Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
2. Bơta jê-yăn
Kơnràñ Jesu kong kup
18 1 Tơnơ̆ mơ tŭ neh đơs ală jơnau hơ̆, Kơnràñ Jesu lik-lòt bal mơ bol jăt-dờn Khai dê, tus đah ne croh Kedron, tềng hơ̆ geh dùl bă suơn, Kơnràñ mut tam hơ̆ mơ bol jăt-dờn Khai dê. 2 Juda, cau jào Kơnràñ, krung git tiah hơ̆, tài bơh Kơnràñ Jesu ờs pơrjum tềng hơ̆ bal mơ bol jăt-dờn Khai dê. 3 Be hơ̆, Juda, tơnơ̆ mơ tŭ neh dờp dùl mpồl ling mơ bol dong-broă bơh dơ bol lơh-yàng dờng mơ bol Phariseo, gen tus tềng hơ̆ bal mơ ồs đèng, ồs sơmpòl mơ tà đào. * 4 Kơnràñ Jesu git jơh ală bơta rơp tus mơ Khai, gen lik mơ đơs mơ bol khai: ‘‘Ñcau bol mê jòi taih ?” * 5 Bol khai đơs mơ Kơnràñ: ‘‘Jesu Nazareth.” Kơnràñ đơs mơ bol khai: ‘‘Añ do !” Juda, cau jào Kơnràñ, krung ntào bal mơ bol khai. 6 Tŭ Kơnràñ đơs mơ bol khai: ‘‘Añ do !”, gen bol khai ruc wơl mơ gơpừ dơ ù. 7 Be hơ̆, Kơnràñ lùp tai bol khai: ‘‘Ñcau bol mê jòi taih ?” Bol khai đơs : ‘‘Jesu Nazareth.” 8 Kơnràñ Jesu hơ wơl: ‘‘Añ neh đơs mơ bol mê: Añ do ! Be hơ̆, dilah bol mê jòi Añ , gen lời tĕ bol do lòt”, 9 làng gơlik gơs wil-tơl jơnau Kơnràñ neh đơs: ‘‘Ală cau Đi neh ai Añ in, Añ ờ lơh roh cau lơi tam bol khai.” 10 Simon Petro geh đào, neh tă gơ mơ sreh cau duh-broă cau lơh-yàng dờng dê, lơh tăc tồr ma khai dê. Cau duh-broă hơ̆ sơnđăn lah Malko. 11 Kơnràñ Jesu đơs mơ Petro: ‘‘Srồm tĕ đào tam sơmprồm; coàn Bàp neh ai Añ in, Añ ờ hùc ơ ?”
Kơnràñ Jesu kong cèng tus hơ Anna mơ Kaipha.
Petro pơndăng-săng Kơnràñ.
12 Mpồl ling, cau ăt-bồ mơ bol dong-broă bol Jude dê kup Kơnràñ Jesu, căp Khai, 13 mơ lài jơh cèng tus hơ Anna; bơh khai lah po-bàp Kaipha, cau lơh-yàng dờng sơnăm hơ̆. 14 Kaipha lah cau neh bơyai mơ bol Jude: ‘‘Kuơ lah dùl nă chơt bơh làng-bol in.”
* 15 Simon Petro mơ dùl nă cau jăt-dờn ndai jăt Kơnràñ Jesu. Cau jăt-dờn do git cau lơh-yàng dờng mơ neh mut bal mơ Kơnràñ Jesu tam hìu-gơlăng cau lơh-yàng dờng dê; 16 ai Petro ntào hơ bơdìh mpồng. Be hơ̆, cau jăt-dờn do, lah cau git cau lơh-yàng dờng, đơs mơ cau ùr kơp mpồng mơ lăm Petro mut. 17 Cau ùr duh-broă kơp mpồng đơs mơ Petro: ‘‘Mê, mê ờ di sơl tam bol jăt-dờn cau hơ̆ dê ơ ?” Petro đơs: ‘‘Ờ di añ !” 18 Tài bơh trồ noăt, bol duh-broă mơ bol dong-broă sing ồs chah mơ ntào njơr ồs; Petro krung ntào njơr ồs bal mơ bol khai.
19 Cau lơh-yàng dờng lùp Kơnràñ Jesu gơrềng bơh bol jăt-dờn mơ jơnau bơto Khai dê. 20 Kơnràñ Jesu hơ wơl mơ khai: ‘‘Añ neh đơs loh-làng dunia in; Añ sùm sùm bơto tam hìu-pơrjum mơ tam hìu duh-khoai, lah anih jơh ală cau Jude pơrjum bal, mơ Añ ờ đơs chi lơi pồn-ndơp. 21 Ñchi gơlơh ồng lùp Añ ? Lùp tĕ ală cau neh iăt ñchi Añ neh đơs mơ bol khai; bol hơ̆ git ală bơta Añ neh đơs.” 22 Lồc Kơnràñ đơs ală jơnau hơ̆, gen dùl nă tam bol dong-broă ntào tềng hơ̆ pah Kơnràñ mơ đơs: ‘‘Mê hơ wơl mơ cau lơh-yàng dờng be hơ̆ ơ ?” 23 Kơnràñ Jesu hơ wơl mơ khai: ‘‘Dilah Añ đơs ờ di, lơh cơng tĕ bơh bơta ờ di hơ̆; ai dilah di, ñchi gơlơh mê lơh Añ taih ?” 24 Anna pơyoa Kơnràñ găm kong căp tus hơ Kaipha lah cau lơh-yàng dờng.
25 Ai Simon Petro găm ntào njơr ồs. Be hơ̆, cau lùp khai: ‘‘Mê, mê ờ di sơl tam bol jăt-dờn Khai dê ơ ?” Simon Petro pơndăng mơ đơs: ‘‘Ờ di añ !” 26 Dùl nă tam bol duh-broă cau lơh-yàng dờng dê, jơi-bơtiàn mơ cau neh Petro sreh tăc tồr, đơs : ‘‘Añ neh ờ gŏ mê tam suơn bal mơ Khai ơ ?” 27 Be hơ̆, Petro pơndăng tai; mơ tŭ hơ̆ mơ iar nrau.
Kơnràñ Jesu kong cèng tus hơ Pilato,
cau kuang dờng
* 28 Bol khai cèng Kơnràñ Jesu bơh Kaipha tus hơ hìu lơh broă cau kuang dờng dê. Tŭ hơ̆ lah àng drim. Bol khai ờ mut tam hìu lơh broă cau kuang dờng dê, mbài gơtờp bơ̆, mơ ờ geh sa leh Lòt Găn. 29 Be hơ̆, Pilato lik hơ bơdìh mơ bol khai mơ đơs: ‘‘Bol mê yă cau do bơh bơta lơi taih ?” 30 Bol khai hơ wơl mơ đơs mơ khai: ‘‘Dilah cau do ờ di lah cau lơh bơta iơh, gen bol hi neh ờ jào khai ồng in.” 31 Be hơ̆, Pilato đơs mơ bol khai: ‘‘Bol mê cèng tĕ Khai mơ cah-rơđa Khai jăt be gùng boh-lăm bol mê dê !” Bol Jude đơs mơ Pilato: ‘‘Bol hi ờ geh gơsơt cau lơi”, * 32 làng gơlik gơs wil-tơl jơnau Kơnràñ Jesu neh đơs, tŭ sơnđio Khai rơp chơt bơh gùng chơt lơi.
33 Be hơ̆, Pilato mut tai tam hìu cah-rơđa, hòi Kơnràñ Jesu mơ đơs mơ Khai: ‘‘Mê lah bơtau bol Jude ơ ?” 34 Kơnràñ Jesu hơ wơl: ‘‘Ồng đơs jơnau hơ̆ bơh să tờm ồng, ngŏlah geh bol ndai neh đơs mơ ồng gơrềng bơh Añ ?” 35 Pilato hơ wơl: ‘‘Añ lah cau Jude ơ ? Làng-bol mê mơ bol lơh-yàng dờng neh jào mê Añ in; ñchi mê neh lơh ?” 36 Kơnràñ Jesu hơ wơl: ‘‘Lơgar Añ ờ gơrê mơ dunia do; dilah lơgar Añ gơrê mơ dunia do, gen bol duh-broă Añ dê neh tamlơh, làng Añ ờ kong jào bol Jude in; mơya tŭ do lơgar Añ ờ di tềng do.” 37 Pilato đơs mơ Kơnràñ: ‘‘Be hơ̆, mê lah bơtau ơ ?” Kơnràñ Jesu hơ wơl: ‘‘Ồng đơs hơ̆ Añ lah bơtau. Tài bơh hơ̆ mơ Añ neh liklìng, mơ tài bơh hơ̆ mơ Añ neh tus tam dunia, làng lơh cơng bơta ngăn-ngồn in; cau lơi gơrê mơ bơta ngăn-ngồn, gen iăt săp Añ .” 38 Pilato đơs mơ Kơnràñ: ‘‘Ñchi lah bơta ngăn-ngồn ?” Lồc đơs jơnau hơ̆, Pilato lik tai mơ bol Jude mơ đơs mơ bol khai: ‘‘Añ ờ gŏ chi lơi tìs tam cau do. 39 Mơya bol mê geh bơta ờs-mờng lah Añ hồ dùl nă cau bol mê in tam leh Lòt Găn; be hơ̆, bol mê kờñ Añ hồ bol mê in bơtau bol Jude ờ ?” 40 Bol khai nggà đơs tai: ‘‘Ờ di cau do, mơya Barabba !” Barabba lah cau thừ-blơ̆.
