Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Jơnau lùp gơrềng bơh gơnoar Kơnràñ Jesu dê
20 1 Gơlik gơs lah dùl ngai ne, tŭ Kơnràñ bơto làng-bol tam hìu duh-khoai mơ yal Jơnau Yal Niăm, gen bol ăt-bồ bol lơh-yàng dê mơ bol gơnoar-cih, bal mơ bol kuang kra tus, 2 mơ đơs mơ Kơnràñ: ‘‘Dăn đơs bol hi in: Ồng ai gơnoar lơi mơ lơh ală bơta hơ̆, ngŏlah ñcau neh pà ồng in gơnoar hơ̆ taih ?” 3 Hơ wơl, Kơnràñ đơs mơ bol khai: ‘‘Ai Añ , Añ rơp lùp bol mê dùl jơnau; đơs tĕ Añ in: 4 Bơta pơnđum Joan dê bơh trồ ngŏlah bơh kòn-bơnus ?” 5 Mơya bol khai kơlôi mơ đơs bal: ‘‘Dilah bol he đơs: ‘‘Bơh trồ”, gen Khai rơp đơs: ‘‘Ñchi bơh tài bol mê ờ pindờn Khai ?; 6 ai dilah bol he đơs: ‘‘Bơh kòn-bơnus”, gen jơh làng-bol rơp to lŭ bol he; kơyoa bol khai pin kơ̆ Joan lah cau ala-bơr.” 7 Mơ bol khai hơ bol khai ờ git mbơh lơi. 8 Kơnràñ Jesu đơs mơ bol khai: ‘‘Añ krung ờ đơs mơ bol mê Añ ai gơnoar lơi mơ lơh ală bơta hơ̆.”
Jơnau pơniơu bol lơh suơn gơsơt cau
9 Kơnràñ sơntờm đơs mơ làng-bol jơnau pơniơu do: ‘‘Geh cau ne tăm dùl suơn đo, ai bol lơh suơn in apah gơ, mơ lòt tiah ngài jŏ tơngai. 10 Tus kàl, khai pơyoa cau duh-broă tus mơ bol lơh suơn, làng bol khai ai khai in cồng-nha suơn đo; mơya bol lơh suơn pù-lơh cau hơ̆ mơ tơnrê gời. 11 Khai pơyoa tai cau duh-broă ndai tus; mơya bol khai krung pù-lơh cau hơ̆, tơmbàs mơ tơnrê gời. 12 Khai pơyoa tai cau duh-broă pe tus; bol khai krung lơh jê-sồt cau hơ̆ mơ tơlik hơ bơdìh. * 13 Cau tờm suơn đo đơs: ‘‘Ñchi Añ rơp lơh taih ? Añ rơp pơyoa kòn klau kờñ -gơboh Añ dê tus; digơlăn bol khai rơp bìr-adăt cau do.” 14 Tŭ bol lơh suơn gŏ cau do, gen kơlôi bal mơ đơs: ‘‘Do lah cau pơrdờn. Bol he rơp gơsơt khai, làng jơtài gơrê mơ he.” 15 Bol khai cơm cau do hơ bơdìh suơn đo mơ gơsơt. Be hơ̆, ñchi cau tờm suơn đo rơp lơh bol khai in taih ? 16 Khai rơp tus mơ tơnroh bol lơh suơn hơ̆ mơ ai suơn đo bol ndai in.”
Kơno be hơ̆, làng-bol đơs: ‘‘Kờñ bAñ geh chi hơ̆ !” 17 Mơya Kơnràñ sền dơ bol khai mơ đơs: ‘‘Be hơ̆, jơnau neh geh cih do lah ñchi taih:
‘‘Lŭ mơ bol băc hìu săng-sơrbì, lŭ hơ̆ neh gơs lŭ mum” ?
18 Cau lơi dùh hơđăng lŭ hơ̆, gen cau hơ̆ rơp kong lề; ai lŭ hơ̆ dùh hơđăng cau lơi, gen gơ rơp tơnlề cau hơ̆.” 19 Bol gơnoar-cih mơ bol ăt-bồ bol lơh-yàng dê jòi gùng tup tê dơ Kơnràñ tam jiờ hơ̆, mơya bol khai ngòt làng-bol; kơyoa bol khai git lah Kơnràñ neh đơs jơnau pơniơu hơ̆ dơ bol khai.
Boh dia Sesare in
20 Bol khai ơm kơp mơ pơyoa bol cau sền ờm lơh be bol song-ring, làng kup Kơnràñ tam jơnau đơs, mơ be hơ̆ jào Khai dơ cau kuang tờm-gơnoar. 21 Bol khai lùp Kơnràñ mơ đơs: ‘‘Ơ Pôgru, bol hi git Đi đơs mơ bơto dơpă-dơpài, ờ bìr cau lơi, mơya bơto gùng Yàng dê tam bơta ngăn-ngồn. 22 Bol hi geh boh dia Sesare in ngŏlah ờ ?” 23 Mơya Kơnràñ git loh bơta pơrlăc-pơrlồm bol khai dê, gen đơs mơ bol khai: 24 ‘‘Sơnđio tĕ Añ in dùl đong priă. Gơ geh rùp mơ khar păc ñcau dê ?” 25 Bol khai đơs: ‘‘Sesare dê.” Kơnràñ đơs mơ bol khai: ‘‘Be hơ̆, jào wơl tĕ Sesare in ală bơta Sesare dê, mơ Yàng in ală bơta Yàng dê.” 26 Bol khai ờ rơgơi kup bơr Kơnràñ dê dơđăp làng-bol; mơ ai lơh krơi bơh jơnau hơ wơl Kơnràñ dê, bol khai ơm momŏ.
Cau chơt kis wơl
27 Geh bàr pe nă cau Saduseo, lah bol đơs ờ geh bơta kis wơl, tus lùp Kơnràñ 28 mơ đơs: ‘‘Ơ Pôgru, Moise neh cih bol he in, dilah oh mi cau lơi chơt, geh bao mơ ờ geh kòn, gen oh mi khai pal bao mơ ùr hơ̆ làng tơrbŏ jơi oh mi he in. 29 Be hơ̆, geh poh nă oh mi: cau sơnrờp bao mơ chơt ờ geh kòn; 30 cau bàr, 31 mơ cau pe bao mơ ùr hơ̆, mơ krung be hơ̆ sơl, poh nă chơt mơ ờ lời wơl kòn. 32 Dut-ndơl, cau ùr hơ̆ krung chơt sơl. 33 Be hơ̆, tam ngai kis wơl, cau ùr hơ̆ rơp lah bao ùr ñcau dê tam bol khai ? Kơyoa poh nă neh bao mơ khai.” 34 Kơnràñ Jesu đơs mơ bol khai: ‘‘Oh kòn rài do lăp klau tambao ùr; 35 mơya bol cau geh kờp lah di-pal mơ rài tơnơ̆ mơ bơta kis wơl bơh bol cau chơt, gen ờ lăp klau, krung ờ tambao ùr. 36 Kơyoa bol khai ờ rơgơi kong chơt tai: bơh bol khai ring bal mơ bol huềng-duh, mơ lah kòn Yàng dê, tài bơh bol khai lah kòn bơta kis wơl dê. * 37 Ai gơrềng bơh bol cau chơt kis wơl, gen Moise neh sơnđio dơ rơlau lò, be khai đơs: ‘‘Kơnràñ lah Yàng Abraham dê, Yàng Isaak dê, mơ Yàng Jakop dê.” 38 Yàng ờ di lah bol cau chơt dê, mơya bol cau kis dê: kơyoa jơh ală cau kis Khai in.” * 39 Hơ wơl, geh bàr pe nă cau gơnoar-cih đơs: ‘‘Ơ Pôgru, Đi đơs di ngăn.” 40 Mơ bol khai ờ khin lùp Kơnràñ chi lơi tai.
Kơnràñ Jesu lah kòn mơ krung lah Kơnràñ Davit dê
41 Kơnràñ đơs mơ bol khai: ‘‘Mbe gơlơh cau đơs Kơnràñ Kristo lah kòn Davit dê ? 42 Kơyoa tờm Davit neh đơs tam sră Nrĭ-nrềng:
‘‘Kơnràñ neh đơs mơ Kơnràñ Añ : Nggui tĕ đah ma Añ ,
43 jơl tus dơ tŭ Añ ơn bol sò-tơm Kòn dê lơh kơrnờl jơng Kòn.”
44 Be hơ̆, Davit hòi Khai lah Kơnràñ, gen mbe gơlơh Khai lah kòn Davit dê taih ?”
Kơnràñ Jesu lah-pơrhơng bol gơnoar-cih
45 Tam tŭ jơh làng-bol găm iăt, gen Kơnràñ đơs mơ bol jăt-dờn Khai dê: 46 ‘‘Sền ngăc tĕ bol gơnoar-cih, lah bol kờñ lòt pơrwài mơ ào jrùh, gơboh ală jơnau đơs niăm-să tam gùng-dà, ală cơnờng hơđăp tam ală hìu-pơrjum, mơ ală anih hơđăp tam ală bơta đô-sa; 47 bol khai sa loan ală hìu-đăm bol ùr-bàng mơ lơh be răc dăn jòng gùng. Bol khai rơp dờp bơta yal-glài kơnjơ̆ rơlau.”
