Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
19 1 Tŭ hơ̆, Pilato sồr cèng Kơnràñ Jesu mơ pù-lơh. 2 Bol ling tàđ dùl nơm gơnoàr mơ lò, ơn dơ bồ Khai mơ tơnwar Khai in dùl nơm ào phồng; 3 bol khai tus hơ Khai mơ đơs: ‘‘Niăm-să bơtau bol Jude !”, mơ pah Khai. 4 Pilato lik tai hơ bơdìh mơ đơs mơ bol Jude: ‘‘Do Añ cèng Khai hơ bơdìh bol mê in, làng bol mê git lah Añ ờ gŏ jơnau tìs lơi tam Khai.” 5 Be hơ̆, Kơnràñ Jesu lik hơ bơdìh, groă gơnoàr lò mơ war ào phồng. Pilato đơs mơ bol khai: ‘‘Do lah cau !” 6 Tŭ gŏ Kơnràñ, bol lơh-yàng dờng mơ bol dong-broă nggà đơs: ‘‘Tơs tĕ dơ chikal, tơs tĕ dơ chikal !” Pilato đơs mơ bol khai: ‘‘Bol mê cèng tĕ Khai mơ tơs tĕ dơ chikal; kơyoa Añ ờ gŏ jơnau tìs tam Khai.” 7 Bol Jude hơ wơl mơ Pilato: ‘‘Bol hi geh gùng boh-lăm, mơ jăt be gùng boh-lăm gen Khai pal chơt, tài bơh Khai neh lơh să tờm lah Kòn Yàng dê.”
8 Tŭ kơno jơnau hơ̆, gen Pilato sơlơ ngòt, 9 khai mut tai tam hìu cah-rơđa mơ đơs mơ Kơnràñ Jesu: ‘‘Mbơh mê tus ?” Mơya Kơnràñ Jesu ờ hơ wơl chi lơi mơ khai. 10 Be hơ̆, Pilato đơs mơ Kơnràñ: ‘‘Mê ờ đơs mơ Añ ơ ? Mê ờ git lah Añ geh gơnoar hồ mê mơ geh gơnoar tơs mê dơ chikal ơ ?” 11 Kơnràñ Jesu hơ wơl: ‘‘Ồng ờ geh gơnoar lơi gơwèt mơ Añ , dilah gơ ờ geh ai ồng in bơh hơđăng; gen tàng, cau jào Añ ồng in, gen geh tìs dờng rơlau.”
Kơnràñ Jesu kong yal-glài chơt
12 Bơh nhơ̆, Pilato jòi gùng hồ Kơnràñ; mơya bol Jude nggà đơs: ‘‘Dilah ồng hồ cau do, gen ồng ờ di lah bơyô Sesare dê ! Cau lơi lơh să tờm lah bơtau, gen tamdră mơ Sesare.” 13 Tŭ kơno ală jơnau hơ̆, Pilato cèng Kơnràñ hơ bơdìh mơ nggui dơ sơbàn cah-rơđa, tam anih hòi lah Lithostrotos, dà Hebrơ lah Gabbatha. * 14 Hơ̆ lah Ngai-Rơcăng leh Lòt Găn, pơgăp jiờ dơ̆ prau. Pilato đơs mơ bol Jude: ‘‘Do lah bơtau bol mê dê !” * 15 Bol khai nggà: ‘‘Cèng tĕ, cèng tĕ, tơs tĕ Khai dơ chikal !” Pilato đơs mơ bol khai: ‘‘Añ tơs bơtau bol mê dơ chikal ơ ?” Bol lơh-yàng dờng hơ wơl: ‘‘Bol hi ờ geh bơtau lơi, mìng Sesare lơm.” 16 Tŭ hơ̆, Pilato jào Kơnràñ bol khai in làng tơs dơ chikal. Be hơ̆, bol khai cèng Kơnràñ Jesu lòt.
Kơnràñ Jesu kong tơs dơ chikal
17 Kơnràñ tui chikal Khai dê, lik-lòt tus hơ tiah hòi lah tiah Kơndoh Bồ, dà Hebrơ hòi lah Golgotha, 18 tềng hơ̆, bol khai tơs Kơnràñ dơ chikal, mơ bàr nă ndai bal mơ Khai, dùl nă dùl đah, ai Kơnràñ Jesu tam gùl. * 19 Pilato sồr cih dùl păng mpàn mơ ơn hơđăng chikal; gơ cih lah: ‘‘Jesu Nazareth, Bơtau bol Jude.” 20 Rà cau tam bol Jude neh đal păng mpàn hơ̆, tài bơh tiah Kơnràñ Jesu kong tơs dơ chikal rềp mơ bòn dờng; mơ gơ cih dà Hebrơ, dà Latin mơ dà Grek. 21 Be hơ̆, bol lơh-yàng dờng bol Jude dê đơs mơ Pilato: ‘‘BAñ cih: Bơtau bol Jude, mơya cih: Khai neh đơs: ‘‘Añ lah Bơtau bol Jude.”‘‘ 22 Pilato hơ wơl: ‘‘Jơnau Añ neh cih, gen neh cih !”
Bol ling tampà ào Kơnràñ Jesu dê
23 Lồc tơs Kơnràñ Jesu dơ chikal, bol ling ai ào Kơnràñ dê mơ lơh gơs poan bơnah, dùl nă dùl bơnah, mơ bol khai krung ai ào jrùh tai. Ào jrùh do ờ geh gùng ntir, tàđ drài dùl blah bơh hơđăng tus hơđơm. * 24 Be hơ̆, bol khai đơs ndring gơp: ‘‘Bol he bAñ crè gơ, mơya tă khà tĕ làng sền cau lơi geh”, làng gơlik gơs wil-tơl jơnau Sră Goh đơs:
‘‘Bol khai neh tampà ào Añ , mơ neh tă khà ào jrùh Añ .” Bol ling neh lơh ală bơta hơ̆.
Kơnràñ Jesu mơ mè Khai dê
* 25 Ntào rềp dơ chikal Kơnràñ Jesu dê geh mè Khai mơ kơnùr mè Khai lah Maria, bao Kleopa, mơ Maria Magdala. 26 Tŭ Kơnràñ Jesu gŏ mè mơ cau jăt-dờn Kơnràñ gơboh ntào rềp, gen đơs mơ mè: ‘‘Ơ mò, do lah kòn ai.” 27 Lồc gen, Khai đơs mơ cau jăt-dờn: ‘‘Do lah mè mê.” Mơ bơh jiờ hơ̆, cau jăt-dờn rò mè rê tam hìu khai dê.
Kơnràñ Jesu chơt dơ chikal
28 Tơnơ̆ hơ̆, Kơnràñ Jesu git lah jơh ală bơta neh sir rau, làng jơnau Sră Goh gơlik gơs wil-tơl, gen Khai đơs: ‘‘Añ tơhìr.” 29 Geh dùl nơm gri bềng dà sràt ơn tềng hơ̆; be hơ̆, bol khai ai dùl nơm phan nsồp iŭ bềng dà sràt, pùt dơ chi đìng, tong dơ bơr Kơnràñ. * 30 Tŭ neh liăp dà sràt, Kơnràñ Jesu đơs: ‘‘Neh sir rau !” Mơ Khai kun bồ, jào nhơm.
Kơnràñ Jesu kong tà srơp
31 Bơh lah ngai Rơcăng-Lài, làng ală bồc ờ găm tai dơ chikal tam ngai sabbat, kơyoa ngai sabbat hơ̆ lah ngai dờng, tàng bol Jude dăn mơ Pilato ai pờng pă ală ntìng kơrgòs bol kong tơs mơ tơmù bol khai. 32 Be hơ̆, bol ling tus mơ pờng pă ală ntìng kơrgòs cau sơnrờp mơ cau ne kong tơs dơ chikal bal mơ Kơnràñ; 33 tŭ bol khai tus hơ Kơnràñ Jesu, gŏ Khai neh chơt rau, gen bol khai ờ pờng pă ală ntìng kơrgòs Khai dê, * 34 mơya dùl nă tam bol ling ai tà srơp dơ wĕ Khai dê, gen gơlik mơ mhàm mơ dà. 35 Cau sền gŏ, neh lơh cơng, mơ cơng khai dê ngăn-ngồn, mơ khai git lah khai đơs ngăn-ngồn, làng bol mê krung pindờn. * 36 Ală bơta do neh gơlik gơs, làng Sră Goh gơlik gơs wil-tơl: ‘‘Ờ dùl nơm ntìng lơi Khai dê rơp kong pă”, * 37 mơ jơnau ndai tam Sră Goh đơs: ‘‘Bol khai rơp sền dơ cau bol khai neh srơp bluh.”
Kơnràñ Jesu kong tơp
38 Tơnơ̆ hơ̆, Joseph, cau Arimathea, lah cau jăt-dờn Kơnràñ Jesu dê, mơya ndơp bơh ngòt bol Jude, dăn mơ Pilato tă bồc Kơnràñ Jesu; mơ Pilato ai. Be hơ̆, khai tus mơ tă bồc Kơnràñ. 39 Nikodemo lah cau lài-òr neh tus mơ Kơnràñ tam trồ măng, krung tus mơ cèng pơgăp dùl rơhiăng kĭ cài trŭ pơrlŭ bal mơ kơlhô. 40 Be hơ̆, bol khai ai bồc Kơnràñ Jesu, pò mơ biài che dơmai lơbơn bal mơ sơnơm bơlhu, jăt bơta ờs-mờng tơp bồc bol Jude dê. 41 Tam tiah Kơnràñ kong tơs dơ chikal geh dùl bă suơn, mơ tam suơn geh dùl nơm bơtô bồc pa, tam hơ̆ ờ hềt ơn cau lơi. 42 Be hơ̆, tài bơh lah ngai Rơcăng-lài bol Jude dê, mơ bơh bơtô bồc gơ rềp, tàng bol khai ơn Kơnràñ Jesu tam hơ̆.
