Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Kơnràñ Jesu tơmbời cau pŭ tam ngai sabbat
14 1 Gơlik gơs lah, tam ngai sabbat, tŭ Kơnràñ mut sào tam hìu dùl nă cau ăt-bồ bol Phariseo, gen bol khai kơp-sền Kơnràñ. 2 Mơ do, geh dùl nă cau kòp pŭ ơm dơđăp Kơnràñ. 3 Hơ wơl, Kơnràñ Jesu đơs mơ bol jăk gùng boh-lăm mơ bol Phariseo :
‘‘Geh tơmbời tam ngai sabbat lah ờ ?” 4 Mơya bol khai ơm momŏ. Gen Kơnràñ ăt dơ khai, tơmbời mơ ai rê. 5 Kơnràñ đơs mơ bol khai: ‘‘Cau lơi tam bol mê geh kòn klau ngŏlah kơnrồ dùh tam tơrlung, mơ ờ hoài-tơlik gơ mơ tam ngai sabbat ơ ?” 6 Bol khai ờ rơgơi hơ wơl mơ Kơnràñ bơh ală jơnau hơ̆.
Nggui tĕ dơ anih lồi-tơnơ̆
7 Kơnràñ đơs mơ ală cau geh jà dùl jơnau pơniơu, tŭ gŏ bol khai rơwah ală cơnờng lài-đăp; Kơnràñ đơs mơ bol khai: 8 ‘‘Tŭ mê geh cau jà ñô-bao, gen bañ nggui dơ anih lài-đăp, ngòt geh cau lơi dờng rơlau mơ mê geh cau jà sơl, 9 mơ cau neh jà mê mơ cau hơ̆ tus đơs mơ mê: ‘‘Dăn lời anih cau do in”; tŭ hơ̆, mê rơp bàssìl mù nggui dơ anih lồi-tơnơ̆. 10 Mơya tŭ mê geh jà, lòt tĕ nggui dơ anih lồi-tơnơ̆, làng tŭ cau neh jà mê tus đơs mơ mê: ‘‘Ơ bi, dăn guh hơđăp êt”; tŭ hơ̆, mê rơp geh yòm dơđăp jơh ală cau ơm nggui sa bal. 11 Kơyoa cau lơi tơngguh să tờm, gen rơp kong tơmù; mơ cau lơi tơmù să tờm, gen rơp geh tơngguh.”
Tŭ yờ ñô-sa, jà tĕ bol rơbah-rơbừp
12 Kơnràñ krung đơs mơ cau neh jà Khai: ‘‘Tŭ mê yờ sào ngai ngŏlah sào mho, bañ jà bol bơyô, bol oh mi, bol jơi-bơtiàn, bol gơp-bòn pas-gơs, rơngòt bol hơ̆ jà wơl mê, mơ mê geh tơm wơl. 13 Mơya tŭ mê yờ ñô-sa, jà tĕ bol rơbah-rơbừp, bol sồt-rơmàñ, bol kuet-kơlte, bol bồm-jơngo; 14 mơ mê rơp geh bơtoah, bơh bol khai ờ geh chi lơi tơm wơl mê in. Kơyoa mê rơp geh tơm wơl tŭ bol song-ring kis wơl.”
Jơnau pơniơu cau năc geh jà mơ ờ tus
15 Tŭ kơno ală jơnau hơ̆, dùl nă tam bol sa bal đơs mơ Kơnràñ: ‘‘Bơtoah cau lơi rơp geh sa bañ tam lơgar Yàng.” 16 Mơya Kơnràñ đơs mơ khai: ‘‘Dùl nă cau ne yờ sào mho dờng mơ jà gal cau; 17 tus jiờ sa, khai pơyoa cau duh-broă khai dê đơs mơ bol cau geh jà: ‘‘Dăn bol đi tus, bơh neh rơcăng jơh rau.” 18 Mơya jơh ală cau balĕ bal sơntờm dăn să. Cau sơnrờp đơs mơ khai: ‘‘Añ pa blơi dùl bă sre, añ pal lòt sền gơ; añ dăn mê ai añ in dăn să.” 19 Cau ndai đơs: ‘‘Añ pa blơi prăm yô kơnrồ, añ lòt lòng sền gơ; añ dăn mê ai añ in dăn să.” 20 Cau ndai tai đơs: ‘‘Añ pa bao, gen tàng añ ờ rơgơi tus.” 21 Cau duh-broă rê wơl, yal ală jơnau hơ̆ cau tờm khai dê in. Tŭ hơ̆, cau tờm hìu gơjrañ đơs mơ cau duh-broă khai dê: ‘‘Mhar lik-lòt tĕ tus tam ală ñhòng bòn dờng mơ ală jum gùng, mơ lăm tĕ bol rơbah-rơbừp, bol sồt-rơmàñ, bol bồm-jơngo mơ bol kuet-kơlte tus ndo.” 22 Cau duh-broă đơs: ‘‘Ơ ồng, jơnau Đi sồr neh lơh rau, mơya găm anih.” 23 Cau tờm đơs mơ cau duh-broă: ‘‘Lik-lòt tĕ tam ală gùng-dà, mơ bơklơn cau mut, làng gơbềng hìu añ. 24 Añ đơs mơ bol mê lah, ờ geh cau lơi tam ală cau neh geh jà hơ̆, rơp geh lep bơta ñô-sa mho añ dê.”‘‘
Tui chikal he dê mơ jăt Kơnràñ Jesu
25 Geh mpồl làng bol gal ngăn lòt bal mơ Kơnràñ; Kơnràñ wơlke đơs mơ bol khai: * 26 ‘‘Dilah cau lơi tus mơ Añ mơ ờ gơjrañ mơ bàp, mơ mè, mơ bao, mơ oh kòn, mơ oh mi, mơ ruh-lŏ mơ bơta kis he dê tai, gen ờ rơgơi gơs cau jăt-dờn Añ dê. 27 Cau lơi ờ tui chikal he dê mơ jăt Añ, gen ờ rơgơi gơs cau jăt-dờn Añ dê.
Săng-lời jơh ală bơta he geh
28 Kơyoa cau lơi tam bol mê kờñ băc-bơtào dùl nơm gơlăng, mơ lài jơh ờ nggui kờp priă-jền pal dơ̆, sền geh tơl làng lơh sir ờ ? 29 Ngòt tơnơ̆ mơ tŭ neh lơh bơnàng mơ ờ rơgơi lơh sir, gen jơh ală cau gŏ rơp sơntờm ñŏ-tơnhial khai 30 mơ đơs: ‘‘Cau do neh sơntờm băc-bơtào mơ ờ rơgơi lơh sir.” 31 Ngŏlah geh bơtau lơi rơp lòt tamlơh mơ bơtau ndai, mơ lài jơh ờ nggui kơlôi sền, khai bal mơ jơt rơbô nă rơgơi tamdră mơ bơtau bal mơ bàr jơt rơbô nă tus mơ khai ờ ? 32 Dilah ờ, gen tŭ bơtau hơ̆ găm ơm ngài, khai neh pơyoa cau ala-măt tus dăn bơta pơnring-lơngai. 33 Be hơ̆ tàng, cau lơi tam bol mê ờ săng-lời jơh ală bơta he geh, gen ờ rơgơi gơs cau jăt-dờn Añ dê.
Boh gơlik bơsàp
34 Boh lah phan niăm, mơya dilah boh krung gơlik bơsàp, gen ñchi ai pơnđồm gơ. 35 Gơ ờ kuơ ù in, krung ờ kuơ chi-pơnđồm ù in, mơya cau săng gơ hơ bơdìh. Cau lơi geh tồr iăt, gen iăt tĕ.”
