Jơnau Yalniam Luka-Pơnah 12

Đơs tĕ dơđăp cau mơ bañ ngòt

12 1 Tam tŭ hơ̆, gal mpồl làng-bol pơrjum bal, tiăn tus bol khai tam ntềt tamjă bal, Kơnràñ sơntờm đơs, lài jơh mơ bol jăt-dờn Khai dê: ‘‘Sền ngăc tĕ bơh kañ bol Phariseo dê, hơ̆ lah bơta blăc-să. 2 Ờ geh bơta lơi pồn-ndơp mơ rơp ờ geh pờ-tơlik, krung ờ geh bơta lơi ndơp mơ cau rơp ờ git. 3 Gen tàng, ală bơta bol kòn neh đơs tam klăm-jơngo, rơp geh kơno tam bơta àng; mơ bơta bol kòn neh đơs dơ tồr tam adŭ, rơp geh yal-bơto hơđăng rơkàng hìu.

4 Añ đơs mơ bol kòn lah bol bơyô Añ dê: Bañ ngòt bol cau gơsơt să-jăn, mơ tơnơ̆ gen, ờ rơgơi lơh chi lơi rơlau tai. 5 Añ rơp sơnđio bol kòn in git pal ngòt cau lơi: Ngòt tĕ Bơtau, tơnơ̆ mơ gơsơt, gen geh gơnoar tơmut tam brah-tìng. Ngăn be hơ̆, Añ đơs mơ bol mê: Ngòt tĕ Bơtau hơ̆. 6 Prăm nơm jik ờ di tăc bàr su ơ ? Mơ ờ dùl nơm lơi tam bol gơ kong huĭ dơđăp Yàng. 7 Mơya ală ñhe sŏ hơđăng bồ bol kòn dê krung neh geh kờp jơh rau. Bañ ngòt, bol kòn màng rơlau mơ oă jik.

8 Añ đơs mơ bol kòn: Cau lơi rơp yal-tơlik Añ dơđăp cau,  gen Kòn kòn-bơnus krung rơp yal-tơlik khai dơđăp bol huềng-duh Yàng dê; 9 mơya cau lơi rơp pơndăng-săng Añ dơđăp cau, gen rơp kong pơndăng-săng dơđăp bol huềng-duh Yàng dê.

10 Cau lơi đơs jơnau tamdră mơ Kòn kòn-bơnus, gen rơp geh hồ; ai cau lơi đơs tràl-sơrbil tamdră mơ Yàng Nhơm, gen rơp ờ geh hồ.

11 Tŭ cau cèng bol kòn tus tam ală hìu-pơrjum, mơ tus hơ bol ăt-bồ mơ bol gơnoar, gen bol kòn bañ kơnòl be lơi ngŏlah chi lơi pal hơ wơl, ngŏlah chi lơi pal đơs: 12 Kơyoa tam jiờ hơ̆, Yàng Nhơm rơp bơto bol kòn ală jơnau pal đơs.”

Bañ tơrgùm-prăp phan-bơna he in

13 Geh cau bơh tam mpồl làng-bol đơs mơ Kơnràñ: ‘‘Ơ Pôgru, dăn đơs mơ bi añ tampà jơtài añ in.” 14 Mơya Kơnràñ đơs mơ khai: ‘‘Ơ cau ne, ñcau neh bơtào Añ gơs cau cah-rơña ngŏlah cau tampà jơtài bol mê in ?” 15 Mơ Kơnràñ đơs mơ bol khai: ‘‘Bol mê sền ngăc tĕ mơ prăp-gàr să tĕ bơh jơh ală bơta hàm-hà, kơyoa dilah cau lơi geh bềng lìu ală bơta, gen bơta kis cau hơ̆ dê ờ di bơh ală bơta khai geh.”

16 Kơnràñ đơs mơ bol khai jơnau pơniơu do: ‘‘Mìr sre cau pas-sơm ne gơlik cồng-nha oă rà. 17 Khai kơlôi is lah: ‘‘Ñchi añ pal lơh, tài bơh añ ờ geh anih prăp ală cồng-nha añ dê tai ?” 18 Khai đơs: ‘‘Añ rơp lơh bedo: lơh tơrlah ală đăm añ dê, băc-bơtào ală đăm dờng rơlau, mơ prăp jơh kòi mơ ală phan-bơna añ dê tam hơ̆; 19 mơ añ rơp đơs mơ sồp-soàn añ: Ơ sồp-soàn, mê geh oă phan-bơna tơrgùm-prăp rà sơnăm in; rơlô tĕ, sa tĕ, ñô tĕ, chờ tĕ.” 20 Mơya Yàng đơs mơ khai: ‘‘Ơ cau brơngơl-gơla, măng do, cau rơp toh wơl sồp-soàn mê, gen ală bơta mơ mê neh rơcăng, rơp gơrê mơ ñcau taih ?” 21Cau lơi tơrgùm-prăp phan-bơna he in, mơ ờ gơs pas-sơm dơđăp Yàng, gen krung be hơ̆ sơl.”

Pin-kơnờm dơ bơta săp-pơndăp Yàng dê

22 Kơnràñ đơs mơ bol jăt-dờn Khai dê: ‘‘Gen tàng, Añ đơs mơ bol kòn: bañ kơlôi-kơnòl bơta kis in ñchi bol kòn sa, mơ să-jăn in ñchi bol kòn soh. 23 Kơyoa bơta kis gen rơlau mơ phan sa, mơ să-jăn gen rơlau mơ phan soh. 24 Sền-kơlôi tĕ ală kơnđà, bol gơ ờ sih, krung ờ tơwès, ờ geh đăm, ờ geh bong, mơ Yàng siăm-ròng bol gơ; bol kòn màng rơlau mơ bol gơ git nđờ ! 25 Ñcau tam bol kòn bơh kơlôi-kơnòl mơ rơgơi bơtơl dùl nđàm dơ rài kis he ơ ? 26 Gen tàng, dilah bơta dêt rơlau jơh mơ bol kòn ờ rơgơi, gen ñchi bol kòn kơlôi-kơnòl gơrềng bơh ală bơta ndai taih ? 27 Sền-kơlôi tĕ ală bơkào bŏ gơhòn be lơi: gơ ờ bòl-glar, krung ờ rồi brài; mơya Añ đơs mơ bol kòn: Salomon tam jơh bơta gơklŏ khai dê, krung ờ geh soh be dùl nơm tam bol gơ. 28 Dilah ñhơt ngai do găm tam blàng, mơ ngai hìng kong sơrbì tam rơm ồs, mơ Yàng găm tơnsoh be hơ̆, gen bol kòn rơlau git nđờ, ơ bol ờ hoan pindờn ! 29 Ai bol kòn, bañ jòi ñchi bol kòn sa, ngŏlah ñchi bol kòn hùc, mơ bañ kơlôi-kơnòl. 30 Kơyoa jơh ală bơta hơ̆, ală làng-bol bơdìh dunia dê jòi; mơya Bàp bol kòn git lah bol kòn di kờñ ală bơta hơ̆. 31 Be hơ̆, bol kòn jòi tĕ lơgar Khai dê; mơ ală bơta hơ̆ rơp geh ai bơtơl bol kòn in.

32 Ơ mpồl dêt-rơhền, bañ ngòt, bơh Bàp bol kòn neh chờ nùs pà lơgar bol kòn in.

Tăc ală bơta he geh mơ pà gời

* 33 Tăc tĕ ală bơta bol kòn geh, mơ pà gời tĕ. Lơh tĕ bol kòn in ală kơldung ờ klar, đăm phan ờ hŭc tam trồ, tềng hơ̆, cau thừ-blơ̆ ờ tus rềp, mơ mŏ tơrleh ờ sa; 34 bơh đăm phan bol kòn ơm tềng lơi, gen nùs bol kòn krung rơp ơm tềng hơ̆ sơl.

Pal răk-rơcăng kơp-gơn cau tờm rê

35 But bol kòn pal kơt tĕ, mơ đèng pal chu tĕ, 36 bol kòn gơs tĕ ndrờm be bol cau kơp-gơn cau tờm he dê rê bơh ñô-bao, làng tŭ khai rê tus mơ teh mpồng, gen pờ mơ khai  in. 37 Bơtoah bol duh-broă hơ̆, tŭ cau tờm rê tus, gŏ bol khai găm ơm drơng. Di ngăn, Añ đơs mơ bol kòn, cau tờm rơp kơt but, ai bol khai ơm dơ cơnờng sào, mơ tus duh-broă bol khai. 38 Dilah cau tờm rê tam jiờ drơng dơ̆ bàr ngŏlah tam jiờ drơng dơ̆ pe, mơ gŏ be hơ̆, gen bơtoah bol hơ̆ in. 39 Bol kòn git tĕ jơnau do: dilah cau tờm hìu git jiờ lơi cau blơ̆ tus, gen khai rơp ờ lời cau hơ̆ tờ-tơrbluh hìu khai. 40 Bol kòn krung be hơ̆ sơl, răk-rơcăng tĕ, tài bơh jiờ lơi bol kòn ờ kơlôi, gen Kòn kòn-bơnus tus.”

 41 Petro đơs: ‘‘Ơ Kơnràñ, Đi đơs jơnau pơniơu do bol kòn in, ngŏlah krung jơh ală cau in sơl ?” 42 Kơnràñ đơs: ‘‘Kòn kơlôi ñcau lah cau ăt-bồ broă kơ̆-mềr mơ ngăc-ngar, mơ cau tờm hìu rơp pồ-ơn hơđăng bol duh-broă tam hìu khai, làng pà bơnah kòi-phe di jiờ taih ? 43 Bơtoah cau duh-broă hơ̆, tŭ cau tờm khai tus, gŏ khai găm lơh be hơ̆. 44 Ngăn, Añ đơs mơ bol kòn: Cau tờm rơp pồ-ơn cau duh-broă hơ̆ hơđăng jơh ală bơta khai geh. 45 Mơya dilah cau duh-broă hơ̆ đơs tam nùs khai: ‘‘Cau tờm añ ờ băt tus”, mơ khai sơntờm pù-lơh ală dĭ klau dĭ ùr, mơ ñô-sa bơñul-lơmbè, 46 cau tờm cau duh-broă hơ̆ rơp tus tam ngai khai ờ kơp, tam jiờ khai ờ git, mơ cau tờm rơp cah is khai, ơn bơnah khai dê bal mơ bol ờ kơ̆-mềr. 47 Cau duh-broă hơ̆ neh git nùs-kờñ cau tờm khai dê, mơ neh ờ răk-rơcăng, ngŏlah neh ờ lơh jăt nùs-kờñ cau tờm dê, gen rơp kong pù-lơh rà ngăn; 48 ai cau lơi ờ git mơ neh lơh ală bơta di-pal pù-lơh, gen rơp kong pù-lơh dŭt. Cau lơi neh geh pà rà, gen rơp kong lùp wơl rà; mơ cau lơi neh geh jào rà, gen rơp kong ai wơl rà rơlau.

Nùs-nhơm Kơnràñ Jesu dê lài mơ bơta jê-yăn

49 Añ neh tus cèng ồs tus tam tiah, mơ ñchi Añ kờñ ? Kờñ gơ neh hìt rau ! 50 Añ geh bơta pơnđum pal dờp, mơ nùs añ gơchồl oă ngăn, jơl tus tŭ gơ gơs wil-tơl !

Kơnràñ tus làng lơh bơta cah is

51 Bol kòn kơlôi lah Añ tus ai bơta ring-lơngai ù-tiah in ơ ?  Añ đơs mơ bol kòn, ờ di, mơya lah bơta cah is. 52 Kơyoa bơh ndo, prăm nă tam dùl hìu rơp tamcah is: pe mơ bàr, bàr mơ pe; 53 bol khai rơp tamcah is, bàp mơ kòn klau, kòn klau mơ bàp, mè mơ kòn ùr, kòn ùr mơ mè, po-me mơ băn, băn mơ po-me.”

Đal-git tŭ tơngai

54 Kơnràñ đơs tai mơ ală mpồl làng-bol: ‘‘Tŭ bol mê gŏ mhoal guh bơh đah măt tơngai mut, bol mê đơs mơ : ‘‘Mìu tus rau”, mơ gơlik gơs be hơ̆;

55 mơ tŭ gŏ càl bơh đah đơm khồm, bol mê đơs: ‘‘Trồ rơp duh”, mơ gơlik gơs be hơ̆. 56 Ơ bol blăc-să, bol mê git đal rùp trồ tiah dê, ai tŭ tơngai do, mbe gơlơh bol mê ờ git đal ? 57 Ñchi bơh tài bol mê ờ sơwì is bơta lơi lah song taih ?

58 Tŭ mê lòt bal mơ cau sò-tơm mê dê tus hơ cau kuang ăt-bồ, rò gùng, tơnlồi tĕ jơnau mơ khai, mbài khai jào mê dơ cau cah-rơña, mơ cau cah-rơña jào mê cau ling in, mơ cau ling tơmut mê tam hìu jàm. 59 Añ đơs mơ mê: Mê rơp ờ lik bơh tềng hơ̆, jơl tus tŭ tơm jơh priă su dut-ndơl.”