Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Pe jơnau pơniơu gơrềng bơh nùs nđàc-sơngit Yàng dê
15 * 1 Jơh ală cau dar dia mơ ală cau tìs-glài tus rềp mơ Kơnràñ làng iăt Khai. 2 Bol Phariseo mơ bol gơnoar-cih kơmrào mơ đơs: ‘‘Cau do wă-rò bol tìs-glài mơ sa bal mơ bol khai.” 3 Kơnràñ đơs mơ bol khai jơnau pơniơu do:
Jơnau pơniơu belàt roh
4 ‘‘Cau lơi tam bol mê geh dùl rơhiăng nơm belàt, mơ dilah gơ nrah dùl nơm tam bol gơ, gen ờ lời sin jơt sin nơm tam blàng bràs, mơ lòt jòi belàt neh nrah, jơl tus tŭ bàn gơ ơ ? 5 Mơ tŭ neh bàn gơ rau, khai chờhờp đoa gơ hơđăng pơnì, 6 rê hìu, hòi-jà bol bơyô mơ bol gơp-bòn, mơ đơs mơ bol khai: ‘‘Hờn-chờ tĕ bal mơ añ, bơh añ neh bàn belàt roh añ dê.” 7 Añ đơs mơ bol mê: Tam trồ rơp chờhờp be hơ̆ bơh dùl nă cau tìs-glài ềng-màl, rơlau mơ bơh sin jơt sin nă cau song-dơpă ờ càng ềng-màl.
Jơnau pơniơu đong priă roh
8 Ngŏlah cau ùr lơi geh jơt đong priă, dilah roh dùl đong, gen ờ chu đèng, pơs hìu mơ jòi nền, jơl tus tŭ bàn ơ ? 9 Mơ tŭ neh bàn rau, khai hòi-jà bol bơyô, bol gơp-bòn mơ đơs: ‘‘Hờn-chờ tĕ bal mơ Añ, bơh añ neh bàn đong priă Añ neh roh.” 10 Be hơ̆, Añ đơs mơ bol mê: Dơđăp bol huềng-duh Yàng dê, geh chờhờp bơh dùl nă cau tìs-glài ềng-màl.”
Jơnau pơniơu cau bàp sơrmah
* 11 Kơnràñ đơs tai: ‘‘Cau ne geh bàr nă kòn klau. 12 Kòn oh đơs mơ bàp: ‘‘Ơ bàp, dăn pà añ in bơnah jơtài gơrê mơ añ.” Mơ cau bàp neh tampà jơtài bol khai in. 13 Dŭt ngai tơnơ̆, kòn oh tơrgùm jơh ală bơta lik-lòt tiah ngài, mơ tềng hơ̆, khai kis gơlềng-gơlàng lơh prih-prah jơtài khai dê. 14 Tŭ khai neh dơ̆ jơh hir rau, gen gơlik gơs bơta jơgloh-rung dờng tam kơnhoàl hơ̆, mơ khai sơntờm jơgloh rơbah. 15 Khai lòt kis tòp mơ dùl nă cau tam kơnhoàl hơ̆, mơ cau do pơyoa khai lòt tam blàng ê sur; 16 khai kờñ ngăn tơmbềng klung mơ pòr sur sa, mơ ờ geh cau lơi ai khai in. 17 Khai wờl să mơ đơs: ‘‘Git nđờ nă cau lơh apah bàp añ dê geh oă rà bañ, mơya añ ndo chơt jơgloh. 18 Añ rơp ñă, rê mơ bàp añ, mơ đơs mơ khai: Ơ bàp, añ neh lơh tìs mơ trồ mơ dơđăp bàp, 19 mơ añ ờ di-pal geh hòi lah kòn bàp dê tai; dăn bàp kờp añ be dùl nă tam bol lơh apah bàp dê.” 20 Khai ñă, rê tus mơ bàp khai.
Tŭ khai găm bơh ngài, gen bàp khai neh gŏ, mơ gơlơh nđàc-sơngit, ntoat tus, koar dơ ngko khai mơ cum khai. 21 Cau kòn đơs mơ bàp: ‘‘Ơ bàp, añ neh lơh tìs mơ trồ mơ dơđăp bàp; añ ờ di-pal geh hòi lah kòn bàp dê tai.” 22 Mơya cau bàp đơs mơ bol duh-broă khai dê: ‘‘Mhar cèng tĕ ào jrùh niăm rơlau jơh tơnsoh khai in, tơndò tĕ sơmbiăt dơ tê khai, tơncù tĕ khŏ dơ jơng khai, 23 mơ kup tĕ kơnrồ kòn lơmă lơh poăc, bol he sa mơ lơh-chờ tĕ, 24 bơh kòn klau añ do neh chơt mơ kis wơl, neh roh mơ bàn wơl. Mơ bol khai sơntờm lơh-chờ.
25 Tŭ hơ̆, kòn tơnhoa khai dê ơm tam blàng sre, dơ̆ rê mờr tus hìu, kơno ntas kơlñi mơ cau tamya, 26 gen hòi dùl nă tam bol duh-broă mơ lùp ñchi ală jơnau hơ̆. 27 Cau hơ̆ đơs mơ khai: ‘‘Oh mê neh rê, mơ bàp mê neh lơh poăc kơnrồ kòn lơmă, bơh gŏ khai pràn-kơldăng.” 28 Cau kòn tơnhoa gơhào-gơjrañ mơ ờ bài mut tam hìu. Gen tàng, bàp khai lik dăn mơ khai. 29 Mơya khai hơ wơl, đơs mơ bàp khai: ‘‘Do, neh git nđờ sơnăm rau, añ duh-broă bàp, ờ tŭ lơi lơh sơlơ̆ mơ jơnau bàp sồr, mơ ờ tŭ lơi bàp neh ai añ in dùl nơm be kòn, làng añ lơh-chờ bal mơ bol bơyô añ dê; 30 mơya tơnơ̆ mơ tŭ kòn klau bàp dê do neh sa loan jơtài bàp dê bal mơ bol dri-tơlàr mơ rê wơl, gen bàp lơh poăc kơnrồ kòn lơmă gờm khai.” 31 Mơya cau bàp đơs mơ khai: ‘‘Ơ kòn, mê ơm sùm bal mơ añ, mơ jơh ală bơta añ dê lah mê dê; 32 mơya pal lơh-chờ mơ chờhờp, bơh oh mê do neh chơt mơ kis wơl, neh roh mơ bàn wơl.”
