Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
TƠNƠ̆ MƠ TŬ KIS WƠL
Bơto bồc soh gời
24 1 Ngai sơnrờp tam poh, bơh rìng-àng, bol cau ùr lòt tus hơ bơtô bồc, cèng bơñà bol khai neh rơcăng. 2 Bol khai gŏ pơnai lŭ neh geh pơrlă bơh bơtô; 3 mut tam dơlăm, bol khai ờ gŏ bồc Kơnràñ Jesu. 4 Gơlik gơs lah, tam tŭ bol khai găm ngi-rơngơ gơrềng bơh bơta hơ̆, gen do geh bàr nă cau klau ntào dơ gah bol khai, soh ào àng-gơcrà. 5 Tam tŭ bol khai rơngòt mơ blup măt dơ ù, gen bàr nă cau klau đơs mơ bol khai: ‘‘Ñchi gơlơh bol ai jòi cau kis tam gùl bol cau chơt taih ? 6 Khai ờ ơm ndo tai, mơya neh kis wơl rau. Kah wơl tĕ mbe Khai neh đơs mơ bol ai, tŭ Khai găm ơm tam Galilea; 7 Khai đơs: ‘‘Kòn kòn-bơnus pal kong jào tam tê bol tìs-glài, kong tơs dơ chikal, mơ ngai pe kis wơl.”‘‘
Bol dờp-pơyoa ờ pin dơ jơnau bol cau ùr yal
8 Bol khai kah wơl ală jơnau đơs Kơnràñ dê, 9 mơ rê wơl bơh bơtô, bol khai yal jơh ală bơta hơ̆ bol Jơt Dùl in mơ jơh ală cau ndai in. 10 Bol khai lah Maria Magdala, Joanna, Maria mè Jakobe; ală cau ùr ndai bal mơ bol khai krung đơs mơ bol dờp-pơyoa ală bơta hơ̆. 11 Mơya dơđăp bol dờp-pơyoa, ală jơnau đơs hơ̆ sền gơlơh be jơnau đơs si, mơ bol khai ờ pindờn bol ùr hơ̆.
Petro ntoat tus hơ bơtô bồc
12 Mơya Petro ñă-ntào, ntoat tus hơ bơtô bồc, mơ kun să sền, khai gŏ mìng ală biài che dơmai lơm; khai rê hìu, ai lơh krơi bơh bơta neh gơlik gơs.
Kơnràñ Jesu tơnggŏ măt mơ bàr nă cau jăt-dờn tam gùng Emmaus
13 Mơ do, krung tam ngai hơ̆, geh bàr nă tam bol jăt-dờn lòt hơ bòn sơnđăn lah Emmaus, ngài bơh Jerusalem jơt dùl kơi-sồ; 14 bol khai tam boh-bơr bal gơrềng bơh jơh ală bơta neh gơlik gơs. 15 Gơlik gơs lah, tam tŭ bol khai tam boh-bơr mơ bơyai bal, gen să tờm Kơnràñ Jesu tus rềp, lòt bal mơ bol khai; * 16 mơya măt bol khai kong kơryăn, ờ đal-git Kơnràñ. 17 Kơnràñ đơs mơ bol khai: ‘‘Ñchi ală jơnau bol mê tam boh bơr bal tam tŭ lòt gùng hơ̆ taih ?” Bol khai dơh wơl, moăt-jrùng. 18 Hơ wơl, dùl nă sơnđăn lah Kleopas, đơs mơ Kơnràñ: ‘‘Mìng dùl nă ồng lah cau năc tam Jerusalem mơ ờ git ală bơta gơlik gơs tềng hơ̆ tam ală ngai do ơ ?” 19 Kơnràñ đơs mơ bol khai: ‘‘Ñchi ală bơta taih ?” Bol khai đơs mơ Kơnràñ: ‘‘Gơrềng bơh Jesu Nazareth, lah cau ala-bơr, gơnăp-gơnoar tam broă-lơh mơ bơr đơs dơđăp Yàng mơ jơh làng-bol; 20 mbe lơi bol lơh-yàng dờng mơ bol lăm-bồ bol he dê neh jào Khai làng kong yal-glài chơt, mơ neh tơs Khai dơ chikal. 21 Ai bol hi, bol hi neh kơnờm lah tờm Khai rơp tơwài Israel; mơya tŭ do rơlau mơ ală jơnau hơ̆, ală bơta do neh gơlik gơs ngai do lah ngai pe rau. 22 Mơya krung geh bàr pe nă cau ùr tam bol hi neh lơh bol hi in nrơt-ngòt; bol khai tus hơ bơtô bồc lài mơ tŭ àng, 23 ờ gŏ bồc Kơnràñ, gen rê đơs lah neh gŏ bol huềng-duh tơnggŏ măt mơ đơs lah Kơnràñ găm kis. 24 Bàr pe nă tam bol hi neh lòt hơ bơtô bồc, mơ gŏ ală bơta di be bol cau ùr neh đơs, ai tờm Kơnràñ, gen bol khai ờ gŏ.”
25 Kơnràñ đơs mơ bol khai: ‘‘Ơ bol brơngơl-gơla mơ nùs ờ băt pindờn dơ jơh ală jơnau bol ala-bơr neh đơs ! 26 Ờ di Bơtau Kristo pal kong ală bơta hơ̆ mơ mut tam bơta gơklŏ Khai dê ơ ?” * 27 Mơ sơntờm bơh Moise mơ jơh ală cau ala-bơr, Kơnràñ yal-mblàng bol khai in ală jơnau gơrềng bơh Khai tam jơh Sră Goh. 28 Tŭ tus rềp hơ bòn bol khai lòt, Kơnràñ lơh be lòt ngài rơlau. 29 Bol khai jà-bơklơn Kơnràñ mơ đơs: ‘‘Dăn ồng ơm bal mơ bol hi, tài bơh trồ neh mho, mơ ngai neh lồi.” Gen Kơnràñ mut làng ơm bal mơ bol khai. 30 Gơlik gơs lah, tam tŭ Kơnràñ ơm dơ cơnờng sào bal mơ bol khai, gen Kơnràñ dờp bañ , yalniăm, pet gơ mơ ai bol khai in. 31 Măt bol khai gơpờ mơ bol khai đal-git Kơnràñ; mơya Kơnràñ roh thit bơh bol khai. 32 Bol khai đơs ndring gơp: ‘‘Tam gùng, tŭ Kơnràñ đơs mơ bol he mơ yal-mblàng Sră Goh bol he in, nùs bol he ờ duh-hur tam bol he ơ ?” 33 Tam jiờ hơ̆, bol khai đă-ntào, rê wơl hơ Jerusalem, tìp bol Jơt Dùl mơ bol cau ơm bal mơ bol hơ̆ găm pơrjum bal, 34 ală cau do đơs: ‘‘Ngăn, Kơnràñ neh kis wơl mơ neh tơnggŏ măt mơ Simon.” * 35 Ai bol khai, gen yal wơl ală bơta neh gơlik gơs tam gùng, mơ mbe lơi bol khai neh đal-git Kơnràñ tam tŭ Kơnràñ pet bañ .
Kơnràñ Jesu tơnggŏ măt mơ bol dờp-pơyoa
36 Tam tŭ bol khai đơs ală bơta hơ̆, gen să tờm Kơnràñ ntào tam gùl bol khai mơ đơs mơ bol khai: ‘‘Ring-lơngai bol kòn in !” 37 Mơya bol khai nrơt-dơl mơ rơngòt, tồn lah gŏ huềng. 38 Kơnràñ đơs mơ bol khai: ‘‘Ñchi bơh tài bol kòn nrơt-dơl, mơ ñchi gơlơh ală jơnau kơlôi-sơnơng gơguh tam nùs bol kòn taih ? 39 Sền tĕ tê Añ mơ jơng Añ , bơh tờm lah Añ ! Bư tĕ dơ Añ mơ sền tĕ, tài bơh huềng ờ geh poăc mơ ntìng, be bol kòn gŏ Añ geh.” 40 Tŭ neh đơs be hơ̆ rau, Kơnràñ sơnđio tê mơ jơng bol khai in. 41 Tam tŭ bol khai găm ờ hềt pindờn tài bơh chờhờp mơ găm ai lơh krơi, gen Kơnràñ đơs mơ bol khai: ‘‘Tềng do, bol kòn geh chi lơi sa sơl ờ ?” 42 Bol khai cèng Kơnràñ in dùl pet ka buh. 43 Kơnràñ dờp mơ sa dơđăp bol khai.
Ală jơnau sồr lồi-tơnơ̆ bol dờp-pơyoa in
44 Kơnràñ đơs mơ bol khai: ‘‘Hơ̆ lah ală jơnau Añ neh đơs mơ bol kòn tŭ Añ găm ơm bal mơ bol kòn, lah pal gơlik gơs wil-tơl jơh ală jơnau neh geh cih gơrềng bơh Añ tam Gùng boh-lăm Moise dê, tam Ală jơnau ala-bơr mơ tam Ală jơnau nrĭ-nrềng.”
45 Tŭ hơ̆, Kơnràñ pờ bồ-tồr bol khai in làng git-wă Sră Goh. * 46 Kơnràñ đơs mơ bol khai: ‘‘Neh geh cih be hơ̆, lah Bơtau Kristo pal kong jê-yăn mơ ngai pe kis wơl bơh bol cau chơt, * 47 mơ pal ai sơnđăn Khai yal-bơto bơta ềng-màl làng geh hồ tìs tam jơh ală làng-bol, sơntờm bơh Jerusalem. 48 Bol kòn lah cau cơng ală bơta hơ̆. * 49 Do Añ pơyoa tus mơ bol kòn bơta Bàp Añ neh hơ; ai bol kòn, ơm tĕ tam bòn dờng, jơl tus tŭ soh-dờp pràn-gơnoar bơh hơđăng.”
Kơnràñ Jesu geh cèng guh hơ trồ
50 Kơnràñ lăm bol khai lik hơ bơdìh, tus hơ đah Bethania, mơ pờ tê yalniăm bol khai in. * 51 Gơlik gơs lah tam tŭ yalniăm bol khai in, gen Kơnràñ lời bol khai mơ geh cèng guh hơ trồ. 52 Bol khai duh-khoai Kơnràñ mơ rê wơl hơ Jerusalem chờhờp ngăn, 53 mơ ơm sùm tam hìu duh-khoai, yalniăm Yàng.
