Jơnau Yalniam Luka-Pơnah 22

BƠTA JÊ-YĂN

Jòi kai gơsơt Kơnràñ Jesu.

Juda jòi gùng jào Kơnràñ.

22 1 Leh BAñ  ờ kAñ , hòi lah leh Lòt Găn neh tus rềp. 2 Bol ăt-bồ bol lơh-yàng dê mơ bol gơnoar-cih jòi gùng mbe lơh làng gơsơt Kơnràñ; bơh bol khai rơngòt làng-bol. 3 Satan neh mut tam Juda, krung hòi lah Iskarioth, dùl nă tam bol Jơt Bàr; 4 khai lik-lòt, boh bơr mơ bol ăt-bồ bol lơh-yàng dê, mơ bol kuang ling, mbe lơi jào Kơnràñ bol khai in. 5 Bol khai chờhờp mơ hơ-pơrgon ai khai in priă. 6 Khai ring nùs mơ jòi tŭ lơmpah, làng jào Kơnràñ bol khai in tŭ ờ geh làng-bol.

Rơcăng sa leh Lòt Găn

7 Neh tus ngai leh BAñ  ờ kAñ , tam ngai hơ̆ pal gơsơt Belàt Lòt Găn. 8 Kơnràñ pơyoa Petro mơ Joan mơ đơs: ‘‘Bol kòn lòt rơcăng tĕ bol he in sa leh Lòt Găn.” 9 Bol khai đơs mơ Kơnràñ: ‘‘Ntềng đah Đi kờñ  bol kòn rơcăng taih ?” 10 Kơnràñ đơs mơ bol khai: ‘‘Do, tŭ bol kòn mut tam bòn dờng, gen rơp geh cau đoa yăng dà tus tìp bol kòn; bol kòn jăt tĕ khai mut tam hìu khai mut. 11 Bol kòn rơp đơs mơ cau tờm hìu: ‘‘Pôgru đơs mơ mê: Ntềng đah adŭ Añ  rơp sa leh Lòt Găn bal mơ bol jăt-dờn Añ  dê ?” 12 Khai rơp sơnđio bol kòn in dùl adŭ dờng, neh săp phan; bol kòn rơcăng tĕ tềng hơ̆.” 13 Bol khai lòt mơ gŏ be Kơnràñ neh đơs mơ bol khai, mơ bol khai rơcăng leh Lòt Găn.

Sa leh Lòt Găn

14 Tŭ neh tus jiờ, Kơnràñ ơm dơ cơnờng sào, mơ bol jăt-dờn ơm bal mơ Khai. 15 Kơnràñ đơs mơ bol khai: ‘‘Añ  wờl-kờñ  ngăn sa leh Lòt Găn do bal mơ bol kòn lài mơ tŭ kong jê-yăn. * 16 Kơyoa Añ  đơs mơ bol kòn: Añ  rơp ờ sa leh do tai, jơl tus tŭ gơ gơs wil-tơl tam lơgar Yàng.” * 17 Lồc dờp coàn, Kơnràñ ưn-ngài mơ đơs: ‘‘Bol kòn dờp tĕ coàn do mơ tampà bal. 18 Kơyoa Añ  đơs mơ bol kòn:  Bơh tŭ do, Añ  rơp ờ hùc dà đo tai, jơl tus tŭ lơgar Yàng tus.”

Kơnràñ Jesu lơh gơs tềl-gơnrơh Să Mhàm niăm-goh

19 Lồc dờp bañ , Kơnràñ ưn-ngài, pet gơ, pà bol jăt-dờn in mơ đơs: ‘‘Do lah să Añ  dê, geh pà bơh bol kòn in. Bol kòn lơh tĕ broă do làng kah-kơlôi Añ .” 20 Krung ndrờm be hơ̆ sơl, lồc sa, Khai dờp coàn mơ đơs: ‘‘Do lah coàn bơta tam bơrkuăt pa tam mhàm Añ , kong tuh bơh bol kòn in.

Kơnràñ Jesu yal lài Juda rơp jào Kơnràñ

21 Mơya do tê cau jào Añ  ơm dơ cơnờng bal mơ Añ ; 22 ngăn, Kòn kòn-bơnus lik-lòt jăt be bơta neh tơn-ơn; mơya dồn-sa cau hơ̆ in, bơh dơ khai Kòn kòn-bơnus kong jào !” 23 Bol jăt-dờn sơntờm tam lùp bal ñcau tam bol khai lah cau rơp lơh bơta hơ̆.

Cau lăm-bồ pal gơlik gơs be cau duh-broă

* 24 Krung gơlik gơs bơta tam pơndăng tam gùl bol khai, ñcau tam bol khai geh sền lah dờng rơlau. 25 Kơnràñ đơs mơ bol khai: ‘‘Bol bơtau ală làng-bol bơdìh dê ai gơnoar ăt-bồ làng-bol; mơ bol geh gơnoar hơđăng làng-bol, gen geh hòi lah bol dong-nđàc. 26 Ai bol kòn ờ di be hơ̆, mơya cau lơi dờng rơlau tam bol kòn, gen pal gơlik gơs be cau dêt rơlau; mơ cau lơi lah cau lăm-bồ, gen pal gơlik gơs be cau duh-broă. 27 Kơyoa ñcau lah dờng rơlau: cau ơm dơ cơnờng sào ngŏlah cau duh-broă ?  Ờ di lah cau ơm dơ cơnờng sào ơ ? Mơya Añ , Añ  ơm tam gùl bol kòn be cau duh-broă.

Phan-jờng gơrê mơ bol dờp-pơyoa

28 Ai bol kòn, bol kòn lah cau ơm sùm bal mơ Añ  tam ală bơta tơlòng Añ  dê; 29 Añ  ơn-rơndăp lơgar bol kòn in, be Bàp Añ  neh ơn-rơndăp Añ  in, 30 làng bol kòn geh đô-sa hơđăng cơnờng Añ  dê tam lơgar Añ , mơ nggui hơđăng sơbàn cah-rơđa jơt bàr jơi-nòi Israel.

Kơnràñ Jesu yal lài: Petro rơp pơndăng-săng Khai, mơya rơp rê wơl

31 Ơ Simon, Simon, do Satan neh kờñ  ngăn geh bol kòn làng ràng be kòi; * 32 mơya Añ  neh hòi dăn kòn in, làng bơta pindờn kòn dê ờ roh. Ai kòn, dơ̆ neh rê wơl, lơh tĕ oh mi kòn in kơ̆ nùs.” 33 Petro đơs mơ Kơnràñ: ‘‘Ơ Kơnràñ, kòn neh răk-rơcăng lòt bal mơ Đi tus tam hìu jàm mơ tam bơta chơt.” 34 Kơnràñ đơs: ‘‘Ơ Petro, Añ  đơs mơ kòn, ngai do iar rơp ờ nrau, jơl tus tŭ kòn neh pe dơ̆ pơndăng lah ờ git Añ .”

Thoa kăn-rơmăn

35 Kơnràñ đơs mơ bol khai: ‘‘Tŭ Añ  sồr bol kòn lòt, ờ kơldung priă, ờ kơldung phan, ờ khŏ-joă, bol kòn phơt chi lơi ờ ?” Bol khai đơs: ‘‘Ờ phơt chi lơi.” * 36 Gen tàng, Kơnràñ đơs mơ bol khai: ‘‘Mơya tŭ do, cau lơi geh kơldung priă, gen cèng tĕ, cau lơi geh kơldung phan krung be hơ̆ sơl, mơ cau lơi ờ geh đào, gen tăc tĕ ào bơdìh mơ blơi. 37 Kơyoa Añ  đơs mơ bol kòn: Jơnau neh geh cih do pal gơlik gơs wil-tơl dơ Añ : ‘‘Khai neh kong kờp bal mơ bol tìs-glài.” Kơyoa ală bơta gơrềng bơh Añ  rơp gơlik gơs wil-tơl.” 38 Bol khai đơs mơ Kơnràñ: ‘‘Ơ Kơnràñ, do geh bàr nơm đào.” Kơnràñ đơs mơ bol khai: ‘‘Tơl rau.”

Tam bơnơm Olive

39 Kơnràñ lik-lòt hơ bơnơm Olive jăt be bơta ờs- mờng; bol jăt-dờn krung jăt Khai. 40 Tŭ neh tus hơ tiah hơ̆, Khai đơs mơ bol khai: ‘‘Bol kòn răc dăn tĕ, mbài mut tam bơta tơlòng.” 41 Khai lòt ngài bơh bol khai kàr to pơnai lŭ, cùn kơltăng răc dăn 42 mơ đơs: ‘‘Ơ Bàp, dilah Đi kờñ , dăn tă coàn do bơh dơ Kòn; bulah be hơ̆, ờ di lah nùs-kờñ  Kòn dê, mơya lah nùs-kờñ  Bàp dê gơlik gơs.” 43 Huềng-duh bơh trồ tơnggŏ măt mơ Khai, tơmpràn Khai. Moăt-kơnòl, Khai sơlơ khoai dăn rơlau. 44 Kơlhề Khai dê gơlik gơs be ală ntờc mhàm gơrung tam ù. 45 Lồc răc dăn, Khai đă- ntào, tus mơ bol jăt-dờn, gŏ bol khai găm bic bơh moăt-jrùng, 46 gen đơs mơ bol khai: ‘‘Ñchi gơlơh bol mê bic taih ? Guh tĕ; răc dăn tĕ mbài mut tam bơta tơlòng.”

Kơnràñ Jesu kong kup

47 Tam tŭ Kơnràñ găm đơs, gen do dùl mpồl cau, mơ cau sơnđăn lah Juda, dùl nă tam bol Jơt Bàr, lòt lài mơ bol khai, tus rềp mơ Kơnràñ Jesu làng cum Kơnràñ. 48 Kơnràñ Jesu đơs mơ khai: ‘‘Ơ Juda, kòn ai bơta cum làng jào Kòn kòn-bơnus ơ ?” 49 Gŏ bơta rơp gơlik gơs, bol cau ơm gùt dar Kơnràñ, đơs: ‘‘Ơ Kơnràñ, bol kòn ai đào sreh di ờ ?” 50 Mơ dùl nă tam bol khai sreh cau duh-broă cau ăt-bồ bol lơh-yàng dê, lơh tăc tồr ma cau hơ̆. 51 Hơ wơl, Kơnràñ Jesu đơs: ‘‘Kàr hơ̆, lời tĕ !” Mơ Kơnràñ bư dơ tồr khai, tơmbời khai. 52 Kơnràñ Jesu đơs mơ bol tus mơ Khai lah bol ăt-bồ bol lơh-yàng dê, bol kuang ling sền-gàr hìu duh-khoai, bol kuang kra: ‘‘Bol mê tus mơ đào mơ gai be tus mơ cau thừ-blơ̆ ơ ? 53 Pah ngai Añ  ơm bal mơ bol mê tam hìu duh-khoai, bol mê ờ tơlik tê dơ Añ ; mơya do lah jiờ bol mê dê mơ lah gơnoar bơta klăm-jơngo dê.”

Petro pơndăng-săng Kơnràñ

54 Bol khai kup Kơnràñ, cèng mơ lăm tus tam hìu cau ăt-bồ bol lơh-yàng dê. Ai Petro jăt bơh ngài ngài. 55  Bol khai sing ồs tam gùl blàng mơ nggui gùt-dar, Petro nggui tam gùl bol khai. 56 Dùl nă cau ùr duh-broă ne gŏ Petro nggui dơ àng ồs, gen sền trong dơ khai mơ đơs: 57 ‘‘Cau do krung ơm bal mơ cau hơ̆ !” Mơya Petro pơndăng-săng Kơnràñ mơ đơs: 58 ‘‘Ơ ùr gen, Añ  ờ git cau hơ̆ !” Dŭt tơnơ̆, cau ndai gŏ Petro, gen đơs: ‘‘Mê krung ơm tam bol hơ̆ !” Mơya Petro đơs: ‘‘Ơ cau gen, Añ  ờ wai !” 59 Dùl thoa pơgăp dùl jiờ tơnơ̆, cau ndai tai đơs nền-cê: ‘‘Ngăn, cau do krung ơm bal mơ cau hơ̆, tài bơh khai krung lah cau Galilea !” 60 Petro đơs: ‘‘Ơ cau gen, Añ  ờ git ñchi mê đơs !” Tŭ hơ̆ mơ, Petro găm đơs, gen iar nrau. 61 Kơnràñ wơlke sền Petro; mơ Petro kah wơl jơnau đơs Kơnràñ dê, be Kơnràñ neh đơs mơ khai: ‘‘Ngai do, lài mơ tŭ iar nrau, kòn neh pơndăng-săng Añ  pe dơ̆.” 62 Mơ khai lik hơ bơdìh, đìm-răc đìm-ròc.

63 Bol cau ăt Kơnràñ, đŏ-tơnhial mơ pù-lơh Khai; 64 bol khai lềt măt Kơnràñ, lùp Khai mơ đơs: ‘‘Hồr đơs tĕ: Ñcau lơh mê taih ?” 65 Bol khai krung đơs rà jơnau tràl-sơrbil ndai dơ Kơnràñ.

Kơnràñ Jesu lik dơđăp mpồl tơrña

66 Trồ ngai, bol kuang kra làng-bol dê, bol ăt-bồ bol lơh-yàng dê mơ bol gơnoar-cih pơrjum bal, cèng Kơnràñ tus tam mpồl tơrđa bol khai dê 67 mơ đơs :  ‘‘Dilah mê lah Kristo, gen đơs tĕ bol hi in.” Kơnràñ đơs mơ bol khai: ‘‘Dilah Añ  đơs mơ bol mê, bol mê krung ờ pindờn; 68 dilah Añ  lùp, bol mê krung ờ hơ wơl Añ  in. * 69 Mơya bơh tŭ do, Kòn kòn-bơnus rơp nggui đah ma pràn-gơnoar Yàng dê.” 70 Jơh ală cau đơs: ‘‘Be hơ̆, mê lah Kòn Yàng dê ờ ?” Kơnràñ đơs mơ bol khai: ‘‘Bol mê đơs hơ̆, Añ  lah cau hơ̆.” 71 Bol khai đơs: ‘‘Ñchi gơlơh bol he găm kờñ  jơnau cơng taih ? Tài bơh tờm bol he neh kơno bơh bơr Khai !”