Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
4. Leh Sàl-ing
Kơnràñ Jesu guh hơ Jerusalem lơh leh mơ bơto
7 1 Tơnơ̆ hơ̆, Kơnràñ Jesu lòt-rê tam Galilea; kơyoa Khai ờ kờñ lòt-rê tam Judea, tài bơh bol Jude jòi gơsơt Khai.
2 Leh Sàl-ing bol Jude dê neh mờr tus. * 3 Be hơ̆, oh mi Kơnràñ dê đơs mơ Khai: ‘‘Đi lời tĕ tiah do mơ lòt tĕ tam Judea, làng bol jăt-dờn Đi dê krung gŏ ală broă Đi lơh. 4 Kơyoa ờ geh cau lơi lơh chi lơi tam bơta ndơp mơ cau hơ̆ jòi gơs loh-làng. Dilah Đi lơh ală bơta hơ̆, gen sơnđio tĕ să tờm Đi dunia in.” 5 Tài bơh oh mi Kơnràñ dê krung ờ pindờn dơ Khai. 6 Be hơ̆, Kơnràñ Jesu đơs mơ bol khai: ‘‘Jiờ Añ dê ờ hềt tus, mơya jiờ bol mê dê gơ geh sùm. 7 Dunia ờ rơgơi ềng-gơjrAñ mơ bol mê; mơya gơ ềng-gơjrAñ mơ Añ , tài bơh Añ lơh cơng gơrềng bơh gơ, lah ală broă gơ dê iơh-rơmơh. * 8 Bol mê guh tĕ lơh leh; Añ ờ guh lơh leh do, tài bơh jiờ Añ dê ờ hềt sir-tơl.” 9 Lồc đơs ală jơnau hơ̆, Khai ơm wơl tam Galilea.
10 Mơya tŭ oh mi Khai neh guh hơ leh, gen tŭ hơ̆ tờm Khai krung guh sơl, ờ tơlik-măt mơya be ndơp. 11 Be hơ̆, bol Jude jòi Khai tam ngai leh mơ đơs: ‘‘Ntềng Khai ơm taih ?” 12 Tam mpồl làng-bol geh jơnau kơmrào oă ngăn gơrềng bơh Khai. Bol bà đơs: ‘‘Khai lah cau niăm !”; bol bà tai đơs: ‘‘Ờ di, Khai bơchồ mpồl làng-bol !” 13 Mơya ờ geh cau lơi đơs loh-làng gơrềng bơh Khai, tài bơh rơngòt bol Jude.
14 Tŭ leh neh nggùl rau, Kơnràñ Jesu guh tam hìu duh-khoai mơ bơto. 15 Be hơ̆, bol Jude ai lơh krơi mơ đơs: ‘‘Mbe ồng do ờ bơsrăm mơ git sră taih ?” 16 Kơnràñ Jesu hơ wơl mơ bol khai mơ đơs: ‘‘Jơnau bơto Añ dê ờ di lah Añ dê, mơya lah Bơtau dê neh pơyoa Añ . 17 Dilah cau lơi kờñ lơh jăt nùs-kờñ Khai dê, gen cau hơ̆ rơp git jơnau bơto hơ̆ lah bơh Yàng, ngŏlah Añ đơs bơh să tờm Añ . 18 Cau lơi bơh să tờm mơ đơs, gen jòi bơta gơklŏ is; ai cau lơi jòi bơta gơklŏ Bơtau neh pơyoa khai dê, gen lah cau ngăn-ngồn, mơ tam cau hơ̆ ờ geh bơta ờ song-dơpă. 19 Moise neh ờ ai bol mê in gùng boh-lăm ơ ? Mơ ờ geh cau lơi tam bol mê prăp gùng boh-lăm. Ñchi gơlơh bol mê jòi gơsơt Añ taih ? 20 Mpồl làng-bol hơ wơl: ‘‘Mê kong cà lơh ! Ñcau jòi gơsơt mê taih ?” 21 Kơnràñ Jesu hơ wơl mơ đơs mơ bol khai: ‘‘Añ neh lơh dùl broă, mơ jơh ală bol mê ai lơh krơi. 22 Moise neh ai bol mê in bơta siăt gơltau – bơta hơ̆ ờ tus bơh Moise, mơya bơh bol ồng-pàng – mơ bol mê siăt gơltau cau in tam ngai sabbat. 23 Dilah cau dờp bơta siăt gơltau tam ngai sabbat làng ờ gơtup dơ gùng boh-lăm Moise dê, gen ñchi gơlơh bol mê gơjrAñ mơ Añ tài bơh Añ neh tơmbời jơh să-jăn dùl nă tam ngai sabbat taih ? 24 Bol mê bañ cah-rơña jăt đah bơdìh, mơya cah-rơña tĕ jăt bơta song-ring.”
Làng-bol tam pơndăng mbơh tus Kơnràñ Kristo ?
25 Be hơ̆, geh bol cau ơm tam Jerusalem đơs: ‘‘Cau do ờ di lah cau bol khai jòi gơsơt ơ ? 26 Mơ do, Khai đơs loh-làng, mơ bol khai ờ đơs chi lơi mơ Khai. Bol lăm bồ neh git ngăn cau do lah Bơtau Kristo ơ ? 27 Mơya cau do, bol hi git Khai mbơh lơi, ai Bơtau Kristo, tŭ Khai tus, gen ờ geh cau lơi git Khai mbơh lơi.”
28 Be hơ̆, tŭ bơto tam hìu duh-khoai, Kơnràñ Jesu đơs dờng lah: ‘‘Bol mê git Añ , mơ bol mê git Añ mbơh lơi. Añ ờ tus bơh să tờm Añ , mơya Bơtau neh pơyoa Añ lah Bơtau ngăn-ngồn, mơ bol mê ờ git. 29 Añ git Khai, tài bơh Añ tus bơh Khai, mơ tờm Khai neh pơyoa Añ .” 30 Be hơ̆, bol khai jòi kup Kơnràñ, mơya ờ geh cau lơi tup tê dơ Khai, tài bơh jiờ Khai dê ờ hềt tus.
Kơnràñ Jesu yal lài Khai mờr lik-lòt
31 Tam mpồl làng-bol, geh gal cau neh pindờn dơ Khai, mơ bol khai đơs: ‘‘Tŭ Kơnràñ Kristo tus, Khai rơp lơh rà tềl krơi rơlau mơ ală bơta cau do neh lơh sơl ơ ?” 32 Bol Phariseo kơno mpồl làng-bol kơmrào ală bơta hơ̆ gơrềng bơh Khai, gen bol lơh-yàng dờng mơ bol Phariseo pơyoa bol dong-broă lòt kup Khai. 33 Be hơ̆, Kơnràñ Jesu đơs: ‘‘Añ găm ơm bal mơ bol mê dŭt tơngai tai, mơ Añ lòt tus hơ Bơtau neh pơyoa Añ . * 34 Bol mê rơp jòi Añ mơ ờ bàn; mơ tiah Añ ơm, bol mê ờ rơgơi tus.” 35 Be hơ̆, bol Jude đơs ndring gơp: ‘‘Ntềng cau do rơp lòt mơ bol he ờ bàn Khai taih ? Khai rơp lòt hơ bol nrah-nring tam bol Grek mơ bơto bol Grek ơ ? 36 Ñchi lah jơnau Khai neh đơs: ‘‘Bol mê rơp jòi Añ mơ ờ bàn” mơ: ‘‘Tiah Añ ơm, bol mê ờ rơgơi tus” ?”
Jơnau hơ pà dà kis
37 Tam ngai dut-ndơl, lah ngai dờng leh dê, Kơnràñ Jesu ntào mơ hòi lah: ‘‘Dilah cau lơi tơhìr, gen tus tĕ hơ Añ mơ hùc. * 38 Cau lơi pindờn dơ Añ , gen be Sră Goh neh đơs, ală đhòng dà kis rơp gơhòr bơh nùs khai.” 39 Kơnràñ đơs jơnau hơ̆ gơrềng bơh Huềng Nhơm, mơ bol pindờn dơ Khai rơp dờp. Kơyoa ờ hềt geh Huềng Nhơm, tài bơh Kơnràñ Jesu ờ hềt geh tơngklŏ.
Làng-bol tam pơndăng tai mbơh tus Kơnràñ Kristo ?
40 Be hơ̆, tam mpồl làng-bol, geh bol tŭ kơno ală jơnau hơ̆, gen đơs: ‘‘Cau do ngăn lah cau ala-bơr !”; * 41 bol ndai đơs: ‘‘Cau do lah Kristo !”; mơya geh bol đơs: ‘‘Kristo tus bơh Galilea ơ ? 42 Sră Goh neh ờ đơs: ‘‘Kristo tus bơh jơi-nòi Davit mơ bơh bòn Bethlehem, tềng hơ̆ Davit ơm ơ ?”‘‘ 43 Gen tàng, gơlik gơs bơta tamcah tam mpồl làng-bol tài bơh Kơnràñ.
44 Geh bol tam bol khai kờñ kup Kơnràñ, mơya ờ geh cau lơi tup tê hơđăng Khai. 45 Be hơ̆, bol dong-broă tus hơ bol lơh-yàng dờng mơ bol Phariseo, mơ bol hơ̆ đơs mơ bol khai: ‘‘Ñchi gơlơh bol mê ờ cèng Khai ?” 46 Bol dong-broă hơ wơl: ‘‘Ờ tŭ lơi geh cau đơs be hơ̆.” 47 Be hơ̆, bol Phariseo hơ wơl mơ bol khai: ‘‘Bol mê krung kong bơchồ sơl ơ ? 48 Geh cau lơi tam bol lăm-bồ ngŏlah tam bol Phariseo neh pindờn dơ Khai sơl ơ ? 49 Mơya mpồl làng-bol do ờ git gùng boh-lăm, bol kong srat-rơma !” 50 Nikodemo, dùl nă tam bol khai, lah cau neh tus mơ Kơnràñ lài-òr, đơs mơ bol khai: 51 ‘‘Gùng boh-lăm he dê geh cah-rơđa cau, dilah ờ iăt bơh khai lài, mơ ờ git chi lơi khai lơh sơl ơ ?” 52 Bol khai hơ wơl mơ đơs mơ khai: ‘‘Mê krung lah cau Galilea sơl ơ ? Sơwì tĕ mơ gŏ lah cau ala-bơr ờ ñă-ntào bơh Galilea !” * 53 Mơ kờp nă rê wơl tam hìu he dê.
