Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Kơnràñ Jesu liklìng
2 1 Gơlik gơs lah, tam ală ngai hơ̆, Sesare Augusto tơlik sră, sồr jơh lơgar dunia pal cih sơnđăn măt. 2 Bơta cih sơnđăn măt dơ̆ sơnrờp do gơlik gơs tam tŭ Quirino gơs cau ăt-bồ Syria. 3 Jơh ală cau lòt yal sơnđăn măt kờp nă tam bòn dờng he dê. 4 Bơh bòn dờng Nazareth tam Galilea, Joseph guh hơ bòn dờng Davit, hòi lah Bethlehem, tam Judea, tài bơh khai lah bơh hìu-bơnhă mơ jơi-bơtiàn Davit, 5 làng yal sơnđăn măt bal mơ Maria, neh hơ bao mơ khai, găm bun. 6 Gơlik gơs lah, tŭ bol khai ơm tềng hơ̆, gen ngai Maria deh neh tus. * 7 Maria deh kòn klau tơnruh, ai ồi klơm khai mơ tơmbic khai tam bòng ñhơt, tài bơh ờ geh anih bol khai in tam hìu apah.
8 Tam kơnhoàl hơ̆, geh ală cau ê belàt ơm drơng măng mơ khiă-gàr mpồl belàt bol khai dê. 9 Huềng-duh Kơnràñ dê ntào rềp mơ bol khai, mơ bơta gơklŏ Kơnràñ dê gơcrà gùt dar bol khai, mơ bol khai rơngòt-rơngơt ngăn. 10 Huềng-duh đơs mơ bol khai: ‘‘Bol mê bañ rơngòt; kơyoa do añ yal bol mê in bơta chờhờp dờng, krung lah bơta chờhờp dờng jơh làng-bol in, 11 tài bơh ngai do, tam bòn dờng Davit dê, neh deh bol mê in Bơtau Tơngklàs, lah Kristo Kơnràñ. 12 Mơ do lah tềl bol mê in : bol mê rơp bàn gŏ oh-nga, geh klơm mơ ồi mơ tơmbic tam bòng ñhơt.” 13 Mơ nisơna, bal mơ huềng-duh, geh mpồl gal ling tam trồ jờngrơ Yàng mơ đơs:
14 ‘‘Gơklŏ Yàng tam kơloàng trồ, mơ tam tiah ring-lơngai bol cau di nùs Yàng.”
15 Gơlik gơs lah, tŭ bol huềng-duh lời bol ê belàt rê hơ trồ, gen bol ê belàt đơs bal: ‘‘Bol he lòt lă tus hơ Bethlehem mơ sền bơta neh gơlik gơs, mơ Kơnràñ neh ai bol he in git.” 16 Bol khai sơrbăc-sơrbăng lòt tus mơ bàn gŏ Maria, Joseph mơ oh-nga tơmbic tam bòng ñhơt. 17 Gŏ be hơ̆, bol khai yal wơl bơta neh yal bol khai in bơh oh dêt do. 18 Jơh ală cau lơi kơno, gen ai lơh krơi bơh ală bơta bol ê belàt neh yal mơ bol khai. 19 Ai Maria gen prăp jơh ală jơnau hơ̆ mơ kơlôi-sơnơng tam nùs.
20 Bol ê belàt rê wơl, tơngklŏ mơ jờngrơ Yàng bơh jơh ală bơta bol khai neh kơno mơ neh gŏ, jăt be neh yal mơ bol khai.
Kơnràñ Jesu dờp bơta siăt gơltau
21 Tơnơ̆ mơ tŭ neh tơl phàm ngai rau, tŭ pal siăt gơltau oh dêt in, gen cau hòi sơnđăn Khai lah Jesu, lah sơnđăn huềng-duh neh hòi, lài mơ tŭ Khai gơ ơn bun tam kơndul.
Pơdơng Kơnràñ Jesu Yàng in
22 Tơnơ̆ mơ tŭ neh tơl ală ngai tơngkloh bol khai dê jăt be jơnau boh-lăm Moise dê, gen bol khai cèng oh dêt hơ Jerusalem, làng pơdơng Kơnràñ in, 23 be neh cih tam jơnau boh-lăm Kơnràñ dê: ‘‘Jơh jơi dăm blong sò lài rơp geh hòi lah niăm-goh Kơnràñ in”, * 24 mơ làng pơdơng phan lơh-yàng jăt be bơta neh đơs tam jơnau boh-lăm Kơnràñ dê: lah dùl yô ntờp brê ngŏlah bàr nơm ntờp plŭ găm dêt.
25 Mơ do, tam Jerusalem, geh cau sơnđăn lah Simeon, lah cau song-dơpă mơ duh-rơngòt, găm kơp-gơn bơta pơndờm-pơnđiăng Israel dê, mơ Yàng Nhơm ơm hơđăng khai; 26 khai neh geh Yàng Nhơm tờs-tơnggit lah, khai rơp ờ gŏ chơt lài mơ tŭ gŏ Kristo Kơnràñ dê. 27 Geh Yàng Nhơm bơchồl, khai tus tam hìu duh-khoai. Mơ tam tŭ me bàp oh dêt Jesu cèng Khai tus, làng lơh Khai in jăt be bơta ờs-mờng jơnau boh-lăm dê, 28 gen Simeon kơnđu Khai tam tê, yalniăm Yàng mơ đơs:
Jơnau lik-lòt ring-lơngai
29 ‘‘Tŭ do, ơ Kơnràñ, jăt be jơnau đơs Đi dê, dăn Đi lời cau duh-broă Đi dê lik-lòt ring-lơngai,
30 tài bơh măt añ neh gŏ bơta tơngklàs Đi dê,
31 mơ Đi neh rơcăng dơđăp măt jơh ală làng-bol,
* 32 lah bơta àng yal-tơlik ală làng-bol bơdìh in, mơ bơta gơklŏ làng-bol Israel Đi dê.”
Simeon đơs ala-bơr
33 Bàp mơ mè Khai ai lơh krơi bơh ală jơnau neh đơs gơrềng bơh Khai. 34 Simeon yalniăm bol khai in, mơ đơs mơ Maria, mè Khai: ‘‘Do, oh dêt do neh geh ơn làng lơh gal cau tam Israel gơplừ mơ ñă-ntào, mơ làng gơs tềl cau in đơs tamdră, 35 – mơ să tờm ai, đào rơp srơp bluh huềng-soàn ai – làng ală jơnau kơlôi bơh nùs gal cau rơp yal-tơlik.”
36 Krung geh cau ùr ala-bơr lah Anna, kòn ùr Phanuel dê, bơh jơi-bơtiàn Aser. Khai neh dờng sơnăm ngăn, mơ bơh dơ tŭ uruh, neh kis bal mơ bơklau poh sơnăm; 37 khai ơm bàng tus phàm jơt poan sơnăm, ờ nrah ngài mơ hìu duh-khoai, măng mơ ngai duh-broă tam bơta wèr-ơt mơ răc dăn. 38 Di dơ jiờ hơ̆, khai krung tus yal-jờng Yàng, mơ đơs gơrềng bơh oh dêt mơ jơh ală cau kơp-gơn bơta tơwài Jerusalem.
Kơnràñ Jesu kis pơndơp tam Nazareth
39 Tŭ bol khai neh lơh sir-tơl jơh ală bơta jăt be jơnau boh-lăm Kơnràñ dê, gen bol khai rê wơl hơ Galilea, hơ bòn dờng bol khai dê lah Nazareth. 40 Ai oh dêt gen gơtào-dờng, pràn-kơldăng, bềng bơta jăk-chài; mơ bơta hàng-goh Yàng dê ơm hơđăng Khai.
Kơnràñ Jesu nggui tam gùl bol jăk-chài
41 Pah sơnăm, me bàp Kơnràñ dê lòt tus hơ Jerusalem tam ngai leh Lòt Găn. 42 Tŭ Kơnràñ neh jơt bàr sơnăm, bol khai guh tềng hơ̆ jăt be bơta ờs-mờng ngai leh dê, 43 lồc ală ngai hơ̆, tŭ bol khai rê wơl, gen oh dêt Jesu ơm wơl tam Jerusalem, mơ me bàp Khai ờ git. 44 Tồn lah oh dêt ơm tam ntum cau rê, bol khai neh lòt dùl ngai gùng, gen lùp-jòi Khai tam gùl bol jơi-bơtiàn mơ gơp-bòn; 45 mơ ờ bàn, tàng bol khai rê wơl hơ Jerusalem jòi Khai. 46 Gơlik gơs lah, tơnơ̆ mơ pe ngai, bol khai bàn Khai tam hìu duh-khoai, nggui tam gùl bol jăk-chài, iăt bol khai mơ lùp bol khai; 47 Jơh ală cau kơno Khai, gen ai lơh crih-crài bơh bơta jăk-chài mơ ală jơnau hơ wơl Khai dê. 48 Dơ̆ gŏ Khai, bol khai ai lơh krơi, mơ mè Khai đơs mơ Khai: ‘‘Ơ kòn, ñchi mê lơh bol hi in be hơ̆ taih ? Do bàp mê mơ añ moăt-kơnòl jòi mê.” * 49 Khai đơs mơ bol khai : ‘‘Ñchi gơlơh me bàp jòi añ taih ? Me bàp ờ git lah añ pal lơh ală broă Bàp añ dê ơ ?” 50 Bol khai ờ wă jơnau Khai đơs mơ bol khai.
Kơnràñ Jesu kis pơndơp tai tam Nazareth
51 Khai mù bal mơ bol khai, tus tam Nazareth mơ dờn-duh bol khai. Mè Khai prăp jơh ală jơnau hơ̆ tam nùs. 52 Kơnràñ Jesu gơguh tam bơta jăk-chài, tam să-bồ, mơ tam bơta hàng-goh dơđăp Yàng mơ dơđăp cau.
