Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
1. TAP DUT-NDƠL
Kơnràñ Jesu tơlik măt dơ dà-lềng Tiberia
21 * 1 Tơnơ̆ hơ̆, Kơnràñ Jesu tơlik măt tai bol jăt-dờn in dơ dà-lềng Tiberia; Khai tơlik măt be do. 2 Simon Petro, Toma hòi lah Didymo, Nathanael, cau Kana, kơnhoàl Galilea, ală kòn Zebede dê, mơ bàr nă ndai tam bol jăt-dờn Kơnràñ dê găm ơm bal. 3 Simon Petro đơs mơ bol khai: ‘‘Añ lòt kup ka.” Bol khai đơs mơ khai: ‘‘Bol hi krung lòt bal mơ mê.” Bol khai lik-lòt mơ hào ahò; mơ măng hơ̆ bol khai ờ geh chi lơi.
4 Tŭ trồ neh àng, Kơnràñ Jesu ntào dơ gah dà; mơya bol jăt-dờn ờ git hơ̆ lah Kơnràñ Jesu. 5 Kơnràñ Jesu đơs mơ bol khai: ‘‘Ơ bol kòn, bol kòn geh phan lơi sa ờ ?” Bol khai hơ wơl mơ Kơnràñ: ‘‘Ờ geh.” 6 Kơnràñ đơs mơ bol khai: ‘‘Dăng tĕ bơrtơng đah ma ahò mơ bol kòn rơp geh.” Bol khai dăng bơrtơng mơ neh ờ jai hoài gơ tài bơh rà ka. 7 Cau jăt-dờn Kơnràñ Jesu gơboh đơs mơ Petro: ‘‘Hơ̆ lah Kơnràñ !” Tŭ kơno hơ̆ lah Kơnràñ, gen Simon Petro ai ào pùt dơ să, tài bơh găm ơm kuh, mơ ntruđ tam dà-lềng; 8 bol jăt-dờn ndai was ahò tus, tài bơh bol khai ờ ơm ngài mơ gah dà, mìng pơgăp bàr rơhiăng tal, mơ hoài bơrtơng rà ka.
9 Tŭ guh hơ gah dà, bol khai gŏ geh ơn ồs chah mơ geh bañ mơ ka ơn hơđăng. 10 Kơnràñ Jesu đơs mơ bol khai: ‘‘Cèng tĕ hơ do ka bol kòn pa kup.” 11 Simon Petro hào ahò, hoài hơ gah dà bơrtơng bềng ka dờng, dùl rơhiăng prăm jơt pe nơm; mơ bulah ka rà be hơ̆, mơya bơrtơng ờ sèt. 12 Kơnràñ Jesu đơs mơ bol khai: ‘‘Bol kòn tus tĕ sa.” Ờ geh cau lơi tam bol jăt-dờn khin lùp Khai: ‘‘Đi lah ñcau ?”, bơh git hơ̆ lah Kơnràñ.
13 Kơnràñ Jesu tus, ai bañ pà bol khai in, mơ ka krung be hơ̆ sơl. 14 Do lah dơ̆ pe Kơnràñ Jesu tơlik măt bol jăt-dờn in, tơnơ̆ mơ tŭ Khai guh wơl bơh bol cau chơt.
* 15 Gen tàng, tŭ bol khai neh sa rau, Kơnràñ Jesu đơs mơ Simon Petro: ‘‘Ơ Simon, kòn Joan, kòn gơboh mơ Añ rơlau mơ ală cau do ờ ?” Khai đơs mơ Kơnràñ: ‘‘Ơi, ơ Kơnràñ, Đi git lah kòn gơboh mơ Đi.” Kơnràñ đơs mơ khai: ‘‘Ê tĕ ală belàt-kòn Añ dê.” 16 Kơnràñ đơs mơ khai dơ̆ bàr tai: ‘‘Ơ Simon, kòn Joan, kòn gơboh mơ Añ ờ ?” Khai đơs mơ Kơnràñ: ‘‘Ơi, ơ Kơnràñ, Đi git lah kòn gơboh mơ Đi.” Kơnràñ đơs mơ khai: ‘‘Ê tĕ ală belàt Añ dê.” 17 Kơnràñ đơs mơ khai dơ̆ pe: ‘‘Ơ Simon, kòn Joan, kòn gơboh mơ Añ ờ ?”, mơ khai đơs mơ Kơnràñ: ‘‘Ơ Kơnràñ, Đi git jơh ală bơta, Đi git lah kòn gơboh mơ Đi.” Kơnràñ đơs mơ khai: ‘‘Ê tĕ ală belàt Añ dê. 18 Di ngăn, di ngăn, Añ đơs mơ kòn: Tŭ kòn găm kơnòm, kòn kơt is but kòn dê mơ lòt tềng lơi kòn kờñ; mơya tŭ kòn neh kra, kòn rơp làs tê kòn dê, mơ cau ndai rơp kơt but kòn in mơ lăm tus tam anih kòn ờ kờñ.” * 19 Kơnràñ neh đơs bơta hơ̆ làng sơnđio bơta chơt lơi Petro rơp kong làng tơngklŏ Yàng. Tơnơ̆ mơ tŭ neh đơs bơta hơ̆, Kơnràñ đơs mơ khai: ‘‘Jăt tĕ Añ.”
20 Petro wơlke mơ gŏ cau jăt-dờn Kơnràñ Jesu gơboh lòt jăt, lah cau neh sơrkềng dơ ntơh Kơnràñ dê tam tŭ sào mho mơ đơs: ‘‘Ơ Kơnràñ, cau lơi lah cau jào Đi ?” 21 Be hơ̆, tŭ Petro gŏ cau hơ̆, gen đơs mơ Kơnràñ Jesu: ‘‘Ơ Kơnràñ, ai cau do gen mbe gơlơh ?” * 22 Kơnràñ Jesu đơs mơ khai: ‘‘Dilah Añ kờñ khai ơm wơl jơl tus tŭ Añ tus, gen ñchi jơnau mơ kòn ? Kòn jăt tĕ Añ.” 23 Gen tàng, gơlik jơnau pơnrơ tam ală oh mi lah cau jăt-dờn hơ̆ rơp ờ chơt. Mơya Kơnràñ Jesu neh ờ đơs mơ Petro: ‘‘Khai rơp ờ chơt”, mơya: ‘‘Dilah Añ kờñ khai ơm wơl jơl tus tŭ Añ tus, gen ñchi jơnau mơ kòn ?”
Jơnau lồi-dut
24 Cau jăt-dờn do lah cau lơh cơng gơrềng bơh ală bơta hơ̆ mơ neh cih ală bơta hơ̆, mơ bol hi git lah cơng khai dê lah ngăn-ngồn. 25 Krung geh rà ală bơta ndai Kơnràñ Jesu neh lơh, ală bơta hơ̆, dilah geh cih wơl kờp bơta, gen añ kơlôi lah dunia krung ờ rơgơi prăp jơh ală sră geh cih hơ̆.
