Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bàr đong trà cau ùr-bàng dê
21 1 Tơngờ sền, Kơnràñ gŏ bol cau pas ơn phan pơdơng he dê tam đài. 2 Khai krung gŏ cau ùr-bàng rơbah ne ơn bàr đong trà tam hơ̆, 3 mơ Khai đơs: ‘‘Añ đơs ngăn mơ bol kòn: Cau ùr-bàng rơbah do neh ơn oă rơlau mơ jơh ală cau. 4 Kơyoa jơh ală cau ne ơn phan pơdơng bơh bơta jơngkah bol khai dê; ai cau ùr do, bơh bơta siơ̆u-siar khai dê, ơn jơh phan khai geh làng ròng să khai.”
Jơnau bơto gơrềng bơh bơta tơrlah bòn dờng Jerusalem dê.
Jơnau lăm-mut
* 5 Tŭ bàr pe nă cau đơs gơrềng bơh hìu duh-khoai geh bơka mơ ală pơnai lŭ niăm mơ ală phan-pà, gen Kơnràñ đơs: 6 ‘‘Ală bơta bol kòn gŏ hơ̆ rơp tus ală ngai ờ geh lời wơl pơnai lŭ lơi hơđăng pơnai lŭ lơi, mơ ờ kong lơh tơrlah.” 7 Bol khai lùp Kơnràñ mơ đơs: ‘‘Ơ Pôgru, be hơ̆, tŭ lơi rơp gơs ală bơta hơ̆, mơ tềl lơi sơnđio tŭ ală bơta hơ̆ mờr gơlik gơs ?”
Ală tềl gơlik gơs lài
8 Kơnràñ đơs: ‘‘Sền ngăc tĕ, mbài bol kòn kong pơrlồm. Kơyoa gal cau rơp ai sơnđăn Añ tus mơ đơs: ‘‘Añ do” mơ: ‘‘Tơngai neh rềp rau.” Be hơ̆, bol kòn bAñ lòt jăt bol khai. 9 Tŭ bol kòn kơno geh ală bơta tamlơh mơ bơta nggồr-nggàc, gen bAñ rơngòt; kơyoa ală bơta hơ̆ pal gơlik gơs lài, mơya ờ di lah dut-lồi mơ.”
10 Tŭ hơ̆, Kơnràñ đơs mơ bol khai: ‘‘Làng-bol do rơp đă-ntào tamdră mơ làng-bol ne, lơgar do tamdră mơ lơgar ne; 11 rơp geh ală bơta mprơm ù dờng mơ ală bơta pluh-plàng, jơgloh-rung tam rà tiah; rơp geh ală bơta gơtơnggơs cù-bìr mơ ală tềl dờng bơh trồ. 12 Mơya lài mơ jơh ală bơta hơ̆, cau rơp ai tê kup-kơryăn bol kòn, jào dơ ală hìu-pơrjum mơ hìu-jàm, mơ bol kòn rơp kong hoài tus dơ bol bơtau mơ bol gơnoar tài bơh sơnđăn Añ ; 13 bơta hơ̆ gơtus bol kòn in làng bol kòn lơh cơng. 14 Be hơ̆, bol kòn ơn tĕ tam nùs bol kòn lah bAñ kơlôi lài mbe lơi rơp tò să; * 15 kơyoa Añ rơp ai bol kòn in mbùng bơr mơ bơta jăk-chài, mơ jơh ală cau sò-tơm bol kòn dê ờ rơgơi tamdră wơl ngŏlah đơs sơlơ̆ wơl. 16 Bol kòn rơp kong jào bơh me bàp, oh mi, gơp-jơi, gơp-bơyô, mơ bol khai rơp gơsơt cau tam bol kòn, 17 mơ bol kòn rơp kong jơh ală cau ềng-gơjrAñ tài bơh sơnđăn Añ . 18 Mơya dùl ñhe sŏ dơ bồ bol kòn krung ờ roh sơl. 19 Bơh bơta kơ̆ nùs bol kòn dê, bol kòn rơp prăp-sròng sồp-soàn bol kòn dê.
Jerusalem kong ling-klàng rơwàng
20 Tŭ bol kòn gŏ Jerusalem kong ling-klàng rơwàng, gen tŭ hơ̆ bol kòn git tĕ bơta tơrlah-tơrling gơ dê neh tus rềp rau. 21 Tŭ hơ̆, bol cau lơi ơm tam Judea, dô tĕ tam bơnơm; bol cau lơi ơm tam gùl gơ, lik-lòt tĕ; mơ bol cau lơi ơm tam sre-brê, bAñ mut tam gơ. 22 Tài bơh hơ̆ lah ală ngai tàng-tê, làng jơh ală bơta neh geh cih rơp gơlik gơs wil-tơl. 23 Dồn-sa bol cau ùr găm bun in mơ bol cau ùr găm tơmpô kòn in tam ală ngai hơ̆ ! Kơyoa rơp geh bơta kòl-yăn kal-ke dờng hơđăng ù-tiah mơ bơta gơjrAñ làng-bol do in; * 24 bol khai rơp gơpừ bơh măt đào, rơp kong kup cèng tus tam jơh ală làng-bol bơdìh, mơ Jerusalem rơp kong ală làng-bol bơdìh jă-ntrơm, jơl tus dơ ală tŭ-tơngai ală làng-bol bơdìh dê gơlik gơs wil-tơl.
Ală tềl krơi. Kòn kòn-bơnus tus.
25 Rơp geh ală tềl tam măt tơngai, àng-kơnhai, ală sơrmAñ ; mơ hơđăng ù-tiah, ală làng-bol rơp kơlôi-kơnòl tài bơh dà-lềng gơpồt nggồr-nggàc, 26 cau ơm ro-ñro tài bơh rơngòt mơ kơp-gơn ală bơta rơp tus tam plai ù, kơyoa ală pràn-gơnoar ală kơloàng trồ dê rơp kong ơwAñ . 27 Tŭ hơ̆, cau rơp gŏ Kòn kòn-bơnus tus tam mhoal bal mơ gơnoar mơ bơta gơklŏ dờng. 28 Tŭ ală bơta hơ̆ sơntờm gơlik gơs, gen bol kòn ntào tĕ song mơ pờ bồ, bơh bơta tơwài bol kòn dê tus rềp rau.”
Jơnau pơniơu tờm chi bal
29 Kơnràñ đơs mơ bol khai jơnau pơniơu: ‘‘Bol kòn sền tĕ tờm chi bal mơ jơh ală chi-che: 30 tŭ gơ căt ngkur, bol kòn gŏ mơ git lah kàl duh neh rềp rau.
31 Ai bol kòn krung be hơ̆ sơl, tŭ gŏ ală bơta hơ̆ gơlik gơs, gen git tĕ lah lơgar Yàng neh rềp rau. 32 Di ngăn, Añ đơs mơ bol kòn: Rơnàng do rơp ờ gơgăn, jơl tus tŭ jơh ală bơta hơ̆ gơlik gơs. 33 Trồ mơ tiah rơp gơgăn, mơya ală jơnau đơs Añ dê rơp ờ gơgăn.
Pal drơng-kơp mơ răc dăn
34 Bol kòn sền ngăc tĕ, mbài nùs bol kòn gơs kơnjơ̆ bơh bơta đô-sa oă ir, bơta bơđul-lơmbè mơ ală bơta kơlôi-rơcăng rài do dê, mơ ngai hơ̆ nisơna tus hơđăng bol kòn; 35 kơyoa be jàl gơ tus hơđăng jơh ală cau ơm hơđăng làm jơh plai ù. 36 Be hơ̆, bol kòn drơng-kơp tĕ mơ răc dăn tam tơl tŭ, làng rơgơi klàs bơh jơh ală bơta rơp tus hơ̆, mơ ơm ntào dơđăp Kòn kòn-bơnus.”
Ală ngai dut-ndơl Kơnràñ Jesu dê
37 Trồ ngai, Kơnràñ bơto tam hìu duh-khoai, ai trồ măng, khai lik-lòt ơm tam bơnơm hòi lah Olive. 38 Bơh rìng-àng, jơh làng-bol tus hơ Kơnràñ tam hìu duh-khoai làng iăt Khai.”
