Jơnau Yalniam Luka-Pơnah 17

Kai lơh gơtup tìs

17 1  Kơnràñ đơs mơ bol jăt-dờn Khai dê: ‘‘Ờ rơgơi mơ ờ gơtus ală kai lơh gơtup tìs; mơya dồn-sa cau lơi in bơh khai gơtus ală bơta hơ̆ ! 2 Ai mpal lŭ dờng kơt gùt dar ngko khai mơ cơm tam dà-lềng, gen kuơ rơlau khai in lah lời khai lơh gơtup tìs dùl nă in tam ală kơnòm dêt do. 3 Bol kòn sền ngăc tĕ !

Hồ tìs oh mi in

Dilah oh mi kòn dê lơh tìs, gen lah-pơrhơng tĕ khai, mơ dilah khai ềng-màl; gen hồ tĕ khai in; 4 dilah khai tìs mơ kòn dùl ngai poh dơ̆, mơ poh dơ̆ rê wơl mơ kòn mơ đơs: ‘‘Añ ềng-màl”, gen kòn pal hồ khai in.”

Bơta pràn nùs pindờn dê

5 Bol dờp-pơyoa đơs mơ Kơnràñ: ‘‘Dăn ai bơtơl bơta pindờn bol kòn in !” 6 Kơnràñ đơs: ‘‘Dilah bol kòn geh bơta pindờn be gar sơbê, bol kòn đơs mơ chi sơr do: ‘‘Rồ tĕ mê mơ tăm tĕ tam dà-lềng”, gen gơ krung dờn bơr bol kòn.

Duh-broă tam bơta pơndêt-să

7 Cau lơi tam bol kòn geh cau duh-broă lòt lơ-òr ngŏlah ê belàt, rê bơh sre, mơ cau hơ̆ đơs mơ khai: ‘‘Tus tĕ mhar, nggui tĕ sào”, 8 mơ ờ đơs mơ khai: ‘‘Yờ tĕ añ in sào mho, kơt but tĕ mơ duh-broă añ, jơl tus tŭ añ ñô-sa rau, gen tơnơ̆ hơ̆ mê rơp ñô-sa sơl ơ ?”

9 Cau tờm pal ưn-ngài cau duh-broă, tài bơh cau duh-broă neh lơh ală jơnau sồr sơl ơ ? * 10 Mơ bol kòn krung be hơ̆ sơl, tŭ bol kòn neh lơh jơh ală bơta neh sồr bol kòn, gen bol kòn đơs tĕ: ‘‘Bol hi lah bol duh-broă ờ kuơ; bol hi neh lơh bơta bol hi pal lơh.”‘‘

Jơt nă cau lut-dun

11 Gơlik gơs lah, tam tŭ lòt hơ Jerusalem, Kơnràñ lòt găn Samaria mơ Galilea. 12 Tŭ Kơnràñ mut tam bòn ne, gen geh jơt nă cau lut-dun tus tìp mơ Khai, bol khai ơm ntào bơh ngài 13 mơ pờ bơr đơs: ‘‘Ơ Pôgru Jesu, dăn nđàc-sơngit bol hi !” 14 Gŏ bol khai, Kơnràñ đơs : ‘‘Bol mê lòt tĕ sơnđio să bol lơh-yàng in.” Mơ gơlik gơs lah, tam tŭ bol khai lòt, gen bol khai geh tơnggoh. 15 Dùl nă tam bol hơ̆, gŏ he neh geh tơmbời, gen rê wơl ai jơnau đơs dờng jờngrơ Yàng; 16 khai blup să dơ jơng Kơnràñ mơ ưn-ngài Kơnràñ; mơ cau do lah cau Samaria. 17 Hơ wơl, Kơnràñ Jesu đơs: ‘‘Ờ di jơt nă neh geh tơnggoh ơ ? Gen, ntềng đah sin nă tai taih ? 18 Ờ gŏ bol khai rê wơl tơngklŏ Yàng, mơ geh mìng cau bơdìh do lơm taih ?” 19  Kơnràñ đơs mơ cau hơ̆: ‘‘Guh rê tĕ, nùs pindờn mê dê neh tơmbời mê.”

Gơnoar-bơtau Yàng dê ơm tam gùl bol mê

20 Bol Phariseo lùp Kơnràñ: ‘‘Tŭ lơi lơgar Yàng tus taih ?” Kơnràñ hơ wơl mơ bol khai mơ đơs: ‘‘Lơgar Yàng ờ di tus mơ măt gŏ, * 21 mơ cau krung rơp ờ đơs: ‘‘Do, tềng do” ngŏlah: ‘‘Tềng ne”; kơyoa do, lơgar Yàng ơm tam gùl bol mê.”

Ngai Kòn kòn-bơnus dê

* 22 Kơnràñ đơs mơ bol jăt-dờn: ‘‘Rơp tus ală ngai bol kòn kờñ gŏ dùl ngai Kòn kòn-bơnus dê mơ ờ gŏ. 23 Cau rơp đơs mơ bol kòn: ‘‘Do, tềng do”, ‘‘Ne, tềng ne”; bol kòn bañ lòt, krung bañ jăt. 24 Kơyoa be puh-lèp àng-gơcrà bơh đah trồ do tus đah trồ ne, gen Kòn kòn-bơnus krung rơp be hơ̆ sơl tam ngai Khai dê.  25 Mơya lài jơh, Khai pal kong oă bơta jê-yăn mơ kong rơnàng do săng-sơrbì. 26 Mơ neh gơlik gơs tam ală ngai Noe be lơi, gen krung rơp gơlik gơs be hơ̆ sơl tam ală ngai Kòn kòn-bơnus dê: 27 cau ñô-sa, lăp klau tambao ùr, jơl tus ngai Noe mut tam ahò, mơ dà kŏ tus tơnroh jơh. 28 Krung neh gơlik gơs ndrờm be hơ̆ sơl tam ală ngai Lot dê: cau ñô-sa, kă-bro, tùc-tăm, băc-bơtào; 29 mơya ngai Lot lik bơh Sodoma, gen Yàng tơndùh mìu ồs mơ siau bơh trồ mơ tơnroh jơh. 30 Krung rơp gơs be hơ̆, ngai Kòn kòn-bơnus geh sơnđio-tơlik. 31 Tam ngai hơ̆, cau lơi ơm hơđăng rơkàng, mơ phan-pờm khai dê ơm tam hìu,  gen bañ mù ai gơ; mơ cau lơi ơm tam sre, gen ndrờm be hơ̆ sơl, bañ wơl ngkời. 32 Kah tĕ bao ùr Lot dê. 33 Cau lơi jòi gùng tơngklàs bơta kis he dê, gen rơp roh gơ; mơ cau lơi roh gơ, gen rơp tơngkis gơ. 34 Añ đơs mơ bol kòn: Măng hơ̆, geh bàr nă tam dùl cơnờng bic: gen dùl nă rơp geh cèng, mơ dùl nă rơp kong lời wơl; 35 geh bàr nă cau ùr bŏ bal: gen dùl nă rơp geh cèng, mơ dùl nă rơp kong lời wơl.”

36 Bol jăt-dờn pờ bơr đơs mơ Kơnràñ: ‘‘Ntềng đah, ơ Kơnràñ ?” Kơnràñ đơs mơ bol khai: ‘‘Tềng lơi geh să chơt, gen tềng hơ̆ geh ală gơrơt ñồm.”