Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
3. Ngai kis wơl
Bơtô bồc soh gời
20 1 Ngai sơnrờp tam poh, Maria Magdala tus hơ bơtô bồc bơh rìng-àng, tŭ trồ găm jơngo, mơ gŏ pơnai lŭ neh pơrlă bơh bơtô bồc. 2 Be hơ̆, khai ntoat tus hơ Simon Petro mơ cau jăt-dờn ndai Kơnràñ Jesu gơboh, mơ đơs mơ bol khai: ‘‘Cau neh tă-tơlik Kơnràñ bơh bơtô bồc, mơ bol hi ờ git cau neh ơn Kơnràñ tềng lơi !” 3 Be hơ̆, Petro mơ cau jăt-dờn ndai ne lik-lòt mơ tus hơ bơtô bồc. 4 Bàr nă ntoat bal, mơ cau jăt-dờn ndai ne ntoat mhar rơlau mơ Petro, mơ tus hơ bơtô bồc lài; 5 mơ tŭ kun să, khai gŏ biài che dơmai lơbơn ơn tềng hơ̆, mơya khai ờ mut. 6 Simon Petro jăt khai krung tus mơ mut tam bơtô bồc; khai gŏ biài che dơmai lơbơn ơn tềng hơ̆ 7 mơ chèo hơđăng bồ Kơnràñ dê, gơ ờ ơn bal mơ biài che dơmai, mơya pồt ơn is tam dùl bă. 8 Tŭ hơ̆, cau jăt-dờn ndai ne neh tus hơ bơtô bồc lài, krung mut, khai gŏ mơ khai pindờn. * 9 Kơyoa bol khai ờ hềt git Sră Goh lah Kơnràñ pal guh wơl bơh bol cau chơt. 10 Tơnơ̆ hơ̆, bol jăt-dờn rê wơl hơ hìu bol khai dê.
Kơnràñ Jesu tơnggŏ măt mơ Maria Magdala
11 Maria ntào rềp bơtô, hơ bơdìh mơ ñìm. Tam tŭ ñìm, khai kun să hơ bơtô, 12 mơ gŏ bàr nă huềng-duh soh ào bò nggui, dùl nă đah bồ, dùl nă đah jơng, dơ anih ơn bồc Kơnràñ Jesu. 13 Bol khai đơs mơ khai: ‘‘Ơ cau ùr gen, ñchi gơlơh ai ñìm ?” Khai đơs mơ bol khai: ‘‘Cau neh tă-tơlik Kơnràñ Añ, mơ Añ ờ git tềng lơi cau ơn Khai.” 14 Lồc đơs be hơ̆, khai wơlke mơ gŏ Kơnràñ Jesu găm ntào, mơ khai ờ git lah Kơnràñ Jesu. 15 Kơnràñ Jesu đơs mơ khai: ‘‘Ơ cau ùr gen, ñchi gơlơh ai ñìm ? Ñcau ai jòi ?” Maria tồn lah cau lơh suơn, gen đơs mơ khai: ‘‘Ơ ồng, dilah ồng neh cèng Khai, dăn ồng đơs añ in tềng lơi ồng neh ơn Khai, mơ añ rơp lòt ai wơl Khai.” 16 Kơnràñ Jesu đơs mơ khai : ‘‘Maria !” Khai wơlke mơ đơs dà Hebrơ mơ Kơnràñ: ‘‘Rabbuni !” – hơ̆ lah ơ Pôgru –. * 17 Kơnràñ Jesu đơs mơ khai: ‘‘Bañ ăt-prăp Añ, bơh Añ ờ hềt guh hơ Bàp; mơya lòt tĕ hơ bol oh mi Añ dê mơ đơs mơ bol khai: Añ guh hơ Bàp Añ, krung lah Bàp bol kòn, hơ Yàng Añ, krung lah Yàng bol kòn.” 18 Maria Magdala lòt yal mơ bol jăt-dờn: ‘‘Añ neh gŏ Kơnràñ !” mơ Khai neh đơs mơ añ ală bơta hơ̆.
Kơnràñ Jesu tơnggŏ măt mơ bol jăt-dờn
19 Tam mho ngai hơ̆, ngai sơnrờp tam poh, tŭ ală mpồng tam tiah bol jăt-dờn ơm neh til bơh ngòt bol Jude, gen Kơnràñ Jesu tus, ntào tam gùl mơ đơs mơ bol khai: ‘‘Ring-lơngai bol kòn in !” 20 Tŭ neh đơs jơnau hơ̆, Kơnràñ sơnđio bol khai in tê mơ wĕ. Bol jăt-dờn chờhờp bơh gŏ Kơnràñ. 21 Kơnràñ đơs tai mơ bol khai: ‘‘Ring-lơngai bol kòn in ! Be Bàp neh pơyoa Añ , gen Añ krung pơyoa bol kòn.” * 22 Mơ tŭ neh đơs jơnau hơ̆, Khai khồm nhơm mơ đơs mơ bol khai: ‘‘Bol kòn dờp tĕ Yàng Nhơm. 23 Bol kòn hồ tìs ală cau lơi, gen gơ geh hồ ală cau hơ̆ in; bol kòn kơt wơl tìs ală cau lơi, gen gơ kong kơt wơl.”
24 Mơya Toma, dùl nă tam bol Jơt Bàr, hòi lah Didymo, ờ ơm bal mơ bol khai tŭ Kơnràñ Jesu tus. 25 Be hơ̆, bol jăt-dờn ndai đơs mơ khai: ‘‘Bol hi neh gŏ Kơnràñ !” Mơya khai đơs mơ bol khai : ‘‘Dilah Añ ờ gŏ tềl tơrnơs tam tê Kơnràñ, ờ cok nau tê Añ tam tềl tơrnơs, mơ ờ ơn tê Añ tam wĕ Khai, gen Añ ờ pindờn.”
26 Phàm ngai tơnơ̆, bol jăt-dờn Kơnràñ dê ơm tai tềng hơ̆, geh Toma bal mơ bol khai. Ală mpồng găm til, Kơnràñ Jesu tus, ntào tam gùl mơ đơs: ‘‘Ring-lơngai bol kòn in !” 27 Lồc gen, Khai đơs mơ Toma: ‘‘Tơmut tĕ nau tê mê tềng do mơ sền tĕ tê Añ , tơlik tĕ tê mê mơ ơn tĕ tam wĕ Añ , bAñ kơldăng nùs tai, mơya pindờn tĕ !” 28 Toma hơ wơl mơ đơs mơ Kơnràñ: ‘‘Ơ Kơnràñ kòn dê mơ Yàng kòn dê !” * 29 Kơnràñ Jesu đơs mơ khai: ‘‘Tài bơh kòn neh gŏ Añ , tàng kòn pindờn. Bơtoah bol cau ờ gŏ mơ pindờn !”
Jơnau lồi-dut dơ̆ dùl
30 Kơnràñ Jesu krung neh lơh rà tềl krơi ndai dơđăp măt bol jăt-dờn Khai dê, gơ ờ geh cih tam sră do; * 31 mơya ală jơnau neh geh cih, làng bol kòn pindờn Kơnràñ Jesu lah Bơtau Kristo, Kòn Yàng dê, mơ làng tŭ pindờn, bol kòn geh bơta kis bơh sơnđăn Khai.
