Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Jơnau pơniơu cau kuang cah-rơña ờ song-ring mơ cau ùr-bàng tơmbòl
18 1 Kơnràñ đơs jơnau pơniơu mơ bol jăt-dờn, bơh bơta pal răc dăn sùm mơ bañ dil nùs, 2 Khai đơs: ‘‘Tam bòn dờng ne, geh dùl nă cau kuang cah-rơña ờ ngòt Yàng mơ krung ờ bìr-adăt cau. 3 Tam bòn dờng hơ̆ krung geh dùl nă cau ùr-bàng tus đơs mơ khai: ‘‘Dăn cah-rơña bơsong añ in gơrềng bơh cau sò-tơm mơ añ.” 4 Jŏ tơngai, khai ờ bài; mơya tơnơ̆ hơ̆, khai đơs is: ‘‘Bulah añ ờ ngòt Yàng mơ krung ờ bìr-adăt cau, 5 mơya bơh cau ùr-bàng do pơrjal añ, gen añ cah-rơña bơsong khai in, mbài tơnơ̆ do khai tus tơmbòl añ.”‘‘ 6 Kơnràñ đơs: ‘‘Bol kòn iăt tĕ jơnau cau kuang cah-rơña iơh-bơsăk đơs; 7 Yàng ờ cah-rơña bơsong bol cau geh rơwah Khai dê in, măng ngai hòi-nggà Khai, mơ Khai lơh ờ băt mơ bol khai ơ ?” 8 Añ đơs mơ bol kòn: Khai rơp mhar cah-rơña bơsong bol khai in. Mơya tŭ Kòn kòn-bơnus tus, Khai rơp bàn gŏ bơta pindờn tam tiah sơl ờ ?”
Jơnau pơniơu cau Phariseo mơ cau dar dia
9 Kơnràñ đơs jơnau pơniơu do mơ bol cau pin he lah cau song-dơpă mơ sền ờ sơp cau ndai: 10 ‘‘Geh bàr nă cau guh hơ hìu duh-khoai làng răc dăn: dùl nă cau Phariseo mơ dùl nă cau dar dia. 11 Cau Phariseo ntào răc dăn is be do: ‘‘Ơ Yàng, añ ưn-ngài Đi, bơh añ ờ di be ală cau ndai, hàm-hà, ờ song-dơpă, bơrnàn, ngŏlah be cau dar dia ne; 12 añ ơt-sa bàr dơ̆ tam dùl poh, añ ơn dùl bơnah jơt bơh jơh ală bơta añ dờp-geh.” 13 Ai cau dar dia ntào bơh ngài, ờ khin tơngờ măt hơ trồ, mơya tur ntơh mơ đơs: ‘‘Ơ Yàng, dăn nđàc-sơngit añ lah cau tìs-glài.” 14 Añ đơs mơ bol mê: Cau do mù rê hơ hìu, gen neh geh kờp lah song-ring, ờ di be cau ne. Kơyoa cau lơi tơngguh să tờm, gen rơp kong tơmù; mơ cau lơi tơmù să tờm, gen rơp geh tơngguh.”
Kơnràñ Jesu mơ bol kơnòm dêt
* 15 Cau krung cèng bol kơnòm dêt tus mơ Kơnràñ, làng Kơnàñ bư dơ bol khai; tŭ bol jăt-dờn gŏ be hơ̆, gen lah-pơrhơng bol khai. 16 Mơya Kơnràñ Jesu hòi bol khai tus mơ đơs: ‘‘Lời tĕ bol kơnòm tus mơ Añ, bañ kơryăn bol khai; bơh lơgar Yàng gơrê mơ bol cau be bol khai. 17 Di ngăn, Añ đơs mơ bol kòn: Cau lơi ờ wă-dờp lơgar Yàng be dùl nă kơnòm, gen rơp ờ geh mut tam hơ̆.”
Cau ăt-bồ pas ngăn
18 Geh dùl nă cau ăt-bồ lùp Kơnràñ mơ đơs: ‘‘Ơ Pôgru niăm-lơnhơn, ñchi añ pal lơh làng dờp-geh bơta kis sùm taih ?” 19 Kơnràñ Jesu đơs mơ khai: ‘‘Ñchi bơh tài mê đơs Añ lah niăm-lơnhơn taih ? Ờ geh cau lơi niăm-lơnhơn, mìng Yàng lơm. 20 Mê neh git ală jơnau sồr: bañ lơh bơrnàn, bañ gơsơt cau, bañ tung-kơñau, bañ lơh cơng blăc, dờn-duh tĕ bàp mơ mè mê.” 21 Cau hơ̆ đơs: ‘‘Jơh ală jơnau hơ̆ añ neh prăp bơh kơnòm.” 22 Kơno be hơ̆, Kơnràñ Jesu đơs mơ khai: ‘‘Mê găm phơt dùl jơnau lơm: tăc tĕ jơh ală bơta mê geh mơ pà bol rơbah in, gen mê rơp geh đăm phan-màng tam trồ, mơ tus tĕ jăt Añ.” 23 Kơno be hơ̆, khai moăt-jrùng, bơh khai pas ngăn.
Cau geh priă-jền mut tam lơgar Yàng lah kal-ke ngăn
24 Kơnràñ Jesu gŏ khai moăt-jrùng, gen đơs: ‘‘Cau geh priă-jền mut tam lơgar Yàng lah kal-ke ngăn. 25 Kơyoa làk-đà lòt găn trồm jrum gen buơn rơlau mơ cau pas-sơm mut tam lơgar Yàng.” 26 Ală cau kơno, gen đơs: ‘‘Be hơ̆, ñcau rơgơi geh tơngklàs taih ?” 27 Kơnràñ đơs mơ bol khai: ‘‘Ală bơta ờ rơgơi mơ kòn-bơnus, gen rơgơi lơm mơ Yàng.”
Phan-jờng gơrê mơ cau săng jơh ală bơta mơ jăt Kơnràñ Jesu
28 Petro đơs: ‘‘Do bol kòn neh săng-lời ală bơta bol kòn dê mơ jăt Đi.” 29 Kơnràñ đơs mơ bol khai: ‘‘Di ngăn, Añ đơs mơ bol mê: Ờ geh cau lơi săng hìu-đăm, ngŏlah kòn-bao, ngŏlah oh mi, ngŏlah me bàp, ngŏlah oh kòn tài bơh lơgar Yàng, 30 mơ ờ dờp oă rà tam rài do, mơ bơta kis sùm tam rài tơnơ̆.”
Kơnràñ Jesu yal lài dơ̆ pe bơta jê-yăn
31 Kơnràñ cèng bol Jơt Bàr mơ đơs mơ bol khai: ‘‘Do bol he guh hơ Jerusalem, mơ jơh ală bơta bol ala-bơr neh cih gơrềng bơh Kòn kòn-bơnus rơp geh bơsir: 32 kơyoa Khai rơp kong jào dơ làng-bol bơdìh, kong ñŏ-tơnhial, kong tơmbàs mơ kong choh-ngkhàk; 33 mơ lồc pù-lơh, cau gơsơt Khai, mơ ngai pe Khai rơp kis wơl.” 34 Mơya bol khai ờ wă chi lơi; jơnau hơ̆ găm pơnndơp mơ bol khai, mơ bol khai ờ wă ală jơnau Kơnràñ đơs.
Kơnràñ Jesu tơmbời cau jơngo măt tam Jeriko
35 Gơlik gơs lah tŭ Kơnràñ tus rềp hơ Jeriko, gen geh dùl nă cau jơngo măt nggui kơnư-dàn dơ gah gùng. 36 Dơ̆ khai kơno mpồl làng-bol lòt găn, khai lùp ñchi jơnau hơ̆. 37 Làng-bol đơs mơ khai: ‘‘Jesu Nazareth lòt găn.” 38 Khai hòi-nggà mơ đơs: ‘‘Ơ Jesu, kòn Davit, dăn nđàc-sơngit añ !” 39 Ală cau lòt lài lah-pơrhơng khai làng khai ơm momŏ; mơya khai sơlơ hòi-nggà rơlau tai: ‘‘Ơ kòn Davit, dăn nđàc-sơngit añ !” 40 Kơnràñ Jesu ơm wơl, sồr cau lăm khai tus mơ Kơnràñ. Tŭ khai neh tus rềp, Kơnràñ lùp khai: 41 ‘‘Ñchi mê kờñ Añ lơh mê in taih ?” Khai đơs: ‘‘Ơ Kơnràñ, dăn ai añ in gŏ.” 42 Kơnràñ Jesu đơs mơ khai: ‘‘Gŏ tĕ ! Nùs pindờn mê dê neh tơmbời mê.” 43 Tŭ hơ̆ mơ, khai gŏ mơ jăt Kơnràñ, mơ tơngklŏ Yàng. Gŏ be hơ̆, jơh làng-bol jờngrơ Yàng.
