Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
I. JƠNAU LĂM-MUT
1 * 1 Bơh sơnrờp neh geh Jơnau Đơs, mơ Jơnau Đơs ơm dơ Yàng, mơ Jơnau Đơs lah Yàng.
2 Khai neh geh bơh sơnrờp dơ Yàng.
3 Jơh ală bơta bơh Khai mơ neh geh lơh gơs, mơ ờ geh Khai gen ờ chi lơi neh geh lơh gơs, geh lơh gơs; * tam Khai geh bơta kis, mơ bơta kis lah bơta àng kòn-bơnus dê,
5 mơ bơta àng pơnđàng tam bơta jơngo, mơ bơta jơngo ờ wă-dờp bơta àng.
6 Geh dùl nă cau Yàng pơyoa tus, sơnđăn lah Joan;
7 khai neh tus gơs cơng, làng lơh cơng gơrềng bơh bơta àng, làng jơh ală cau bơh khai mơ pindờn.
8 Khai ờ di lah bơta àng, mơya làng lơh cơng gơrềng bơh bơta àng.
* 9 Hơ̆ lah bơta àng ngăn, tus tam dunia pơnđàng tơl nă cau in.
10 Bơta àng neh ơm tam dunia, mơ dunia bơh Khai mơ neh geh lơh gơs, mơ dunia neh ờ git Khai.
11 Khai neh tus tam hìu Khai dê, mơ ală cau Khai dê neh ờ wă-rò Khai.
* 12 Ai bol cau lơi neh dờp Khai, gen Khai pà bol khai in gơnoar gơs kòn Yàng dê, hơ̆ lah bol cau pindờn dơ sơnđăn Khai dê, 13 bol hơ̆ deh ờ di bơh mhàm, krung ờ di bơh nùs-kờñ poăc-să dê, krung ờ di bơh nùs-kờñ cau klau dê, mơya bơh Yàng.
* 14 Jơnau Đơs neh gơs poăc-să mơ neh ơm tam gùl bol he; mơ bol hi neh gŏ bơta gơklŏ Khai dê, bơta gơklŏ be Kòn Dùl dê bơh dơ Bàp, bềng bơta hàng-goh mơ bơta ngăn-ngồn.
15 Joan lơh cơng gơrềng bơh Khai mơ nggà đơs: ‘‘Do lah Bơtau mơ Añ neh đơs: Cau rơp tus tơnơ̆ Añ , lèt rơlau mơ Añ , tài bơh neh geh lài mơ Añ .”
16 Bơh bơta bềng lìu Khai dê, jơh ală bol he neh dờp bơta hàng-goh do tus bơta hàng-goh ne;
17 tài bơh Gùng boh-lăm neh geh pà bơh Moise, ai bơta hàng-goh mơ bơta ngăn-ngồn geh lơh gơs bơh Kơnràñ Jesu Kristo. *
18 Yàng, ờ tŭ lơi cau lơi neh gŏ; Kòn Dùl lah Yàng, lah Bơtau ơm tam nùs Bàp, tờm Khai neh yal-tơnggit.
II. BROĂ-LƠH KƠNRÀÑ JESU DÊ
1. Yal-pơnrơ jơnau pa
A. Poh sơntờm Jơnau lơh cơng Joan dê
* 19 Do lah cơng Joan dê, tŭ bol Jude bơh Jerusalem sồr bol lơh-yàng mơ bol Levi tus mơ khai làng lùp khai: ‘‘Mê lah ñcau ?” 20 Khai yal-tơlik mơ ờ pơndăng; khai yal-tơlik: ‘‘Añ ờ di lah Bơtau Kristo.” 21 Bol khai lùp khai: ‘‘Be hơ̆ gen lah ñchi taih ? Mê lah Elia ơ ?” Khai đơs: ‘‘Ờ di.” ‘‘Mê lah cau ala-bơr ơ ?” Khai hơ: ‘‘Ờ.” 22 Gen bol khai đơs mơ khai: ‘‘Mê lah ñcau ? Làng bol hi hơ wơl mơ bol cau neh pơyoa bol hi tus. Ñchi mê đơs gơrềng bơh să tờm mê ?” * 23 Khai đơs:‘ ‘Añ lah săp hòi-nggà tam blàng bràs:‘‘Bơsong tĕ gùng Kơnràñ dê”, be Isaia, cau ala-bơr, neh đơs.” 24 Tam ală cau geh pơyoa tus geh bol bơh mpồl Phariseo; 25 bol khai lùp khai mơ đơs mơ khai: ‘‘Be hơ̆, ñchi gơlơh mê lơh bơta pơnđum, dilah mê ờ di lah Kơnràñ Kristo, krung ờ di lah Elia, krung ờ di lah cau ala-bơr ?” 26 Joan hơ wơl mơ bol khai mơ đơs: ‘‘Añ lơh bơta pơnđum tam dà; mơya geh Bơtau ntào tam gùl bol mê mơ bol mê ờ git, 27 Bơtau rơp tus tơnơ̆ Añ , mơ Añ ờ di-pal làng hồ che khŏ Khai dê.” 28 Ală bơta hơ̆ neh gơlik gơs tam Bethania, đah ne Jordano, tềng hơ̆ Joan lơh bơta pơnđum.
* 29 Ngai tơnơ̆, Joan gŏ Kơnràñ Jesu tus hơ khai, gen đơs: ‘‘Do Belàt-kòn Yàng dê, Bơtau tơnroh tìs dunia. 30 Do lah Bơtau, gơrềng bơh Khai Añ neh đơs: Geh cau tus tơnơ̆ Añ , lèt rơlau mơ Añ , tài bơh neh geh lài mơ Añ . 31 Añ neh ờ git Khai, mơya làng Khai geh sơnđio-tơlik Israel in, tàng Añ tus lơh bơta pơnđum tam dà.” 32 Joan lơh cơng mơ đơs: ‘‘Añ neh gŏ Huềng Nhơm mù bơh trồ be ntờp mơ ơm wơl hơđăng Khai; * 33 Añ neh ờ git Khai, mơya tờm Bơtau neh pơyoa Añ tus lơh bơta pơnđum tam dà, đơs mơ Añ : ‘‘Mê gŏ Huềng Nhơm mù hơđăng cau lơi mơ ơm wơl hơđăng khai, gen hơ̆ lah Bơtau lơh bơta pơnđum tam Yàng Nhơm.” 34 Añ neh gŏ mơ Añ lơh cơng hơ̆ lah Kòn Yàng dê.”
Bol jăt-dờn sơnrờp
35 Ngai tơnơ̆ tai, Joan ntào bal mơ bàr nă tam bol jăt-dờn khai dê, 36 gŏ Kơnràñ Jesu lòt găn, gen đơs: ‘‘Do Belàt-kòn Yàng dê.” 37 Bàr nă cau jăt-dờn kơno khai đơs, gen lòt jăt Kơnràñ Jesu. 38 Kơnràñ Jesu wơlke, gŏ bol khai lòt jăt he, gen đơs mơ bol khai: ‘‘Ñchi bol mê jòi taih ?” Bol khai đơs mơ KơnrAñ : ‘‘Rabbi – gơ cih-tơlik lah ơ Pôgru – ntềng Đi ơm ?” 39 Kơnràñ đơs mơ bol khai: ‘‘Tus tĕ mơ rơp gŏ.” Gen bol khai neh tus mơ gŏ tiah Kơnràñ ơm, mơ ơm wơl mơ Kơnràñ ngai hơ̆; tŭ hơ̆ pơgăp jiờ dơ̆ jơt.
40 Andrea, oh Simon Petro dê, lah dùl tam bàr nă neh kơno Joan đơs mơ lòt jăt Kơnràñ. 41 Lài jơh, khai tìp bi khai lah Simon mơ đơs mơ bi: ‘‘Bol hi neh tìp Bơtau Messia” – gơ cih-tơlik lah Bơtau Kristo –; 42 khai lăm bi tus mơ Kơnràñ Jesu. Kơnràñ Jesu sền Simon mơ đơs: ‘‘Mê lah Simon, kòn Joan; mê rơp geh hòi lah Kepha” – gơ cih-tơlik lah Petro –
43 Ngai tơnơ̆, Kơnràñ kờñ lik-lòt hơ Galilea mơ Khai neh tìp Philippe. Kơnràñ Jesu đơs mơ khai: ‘‘Jăt tĕ Añ .” 44 Philippe lah cau Bethsaida, bòn dờng Andrea mơ Petro dê. 45 Philippe tìp Nathanael mơ đơs mơ khai: ‘‘Bơtau mơ Moise tam Gùng boh-lăm mơ bol Ala-bơr neh cih, bol hi neh tìp, hơ̆ lah Jesu, kòn Joseph, cau Nazareth.” 46 Nathanael đơs mơ khai: ‘‘Bơh Nazareth, rơgơi geh chi lơi niăm ơ ?” Philippe đơs mơ khai: ‘‘Tus tĕ mơ sền.” 47 Kơnràñ Jesu gŏ Nathanael tus hơ Kơnràñ, gen đơs gơrềng bơh khai: ‘‘Do ngăn lah cau Israel, tam khai ờ geh bơta blăc-pơrlồm.” 48 Nathanael đơs mơ Kơnràñ: ‘‘Mbơh Đi git Añ .” Kơnràñ Jesu hơ wơl mơ đơs mơ khai: ‘‘Lài mơ tŭ Philippe hòi mê, tŭ mê ơm hơđơm chi bal, Añ neh gŏ mê.” * 49 Nathanael hơ wơl mơ Kơnràñ: ‘‘Rabbi, Đi lah Kòn Yàng dê, Đi lah Bơtau Israel dê !” 50 Kơnràñ Jesu hơ wơl mơ đơs mơ khai: ‘‘Tài bơh Añ neh đơs mơ mê: Añ neh gŏ mê hơđơm chi bal, tàng mê pindờn ơ ? Mê rơp gŏ ală bơta dờng rơlau mơ ală bơta do tai.” * 51 Kơnràñ đơs mơ khai: ‘‘Di ngăn, di ngăn, Añ đơs mơ bol mê: Bol mê rơp gŏ trồ gơpờ mơ ală huềng-duh Yàng dê guh mơ mù hơđăng Kòn kòn-bơnus.”
