Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Kơnràñ Jesu pơyoa poh jơt bàr nă cau jăt-dờn lòt yal-bơto
10 * 1 Tơnơ̆ hơ̆, Kơnràñ bơtào gơs poh jơt bàr nă ndai, mơ pơyoa bol khai, bàr nă bàr nă, lòt lài mơ Khai mut tam ală bòn dờng mơ ală tiah să tờm Khai rơp tus. 2 Khai đơs mơ bol khai: ‘‘Kòi tơwès oă, mơya cau tơwès êt; be hơ̆, bol kòn dăn tĕ mơ Kơnràñ kòi tơwès dê, làng Khai pơyoa cau tơwès lòt tus tơwès kòi Khai dê. 3 Bol kòn lòt tĕ; do Añ pơyoa bol kòn lòt tus be ală belàt tam gùl so rơhau. 4 Bañ cèng kơldung priă, krung ờ kơldung phan, ờ khŏ-joă, mơ bañ đơs niăm-să cau lơi rò gùng. 5 Mut tam hìu lơi, lài jơh đơs tĕ: ‘‘Ring-lơngai hìu do in.” 6 Dilah tềng hơ̆ geh kòn bơta ring-lơngai dê, gen bơta ring-lơngai bol kòn dê rơp ơm hơđăng khai; dilah ờ geh, gen gơ rơp rê wơl mơ bol kòn. 7 Ơm tĕ tam hìu hơ̆, sa mơ ñô ală phan bol hơ̆ geh, kơyoa cau lơh broă gen di-pal mơ priă tơngai khai dê. Bañ lòt bơh hìu do tus hìu ne. 8 Mut tam bòn dờng lơi mơ cau wă-rò bol kòn, gen sa tĕ ală phan cau yờ bol kòn in; 9 tơmbời tĕ bol kòp-jê tam bòn hơ̆ mơ đơs tĕ mơ bol khai: ‘‘Lơgar Yàng neh tus rềp mơ bol mê.” 10 Mut tam bòn dờng lơi mơ cau ờ wă-rò bol kòn, gen bol kòn lik-lòt tam ală jum gùng gơ dê mơ đơs tĕ: 11 ‘‘Jơh thul sơl bơh bòn dờng bol mê dê gơkar dơ jơng bol hi, bol hi krung rơtuh trơwơl dơ bol mê; mơya bol mê git tĕ jơnau do lah: lơgar Yàng neh tus rềp rau.” 12 Añ đơs mơ bol kòn lah, tam ngai hơ̆, Sodoma rơp kong nggờc rơlau mơ bòn dờng hơ̆.
13 Dồn-sa mê in, ơ Korazin ! Dồn-sa mê in, ơ Bethsaida ! Kơyoa ală broă pràn-gơnoar neh lơh tam bol mê, dilah lơh tam Tyro mơ Sidon, gen jŏ rau, bol khai neh soh phan biài ờ diơng, nggui hơđăng bùh ềng-màl. 14 Be hơ̆, tam tŭ cah-rơña, Tyro mơ Sidon rơp kong nggờc rơlau mơ bol mê.
15 Ai mê, ơ Kapharnaum, mê rơp geh tơngguh tus hơ trồ ơ ? Mê rơp dùh tus tam brah-tìng !
16 Cau lơi iăt bol kòn lah iăt Añ; cau lơi săng bol kòn lah săng Añ; mơ cau lơi săng Añ lah săng Bơtau neh pơyoa Añ.”
Hờn-chờ tĕ bơh sơnđăn bol kòn neh geh cih tam trồ
17 Poh jơt bàr nă hờn-chờ rê wơl, mơ đơs: ‘‘Ơ Kơnràñ, bơh sơnđăn Đi, ală cà krung dờn-duh bol kòn sơl !” 18 Kơnràñ đơs mơ bol khai : ‘‘Añ neh gŏ Satan be puh-lèp dùh bơh trồ. 19 Do, Añ neh ai bol kòn in gơnoar jă hơđăng bơs mơ diăng, mơ hơđăng jơh pràn-gơnoar cau sò-tơm dê; mơ ờ geh chi lơi rơgơi lơh ơniai bol kòn. 20 Be hơ̆, bol kòn bañ hờn-chờ bơh ală cà dờn-duh bol kòn; mơya hờn-chờ tĕ bơh sơnđăn bol kòn neh geh cih tam trồ.”
Yàng Bàp yal-tơlik bol dêt-rơhền in
21 Tam jiờ hơ̆, Kơnràñ hờn-chờ tam Yàng Nhơm mơ đơs: ‘‘Kòn yal-jờng Đi, ơ Bàp, Kơnràñ trồ tiah dê, kơyoa Đi neh pồn ală bơta do mơ bol jăk-chài, mơ bol ngăc-ngar, mơya neh yal-tơlik bol dêt-rơhền in; ngăn, ơ Bàp, kơyoa gen lah bơta niăm nùs Bàp.
Yàng Bàp mơ Yàng Kòn
22 Jơh ală bơta neh Bàp Añ jào Añ in; ờ geh cau lơi git Kòn lah cau lơi, mìng Bàp lơm, krung ờ geh cau lơi git Bàp lah cau lơi, mìng Kòn lơm mơ cau lơi in Kòn kờñ yal-tơlik.”
Bơta hàng-goh is-ồn bol jăt-dờn dê
* 23 Kơnràñ wơlke mơ bol jăt-dờn mơ đơs is mơ bol khai: ‘‘Bơtoah măt gŏ ală bơta bol kòn gŏ. * 24 Kơyoa Añ đơs mơ bol kòn: Gal cau ala-bơr mơ cau bơtau kờñ gŏ ală bơta bol kòn gŏ mơ neh ờ gŏ, kơno ală bơta bol kòn kơno mơ neh ờ kơno.”
Jơnau sồr dờng
25 Mơ do, geh cau jăk gùng boh-lăm ñă-ntào, tơlòng Kơnràñ mơ đơs: ‘‘Ơ Pôgru, ñchi añ pal lơh làng dờp-geh bơta kis rài rài ?” 26 Kơnràñ đơs mơ khai: ‘‘Tam Gùng boh-lăm, ñchi neh geh cih ? Mbe mê đal ?” * 27 Khai hơ wơl mơ đơs: ‘‘Mê pal gơboh mơ Kơnràñ Yàng mê dê jơh nùs, jơh soàn, jơh pràn, jơh tồr mê, mơ gơboh mơ gơp mê be să tờm mê.” 28 Kơnràñ đơs mơ khai: ‘‘Mê neh hơ wơl di ngăn; lơh tĕ bơta hơ̆ mơ mê rơp geh kis.”
Jơnau pơniơu cau Samaria sơrmah-sơrmài
* 29 Mơya khai kờñ sơnđio să he lah song-ring, gen đơs mơ Kơnràñ Jesu: ‘‘Ñcau lah gơp añ dê taih ?”
30 Kơnràñ Jesu pờ bơr đơs: ‘‘Dùl nă cau ne bơh Jerusalem mù hơ Jeriko, mơ neh dùh tam tê bol thừ-blơ̆; bol do hồ ai jơh ồi-ào khai, pù-pờng mơ lòt, lời khai chơt gơyơh. 31 Di tŭ hơ̆, geh dùl nă cau lơh-yàng ne mù jăt gùng hơ̆, gŏ cau gen, khai pleh mơ lòt. 32 Be hơ̆ sơl, geh dùl nă cau Levi, tŭ tus tiah hơ̆, gŏ cau gen, krung lòt găn. 33 Mơya dùl nă cau Samaria ne lòt gùng, tus tiah hơ̆, gŏ cau hơ̆, gen khai nđàc-sơngit; 34 khai tus rềp, tuh jiờu mơ alăk, pùt-sơm ală sồt-rơmàñ cau hơ̆ dê, ơn cau hơ̆ hơđăng alàng khai dê, cèng tus tam hìu apah mơ căm-gàr cau hơ̆. 35 Ngai tơnơ̆, khai ai bàr đong priă, jào dơ cau tờm hìu apah mơ đơs: ‘‘Dăn mê căm-gàr cau do, mơ dilah pal rơlau tai, gen añ, tŭ rê wơl, rơp tơm wơl mê in.” 36 Mê kơlôi, ñcau tam pe nă cau hơ̆ lah cau gơp mơ cau neh dùh tam tê bol thừ-blơ̆ taih ?” 37 Khai đơs: ‘‘Cau neh nđàc-sơngit dơ cau hơ̆.” Kơnràñ Jesu đơs mơ khai: ‘‘Mê lòt tĕ mơ lơh tĕ be hơ̆.”
Bà nă kơnùr Marta mơ Maria
* 38 Tam tŭ Kơnràñ mơ bol jăt-dờn lòt gùng, Kơnràñ mut tam bòn ne, mơ geh dùl nă cau ùr ne sơnđăn lah Marta wă-rò Khai. 39 Cau ùr do geh dùl nă oh ùr sơnđăn lah Maria, oh ùr do nggui dơ jơng Kơnràñ, iăt jơnau Khai dê. 40 Marta giga bơh oă bơta duh-broă; khai tus mơ đơs: ‘‘Ơ Kơnràñ, oh ùr añ lời mìng añ duh-broă mơ Đi ờ kơlôi ơ ? Be hơ̆, dăn Đi sồr khai dong añ bà.” 41 Hơ wơl, Kơnràñ đơs mơ khai: ‘‘Marta, Marta, ai kơlôi-rơcăng mơ ờ suk ơm bơh oă bơta, 42 mơya mìng dùl bơta pal geh lơm; Maria neh rơwah bơnah niăm rơlau jơh, lah bơnah ờ geh cau lơi rơgơi tampìt bơh dơ khai.”
