Jơnau Yalniam Joan-Pơnah 12

Bong bơñà tam Betania

12 1 Prau ngai lài mơ leh Lòt Găn, Kơnràñ Jesu tus tam Bethania, tềng hơ̆ geh Lazaro, lah cau mơ Kơnràñ Jesu neh tơngkis wơl bơh bol cau chơt. 2 Tềng hơ̆, bol khai yờ sào mho Kơnràñ in, mơ Marta duh-broă, ai Lazaro lah dùl nă tam bol cau ơm dơ cơnờng sào bal mơ Kơnràñ. 3 Maria ai dùl gri bơñà bô bơlhu, găm dà tờm gơ dê, kas-màng, bong dơ jơng Kơnràñ Jesu mơ ai sŏ khai làng jùt jơng Kơnràñ; hìu bềng bô bơñà. 4 Juda Iskariot, dùl nă tam bol jăt-dờn Kơnràñ dê, lah cau rơp jào Kơnràñ, đơs: 5 ‘‘Ñchi gơlơh ờ tăc bơñà do pe rơhiăng đong priă mơ pà bol rơbah in taih ?” 6 Khai đơs jơnau hơ̆, ờ di tài bơh khai kơlôi gơrềng bơh bol rơbah, mơya tài bơh khai lah cau thừ-blơ̆, khai ăt kơldung priă, mơ ai ală chi lơi geh tơmut. 7 Gen tàng, Kơnràñ Jesu đơs: ‘‘Lời tĕ khăt cau ùr do, làng khai prăp gơ tus dơ ngai tơp Añ dê. 8 Kơyoa bol rơbah, bol mê sùm sùm geh bal mơ bol mê, ai Añ, bol mê ờ geh sùm.”

9 Mpồl gal cau Jude git lah Kơnràñ ơm tềng hơ̆, mơ bol khai tus ờ di mìng tài bơh Kơnràñ Jesu, mơya làng gŏ Lazaro tai, lah cau mơ Kơnràñ neh tơngkis wơl bơh bol cau chơt. 10 Bol ăt-bồ bol lơh-yàng dê kơlôi tus bơta gơsơt Lazaro tai, 11 kơyoa tài bơh khai, gal cau Jude neh lời bol khai mơ pindờn dơ Kơnràñ Jesu.

Kơnràñ Jesu mut tam Jerusalem mơ gơnăp-gơnoar Bơtau Messia dê

12 Ngai tơnơ̆, mpồl gal cau lòt leh, tŭ kơno lah Kơnràñ Jesu tus hơ Jerusalem, 13 gen ăt ală ntê nha rơsồi mơ lòt rò Kơnràñ mơ driau:

‘‘Hosanna ! Yalniăm Bơtau tus bơh sơnđăn Kơnràñ, yalniăm Bơtau Israel !”

14 Kơnràñ Jesu bàn gŏ dùl nơm alàng-kòn mơ nggui hơđăng gơ, be neh geh cih:

* 15 ‘‘Bañ ngòt, ơ kòn ùr Sion. Do Bơtau ai dê tus, nggui hơđăng alàng-kòn alàng-me dê.”

16 Sơnrờp, bol jăt-dờn Kơnràñ dê ờ git-wă ală jơnau hơ̆, mơya tŭ Kơnràñ Jesu geh tơngklŏ, tŭ hơ̆ bol khai kah wơl lah, ală jơnau hơ̆ neh geh cih gơrềng bơh Khai, mơ cau neh lơh ală bơta hơ̆ Khai in. 17 Be hơ̆, mpồl làng-bol lơh cơng, bol khai ơm bal mơ Kơnràñ tŭ Kơnràñ hòi Lazaro lik bơh bơtô bồc mơ tơngguh khai bơh bol cau chơt. 18 Tài bơh hơ̆, mpồl làng-bol lòt rò Kơnràñ, tài bơh bol khai neh kơno Kơnràñ neh lơh tềl hơ̆. 19 Gen tàng, bol Phariseo đơs ndring gơp: ‘‘Bol mê gŏ sơl, bol mê ờ lơh gơs chi lơi ? Ne, dunia neh lòt jăt Khai !”

Kơnràñ Jesu yal lài Khai rơp geh tơngklŏ bơh bơta chơt Khai dê

* 20 Tam bol cau guh làng duh-khoai tam ngai leh, geh bol cau Grek; 21 Be hơ̆, bol do tus mơ Philippe, cau Bethsaida Galilea, dăn khai mơ đơs: ‘‘Ơ ồng, bol añ kờñ tìp măt Kơnràñ Jesu.” 22 Philippe tus mơ đơs mơ Andrea; Andrea tus bal mơ Philippe mơ bol khai đơs mơ Kơnràñ Jesu. 23 Tŭ hơ̆, hơ wơl, Kơnràñ Jesu đơs mơ bol jăt-dờn lah: ‘‘Neh tus jiờ làng Kòn kòn-bơnus geh tơngklŏ. 24 Di ngăn, di ngăn, Añ đơs mơ bol kòn: Dilah gar kòi gơrung tam ù mơ ờ chơt, gen gơ ơm dùl nơm gơ dê; mơya dilah gơ chơt, gen gơlik oă gar. 25 Cau lơi gơboh mơ bơta kis he dê, gen rơp roh gơ; ai cau lơi ềng mơ bơta kis he dê, gen rơp prăp gơ jơl tus dơ bơta kis sùm. 26 Dilah cau lơi duh-broă Añ, gen jăt tĕ Añ, mơ Añ ơm tềng lơi, gen cau duh-broă Añ rơp ơm tềng hơ̆; dilah cau lơi duh-broă Añ, gen Bàp Añ rơp sền màng khai. * 27 Tŭ do, sồp-soàn Añ ờ suk. Ñchi Añ pal đơs ?  Ơ Bàp, dăn dong kòn klàs bơh jiờ do. Mơya tài bơh hơ̆ mơ Kòn neh tus jơl tus dơ jiờ do. 28 Ơ Bàp, dăn tơngklŏ tĕ sơnđăn Đi !” Tŭ hơ̆, geh săp bơh trồ tus: ‘‘Añ neh tơngklŏ mơ Añ rơp tơngklŏ tai.”

29 Mpồl làng-bol ntào tềng hơ̆, kơno gen đơs lah ntơr; bol ndai đơs: ‘‘Huềng-duh đơs mơ Khai.” 30 Kơnràñ Jesu hơ wơl mơ đơs: ‘‘Ờ di tài bơh Añ mơ geh săp do, mơya tài bơh bol mê. 31 Tŭ do gơs bơta cah-rơña dunia do, tŭ do cau ăt-bồ dunia do kong bơtrơh hơ bơdìh; * 32 mơ Añ, dilah Añ rơp geh tơngguh bơh tiah, Añ rơp hoài jơh ală cau tus mơ Añ.” 33 Kơnràñ đơs jơnau hơ̆ làng sơnđio Khai rơp chơt bơh bơta chơt lơi. 34 Gen tàng, mpồl làng-bol hơ wơl mơ Khai: ‘‘Bol hi neh kơno git bơh Gùng boh-lăm lah Kơnràñ Kristo găm gơs jơl rài rài; mbe gơlơh Đi đơs: ‘‘Kòn kòn-bơnus pal geh tơngguh” ? Kòn kòn-bơnus hơ̆ lah ñcau taih ?” 35 Be hơ̆, Kơnràñ Jesu đơs mơ bol khai: ‘‘Bơta àng găm ơm tam gùl bol mê dŭt tơngai tai. Bol mê cơnđoà lòt tĕ tam tŭ bol mê geh bơta àng, mbài bơta klăm-jơngo ăt-prăp bol mê; cau lơi cơnđoà lòt tam bơta klăm-jơngo, gen ờ git lòt tềng lơi. 36 Tam tŭ bol mê geh bơta àng, gen pindờn tĕ dơ bơta àng, làng gơs kòn bơta àng dê.” Kơnràñ Jesu đơs ală jơnau hơ̆ rau, gen Khai lik-lòt mơ pơndơp-să bơh dơ bol khai. 

Lồi-dut: bol Jude kơldăng nùs ờ bài pindờn

37 Kơnràñ neh lơh git nđờ tềl krơi dơđăp măt bol khai, mơya bol khai ờ pindờn dơ Kơnràñ, 38 làng gơlik gơs wil-tơl jơnau Isaia, cau ala-bơr, neh đơs:‘ ‘Ơ Kơnràñ, ñcau neh pindờn jơnau bol hi yal-bơto, mơ tơwờr tê Kơnràñ dê neh geh yal-tơlik ñcau in taih ?”

39 Bơh hơ̆, bol khai ờ rơgơi pindờn, tài bơh Isaia neh đơs tai: * 40 ‘‘Khai neh lơh jơngo măt bol khai, mơ neh lơh kơldăng nùs bol khai, làng bol khai ờ gŏ mơ măt, ờ wă mơ nùs mơ rê wơl, mơ Añ rơp tơmbời bol khai.”

41 Isaia neh đơs ală jơnau hơ̆, tài bơh khai neh gŏ bơta gơklŏ Kơnràñ dê mơ neh đơs gơrềng bơh Khai. 42 Bulah be hơ̆, tam bol lăm-bồ krung geh gal cau neh pindờn dơ Kơnràñ, mơya tài bơh bol Phariseo, bol khai ờ yal-tơlik, mbài kong bơtrơh bơh hìu-pơrjum; 43 kơyoa bol khai gơboh mơ bơta gơklŏ kòn-bơnus dê rơlau mơ bơta gơklŏ Yàng dê.

 * 44 Kơnràñ Jesu nggà mơ đơs: ‘‘Cau lơi pindờn dơ Añ, ờ di lah pindờn dơ Añ, mơya dơ Bơtau neh pơyoa Añ; 45 mơ cau lơi gŏ Añ, gen gŏ Bơtau neh pơyoa Añ. 46 Añ lah bơta àng neh tus tam dunia, pơyoa Añ. 46 Añ lah bơta àng neh tus tam dunia, làng jơh cau lơi pindờn dơ Añ, gen ờ ơm wơl tam bơta klăm-jơngo. 47 Mơ dilah cau lơi iăt ală jơnau đơs Añ dê mơ ờ prăp, gen Añ ờ cah-rơña cau hơ̆; kơyoa Añ neh ờ tus làng cah-rơña dunia, mơya làng tơngklàs dunia. 48 Cau lơi săng Añ mơ ờ dờp ală jơnau đơs Añ dê, gen geh cau cah-rơña khai: jơnau mơ Añ neh đơs, jơnau hơ̆ rơp cah-rơña khai tam ngai lồi-dut. 49 tài bơh Añ neh ờ đơs bơh să tờm Añ, mơya Bàp, lah Bơtau neh pơyoa Añ, tờm Khai neh ai Añ in jơnau sồr lah Añ pal đơs chi lơi mơ pal yal chi lơi. 50 Mơ Añ git lah jơnau sồr Khai dê lah bơta kis rài rài. Gen tàng, ală jơnau Añ yal, gen Añ yal di be Bàp neh đơs mơ Añ.”