi lah Bơtau lơi: lah Bơtau niăm-goh Yàng dê.” 35 Kơnràñ Jesu lah-pơrhơng gơ mơ đơs: ‘‘Ơm momŏ mơ lik tĕ bơh cau do !” Cà tơlơ cau hơ̆ dơ gùl, lik bơh khai mơ ờ lơh ơniai khai chi lơi. 36 Jơh ală cau nrơt-dơl mơ đơs ndring bol khai lah: ‘‘Mbe lah jơnau hơ̆ taih, tài bơh Khai ai gơnăp-gơnoar mơ bơta pràn sồr bol huềng bơ̆-bơl, mơ bol gơ pal lik ?” 37 Mơ tiơng-pơnrơ Khai gơrề làm jơh kơnhoàl hơ̆.
Kơnràñ Jesu tơmbời po-me Simon dê
38 Lik bơh hìu-pơrjum, Kơnràñ mut tam hìu Simon. Po-me Simon dê găm kòp mprơm kơnjơ̆, mơ bol khai dăn mơ Kơnràñ mò in, 39 Kơnràñ kun să hơđăng mò, sồr kòp mprơm mơ kòp mprơm lik bơh mò; tŭ hơ̆ mơ, mò guh duh-broă bol khai.
Kơnràñ Jesu tơmbời rà cau kòp-jê
40 Tŭ măt tơngai mut, jơh ală cau geh bol kòp-jê kong tơl srăp bơta kòp-tê jê-să, cèng bol khai tus mơ Kơnràñ; Kơnràñ ơn tê kờp nă in, tơmbời bol khai. 41 Ală cà lik bơh gal cau, tơnggà mơ đơs: ‘‘Đi lah Kòn Yàng dê.” Kơnràñ lah-pơrhơng, ờ ai bol gơ đơs, tài bơh bol gơ git Khai lah Bơtau Kristo.
Kơnràñ Jesu yal-bơto tam Judea
42 Tus drim, Kơnràñ lik-lòt hơ tiah ngềt-ngơt; ală mpồl làng-bol jòi Khai, tus hơ Khai, mơ kup Khai ơm wơl, mbài Khai lời bol khai. 43 Kơnràñ đơs mơ bol khai: ‘‘Añ pal yal Jơnau Yal Niăm lơgar Yàng ală bòn dờng ndai in tai, tài bơh Añ geh pơyoa tus bơh broă hơ̆.” 44 Mơ Kơnràñ yal-bơto tam ală hìu-pơrjum Judea dê.
