Bàr nă ŏh mi lòt sơn pàm lời geh ka

Bàr nă ŏh mi khai lòt sơn pàm tam dà rơbòng sre. Bàr nă bol khai ăt bàr nơm pàm, tus tơ gen bol khai sơn. Cau mi sơn pàm tam dà. Cau ŏh khai sơn pàm tôđăng, be gen ờ gŏ geh dà. Cau mi khai lùp: ñchi gơlơh mê sơn pàm tôđăng? Mbe tàng geh ka bơh tôđăng ờ geh dà.

Bè drim hìng, jơh bàr nă lòt còp bơh măng. Cau mi geh ka rà ngăn. Cau ŏh khai rê gời, ờ gŏ lŭi geh ka nơm lơi. Tus tam hìu cau ŏh gen sa piang mơ bŏh. Mi khai jà sa bal ka, cau ŏh khai ờ gŏ bài, ngòt bàssìl, kơyoa khai ờ sơn pàm tam dà. Pah drim pah drim, bol khai lòt còp pàm. Cau mi lơh geh ka sùm, cau ŏh rê gời sùm sùm, ờ gŏ geh dùl nơm ka dèât. Trơnơ̆, cau ŏh lòt ai pàm, brê tơm bòn tờm, kơyoa ờ gŏ lŭi geh ka. Mờr tus dơ brê khai sơn pàm gen, khai geh jơh ală sềmrăc, iar brê, kơnđà, gơrơt, klàng kò, ntờp gen jơh ală sềm ndai. Tam tŭ geh jơh ală sềm, khai jòi che kơt, lơh rơseh gen àñ. Apbelah bàr pe cơnđòa, khai rê tơ bòn tờm, sềm răc lam par tam trồ khai ngòt ngăn, khai ñìm sùm ñìm sùm. Tam tŭ cau ŏh gŏ mi khai, khai kơlôi ngăn ya. Gen tŭ mi khai rê hơ bòn yal me bàp in: cau ŏh neh sềm prơ dô hơ trồ. Tŭ me bàp git be gen, bol khai ñìm mơ kơlôi sùm, tus phàm ngai, kơyoa kòn bol khai rŏh, git chơt git kis, khai neh dùh tam brê lơi bol khai ờ gŏ git.

Tus dơ ngai, mơ trồ mờr măng rau, mbe mơ sềm răc trơdùh khai tam brê dà lềng, bòn Prum. Bol sềm răc sơrbì jơh che khai kơt mơ trơdùh khai tam brê ngài ngăn. Geh dùl nă ŏh dèât tam brê dà lềng, khai jơglŏh ngăn, khai lòt rềp tam bòn Prum kờñ dăn piang sa. Cau Prum ai khai in piang sa, cau ròng khai tus dơ hìng-nau. Ngai pah ngai cau Prum sồr khai lòt ê rơpu tam brê ngài ngăn. Dùl ngai ne khai klo cau nggà dơ hìu Klàm tèâ gah dà lềng, tam hìu Klàm gen dùl nă cau geh ơn làng klàng in sa, dùl kơnnhai dùl nă, dùl kơnnhai dùl nă. Tam tŭ khai tus dơ hìu Klàm gen, cau ŏh gŏ rà ngăn cau ñô sa, lơh leh lời cau klàng sa gen in. Dùl nă cau ùr gŏ khai, sồr khai tơnchơt klàng gen mơ đào. Khai hơ wơl: añ dềt ngăn, mbe tàng añ tơnchơt klàng? Jơh ală cau krung ờ jai tơnchơt gơ. Añ cau dèât mbe jai pràn, kơyoa klàng dờng ngăn. Me bàp, kồñ wa tam gen sồr sùm khai tơnchơt klàng. Khai đơs: añ kờñ tơnchơt ya klàng. Khai đơs jơl hìng-nau dilah yàng sơnđàc añ gen añ jai tơnchơt klàng gen, di yàng ờ sơnđàc hơ̆ ơm đau he. Tam tŭ cau ŏh wĕ rơpu rê tam hìu, khai dăn mơ cau Prum ơm gời dùl ngai, làng tiar đào làng tam lơh mơ klàng. Cau Prum ai khai in be hơ̆. Khai tiar dùl nơm đào jòng làs mơ niăm bơnĕ ngăn. Cau Prum krung sồr khai tiar đào bol khai in mơ khai ờ bài.

Tam tŭ di ngai klàng lòt sa cau, cau ŏh lòt ơm tam hìu Klàm. Tam pŏh phàm jiờ drim, bàr nơm klàng tus làng sa cau tam hìu gen. Bol gơ lòt sùm pah kơnhai pah kơnhai. Tamtŭ rau bol klàng rơ̆p lài tam gơlô dà lềng kờñ rào mbùng tŭ sa cau. Bơh hơ̆, bol gơ lòt sa cau ùr neh cau ơn. Khai rơmê gơ bơdìh, bơh khai ngòt ngăn. Cau ŏh ơm kơp dơ bơr-mpồng hìu. Tus klàng, gơ hòi cau ùr tuh bơdìh làng sa. Cau ùr ờ gŏ bài. Khai lah klàng in: di lah kờñ sa añ, ồng mut tam hìu do. Klàng gen lah: ñchi gơlơh ai jàñ, kơldăng ngăn ờ bài tuh bơdìh? Be mơ, lài klàng ùr mut, cau dềt gen kŏh ngko bàr gơl. Klàng klau gŏ be gen, gơ gơjrañ mơ lah cau ùr gen in: ai pràn kơldăng be mơ, ŏh dềøt gen sreh tai klàng tê ngko bàr gơl. Bàr nơm klàng chơt, gơhòr mhàm tam dà lềng rà ngăn. Behơ̆, jơh cau tam bòn nrơt jơh, kơyoa mhàm gơhòr rà ngăn tam gen. Jơh cau di git, kơyoa gen, ngai klàng sa cau. Jơh bol cau di lòt ngài.

Tus tam hìu klàm gen, bol khai gŏ cau geh ơn klàng in sa găm kis, mơ bol khai gŏ klàng neh chơt rau. Bol khai nrơt ngăn. Jơh bol khai ờ gŏ git ñcau lơi tơnchơt klàng. Bol khai gŏ ŏh dềt sreh klàng. Bol khai wèr jơhsa, ờ yal cau ndai in. Tam tŭ tus me bàp geh kòn làng ơn klàng sa in, bol khai chờ ngăn bơh bol khai gŏ klàng neh chơt. Bol khai lùp: ñcau sreh klàng? Jơh ală cau đơs: cau do lah añ, cau ne lah añ. Jơh cau lah be hơ̆ lơm. Me bàp cau ùr gen ờ git dờn cau lơi. Bol khai lời cau ơm lòâc gen lùp: kơyoa jơh ală ŏh mi lah: cau do lah añ, cau ne lah añ. Tŭ hơ̆, bol khi di lơh be do: di lah cau lơi tơnchơt klàng do, di yờ lă sơrbì tam dà lềng. Cau lơi sreh gen jai sơrbì gơ tam dà lềng, gen cau lơi ờ sreh ờ tus yờ gơ sơrbì tam dà lềng. Ală cau đơs : lời hi lơh be hơ̆. Be mơ, lài dùl nă yờ klàng lời sơrbì mơ ờ gŏ jai, ai cau ndai tai krung ờ ya sơl. Bàr pe rơhiăng nă cau yờ klàng gen krung ờ be jai sơl. Nõchi mong lơh! kòl sùm! Cau lơi mơ tơnchơt klàng do? Me bàp cau ùr kơlôi kòl sùm. Bol khai lah : căk cau dèât ờs grăp rơpu pah ngai pah ngai ờ be git tơnchơt klàng do? hòi lă khai lời lùp. Me bàp lùp: mê ơ tơnchơt klàng do? Khai hơ: să añ dêt ngăn, ñchi chài añ tơnchơt klàng, bol gơdờng ngăn añ ờ gŏ jai ờ. Me bàp gen lùp sùm ŏh dèât mơ đơs : lòng mê yờ klàng di mê sreh mê jai sơrbì gơ tam gùl dà lềng. Behơ̆, ŏh dêt gen ai đào, lồc gen yờ klàng. Khai ai đào lòâc gen khai yờ bàr nơm klàng ờ gŏ kơnjơ̆. Bơh tê hơ̆, tơl cau git khai lah cau tơnchơt klàng. Me bàp, bol khai ai kòn ùr khi ŏh dềt in bau, kơyoa ŏh dềt tơngklàs kòn bol khai. Jơh ală cau ndai bơwah ŏh dềt gen. Bol khi kờñ tơnchơt khai, khai ngòt sùm. Tam tŭ cau jơh rê tam bòn tờm. Oh dềt lòt rềp tê rơbàng kờñ trơdùh jơh cau tam dà lềng. Tam tŭ cau jơh tus tê rơbàng, khai tơlơ̆ rơbàng, tơl cau chơt dùh tam dà lềng. Lồi dŭt, khai ơm lơngai lơngŏ tam hìu bau khai.