Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Tờm ño ngăn
15 * 1 Añ lah tờm ño ngăn, mơ Bàp Añ lah cau tăm. 2 Ntê lơi tam Añ ờ gơlik plai, gen Khai koh gơ; mơ ntê lơi gơlik plai, gen Khai jơkăo gơ, làng gơlik plai oă rơlau. 3 Bol kòn neh goh rau bơh jơnau Añ neh đơs mơ bol kòn. 4 Ơm wơl tĕ tam Añ mơ Añ tam bol kòn. Be ntê chi ño ờ rơgơi gơlik plai is gơ dê dilah ờ ơm wơl tam chi ño, bol kòn krung be hơ̆ sơl dilah ờ ơm wơl tam Añ. 5 Añ lah chi ño, bol kòn lah ntê. Cau lơi ơm tam Añ, mơ Añ tam khai, cau hơ̆ gơlik plai oă ngăn, kơyoa ờ geh Añ, bol kòn ờ rơgơi lơh chi lơi. 6 Dilah cau lơi ờ ơm wơl tam Añ, gen kong săng hơ bơdìh be ntê ño mơ gơ ro, mơ cau tơrgùm ală ntê gen mơ cơm tam ồs, mơ ồs sa. 7 Dilah bol kòn ơm wơl tam Añ, mơ ală jơnau đơs Añ dê ơm wơl tam bol kòn, gen bơta lơi bol mê kòn, dăn tĕ, mơ gơ gơs bol kòn in. 8 Tam bơta do, Bàp Añ geh tơngklŏ, lah bol kòn gơlik oă plai mơ gơjềng bol jăt-dờn Añ dê. * 9 Be Bàp neh gơboh mơ Añ, Añ neh gơboh mơ bol kòn; bol kòn ơm tĕ tam bơta gơboh Añ dê. 10 Dilah bol kòn prăp ală jơnau sồr Añ dê, gen bol kòn ơm tam bơta gơboh Añ dê, be Añ neh prăp ală jơnau sồr Bàp Añ dê, mơ Añ ơm tam bơta gơboh Khai dê. 11 Añ đơs ală jơnau do bol kòn in, làng bơta chờhờp Añ dê ơm tam bol kòn, mơ bơta chờhờp bol kòn geh bềng lìu.
12 Do lah jơnau sồr Añ dê, lah bol kòn tam gơboh bal be Añ neh gơboh mơ bol kòn; 13 ờ geh cau lơi geh bơta gơboh dờng rơlau mơ cau phi màng kis he dê bơh bơyô he. 14 Bol kòn lah bơyô Añ dê, dilah bol kòn lơh jơnau Añ sồr bol kòn. 15 Añ neh ờ hòi bol kòn lah cau duh-broă, bơh cau duh-broă ờ git bơta cau tờm khai dê lơh; mơya Añ neh hòi bol kòn lah cau bơyô, bơh jơh ală bơta Añ neh kơno bơh Bàp Añ, gen Añ neh ai bol kòn in git. 16 Ờ di bol kòn neh rơwah Añ, mơya Añ neh rơwah bol kòn mơ neh bơtào bol kòn, làng bol kòn lòt mơ gơlik plai, mơ plai bol kòn dê gơ găm, làng bơta lơi bol kòn dăn mơ Bàp bơh sơnđăn Añ, gen Khai rơp pà bol kòn in. 17 Añ sồr bol kòn ală bơta hơ̆ê làng bol kòn tam gơboh bal.
Bol jăt-dờn mơ dunia
* 18 Dilah dunia ềng mơ bol kòn, bol kòn git tĕ lah gơ neh ềng mơ Añ lài mơ bol kòn. 19 Dilah bol kòn gơrê mơ dunia, gen dunia neh gơboh mơ bơta lơi lah gơ dê; mơya tài bơh bol kòn ờ gơrê mơ dunia, mơ Añ neh rơwah bol kòn bơh dunia, tài bơh hơ̆, dunia ềng mơ bol kòn. 20 Bol kòn kah tĕ jơnau Añ neh đơs mơ bol kòn: Cau duh-broă ờ dờng rơlau mơ cau tờm khai dê. Dilah bol khai neh kup-kuăn Añ, bol khai krung rơp kup-kuăn bol kòn; dilah bol khai prăp jơnau Añ, bol khai krung rơp prăp jơnau bol kòn. 21 Mơya tài bơh sơnđăn Añ, bol khai rơp lơh bol kòn in jơh ală bơta hơ̆, bơh bol khai ờ git Bơtau neh pơyoa Añ. 22 Dilah Añ neh ờ tus mơ ờ đơs mơ bol khai, gen bol khai neh ờ geh tìs; mơya tŭ do, bol khai ờ rơgơi tò tìs he. 23 Cau lơi ềng mơ Añ, gen krung ềng mơ Bàp Añ. 24 Dilah Añ neh ờ lơh tam gùl bol khai ală broă mơ ờ geh cau lơi ndai neh lơh, gen bol khai neh ờ geh tìs; mơya tŭ do, bol khai neh gŏ mơ neh ềng mơ Añ, mơ Bàp Añ sơl. * 25 Mơya làng gơs wil-tơl jơnau neh geh cih tam gùng boh-lăm bol khai dê: ‘‘Bol khai neh ềng mơ Añ ờ kồ jơnau.”
26 Tŭ Bơtau Dong-Tò tus, Bơtau mơ Añ rơp pơyoa tus mơ bol kòn bơh dơ Bàp, Khai lah Nhơm bơta ngăn-ngồn lik bơh Bàp, Khai rơp lơh cơng gơrềng bơh Añ; 27 mơya bol kòn krung lơh cơng, tài bơh bol kòn ơm bal mơ Añ bơh sơnrờp.
