Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Jơnau răc dăn Kơnràñ Jesu dê
17 * 1 Kơnràñ Jesu neh đơs ală bơta hơ̆; mơ dơ̆ neh tơngờ măt hơ trồ, Khai đơs: ‘‘Ơ Bàp, neh tus jiờ: dăn Đi tơngklŏ Kòn Bàp dê, làng Kòn Bàp dê tơngklŏ Đi, 2 be Bàp neh ai Khai in gơnoar hơđăng jơh ală poăc-să, làng jơh ală bơta Đi neh ai Khai in, gen Khai ai bol khai in bơta kis rài rài. * 3 Bơta kis rài rài, hơ̆ lah bol khai git Đi, Yàng dùl-lơm mơ ngăn-ngồn, mơ Bơtau Đi neh pơyoa, Jesu Kristo. 4 Kòn neh tơngklŏ Đi hơđăng ù-tiah: Kòn neh bơsir broă Đi neh ai Kòn in lơh; * 5 mơ tŭ do, ơ Bàp, dăn Đi tơngklŏ Kòn dơ Đi mơ bơta gơklŏ Kòn neh geh dơ Bàp lài mơ geh dunia.
6 Kòn neh sơnđio-tơlik sơnđăn Bàp dê dơ bol cau Đi neh ai Kòn in bơh tam dunia. Bol khai gơrê mơ Đi, mơ Đi neh ai bol khai Kòn in, mơ bol khai neh prăp jơnau Đi dê. 7 Tŭ do, bol khai neh git lah, jơh ală bơta Đi neh ai Kòn in, lah bơh dơ Đi, 8 tài bơh ală jơnau đơs Đi neh ai Kòn in, gen Kòn neh ai bol khai in, mơ bol khai neh dờp mơ git ngăn lah Kòn neh lik bơh Bàp, mơ pindờn lah Bàp neh pơyoa Kòn. * 9 Kòn răc dăn bol khai in; Kòn ờ răc dăn dunia in, mơya bol do in lah bol cau Bàp neh ai Kòn in, bơh bol khai gơrê mơ Đi, 10 mơ jơh ală bơta Kòn dê lah Đi dê, mơ jơh ală bơta Đi dê lah Kòn dê; mơ Kòn neh geh tơngklŏ tam bol khai. * 11 Kòn ờ ơm tam dunia tai, mơ bol do găm ơm tam dunia, ai Kòn tus hơ Bàp.
Ơ Bàp niăm-goh, dăn Đi prăp-gàr bol khai tam sơnđăn Đi mơ Đi neh ai Kòn in, làng bol khai gơs dùl be Bol He. 12 Tŭ Kòn ơm bal mơ bol khai, Kòn neh prăp-gàr bol khai tam sơnđăn Đi mơ Đi neh ai Kòn in, mơ Kòn neh sền-gàr, mơ ờ geh cau lơi tam bol khai roh-rui, mìng cau kòn bơta roh-rui dê lơm, làng Sră Goh geh lơh gơs wil-tơl. 13 Tŭ do, Kòn tus mơ Đi, mơ Kòn đơs ală bơta do tam dunia, làng bol khai geh wil-tơl bơta chơhờp Kòn dê tam bol khai. 14 Kòn neh ai bol khai in jơnau đơs Đi dê, mơ dunia neh kơuềng dơ bol khai, bơh bol khai ờ gơrê mơ dunia, be Kòn ờ gơrê mơ dunia.
15 Kòn ờ răc dăn Đi tơlik bol khai bơh dunia, mơya dăn Đi prăp-gàr bol khai bơh bơta iơh. 16 Bol khai ờ gơrê mơ dunia, be Kòn ờ gơrê mơ dunia. * 17 Dăn Đi pơniăm-goh bol khai tam bơta ngăn; jơnau đơs Đi dê lah bơta ngăn. 18 Be Bàp neh pơyoa Kòn tus tam dunia, Kòn krung neh pơyoa bol khai tus tam dunia; 19 mơ bơh bol khai in, Kòn pơniăm-goh să tờm Kòn, làng bol khai krung geh pơniăm-goh tam bơta ngăn.
* 20 Ơ Bàp, kòn răc dăn ờ di mìng bơh bol do in lơm, mơya bơh bol cau in tai rơp pindờn dơ Kòn tài bơh jơnau đơs bol khai dê, 21 làng jơh ală cau gơs dùl, be Đi, ơ Bàp, tam Kòn mơ Kòn tam Đi, mơ làng bol khai gơs dùl tam Bol He: làng dunia pindờn lah Đi neh pơyoa Kòn. 22 Kòn neh pà bol khai in bơta gơklŏ mơ Đi neh pà Kòn in, làng bol khai gơs dùl be Bol He lah dùl; 23 Kòn tam bol khai mơ Đi tam Kòn, làng bol khai gơs dùl lơm: làng dunia in git lah, Đi neh pơyoa Kòn mơ Đi neh gơboh mơ bol khai, be Đi neh gơboh mơ Kòn.
* 24 Ơ Bàp, bơta Đi neh pà Kòn in, gen Kòn kờñ lah, Kòn ơm tềng lơi, bol khai krung ơm tềng hơ̆ bal mơ Kòn, làng bol khai sền gŏ bơta gơklŏ Kòn dê mơ Đi neh pà Kòn in, kơyoa Đi neh gơboh mơ Kòn lài mơ tŭ bơt-bơtào dunia.
25 Ơ Bàp song-dơpă, dunia neh ờ đal-git Đi; mơya Kòn neh đal-git Đi, mơ ală cau do krung neh đal-git Đi neh pơyoa Kòn. 26 Kòn neh lơh bol khai in git sơnđăn Đi, mơ Kòn rơp tơnggit tai, làng bơta gơboh, bơh gơ gen Đi neh gơboh mơ Kòn, ơm tam bol khai, mơ Kòn tam bol khai.”
