Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Kơnràñ Jesu lik dơđăp Pilato
23 1 Jơh mpồl bol khai đă-ntào cèng Kơnràñ tus hơ Pilato. 2 Bol khai sơntờm yă Kơnràñ mơ đơs: ‘‘Bol hi neh bàn gŏ cau do bơtời làng-bol hi, kơryăn boh dia Sesare in, mơ đơs Khai lah Bơtau Kristo.” 3 Pilato lùp Kơnràñ mơ đơs: ‘‘Mê lah Bơtau bol Jude ơ ?” Kơnràñ hơ wơl mơ đơs: ‘‘Ồng đơs hơ̆.” 4 Pilato đơs mơ bol ăt-bồ bol lơh-yàng dê mơ ală mpồl làng-bol: ‘‘Añ ờ gŏ chi lơi tìs tam cau do.” 5 Mơya bol khai đơs pràn tai: ‘‘Khai bơchồl làng-bol mơ bơto làm jơh Judea, sơntờm bơh Galilea tus ndo !”
6 Kơno be hơ̆, Pilato lùp cau do di lah cau Galilea ờ; 7 mơ tŭ git lah Kơnràñ gơrê mơ gơnoar Herode dê, Khai sồr cèng Kơnràñ tus hơ Herode, lah cau krung ơm tam Jerusalem tam ală ngai hơ̆.
Kơnràñ Jesu lik dơđăp Herode
* 8 Gŏ Kơnràñ Jesu, Herode chờhờp ngăn; tài bơh neh jŏ rau, khai wờl gŏ Kơnràñ, bơh neh kơno gơrềng bơh Kơnràñ, mơ khai kờñ gŏ Kơnràñ lơh tềl krơi lơi. 9 Khai lùp Kơnràñ rà jơnau; mơya Kơnràñ ờ hơ wơl mơ khai chi lơi. 10 Bol ăt-bồ bol lơh-yàng dê mơ bol gơnoar-cih ntào yă Kơnràñ oă ngăn. 11 Herode bal mơ mpồl ling khai dê sền ờ sơp Kơnràñ, tơnsoh ào bò Khai in, đŏ-tơnhial, mơ sồr cèng wơl Khai hơ Pilato. 12 Tam ngai hơ̆, Herode mơ Pilato gơjềng gơs gơp-bơyô bal; kơyoa lài-òr bol khai lah sò-tơm bal.
Kơnràñ Jesu lik tai dơđăp Pilato
13 Pilato tơrgùm bol ăt-bồ bol lơh-yàng dê, bol lăm-bồ mơ làng-bol, 14 mơ đơs mơ bol khai: ‘‘Bol mê neh cèng Añ in cau do be cau bơtời làng-bol, mơ do Añ neh lùp dơđăp bol mê, mơ ờ gŏ tam cau do chi lơi tìs tam ală jơnau bol mê yă Khai, 15 Herode krung ờ sơl: kơyoa khai neh sồr cèng wơl cau do hơ bol he. Mơ do, cau do ờ lơh chi lơi di-pal chơt. 16 Be hơ̆, Añ rơp sồr cau pù-lơh khai mơ ai rê.”
18 Mơya jơh mpồl làng-bol nggà đơs: ‘‘Gơsơt tĕ cau do mơ hồ Barabba bol hi in !”, 19 Barabba lah cau kong jàm tài bơh neh lơh pơrlơ̆-dră tam bòn dờng mơ gơsơt cau.
20 Pilato kờñ hồ Kơnràñ Jesu, gen đơs tai mơ bol khai, 21 mơya bol khai nggà đơs: ‘‘Tơs tĕ, tơs tĕ Khai dơ chikal !” 22 Pilato đơs mơ bol khai dơ̆ pe: ‘‘Ñchi iơh cau do neh lơh taih ? Añ ờ gŏ chi lơi pal chơt tam cau do; be hơ̆, Añ rơp sồr pù-lơh khai mơ ai rê.” 23 Mơya bol khai sơlơ nggà dờng, dăn tơs Kơnràñ dơ chikal, mơ săp bol khai sơlơ nggà dờng rơlau tai. 24 Pilato dờp lơh jăt jơnau bol khai dăn: 25 Khai hồ cau bol khai dăn, lah cau kong jàm bơh neh lơh pơrlơ̆-dră mơ gơsơt cau; ai Kơnràñ Jesu, khai jào khăt nùs-kờñ bol khai dê.
Tam gùng guh Golgotha
26 Tŭ cèng Kơnràñ lòt, bol khai kup Simon, cau Sirene, rê bơh sre, mơ ơn chikal khai in tui tơnơ̆ Kơnràñ.
* 27 Mpồl gal làng-bol mơ cau ùr lòt jăt Kơnràñ, bol ùr tur ntơh mơ ñìm-răc Khai. 28 Mơya Kơnràñ Jesu wơlke hơ bol khai mơ đơs: ‘‘Ơ bol kòn ùr Jerusalem, bañ ñìm Añ, mơya ñìm tĕ să tờm bol ai mơ oh kòn bol ai, 29 kơyoa do rơp tus ală ngai cau rơp đơs: ‘‘Bơtoah bol ùr kơnền, ală ndul ờ deh, ală toh ờ tơmpô !”
30 Tŭ hơ̆, cau rơp sơntờm đơs mơ ală bơnơm: ‘‘Tơrlah tĕ hơđăng bol hi !”, mơ ală dòr: ‘‘Bồr tĕ bol hi !”
* 31 tài bơh dilah mơ chi ris, cau lơh ală bơta hơ̆, gen mơ chi ro, ñchi bơta rơp gơlik gơs ?”
32 Krung geh bàr nă cau iơh-bơsăk kong cèng gơsơt bal mơ Kơnràñ.
Kơnràñ Jesu kong tơs dơ chikal
* 33 Tŭ tus tam dùl bă tiah hòi lah tiah Kơndoh Bồ, tềng hơ̆, bol khai tơs Kơnràñ dơ chikal, bal mơ bol thừ-blơ̆, dùl nă đah ma, dùl nă đah kiau. * 34 Kơnràñ Jesu đơs: ‘‘Ơ Bàp, dăn hồ bol khai in, tài bơh bol khai ờ git bơta bol khai lơh.” Lồc gen bol khai tă khà tampà ào Kơnràñ dê.
Kơnràñ Jesu kong tơmbàs
* 35 Làng-bol ntào sền. Bol ăt-bồ ñŏ-tơnhial Kơnràñ mơ đơs: ‘‘Khai neh tơngklàs bol ndai, gen tơngklàs tĕ să tờm, dilah khai lah Kristo, cau Yàng rơwah !” 36 Bol ling krung ñŏ-tơnhial Kơnràñ, tus rềp, ai Khai in dà sràt 37 mơ đơs: ‘‘Dilah mê lah bơtau bol Jude, gen tơngklàs tĕ să mê !” 38 Krung geh jơnau cih hơđăng Kơnràñ: ‘‘Do lah bơtau bol Jude.”
Cau thừ-blơ̆ ềng-màl
39 Dùl nă tam bàr nă thừ-blơ̆ kong yồng krung đơs tràl-sơrbil dơ Kơnràñ: ‘‘Mê ờ di lah Kristo ơ ? Tơngklàs tĕ să mê mơ bol hi sơl !” 40 Mơya hơ wơl, cau ne lah-pơrhơng khai mơ đơs: ‘‘Mê kong bal dùl bơta glài, mơ mê krung ờ ngòt Yàng ơ ? 41 Bol he be do lah song-ring, bơh bol he dờp ală bơta di-pal mơ ală broă neh lơh ! Ai cau do ờ lơh chi lơi iơh.” 42 Mơ khai đơs: ‘‘Ơ Jesu, dăn kah añ tŭ Đi tus tam lơgar Đi dê.” * 43 Kơnràñ đơs mơ khai: ‘‘Di ngăn, Añ đơs mơ mê: Ngai do mê rơp ơm bal mơ Añ tam lơgar chờhờp.”
Kơnràñ Jesu tăc nhơm
44 Pơgăp jiờ dơ̆ prau, gơlik gơs jơngo làm jơh ù-tiah jơl tus jiờ dơ̆ sin, 45 Măt tơngai gơklăm, biài kơrnìng gơcrè dơ gùl. 46 Kơnràñ Jesu nggà dờng mơ đơs: ‘‘Ơ Bàp, Kòn jào nhơm Kòn tam tê Bàp”; đơs be hơ̆ rau, Khai tăc nhơm.
Tơnơ̆ mơ tŭ Kơnràñ Jesu tăc nhơm
47 Gŏ bơta gơlik gơs, cau kuang ăt-rơhiăng tơngklŏ Yàng mơ đơs: ‘‘Ngăn, cau do lah cau song-dơpă !” 48 Jơh mpồl bol neh dùl bal tus sền bơta hơ̆, gŏ ală bơta gơlik gơs, gen tur ntơh rê wơl. 49 Jơh ală cau mờng-git Kơnràñ mơ bol cau ùr neh jăt Kơnràñ bơh Galilea, ntào bơh ngài, gŏ ală bơta hơ̆.
Tơp bồc Kơnràñ Jesu
50 Mơ do geh cau sơnđăn lah Joseph, lah kuang tơrña, lah cau niăm mơ song-ring 51 – cau do ờ ring nùs mơ jơnau bơyai mơ ală broă bol khai dê – khai lah cau Arimathea, bòn dờng bol Jude dê, khai krung kơp-gơn lơgar Yàng; 52 cau do tus hơ Pilato mơ dăn bồc Kơnràñ Jesu; 53 khai tơmù bồc, pò mơ biài che dơmai, ơn bồc tam bơtô neh phàt, tam hơ̆ ờ hềt ơn cau lơi. 54 Ngai hơ̆ lah ngai Rơcăng Lài, mơ ngai sabbat neh rìng-àng. 55 Geh ală cau ùr lòt jăt, lah bol cau neh tus bal mơ Kơnràñ bơh Galilea, bol khai sền bơtô mơ bồc Kơnràñ geh ơn be lơi, 56 mơ bol khai rê wơl, rơcăng bơñà mơ sơnơm bô bơlhu, mơ ngai sabbat, bol khai ơm rơlô jăt be jơnau sồr-lăm.
