Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Boh-bơr mơ Nikodemo
3 1 Geh dùl nă tam bol Phariseo, sơnđăn lah Nikodemo, cau ăt-bồ bol Jude; 2 cau do tus mơ Kơnràñ Jesu tŭ trồ măng, đơs mơ Kơnràñ: ‘‘Ơ Rabbi, bol hi git Đi lah cau Pôgru neh bơh Yàng mơ tus: kơyoa ờ geh cau lơi rơgơi lơh ală tềl Đi lơh, dilah Yàng ờ ơm mơ cau hơ̆.” * 3 Hơ wơl, Kơnràñ Jesu đơs mơ khai: ‘‘Ngăn, Añ đơs ngăn mơ mê: Dilah cau lơi ờ geh deh bơh hơđăng, gen ờ rơgơi gŏ lơgar Yàng.” 4 Nikodemo đơs mơ Kơnràñ: ‘‘Mbe lơh dùl nă cau neh kra rơgơi geh deh ? Khai rơgơi mut tam ndul mè khai dê mơ geh deh wơl tai ơ ?” 5 Kơnràñ Jesu hơ wơl: ‘‘Ngăn, Añ đơs ngăn mơ mê: Dilah cau lơi ờ geh deh bơh dà mơ Yàng Nhơm, gen ờ rơgơi mut tam lơgar Yàng. 6 Bơta lơi geh deh bơh poăc-să lah poăc-să; mơ bơta lơi geh deh bơh Nhơm lah nhơm. 7 Mê bAñ ai lơh krơi tài bơh Añ neh đơs mơ mê: Bol mê pal geh deh tai. * 8 Nhơm khồm tềng lơi gơ kờñ , mê kơno săp gơ, mơya ờ git mbơh lơi gơ tus mơ tơ lơi gơ lòt; cau lơi geh deh bơh Nhơm, gen krung be hơ̆ sơl.” 9 Nikodemo hơ wơl mơ đơs mơ Kơnràñ : ‘‘Mbe lơh ală bơta hơ̆ rơgơi gơlik gơs taih ?” 10 Kơnràñ Jesu hơ wơl mơ đơs mơ khai: ‘‘Mê lah cau pôgru Israel dê mơ mê ờ git ală bơta hơ̆ ơ ? 11 Di ngăn, di ngăn, Añ đơs mơ mê: Bol hi đơs bơta bol hi git, bol hi lơh cơng bơta bol hi gŏ, mơ bol mê ờ dờp cơng bol hi dê. * 12 Dilah Añ đơs mơ bol mê ală bơta tam tiah, mơ bol mê ờ pindờn, gen dilah Añ đơs mơ bol mê ală bơta tam trồ, mbe lơh bol mê pindờn taih ? 13 Ờ geh cau lơi neh guh hơ trồ, mìng Bơtau neh mù bơh trồ lơm, lah Kòn kòn-bơnus. * 14 Be Moise neh yờ bơs tam blàng bràs, gen Kòn kòn-bơnus pal kong yờ be hơ̆ sơl, * 15 làng cau lơi pindờn, gen geh bơta kis sùm tam Khai.”
16 Kơyoa Yàng neh gơboh mơ dunia, tiăn tus neh pà Kòn Dùl Khai dê, làng cau lơi pindờn dơ Khai, gen ờ roh, mơya geh bơta kis sùm. * 17 Tài bơh Yàng ờ sồr Kòn tus tam dunia làng cah-rơđa dunia, mơya làng dunia bơh Khai mơ geh tơngklàs. 18 Cau lơi pindờn dơ Khai, gen ờ kong cah-rơđa; mơya cau lơi ờ pindờn, gen neh kong cah-rơđa rau, tài bơh ờ pindờn dơ sơnđăn Kòn Dùl Yàng dê. 19 Do lah bơta cah-rơđa: Bơta àng neh tus tam dunia, mơ kòn-bơnus neh gơboh mơ bơta jơngo rơlau mơ bơta àng; tài bơh ală broă bol khai dê lah iơh. 20 Kơyoa cau lơi lơh ală bơta iơh, gen gơjrAñ mơ bơta àng mơ ờ tus hơ bơta àng, làng ală broă khai dê ờ kong lah-pơrhơng; 21 mơya cau lơi lơh bơta ngăn-ngồn, gen tus hơ bơta àng, làng ală broă khai dê geh sơnđio-tơlik, tài bơh neh geh lơh tam Yàng.
Broă-lơh Kơnràñ Jesu dê tam Judea.
Jơnau lơh cơng dut-ndơl Joan Baptista dê.
22 Tơnơ̆ hơ̆, Kơnràñ Jesu mơ bol jăt-dờn Khai dê lòt tus hơ kơnhoàl Judea, mơ Kơnràñ ơm tềng hơ̆ bal mơ bol khai mơ lơh bơta pơnđum. 23 Joan krung lơh bơta pơnđum tam Enon, rềp Salim, tài bơh tềng hơ̆ geh rà dà, mơ cau tus dờp bơta pơnđum; 24 kơyoa Joan ờ hềt kong kup jàm.
25 Gen gơlik gơs bơta tam pơndăng tam gùl bol jăt-dờn Joan dê mơ dùl nă cau Jude gơrềng bơh bơta tơngkloh. 26 Bol khai tus hơ Joan mơ đơs mơ khai: ‘‘Rabbi, cau neh ơm bal mơ Đi đah ne Jordano, mơ Đi neh lơh cơng khai in, gen do khai lơh bơta pơnđum, mơ jơh ală cau tus hơ khai !” 27 Joan hơ wơl mơ đơs: ‘‘Cau ờ rơgơi dờp chi lơi, dilah ờ geh pà khai in bơh trồ. 28 Să tờm bol mê lơh cơng Añ in lah Añ neh đơs: Añ ờ di lah Bơtau Kristo, mơya: Añ geh pơyoa tus lài mơ Khai. * 29 Cau lơi geh pơ-ùr, gen lah bơklau; ai gơp-bơyô bơklau dê, lah cau ntào mơ iăt khai, gen chờhờp-chờchờr bơh săp bơklau dê. Gen hơ̆ lah bơta chờhờp Añ dê neh gơs wil-tơl. 30 Khai pal gơguh, Añ pal gơmù.”
31 Bơtau tus bơh hơđăng, gen ơm hơđăng jơh ală cau; cau gơs bơh ù, gen gơrê mơ ù mơ đơs gơrềng bơh ù. Bơtau tus bơh trồ, gen ơm hơđăng jơh ală cau; 32 Khai lơh cơng bơta Khai neh gŏ mơ neh kơno, mơ ờ geh cau lơi dờp cơng Khai dê. 33 Cau lơi dờp cơng Khai dê, gen neh tap băng-kì: Yàng lah ngăn-ngồn. 34 Kơyoa Bơtau mơ Yàng neh pơyoa tus, gen đơs ală jơnau Yàng dê, tài bơh Yàng pà Khai in Nhơm ờ jai kờp. 35 Bàp gơboh mơ Kòn mơ neh pà jơh ală bơta tam tê Khai. 36 Cau lơi pindờn dơ Kòn, gen geh bơta kis sùm; ai cau lơi ờ pindờn dơ Kòn, gen rơp ờ gŏ bơta kis, mơya bơta gơjrAñ Yàng dê ơm wơl hơđăng khai.
