Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
2. Leh dơ̆ bàr tam Jerusalem
Kơnràñ Jesu tơmbời dùl nă cau kòp-jê dơ tơnau dà tam Bethsatha
5 1 Tơnơ̆ hơ̆, geh ngai leh bol Jude dê, mơ Kơnràñ Jesu guh hơ Jerusalem. * 2 Tam Jerusalem, rềp Mpồng Belàt, geh tơnau, dà Hebrơ sơnđăn lah Bethsatha, gơ geh prăm gùng rèng. 3 Gal cau kòp-jê, jơngo, pă-le, kuet-kơlte bic tam hơ̆.
5 Tềng hơ̆ geh dùl nă cau kòp-jê neh pe jơt phàm sơnăm. 6 Tŭ Kơnràñ Jesu gŏ cau hơ̆ bic mơ git lah neh jŏ rau, gen đơs mơ khai: ‘‘Mê kờñ geh bời ờ ?” * 7 Cau kòp-jê hơ wơl mơ Kơnràñ: ‘‘Ơ ồng, Añ ờ geh cau, làng tŭ dà gơ wAñ , khai tơmù Añ tam tơnau; tam tŭ Añ tus, gen cau ndai neh mù lài mơ Añ rau.” 8 Kơnràñ Jesu đơs mơ khai: ‘‘Đă tĕ, tui tơrnă mê mơ lòt.” 9 Tŭ hơ̆ mơ, cau hơ̆ geh bời, tui tơrnă khai mơ lòt.
Ngai hơ̆ lah ngai sabbat. 10 Be hơ̆, bol Jude đơs mơ cau geh tơmbời: ‘‘Do lah ngai sabbat, mê ờ di tui tơrnă mê.” 11 Mơya khai hơ wơl mơ bol khai: ‘‘Cau neh lơh Añ in bời, cau hơ̆ neh đơs mơ Añ : ‘‘Tui tĕ tơrnă mê mơ lòt.”‘‘ 12 Bol khai lùp khai: ‘‘Cau neh đơs mơ mê: ‘‘Tui tĕ mơ lòt” lah ñcau ?”‘‘ 13 Mơya cau neh geh tơmbời ờ git lah cau lơi; tài bơh Kơnràñ Jesu neh pleh bơh mpồl làng-bol ơm tềng hơ̆. 14 Tơnơ̆ hơ̆, Kơnràñ Jesu bàn khai tam hìu duh-khoai mơ đơs mơ khai: ‘‘Do, mê neh geh bời; bAñ lơh tìs tai, mbài bơta lơi iơh rơlau gơlik mê in.” 15 Cau hơ̆ lòt yal bol Jude in tờm Kơnràñ Jesu lah cau neh lơh khai in geh bời. * 16 Bơh hơ̆, bol Jude jòi jơnau mơ Kơnràñ Jesu, tài bơh Khai lơh ală bơta hơ̆ tam ngai sabbat. * 17 Mơya Kơnràñ Jesu hơ wơl mơ bol khai: ‘‘Jơl tus tŭ do, Bàp Añ lơh broă, gen Añ krung lơh broă.” 18 Bơh hơ̆, bol Jude sơlơ jòi gùng gơsơt Kơnràñ, tài bơh Khai ờ di mìng lơh tìs mơ ngai sabbat lơm, mơya găm đơs Yàng lah Bàp Khai, lơh să Khai ndrờm mơ Yàng.
Jơnau đơs gơrềng bơh broă Yàng Kòn dê
* 19 Be hơ̆, Kơnràñ Jesu hơ wơl mơ đơs mơ bol khai: ‘‘Di ngăn, di ngăn, Añ đơs mơ bol mê: Kòn ờ rơgơi lơh bơta lơi bơh să tờm, dilah ờ gŏ Bàp lơh bơta hơ̆; tài bơh ală bơta lơi Bàp lơh, gen Kòn krung lơh ndrờm be hơ̆ sơl. 20 Kơyoa Bàp gơboh mơ Kòn, mơ sơnđio Kòn in jơh ală bơta Khai lơh, mơ rơp sơnđio Kòn in ală bơta dờng rơlau mơ ală bơta hơ̆, làng bol mê in ai lơh krơi. 21 Kơyoa Bàp tơngguh bol cau chơt mơ tơngkis be lơi, gen Kòn krung tơngkis bol cau lơi Khai kờñ be hơ̆ sơl. 22 Kơyoa Bàp ờ cah-rơđa cau lơi, mơya neh ai Kòn in jơh bơta cah-rơđa, 23 làng jơh ală cau duh-adăt Kòn be duh-adăt Bàp. Cau lơi ờ duh-adăt Kòn, gen ờ duh-adăt Bàp, lah Bơtau neh pơyoa Kòn tus. 24 Di ngăn, di ngăn, Añ đơs mơ bol mê: Cau lơi iăt jơnau Añ mơ pindờn dơ Bơtau neh pơyoa Añ tus, gen geh bơta kis rài rài mơ ờ tus tam bơta cah-rơđa, mơya lòt găn bơh bơta chơt tus tam bơta kis. 25 Di ngăn, di ngăn, Añ đơs mơ bol mê: Jiờ neh tus, mơ lah tŭ do, tŭ bol cau chơt kơno săp Kòn Yàng dê, mơ bol cau lơi kơno, gen rơp kis. 26 Kơyoa Bàp geh bơta kis tam să tờm Khai be lơi, gen krung neh ai Kòn in geh bơta kis tam să tờm Khai be hơ̆ sơl; 27 mơ neh ai Khai in gơnoar cah-rơđa, tài bơh Khai lah Kòn kòn-bơnus. 28 Bol mê bAñ ai lơh krơi gơrềng bơh jơnau do, tài bơh neh tus jiờ, jiờ jơh ală cau ơm tam bơtô bồc, rơp kơno săp Khai; 29 mơ tŭ lik, bol cau lơi neh lơh bơta niăm, gen kis wơl làng kis, ai bol cau lơi neh lơh bơta iơh, gen kis wơl làng kong cah-rơđa. 30 Añ ờ rơgơi lơh bơta lơi bơh să tờm Añ ; Añ cah-rơđa jăt be Añ kơno, mơ bơta cah-rơđa Añ dê lah song-ring, tài bơh Añ ờ jòi nùs-kờñ Añ dê, mơya lah nùs-kờñ Bơtau neh pơyoa Añ tus.
* 31 Dilah Añ lơh cơng gơrềng bơh să tờm Añ , gen jơnau lơh cơng Añ dê ờ ngăn-ngồn; 32 geh Bơtau ndai lơh cơng gơrềng bơh Añ , mơ Añ git lah jơnau lơh cơng Khai lơh gơrềng bơh Añ , lah ngăn-ngồn. 33 Bol mê neh pơyoa cau tus hơ Joan, mơ khai neh lơh cơng bơta ngăn-ngồn in; 34 Añ dờp jơnau lơh cơng ờ di bơh cau, mơya Añ đơs ală bơta hơ̆, làng bol mê in geh tơngklàs. 35 Khai lah đèng hìt mơ pơnđàng; bol mê neh kờñ hờn-chờ dùl thoa tam bơta àng khai dê.
36 Mơya Añ geh jơnau lơh cơng dờng rơlau mơ Joan; tài bơh ală broă Bàp neh ai Añ in làng Añ lơh wil-tơl, gen tờm ală broă Añ lơh, lơh cơng gơrềng bơh Añ , lah Bàp neh pơyoa Añ tus; 37 mơ Bàp lah Bơtau neh pơyoa Añ tus, tờm Khai neh lơh cơng gơrềng bơh Añ . Bol mê neh ờ tŭ lơi kơno săp Khai, krung ờ tŭ lơi neh gŏ rùp să Khai; 38 bol mê ờ geh jơnau Khai dê ơm wơl tam bol mê, tài bơh bol mê ờ pindờn Bơtau Khai neh pơyoa tus. * 39 Bol mê sền-sơwì Sră Goh, tài bơh kơlôi lah tam hơ̆ geh bơta kis rài rài; mơ hơ̆ lah sră lơh cơng gơrềng bơh Añ . 40 Bol mê ờ kờñ tus mơ Añ làng geh bơta kis.
41 Añ ờ dờp bơta gơklŏ bơh kòn-bơnus, 42 mơya Añ git bol mê, lah bol mê ờ geh bơta gơboh Yàng tam bol mê. 43 Añ neh tus bơh sơnđăn Bàp Añ , mơ bol mê ờ dờp Añ ; dilah geh cau ndai tus bơh sơnđăn să khai, gen bol mê rơp dờp khai. 44 Mbe lơh bol mê rơgơi pindờn, bol mê lah cau dờp bơta gơklŏ bơh ndring gơp, mơ ờ jòi bơta gơklŏ tus bơh mìng Yàng lơm ? 45 Bol mê bAñ kơlôi lah Añ rơp yă bol mê dơ Bàp; cau yă bol mê lah Moise, lah cau bol mê kơnờm. 46 Kơyoa dilah bol mê pindờn Moise, gen bol mê krung pindờn Añ ; tài bơh khai neh cih gơrềng bơh Añ . * 47 Mơya dilah bol mê ờ pindờn ală jơnau cih khai dê, gen mbe lơh bol mê rơp pindờn ală jơnau đơs Añ dê ?”
