Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Jơnau răc ‘‘Ơ Bàp bol kòn”
11 1 Gơlik gơs lah, tŭ Kơnràñ ơm răc dăn tam anih ne, neh sir rau, gen dùl nă tam bol jăt-dờn Khai dê đơs mơ Khai: ‘‘Ơ Kơnràñ, dăn bơto bol kòn răc dăn, be Joan neh bơto bol jăt-dờn Khai dê.” * 2 Kơnràñ đơs mơ bol khai: ‘‘Tŭ răc dăn, bol kòn đơs tĕ:
Ơ Bàp, dăn sơnđăn Đi geh pơniăm-goh, gơnoar Đi tus;
3 dăn ai bol kòn in ngai lơi phan sa ngai hơ̆,
4 hồ tìs bol kòn in, bơh să tờm bol kòn krung hồ cau in dồs mơ bol kòn, mơ bañ tơmut bol kòn tam bơta tơlòng.”
Cau bơyô tơmbòl
5 Kơnràñ đơs mơ bol khai: ‘‘Cau lơi tam bol kòn geh cau bơyô, mơ nggùl măng tus mơ khai mơ đơs: ‘‘Ơ cau bơyô, dăn ai añ in càn pe nơm bañ, 6 bơh cau bơyô añ dê lòt gùng tus mơ añ, mơ añ ờ geh chi lơi yờ dơđăp khai”; 7 mơ cau bơyô hơ̆ bơh tam dơlăm hơ wơl mơ đơs: ‘‘Bañ tơmbòl añ; mpồng neh kal rau, ală kòn añ dê bal mơ añ neh tam cơnờng; añ ờ rơgơi guh mơ ai mê in.” 8 Añ đơs mơ bol kòn: Bulah cau hơ̆ ờ guh ai cau do in bơh cau do lah cau bơyô khai dê, gen tài bơh bơta ntềt-pơrjal cau do dê, cau hơ̆ krung guh mơ ai khai in jơh ală chi lơi khai kờñ.
Dăn tĕ gen rơp geh
9 Añ đơs mơ bol kòn: Dăn tĕ, gen rơp pà bol kòn in; jòi tĕ, gen bol kòn rơp bàn; teh tĕ, gen rơp geh pờ bol kòn in. 10 Kơyoa cau lơi dăn, gen dờp; cau lơi jòi, gen bàn; mơ cau lơi teh, gen rơp geh pờ.
11 Cau lơi tam bol kòn lah cau bàp, mơ kòn dăn ka, gen pà khai in bơs ala ka ơ ? 12 Ngŏlah khai dăn tăp, gen ai khai in diăng wơl ơ ? 13 Be hơ̆, dilah bol kòn, bulah cau iơh, mơ git pà kòn bol kòn in ală phan niăm, gen rơlau git nđờ, Bàp bơh trồ rơp pà Yàng Nhơm bol cau lơi in dăn mơ Khai.”
Kơnràñ Jesu mơ Beelzebul, bơtau cà
14 Kơnràñ bơtrơh cà, gơ lah cà kloat; mơ gơlik gơs lah, tŭ cà neh lik, gen cau kloat đơs. Ală mpồl làng-bol ai lơh krơi; 15 mơya geh dŭt cau tam bol khai đơs: ‘‘Khai kơnờm dơ Beelzebul, bơtau ală cà, mơ bơtrơh ală cà.” 16 Geh bol ndai kờñ tơlòng, gen dăn mơ Kơnràñ tềl bơh trồ. 17 Mơya Kơnràñ git ală jơnau kơlôi bol khai dê, gen đơs mơ bol khai: ‘‘Lơgar lơi tamcah is gơ dê, gen rơp kong tơrlah-tơrling, mơ hìu do tơrlơm hơđăng hìu ne. 18 Dilah Satan tamcah is gơ dê, gen mbe lơh lơgar gơ dê ntào kơ̆ taih ? Tài bơh bol mê đơs Añ kơnờm dơ Beelzebul mơ bơtrơh cà. 19 Dilah Añ kơnờm dơ Beelzebul mơ bơtrơh cà, gen oh kòn bol mê kơnờm dơ cau lơi mơ bơtrơh cà taih ? Gen tàng, tờm bol hơ̆ rơp gơs cau cah-rơña bol mê. * 20 Ai dilah Añ kơnờm dơ nau tê Yàng dê mơ bơtrơh cà, gen ngăn lơgar Yàng neh tus tam bol mê.
21 Tŭ cau pràn-kơldăng geh giăm mơ phan tamlơh sền-gàr hìu khai, gen ală bơta khai geh, găm sròng; 22 mơya dilah geh cau pràn-kơldăng rơlau mơ khai lòt tus, pha mơ khai, gen rơp tă jơh ală phan tamlơh khai kơnờm, mơ rơp tampà ală phan neh pìt-phà.
Ờ bal mơ Kơnràñ Jesu lah tamdră mơ Khai
23 Cau ờ bal mơ Añ lah tamdră mơ Añõ, mơ cau ờ tơrgùm bal mơ Añ lah lơh gơprah-gơpring.
Huềng bơ̆-bơl rê wơl
24 Dơ̆ huềng bơ̆-bơl lik bơh dùl nă cau, gen gơ lòt làm ală tiah rañ-rơdàng, jòi anih rơlô bòl mơya ờ bàn, gen gơ đơs: ‘‘Añ rơp rê wơl hơ hìu añ dê, mơ bơh nhơ̆ añ neh lik-lòt.” 25 Tŭ tus, gơ gŏ hìu neh pơs-wàs mơ rơndăp niăm. 26 Tŭ hơ̆, gơ lòt tai, cèng tus poh huềng-iơh ndai iơh rơlau mơ gơ, mơ bol gơ mut ơm tam hơ̆; mơ ală bơta lồi-dut cau hơ̆ dê gơs iơh rơlau mơ lài.”
Mbe lah bơta bơtoah ngăn-ngồn
27 Gơlik gơs lah, tam tŭ Kơnràñ găm đơs ală jơnau hơ̆, gen bơh mpồl làng-bol geh cau ùr ne pờ bơr đơs mơ Khai : ‘‘Bơtoah ndul neh bun Đi mơ toh Đi neh pô !” * 28 Mơya Kơnràñ đơs: ‘‘Di rơlau, bơtoah bol cau iăt jơnau Yàng dê mơ prăp-gàr !”
Tềl krơi Jona, cau ala-bơr
29 Tŭ ală mpồl làng-bol neh pơrjum, Kơnràñ sơntờm đơs: ‘‘Jơi-nòi do lah jơi-nòi iơh-bơsăk; bol khai lùp tềl krơi, mơya rơp ờ ai bol khai in tềl krơi lơi, mìng tềl krơi Jona lơm. * 30 Kơyoa be Jona neh gơs tềl krơi bol Ninive in, gen Kòn kòn-bơnus krung rơp gơs tềl krơi jơi-nòi do in be hơ̆ sơl. 31 Tam tŭ cah-rơña, ùr-bơtau đah jum rơp ñă-ntào bal mơ ală cau jơi-nòi do dê mơ yal-glài bol khai, bơh khai neh bơh lồi-dut ù-tiah tus iăt bơta jăk-chài Salomon dê, mơ ndo, găm rơlau mơ Salomon tai. 32 Tam tŭ cah-rơña, bol Ninive rơp ñă-ntào bal mơ jơi-nòi do mơ yal-glài bol khai, bơh bol hơ̆ neh ềng-màl tam tŭ Jona yal-bơto, mơ ndo găm rơlau mơ Jona tai.
Bàr jơnau đơs gơrềng đèng
33 Ờ geh cau lơi chu đèng mơ ơn tam tiah ndơp ngŏlah tam rồm, mơya ơn gơ hơđăng jơng đèng, làng bol cau mut, gen gŏ bơta àng. * 34 Đèng să-jăn dê lah măt mê. Dilah măt mê sàng niăm, gen jơh să-jăn mê rơp àng-goh, mơya dilah măt mê ờ diơng, gen să-jăn mê krung rơp klăm-jơngo.35 Be hơ̆, sền ngăc tĕ, mbài bơta àng gơ ơm tam mê, gơs bơta klăm-jơngo. 36 Be hơ̆, dilah jơh să-jăn mê àng-goh, ờ geh bơnah lơi klăm-jơngo, gen gơ rơp àng-goh jơh, be tŭ đèng gơcrà pơnđàng mê.”
Kơnràñ Jesu lah-pơrhơng bol Phariseo mơ bol gơnoar-cih
37 Tŭ Kơnràñ găm đơs, gen geh dùl nă cau Phariseo ne jà Kơnràñ tus sào tam hìu khai; Kơnràñ mut nggui dơ cơnờng sào. 38 Gŏ be hơ̆, cau Phariseo ai lơh krơi bơh Kơnràñ ờ rào tê lài mơ tŭ sào. 39 Kơnràñ đơs mơ khai: ‘‘Do, bol mê, bol Phariseo, đah bơdìh coàn mơ preng, gen bol mê rào goh; mơya tam dơlăm bol mê, gen bềng bơta thừ-blơ̆ mơ bơta iơh-bơsăk. 40 Ơ bol brơngơl gơla ! Bơtau neh lơh gơs đah bơdìh, neh ờ lơh gơs đah dơlăm sơl ơ ? 41 Niăm rơlau, pà gời tĕ ală bơta tam dơlăm; gen do jơh ală bơta rơp gơs goh bol mê in. 42 Mơya dồn-sa bol mê in, bol Phariseo, bơh bol mê ơn dùl bơnah jơt biăp bô, biăp krồng mơ tơl srăp biăp, mơ săng-lời bơta song-ring mơ bơta gơboh mơ Yàng ! Pal lơh ală bơta do, mơ bañ săng-lời ală bơta ne. 43 Dồn-sa bol mê in, bol Phariseo, bơh bol mê kờñ cơnờng lài-đăp tam hìu-pơrjum, mơ kờñ ală jơnau đơs niăm-să tam jum gùng ! 44 Dồn-sa bol mê in, bơh bol mê be ală bơtô bồc roh tềl, cau lòt hơđăng mơ ờ git !”
45 Hơ wơl, dùl nă tam bol jăk gùng boh-lăm đơs mơ Kơnràñ: ‘‘Ơ Pôgru, đơs be hơ̆, Đi bơtăt-bơtrờh bol hi sơl.” 46 Kơnràñ đơs: ‘‘Dồn-sa bol mê in sơl, bol jăk gùng boh-lăm, bơh bol mê rơndăp cau in ală tơrnui kơnjơ̆ ờ rơgơi tui, mơ să tờm bol mê ờ bài bư mơ dùl nau tê ! 47 Dồn-sa bol mê in, bơh bol mê băc ală bơtô bồc bol ala-bơr dê, mơ ồng-pàng bol mê neh gơsơt bol khai ! 48 Be hơ̆, bol mê lơh cơng mơ geh dùl nùs bal mơ ală broă ồng-pàng bol mê dê, bơh bol khai neh gơsơt bol ala-bơr, ai bol mê gen băc ală bơtô bồc. 49 Hơ̆ tàng bơta jăk-chài Yàng dê neh đơs: Añ rơp pơyoa bol ala-bơr mơ bol dờp-pơyoa tus mơ bol khai, bol khai rơp gơsơt cau do, kup-kuăn cau ne, 50 làng jơi-nòi do rơp kong lùp dồs mhàm jơh ală cau ala-bơr dê neh gơtuh bơh tŭ crơng-gơs trồ tiah, 51 bơh mhàm Abel jơl tus mhàm Zakaria dê, lah cau neh chơt tam gùl cơnờng duh-khoai mơ gơlăng niăm-goh. Ngăn be hơ̆, Añ đơs mơ bol mê: Jơi-nòi do rơp kong lùp dồs mhàm. 52 Dồn-sa bol mê in, bol cau jăk gùng boh-lăm, bơh bol mê neh ăt kơrnal pờ bơta git-wă dê ! Să tờm bol mê neh ờ mut, mơ ală cau kờñ mut, bol mê krung kơryăn.”
53 Tŭ Kơnràñ lik bơh tềng hơ̆, bol gơnoar-cih mơ bol Phariseo sơntờm gơhào-gơjrañ, lùp sơwì Khai gơrềng bơh rà jơnau, 54 pơt dă Khai, làng kup jơnau lơi bơh bơr Khai.
