Jơnau Yal Niam Kơnràñ Jesu đơs: ‘‘Añ lah gùng, bơta ngăn mơ bơta kis; ờ geh cau lơi tus mơ Bàp, dilah ờ găn Añ.” Dilah bol kòn neh git Añ, gen bol kòn krung rơp git Bàp Añ; mơ bơh tŭ do, bol kòn git Khai mơ neh gŏ Khai” (Jo 14, 6-7).
Bol Jăk-chài tus duh-khoai oh-nga Jesu
2 1 Tŭ neh deh rau Kơnràñ Jesu tam Bethlehem, lơgar Judea, tam rài bơtau Herode, gen do bol Jăk-chài, bơh đah măt tơngai lik, tus tam Jerusalem 2 mơ đơs: ‘‘Ntềng đah Bơtau bol Jude pa deh ơm ? Bơh bol hi neh gŏ sơrmañ Khai dê đah măt tơngai lik, mơ bol hi tus duh-khoai Khai.” 3 Kơno be hơ̆, bơtau Herode ờ suk ơm, mơ jơh Jerusalem bal mơ khai; 4 khai tơrgùm jơh ală cau ăt-bồ bol lơh-yàng dê mơ ală cau gơnoar-cih làng-bol dê, lùp bol khai làng git ntềng đah deh Kơnràñ Kristo. 5 Bol khai đơs mơ khai: ‘‘Tam Bethlehem, lơgar Judea. Bơh neh geh cau ala-bơr cih be do:
* 6 ‘‘Mơ mê, ơ Bethlehem, tiah Juda, ngăn mê ờ di dêt rơlau jơh tăm ală bòn dờng Juda dê; kơyoa bơh dơ mê rơp lik cau lăm-bồ làng-bol Israel Añ dê.”‘‘
7 Tŭ hơ̆, Herode hòi ờm bol Jăk-chài, lùp nền bol khai làng git tŭ lơi sơrmañ neh lik bol khai in; 8 mơ pơyoa bol khai tus tam Bethlehem mơ đơs: ‘‘Bol mê lòt tĕ lùp nền gơrềng bơh oh-nga; mơ tŭ bol mê neh bàn rau, gen yal wơl tĕ añ in, làng añ krung tus duh-khoai khai.”
9 Kơno bơtau đơs be hơ̆, bol khai lik-lòt. Mơ do sơrmañ bol khai neh gŏ đah măt tơngai lik, lòt lài mơ bol khai, jơl tus tŭ gơ tus ơm hơđăng anih oh-nga ơm. 10 Gŏ sơrmañ, bol khai chờhờp-chờchờr oă ngăn. * 11 Mut tam hìu, bol khai gŏ oh-nga bal mơ Maria mè Khai, bol khai kun să duh-khoai Khai; mơ pờ ală kiăt bol khai dê, bol khai pơdơng Khai in ală phan, lah màh-biàng, cài trŭ mơ kơlhô. 12 Mơ geh tờs mpao bañ wơl tai mơ Herode, gen bol khai neh jăt gùng ndai rê wơl hơ lơgar bol khai dê.
Kơnràñ Jesu dô hơ Ejypto, mơ ală oh dêt kong gơsơt
13 Tŭ bol khai neh rê rau, gen do huềng-duh Kơnràñ dê tơnggŏ măt mơ Joseph tam mpao mơ đơs: ‘‘Guh tĕ cèng oh-nga mơ mè Khai dô hơ Ejypto, mơ ơm tềng hơ̆ jơl tus tŭ Añ yal wơl mê in; tài bơh Herode rơp jòi oh-nga làng gơsơt Khai.”
14 Guh bic, Joseph cèng oh-nga mơ mè Khai tam tŭ trồ măng dô hơ Ejypto, * 15 mơ ơm tềng hơ̆ jơl tus tŭ Herode chơt, làng gơlik di ngăn jơnau Kơnràñ neh ngui cau ala-bơr mơ đơs: ‘‘Añ neh hòi kòn Añ lik bơh Ejypto.”
16 Tŭ hơ̆, Herode gŏ bol Jăk-chài neh pơrlồm khai, gen khai gơhào-gơjrañ ngăn mơ sồr gơsơt jơh ală oh dêt tam Bethlehem mơ làm kơnhoàl gùt dar, bơh bàr sơnăm hơđơm, jăt be tơngai khai neh lùp nền bol Jăk-chài. 17 Tŭ hơ̆ neh gơlik di ngăn jơnau Jeremia, cau ala-bơr, đơs:
* 18 ‘‘Tam Rama, cau kơno săp ñìm-răc ñìm-ròc nggồr-nggàc: Rakel ñìm-răc ñìm-ròc bol kòn khai dê, mơ ờ bài cau pơndờm-pơnđiăng, tài bơh bol khai ờ găm tai.”
Bơh Ejypto rê hơ ù Israel
19 Herode chơt rau, gen do huềng-duh Kơnràñ dê tơnggŏ măt tam mpao mơ Joseph tam Ejypto 20 mơ đơs: ‘‘Guh tĕ cèng oh-nga mơ mè Khai rê hơ ù Israel, tài bơh bol cau jòi bơta kis oh-nga neh chơt rau.” 21 Guh bic, Joseph cèng oh-nga mơ mè Khai rê hơ ù Israel. 22 Mơya kơno Arkelao ăt-bồ lơgar Judea ala bàp khai lah Herode, gen Joseph ngòt ờ khin rê hơ gen; mơ geh tờs mpao, khai rê hơ kơnhoàl Galilea, * 23 mơ tus ơm tam bòn dờng hòi lah Nazareth, làng gơlik di ngăn jơnau bol ala-bơr neh đơs: ‘‘Khai rơp geh hòi lah cau Nazareth.”
