Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
III. JIỜ KƠNRÀÑ JESU DÊ
LEH LÒT GĂN BELÀT-KÒN YÀNG DÊ
1. Bơta ñô-sa dơ̆ dut-ndơl Kơnràñ Jesu dê mơ bol jăt-dờn
Kơnràñ Jesu rào jơng bol jăt-dờn
13 * 1 Lài mơ leh Lòt Găn, Kơnràñ Jesu git lah jiờ Khai dê neh tus, Khai pal lòt găn bơh dunia do tus hơ Bàp; bơh neh gơboh mơ bol cau Khai dê găm ơm tam dunia, Khai gơboh mơ bol khai tus lồi-dut. 2 Tam tŭ sào mho, tŭ cà neh ơn tam nùs Juda, kòn Simon Iskariot, jơnau jào Khai; 3 mơ git lah Bàp neh pà jơh ală bơta tam tê Khai, mơ Khai neh lik bơh Yàng, mơ Khai lòt tus hơ Yàng, 4 gen tŭ găm sào, Khai đă-ntào, hồ ào, ai chèo kơt dơ but. * 5 Lồc gen, Khai tuh dà tam thù-bàk, sơntờm rào jơng bol jăt-dờn, mơ jùt mơ chèo kơt but. 6 Be hơ̆, Khai tus hơ Simon Petro. Simon Petro đơs mơ Khai: ‘‘Ơ Kơnràñ, Đi rào jơng kòn in ơ ?” 7 Kơnràñ Jesu hơ wơl mơ đơs mơ khai: ‘‘Bơta Añ lơh, tŭ do kòn ờ git, mơya hìngnau kòn rơp git.” 8 Petro đơs mơ Khai: ‘‘Ờ tŭ lơi Đi rơp rào jơng kòn in !” Kơnràñ Jesu hơ wơl mơ khai: ‘‘Dilah Añ ờ rào jơng kòn, kòn ờ geh bơnah bal mơ Añ .” 9 Simon Petro đơs mơ Khai: ‘‘Ơ Kơnràñ, ờ di mìng jơng kòn lơm, mơya jơh tê mơ bồ tai !” * 10 Kơnràñ Jesu đơs mơ khai: ‘‘Cau lơi neh um, gen ờ càng, mìng rào jơng lơm, bơh neh goh jơh; bol kòn neh goh, mơya ờ di jơh ală.” 11 Tài bơh Kơnràñ git cau lơi rơp jào Khai, tàng Khai đơs: ‘‘Ờ di jơh ală bol kòn goh.”
12 Be hơ̆, tơnơ̆ mơ tŭ rào jơng bol khai, Kơnràñ soh ào, ơm wơl dơ cơnờng sào, mơ đơs mơ bol khai: ‘‘Bol kòn git bơta Añ neh lơh bol kòn in ờ ? 13 Bol kòn hòi Añ : ‘‘Ơ Pôgru” mơ: ‘‘Ơ Kơnràñ”, mơ bol kòn đơs di ngăn; kơyoa Añ lah be hơ̆. 14 Be hơ̆, dilah Añ lah Kơnràñ mơ Pôgru, neh rào jơng bol kòn, gen bol kòn pal tam rào jơng bal. 15 Kơyoa Añ neh lơh krơh bol kòn in, làng bol kòn krung lơh be Añ neh lơh bol kòn in. 16 Di ngăn, di ngăn, Añ đơs mơ bol kòn: cau duh-broă ờ dờng rơlau mơ cau tờm khai dê, cau geh pơyoa tus krung ờ dờng rơlau mơ cau neh pơyoa khai tus. 17 Dilah bol kòn git ală jơnau hơ̆ mơ lơh jăt, gen bol kòn gơs bơtoah. * 18 Añ ờ đơs gơrềng bơh jơh ală bol kòn, Añ git ală cau Añ neh rơwah, mơya làng gơlik gơs wil-tơl jơnau tam Sră Goh: ‘‘Cau sa bañ Añ dê, neh yờ kơndờl jơng khai tamdră mơ Añ.” * 19 Añ đơs mơ bol kòn bơh tŭ do, lài mơ tŭ bơta hơ̆ gơlik gơs, làng tŭ bơta hơ̆ gơlik gơs, bol kòn pindờn lah Añ gơs. 20 Di ngăn, di ngăn, Añ đơs mơ bol kòn: Cau lơi wă-dờp cau mơ Añ pơyoa, lah wă-dờp Añ; mơ cau lơi wă-dờp Añ, lah wă-dờp Bơtau neh pơyoa Añ.”
Kơnràñ Jesu yal lài Juda rơp pơrlơ̆-dră
21 Tŭ Kơnràñ Jesu neh đơs ală jơnau hơ̆ rau, gen nùs-nhơm Khai ờ suk, Khai yal-tơlik mơ đơs: ‘‘Di ngăn, di ngăn, Añ đơs mơ bol kòn: Dùl nă tam bol kòn rơp jào Añ.” 22 Bol jăt-dờn sền bal ndring gơp, kơlôi ờ git Khai đơs gơrềng bơh cau lơi. 23 Geh dùl nă tam bol jăt-dờn găm ơm dơ cơnờng sào, bồ dơ nùs Kơnràñ Jesu dê, lah cau Kơnràñ Jesu gơboh. 24 Gen tàng, Simon Petro lơh tềl cau hơ̆ in làng khai lùp: ‘‘Cau mơ Kơnràñ đơs hơ̆ lah ñcau ?” 25 Be hơ̆, cau do sơrkềng să dơ ntơh Kơnràñ Jesu dê, đơs mơ Khai: ‘‘Ơ Kơnràñ, ñcau hơ̆ ?” 26 Kơnràñ Jesu hơ wơl: ‘‘Hơ̆ lah cau mơ Añ rơp iŭ pet bañ tong khai in.” Be hơ̆, Kơnràñ iŭ pet bañ, ai Juda kòn Simon Iskariot dê in. 27 Tŭ hơ̆, lồc ai pet bañ, Satan mut tam khai. Gen tàng, Kơnràñ Jesu đơs mơ khai: ‘‘Chi lơi kòn lơh, lơh tĕ mhar.” 28 Mơya ờ geh cau lơi tam bol ơm dơ cơnờng sào git-wă ñchi gơlơh Kơnràñ đơs mơ khai jơnau hơ̆; 29 kơyoa bơh Juda ăt kơldung priă, gen geh bol tồn lah Kơnràñ Jesu đơs mơ khai : ‘‘Blơi tĕ ală bơta bol he kờñ tam ngai leh”, ngŏlah pà chi lơi bol rơbah in. 30 Be hơ̆, lồc neh dờp pet bañ, Juda lik-lòt mơ; mơ neh măng trồ.
Ală jơnau đơs tơngăc
* 31 Be hơ̆, tŭ Juda neh lik-lòt, Kơnràñ Jesu đơs: ‘‘Tŭ do, Kòn kòn-bơnus geh tơngklŏ, mơ Yàng geh tơngklŏ tam Khai; 32 dilah Yàng geh tơngklŏ tam Khai, gen Yàng rơp tơngklŏ Khai tam să tờm Yàng, mơ Yàng rơp tơngklŏ Khai mơ. 33 Ơ oh kòn, Añ găm ơm bal mơ bol kòn dŭt tai; bol kòn rơp jòi Añ , mơ be Añ neh đơs mơ bol Jude: Tiah Añ lòt, bol kòn ờ rơgơi tus, tŭ do, Añ krung đơs mơ bol kòn. * 34 Añ ai bol kòn in jơnau sồr pa, lah bol kòn gơboh tĕ bal; be Añ neh gơboh mơ bol kòn, gen bol kòn krung gơboh tĕ bal. 35 Tam jơnau do, jơh ală cau git bol kòn lah bol jăt-dờn Añ dê: dilah bol kòn geh nùs gơboh bal.”
36 Simon Petro đơs mơ Kơnràñ: ‘‘Ơ Kơnràñ, ntềng Đi lòt ?” Kơnràñ Jesu hơ wơl: ‘‘Tiah Añ lòt, tŭ do kòn ờ rơgơi jăt Añ, mơya tơnơ̆ do kòn rơp jăt Añ.” 37 Petro đơs mơ Kơnràñ: ‘‘Ơ Kơnràñ, ñchi bơh tài tŭ do kòn ờ rơgơi jăt Đi ? Kòn rơp phi bơta kis kòn dê bơh Đi in.” 38 Kơnràñ Jesu hơ wơl: ‘‘Kòn rơp phi bơta kis kòn dê bơh Añ in ơ ? Di ngăn, di ngăn, Añ đơs mơ kòn: ‘‘Iar rơp ờ nrau, jơl tus tŭ kòn pơndăng-săng Añ pe dơ̆.
