Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Jơnau pơniơu cau ăt-bồ broă-hìu ờ song-ring
16 1 Kơnràñ đơs tai mơ bol jăt-dờn: ‘‘Cau pas-gơs ne geh dùl nă cau ăt-bồ broă, mơ cau do kong cau yă mơ cau tờm lah khai neh lơh prih-prah phan-bơna cau tờm dê. 2 Cau tờm hòi khai mơ đơs mơ khai: ‘‘Ñchi jơnau añ kơno gơrềng bơh mê taih ? Kờp sền tĕ broă ăt-bồ hìu mê dê; tài bơh mê ờ rơgơi ăt-bồ broă-hìu tai.” 3 Cau ăt-bồ broă đơs is: ‘‘Ñchi añ rơp lơh taih, tài bơh cau tờm añ dê tă gơnoar ăt-bồ broă-hìu bơh dơ añ ? Pŏ ù gen añ ờ jai, lơh kơnư-dàn gen añ bàssìl. 4 Añ git bơta añ pal lơh, làng tŭ añ roh gơnoar ăt-bồ broă-hìu, gen geh ală cau wă-rò añ tam hìu bol khai dê.” 5 Gen, khai hòi kờp nă cau kòl dồs mơ cau tờm khai dê, mơ đơs mơ cau sơnrờp: ‘‘Nđờ mê kòl dồs mơ cau tờm añ dê taih ?” 6 Cau hơ̆ đơs: ‘‘Dùl rơhiăng yăng jiờu.” Khai đơs mơ cau hơ̆: ‘‘Ai tĕ sră cih dồs mê dê, nggui mhar mơ cih prăm jơt.” 7 Lồc gen, khai đơs mơ cau ndai: ‘‘Ai mê, mê kòl dồs nđờ taih ?” Cau hơ̆ đơs: ‘‘Dùl rơhiăng sơ̆ kòi.” Khai đơs mơ cau hơ̆: ‘‘Ai tĕ sră cih dồs mê dê mơ cih phàm jơt.” * 8 Mơ cau tờm jờng cau ăt-bồ broă ờ song-ring hơ̆, tài bơh khai neh lơh chài-rơgơi, kơyoa gơwèt mơ gơp-jơi he dê, kòn sau rài do chài-rơgơi rơlau mơ kòn sau bơta àng.
Song-ring tam broă ngui priă-jền
* 9 Mơ Añ đơs mơ bol mê: Ai tĕ priă-jền ờ song-ring lơh bol mê in geh ală oh mi bơyô, làng tŭ gơ neh jơh, gen bol khai wă-rò bol mê mut tam hìu gơs sùm.
10 Cau lơi kơ̆-mềr tam bơta dêt-rơhền, gen krung kơ̆-mềr tam bơta dờng; mơ cau lơi ờ song-ring tam bơta dêt-rơhền, gen krung ờ song-ring tam bơta dờng.
11 Be hơ̆, dilah bol mê neh ờ kơ̆-mềr gơrềng bơh priă-jền ờ song, gen ñcau rơp jào bol mê in bơta ngăn-ngồn ? 12 Mơ dilah bol mê neh ờ kơ̆-mềr bơh bơta cau ndai dê, gen ñcau rơp ai bol mê in bơta gơrê mơ bol mê ?
13 Ờ geh cau duh-broă lơi rơgơi duh-broă bàr nă cau tờm: kơyoa ngŏlah rơp kơuềng dơ cau do mơ gơboh dơ cau ne, ngŏlah rơp mềr mơ cau do mơ sền ờ sơp cau ne. Bol mê ờ rơgơi duh-broă Yàng mơ priă-jền.”
Kơnràñ Jesu lah-pơrhơng
bol Phariseo hàm-kờñ priă-jền
14 Bol Phariseo lah bol cau hàm-kơñ priă-jền, kơno jơh ală jơnau hơ̆, gen ñŏ-tơnhial Kơnràñ. 15 Kơnràñ đơs mơ bol khai: ‘‘Bol mê lah bol cau lơh song-dơpă să tờm dơđăp kòn-bơnus; mơya Yàng git nùs bol mê, bơh bơta lah dờng-jơnhoa mơ kòn-bơnus gen lah bơta ngkòr-ngkàc dơđăp Yàng.
16 Geh Gùng boh-lăm mơ bol Ala-bơr jơl tus Joan; bơh tŭ hơ̆, lơgar Yàng geh yal-bơto, mơ cau lơi krung ngui pràn mut tam hơ̆.
Gùng boh-lăm rơp ờ tŭ lơi ờ kuơ
* 17 Trồ tiah gơgăn gen buơn rơlau mơ dùl pêt dùl lêl tam Gùng boh-lăm gơroh.
Jơnau lời bao
18 Cau lơi lời bao ùr he mơ bao mơ cau ndai, gen lơh tìs bơrnàn; mơ cau lơi bao mơ cau ùr neh cau klau lời, gen krung lơh tìs bơrnàn sơl.
Jơnau pơniơu cau pas-gơs mơ Lazaro rơbah
* 19 Geh cau pas-gơs ne soh ào prơhê mơ lơbơn, pah ngai ñô-sa dờng lơm. 20 Mơ geh cau rơbah ne, sơnđăn lah Lazaro, bic dơ mpồng hìu cau hơ̆, să bềng toh kiăt, 21 wờl-kờñ geh hờm mơ ală phan pìng bơh cơnờng sào cau pas-gơs dê; mơya mìng geh mpồl so tus liăp toh kiăt khai dê. 22 Gơlik gơs lah cau rơbah chơt, mơ geh bol huềng-duh cèng tus dơ ntơh Abraham dê; cau pas-gơs krung chơt mơ geh tơp. 23 Tam brah-tìng, tŭ kong jê-yăn, cau pas-gơs tơngờ măt, gŏ Abraham bơh ngài, mơ Lazaro dơ ntơh khai. 24 Cau pas-gơs hòi-nggà mơ đơs: ‘‘Ơ Bàp Abraham, dăn nđàc-sơngit añ, mơ pơyoa Lazaro iŭ cồng nau tê khai tam dà, làng lơh mrềt mpiăt añ, kơyoa añ kong jê-yăn tam cồng ồs do.” 25 Mơya Abraham đơs: ‘‘Ơ kòn, kah tĕ lah tam rài mê, mê neh dờp ală bơta niăm mê dê, ai Lazaro neh dờp ală bơta iơh; tŭ do khai geh pơndờm-pơnđiăng tềng do, ai mê kong jê-yăn. 26 Rơlau tai, tam gùl bol hi mơ bol mê, neh geh thòng jrô dờng, tiăn tus bol hi kờñ bơh ndo lòt găn tus hơ bol mê gen ờ rơgơi, mơ bơh nhơ̆ lòt găn tus hơ bol hi krung ờ rơgơi sơl.” 27 Cau pas-gơs đơs: ‘‘Be hơ̆, ơ Bàp, añ dăn Bàp pơyoa Lazaro tus tam hìu bàp añ dê 28 – kơyoa añ geh prăm nă oh mi – làng khai lơh cơng bol khai in, mbài bol khai tus tam anih jê-yăn do.” 29 Abraham đơs: ‘‘Bol khai geh Moise mơ bol Ala-bơr; bol khai iăt tĕ bol hơ̆.” 30 Cau pas-gơs đơs: ‘‘Ờ, ơ Bàp Abraham, mơya dilah geh cau lơi bơh bol cau chơt tus mơ bol khai, gen bol khai rơp ềng-màl.” 31 Abraham đơs mơ khai: ‘‘Dilah bol khai ờ iăt Moise mơ bol Ala-bơr, gen dilah geh cau lơi bơh bol cau chơt kis wơl, bol khai krung ờ pindờn sơl.”
