Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Ñô bao tam Kana
2 1 Ngai dơ̆ pe, geh bơta ñô-bao tam Kana, kơnhoàl Galilea, mơ geh mè Kơnràñ Jesu tềng hơ̆; 2 Kơnràñ Jesu mơ bol jăt-dờn Khai dê krung geh cau jà tus ñô-bao. 3 Tŭ ờ tơl tơrnờm, mè Kơnràñ Jesu đơs mơ Khai: ‘‘Cau ờ geh tơrnờm tai.” * 4 Kơnràñ Jesu đơs mơ mè: ‘‘Ơ mò, ñchi jơnau mơ añ, mơ ai taih ? Jiờ añ ờ hềt tus.” 5 Mè Khai đơs mơ ală cau dong-broă: ‘‘Chi lơi lơi Khai đơs mơ bol mê, gen lơh tĕ.”
6 Tềng hơ̆ geh ơn prau nơm drăp lŭ làng ngui tam bơta ờs-mờng tơngkloh bol Jude dê, kờp nơm ơn bàr pe yăng dà. 7 Kơnràñ Jesu đơs mơ bol khai: ‘‘Tuh tĕ dà bềng ală drăp !” Bol khai tuh bềng tus dơ bơr. 8 Mơ Kơnràñ Jesu đơs mơ bol khai: ‘‘Tŭ do, bơ̆ tĕ cèng cau sền năc in !” Bol khai bơ̆ cèng. 9 Tŭ cau sền năc tiăm dà neh gơs tơrnờm mơ ờ git mbơh lơi, mơya ală cau dong-broă neh bơ̆ dà gen git, gen cau sền năc hòi cau bơrtơu 10 mơ đơs: ‘‘Cau lơi krung yờ tơrnờm bơkah lài, tŭ cau neh khồm-òng rau gen yờ tơrnờm dimơ, ai mê prăp tơrnờm bơkah jơl tus tŭ do.” * 11 Kơnràñ Jesu neh lơh tềl sơnrờp do tam Kana, kơnhoàl Galilea, sơnđio-tơlik bơta gơklŏ Khai dê, mơ bol jăt-dờn Khai dê neh pindờn dơ Khai.
12 Tơnơ̆ hơ̆, Kơnràñ mù hơ Kapharnaum bal mơ mè Khai, oh mi Khai mơ bol jăt-dờn Khai dê, mơ bol khai ơm wơl tềng hơ̆ dŭt ngai.
B. Leh Lòt Găn dơ̆ dùl
Kơnràñ Jesu tơnggoh hìu duh-khoai
13 Mờr tus leh Lòt Găn bol Jude dê, Kơnràñ Jesu guh hơ Jerusalem. 14 Khai gŏ tam hìu duh-khoai bol tăc kơnrồ, belàt, ntờp, mơ bol gơl priă găm nggui; 15 Khai ai che lơh gai, bơtrơh jơh ală cau bơh hìu duh-khoai bal mơ belàt, kơnrồ, lơh prih-prah priă-jền bol gơl priă mơ tơlơ cơnờng; 16 Khai đơs mơ bol tăc ntờp: ‘‘Cèng-tơlik tĕ ală phan do bơh ndo ! BAñ lơh hìu Bàp Añ gơs hìu tăc phan.” * 17 Bol jăt-dờn Khai dê kah wơl lah neh geh cih: ‘‘Bơta duh-hur hìu Yàng in sa siar Añ .” 18 Gen bol Jude hơ wơl mơ đơs mơ Khai: ‘‘Tềl lơi ồng sơnđio bol hi in mơ lơh be hơ̆ ?”
19 Kơnràñ Jesu hơ wơl mơ đơs mơ bol khai: ‘‘Bol mê lơh tơrlah tĕ hìu duh-khoai do, mơ tam pe ngai Añ rơp bơtào wơl gơ.” 20 Gen bol Jude đơs: ‘‘Hìu duh-khoai do neh geh băc tam poan jơt prau sơnăm, mơ ồng rơp bơtào wơl gơ tam pe ngai ơ ?” * 21 Mơya Kơnràñ đơs gơrềng bơh hìu duh-khoai lah să-jăn Khai. 22 Gen tàng, tŭ Kơnràñ kis wơl bơh bol cau chơt, bol jăt-dờn Khai dê kah wơl lah Khai neh đơs jơnau hơ̆, mơ bol khai pindờn dơ Sră Goh mơ dơ jơnau Kơnràñ Jesu neh đơs.
Kơnràñ Jesu ơm tam Jerusalem
23 Tam tŭ Kơnràñ ơm tam Jerusalem, tam ngai leh Lòt Găn, geh gal cau pindờn dơ sơnđăn Khai, bơh gŏ ală tềl Khai dê mơ Khai neh lơh. 24 Mơya să tờm Kơnràñ Jesu ờ pindờn bol khai, tài bơh Khai git jơh ală cau, 25 mơ Khai ờ càng cau lơi lơh cơng gơrềng bơh kòn-bơnus, kơyoa să tờm Khai git geh chi lơi tam kòn-bơnus.
