Jơnau Yalniam Joan-Pơnah 14

14* 1 Nùs bol kòn bañ ờ suk. Bol kòn pindờn dơ Yàng, gen bol kòn pindờn tĕ dơ Añ. 2 Tam hìu Bàp Añ geh rà anih ơm; dilah ờ be hơ̆, Añ neh đơs mơ bol kòn, bơh Añ lòt rơcăng anih bol kòn in. * 3 Dilah Añ lik-lòt rơcăng anih bol kòn in, gen Añ tus tai mơ rơp rò bol kòn tus mơ Añ, làng Añ ơm tềng lơi, gen bol kòn krung ơm tềng hơ̆. 4 Mơ Añ lòt tiah lơi, gen bol kòn neh git gùng.”

5 Toma đơs mơ Kơnràñ:  ‘‘Ơ Kơnràñ, bol kòn ờ git tiah lơi Đi lòt, mbe lơh bol kòn rơgơi git gùng ?” * 6 Kơnràñ Jesu đơs mơ khai: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” 7 Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai.” 8 Philippe đơs mơ Kơnràñ: ‘‘Ơ Kơnràñ, dăn sơnđio bol kòn in Bàp, mơ gơ tơl bol hi in.” 9 Kơnràñ Jesu đơs mơ khai: ‘‘Añ ơm bal mơ bol kòn kàr hơ̆ tơngai, mơ bol kòn neh ờ git Añ ơ, ơ Philippe ? Cau lơi neh gŏ Añ lah neh gŏ Bàp. Mbe gơlơh kòn đơs: ‘‘Dăn sơnđio bol kòn in Bàp” ? 10 Kòn ờ pindờn lah Añ ơm tam Bàp mơ Bàp ơm tam Añ ơ ? Ală jơnau Añ đơs mơ bol kòn, Añ ờ đơs bơh să tờm Añ; mơya Bàp ơm sùm tam Añ, Khai lơh ală broă Khai dê. 11 Bol kòn pindờn tĕ Añ: lah Añ ơm tam Bàp mơ Bàp ơm tam Añ; dilah ờ be hơ̆, bol kòn pindờn tĕ tài bơh ală broă hơ̆. 

* 12 Di ngăn, di ngăn, Añ đơs mơ bol kòn: Cau lơi pindờn dơ Añ, gen ală broă Añ lơh, khai krung rơp lơh, mơ khai rơp lơh ală broă dờng rơlau mơ ală bơta do tai, tài bơh Añ tus mơ Bàp. 13 Mơ bơta lơi bol kòn dăn bơh sơnđăn Añ, gen Añ rơp lơh bơta hơ̆, làng Bàp geh tơngklŏ tam Kòn; 14 dilah bơta lơi bol kòn dăn mơ Añ bơh sơnđăn Añ, gen Añ rơp lơh.

15 Dilah bol kòn gơboh mơ Añ, gen bol kòn rơp prăp ală jơnau sồr Añ dê; * 16 mơ Añ rơp dăn mơ Bàp, mơ Bàp rơp pà bol kòn in Bơtau Dong Tò ndai, làng Khai ơm sùm bal mơ bol mê jơl rài rài; 17 Khai lah Nhơm bơta ngăn-ngồn dê mơ dunia ờ rơgơi dờp, tài bơh dunia ờ gŏ mơ krung ờ git Khai. Bol kòn git Khai, tài bơh Khai ơm sùm dơ bol kòn; mơ Khai rơp ơm tam bol kòn. 18 Añ rơp ờ lời bol kòn ơm kòn đời; Añ tus mơ bol kòn. 19 Dŭt tai, dunia rơp ờ gŏ Añ, mơya bol kòn gŏ Añ, tài bơh Añ kis mơ bol kòn rơp kis. * 20 Tam ngai hơ̆ bol kòn rơp git lah Añ ơm tam Bàp Añ, mơ bol kòn tam Añ, mơ Añ tam bol kòn. 21 Cau lơi geh ală jơnau sồr Añ dê mơ prăp ală jơnau hơ̆, gen khai lah cau gơboh mơ Añ; mơ cau lơi gơboh mơ Añ, gen khai geh Bàp Añ gơboh, mơ Añ rơp gơboh mơ khai, mơ rơp sơnđio să tờm Añ khai in.”

22 Juda, ờ di lah Juda Iskariot, đơs mơ Kơnràñ: ‘‘Ơ Kơnràñ, ñchi gơlơh gơlik lah Đi rơp sơnđio să tờm Đi bol kòn in, mơ ờ dunia in taih ?” 23 Kơnràñ Jesu hơ wơl mơ đơs mơ khai: ‘‘Dilah cau lơi gơboh mơ Añ, gen rơp prăp jơnau Añ dê, mơ Bàp Añ rơp gơboh mơ khai, mơ Bol Añ rơp tus mơ khai, mơ Bol Añ rơp ơm tam khai;  24  cau lơi ờ gơboh mơ Añ , gen ờ prăp ală jơnau Añ  dê. Mơ jơnau bol kòn iăt, ờ di lah Añ  dê, mơya lah Bàp dê, Bơtau neh pơyoa Añ .

25 Ală jơnau hơ̆, Añ  neh đơs mơ bol kòn tam tŭ găm ơm mơ bol kòn. 26 Mơya Bơtau Dong-Tò, lah Yàng Nhơm mơ Bàp rơp pơyoa tus bơh sơnđăn Añ , Khai rơp bơto bol kòn jơh ală jơnau, mơ rơp tơngkah bol kòn in jơh ală jơnau Añ  neh đơs mơ bol kòn. 27 Añ lời bơta ring-lơngai bol kòn in, Añ pà bơta ring-lơngai Añ dê bol kòn in; Añ pà bol kòn in ờ di be dunia pà. Nùs bol kòn bañ ờ suk mơ bañ rơngòt. * 28 Bol kòn neh kơno lah, Añ  neh đơs mơ bol kòn: Añ  lik-lòt mơ Añ  tus wơl mơ bol kòn. Dilah bol kòn gơboh mơ Añ , gen bol kòn rơp chờhờp, bơh Añ  lik-lòt hơ Bàp, bơh Bàp dờng rơlau mơ Añ . 29 Tŭ do, Añ  neh đơs mơ bol kòn lài mơ tŭ bơta hơ̆ gơlik gơs, làng tŭ gơlik gơs, gen bol kòn pindờn. 30 Añ ờ đơs oă jơnau mơ bol kòn tai, kơyoa cau lăm-bồ dunia tus, mơ khai ờ geh chi lơi tam Añ, 31 mơya làng dunia git lah Añ gơboh mơ Bàp, mơ Añ lơh di be jơnau sồr Bàp neh ai Añ in. Đă tĕ, he lik-lòt bơh ndo.