Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bơta liklìng mơ ală sơnăm kơnòm Kơnràñ Jêsu dê
Jơi-nòi Kơnràñ Jesu Kristo dê
1 * 1 Sră jơi-nòi Kơnràñ Jesu Kristo, kòn Davit, kòn Abraham.
2 Abraham deh Isaak, Isaak deh Jakop, Jakop deh Juda mơ ală oh mi khai dê, 3 Juda deh Phares mơ Zara bơh Thamar, Phares deh Esrom, Esrom deh Aram, 4 Aram deh Aminadap, Aminadap deh Naasson, Naasson deh Salmon, 5 Salmon deh Booz bơh Rahap, Booz deh Obet bơh Ruth, Obet deh Jesse, 6 Jesse deh bơtau Davit.
Davit deh Salomon bơh bao ùr Uria dê, 7 Salomom deh Roboam, Roboam deh Abia, Abia deh Asa, 8 Asa deh Josaphat, Josaphat deh Joram, Joram deh Ozia, 9 Ozia deh Joatham, Joatham deh Akaz, Akaz deh Ezekia, 10 Ezekia deh Manasse, Manasse deh Amon, Amon deh Josia, 11 Josia deh Jekonia mơ ală oh mi khai dê tŭ kong cèng ơm tam Babylon.
12 Tơnơ̆ mơ tŭ kong cèng ơm tam Babylon, Jekonia deh Salathiel, Salathiel deh Zorobabel,
13 Zorobabel deh Abiut, Abiut deh Eliakim, Eliakim deh Azor, 14 Azor deh Sadok, Sadok deh Akim, Akim deh Eliut, 15 Eliut deh Eleazar, Eleazar deh Matthan, Matthan deh Jakop, * 16 Jakop deh Joseph, bao klau Maria dê; bơh Maria, Kơnràñ Jesu, hòi lah Kristo, neh deh-dùh.
17 Be hơ̆, jơh ală rài, bơh Abraham tus Davit lah jơt poan rài; bơh Davit tus tŭ kong cèng ơm tam Babylon lah jơt poan rài; mơ bơh tŭ kong cèng ơm tam Babylon tus Kơnràñ Kristo lah jơt poan rài.
Huềng-duh yal Joseph in
* 18 Kơnràñ Jesu Kristo deh-dùh be do:
Maria, mè Khai, neh hơ bao mơ Joseph; lài mơ tŭ bol khai ơm bal, gen gơlik gơs lah Maria neh bun bơh Yàng Nhơm.
19 Joseph, bao klau khai dê, bơh lah cau song-dơpă mơ ờ kờñ yal-yă khai, gen kờñ lời ờm khai. 20 Khai găm kơlôi jơnau hơ̆, gen do huềng-duh Kơnràñ dê neh tơnggŏ măt mơ khai tam mpao mơ đơs: ‘‘Ơ Joseph, kòn Davit dê, bañ ngòt dờp Maria bao mê. Bơh kòn khai neh bun lah bơh Yàng Nhơm; * 21 khai rơp deh kòn klau, mơ mê rơp hòi sơnđăn Khai lah Jesu: bơh tờm Khai rơp tơngklàs làng-bol Khai bơh ală jơnau tìs bol khai dê.”
* 22 Jơh jơnau do neh gơlik gơs, làng gơlik di ngăn jơnau Kơnràñ neh ngui cau ala-bơr mơ đơs: * 23 ‘‘Do, ùr tơmo rơp bun mơ deh kòn klau, mơ cau rơp hòi sơnđăn Khai lah Emmanuel”, gơ cih-tơlik lah Yàng ơm bal mơ bol he.
24 Kah-rơngal, Joseph neh lơh jăt be huềng-duh Kơnràñ dê neh sồr khai, mơ khai rò bao khai dê; * 25 mơya ờ git broă ơm bal jơl tus tŭ bao ùr deh kòn klau, mơ Joseph hòi sơnđăn Khai lah Jesu.
